ತೃಣಮೂಲ ಕಾಂಗ್ರೆಸ್‌ನ ಬಂಡಾಯ ಬಣದ ಮುಖ್ಯಸ್ಥ ರಿತಬ್ರತ ಬ್ಯಾನರ್ಜಿ ಅವರನ್ನು ಪಶ್ಚಿಮ ಬಂಗಾಳದ ವಿಧಾನಸಭೆಯ ವಿರೋಧ ಪಕ್ಷದ ನಾಯಕರನ್ನಾಗಿ ನೇಮಕ ಮಾಡುವಲ್ಲಿ ಸ್ಪೀಕರ್ ರತೀಂದ್ರ ಬೋಸ್ ತೋರಿರುವ “ತರಾತುರಿ”ಯನ್ನು ಕಲ್ಕತ್ತಾ ಹೈಕೋರ್ಟ್‌ನ ನ್ಯಾಯಮೂರ್ತಿ ಶಂಪಾ ಸರ್ಕಾರ್ ಮಂಗಳವಾರ ತೀವ್ರವಾಗಿ ಪ್ರಶ್ನಿಸಿದ್ದಾರೆ. ಯಾವ ಬಣ “ನಿಜವಾದ” ತೃಣಮೂಲ ಕಾಂಗ್ರೆಸ್ ಎಂಬುದನ್ನು ಚುನಾವಣಾ ಆಯೋಗವು ಇನ್ನೂ ನಿರ್ಧರಿಸದೇ ಇರುವಾಗ ಸ್ಪೀಕರ್ ಈ ನಿರ್ಧಾರ ಕೈಗೊಂಡಿರುವುದಕ್ಕೆ ಕೋರ್ಟ್ ಆಕ್ಷೇಪ ವ್ಯಕ್ತಪಡಿಸಿದೆ.
ಮಾಜಿ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರ ಆಪ್ತ ಹಾಗೂ ಅವರು ವಿಪಕ್ಷ ನಾಯಕನ ಸ್ಥಾನಕ್ಕೆ ಆಯ್ಕೆ ಮಾಡಿದ್ದ ಶೋಭಂದೇಬ್ ಚಟ್ಟೋಪಾಧ್ಯಾಯ ಜೂನ್ ತಿಂಗಳಲ್ಲಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯನ್ನು ನ್ಯಾಯಮೂರ್ತಿ ಸರ್ಕಾರ್ ನಡೆಸುತ್ತಿದ್ದರು.
ರಿತಬ್ರತ ಅವರನ್ನು ನೇಮಕ ಮಾಡಿದ ಸ್ಪೀಕರ್ ಬೋಸ್ ಅವರ ನಿರ್ಧಾರದ ಬಗ್ಗೆ ಪ್ರಶ್ನಿಸಿದ ನ್ಯಾಯಮೂರ್ತಿ ಸರ್ಕಾರ್, “ಈ ವಿಷಯಕ್ಕೆ ಸಂಬಂಧಿಸಿದ ಮತ್ತೊಂದು ಪ್ರಕರಣ ಈಗಾಗಲೇ ಸುಪ್ರೀಂ ಕೋರ್ಟ್‌ನಲ್ಲಿ ಬಾಕಿ ಇರುವಾಗ… ಮತ್ತು ಈ ಬಣಗಳ ಅಧಿಕೃತತೆಯನ್ನು ಚುನಾವಣಾ ಆಯೋಗವೇ ನಿರ್ಧರಿಸಬೇಕಾಗಿರುವಾಗ, ವಿಧಾನಸಭೆಯ ಸ್ಪೀಕರ್ ಈ ನಿರ್ಧಾರ ತೆಗೆದುಕೊಳ್ಳಲು ಅಷ್ಟೊಂದು ತರಾತುರಿ ಏಕಿತ್ತು?” ಎಂದು ಕೇಳಿದರು.
ದೆಹಲಿಯಲ್ಲಿ ಪಕ್ಷಾಂತರ ನಿರೋಧಕ ಕಾಯ್ದೆಯಡಿ ವಿಚಾರಣೆಗಳು ನಡೆಯುತ್ತಿರುವಾಗ, ಸ್ಪೀಕರ್ ಏಕಪಕ್ಷೀಯವಾಗಿ ತೆಗೆದುಕೊಂಡಿರುವ ಈ ನಿರ್ಧಾರವು ಅಪ್ರಜಾಪ್ರಭುತ್ವ ಮತ್ತು ಕಾನೂನುಬಾಹಿರ ಎಂದು ಮಮತಾ ಆಪ್ತರು ಮೊದಲಿನಿಂದಲೂ ವಾದಿಸುತ್ತಿದ್ದಾರೆ.
“ಯಾವ ಪಕ್ಷ ನಿಜವಾದ ಪಕ್ಷ ಎಂಬುದನ್ನು ಚುನಾವಣಾ ಆಯೋಗವೇ ತೀರ್ಮಾನಿಸಬೇಕಿರುವಾಗ, ಸ್ಪೀಕರ್ ಅವರೇ ಯಾವುದು ನಿಜವಾದ ವಿರೋಧ ಪಕ್ಷ ಮತ್ತು ಅದರ ನಾಯಕ ಯಾರು ಎಂದು ಘೋಷಿಸಲು ಹೇಗೆ ಸಾಧ್ಯ?” ಎಂದು ನ್ಯಾಯಾಧೀಶರು ಪ್ರಶ್ನಿಸಿದರು.
ಯಾವುದು ನಿಜವಾದ ಅಸಲಿ ತೃಣಮೂಲ ಎಂಬುದನ್ನು ಚುನಾವಣಾ ಆಯೋಗ (ನಿರ್ವಾಚನ್ ಸದನ್) ಪ್ರಸ್ತುತ ಪರಿಶೀಲಿಸುತ್ತಿದೆ. ತೃಣಮೂಲದ 28 ಲೋಕಸಭಾ ಸಂಸದರ ಪೈಕಿ 20 ಸಂಸದರು ‘ನ್ಯಾಷನಲಿಸ್ಟ್ ಸಿಟಿಜನ್ಸ್ ಪಾರ್ಟಿ ಆಫ್ ಇಂಡಿಯಾ’ ಜೊತೆ ವಿಲೀನಗೊಂಡಿರುವುದು ಮತ್ತು ತೃಣಮೂಲದ 13 ರಾಜ್ಯಸಭಾ ಸದಸ್ಯರ ಪೈಕಿ ಮೂವರು ರಾಜೀನಾಮೆ ನೀಡಿ ಬಿಜೆಪಿಯಿಂದ ಉಪಚುನಾವಣೆಗೆ ಸ್ಪರ್ಧಿಸುತ್ತಿರುವುದು—ಇದಕ್ಕಿಂತ ಈ ವಿಷಯ ಭಿನ್ನವಾಗಿದೆ.
ಚಟ್ಟೋಪಾಧ್ಯಾಯ ಅವರ ಪರವಾಗಿ ವಾದ ಮಂಡಿಸಿದ ಹಿರಿಯ ವಕೀಲ ಹಾಗೂ ತೃಣಮೂಲ ಸಂಸದ ಕಲ್ಯಾಣ್ ಬ್ಯಾನರ್ಜಿ, ಸ್ಪೀಕರ್ ಬೋಸ್ ಅವರು ತಮ್ಮ ಅಧಿಕಾರ ವ್ಯಾಪ್ತಿಯನ್ನು ಮೀರಿ ಕೆಲಸ ಮಾಡಿದ್ದಾರೆ ಮತ್ತು ಚುನಾವಣಾ ಆಯೋಗವು ಈ ವಿಷಯ ಇತ್ಯರ್ಥಪಡಿಸುವವರೆಗೆ ನೇಮಕಾತಿಯನ್ನು ತಡೆಹಿಡಿಯಬೇಕಾಗಿತ್ತು ಎಂದು ವಾದಿಸಿದರು.
ರಿತಬ್ರತ ಪರ ವಕೀಲ ಜಯದೀಪ್ ಕರ್ ಮತ್ತು ಸರ್ಕಾರದ ಪರ ಹೆಚ್ಚುವರಿ ಅಡ್ವೊಕೇಟ್ ಜನರಲ್ ಬಿಲ್ವದಲ್ ಭಟ್ಟಾಚಾರ್ಯ ಅವರು, ಇದನ್ನು ಸ್ಪೀಕರ್ ಬೋಸ್ ಅವರ ‘ತಾತ್ಕಾಲಿಕ ಕ್ರಮ’ (Interim measure) ಎಂದು ಒಪ್ಪಿಕೊಳ್ಳುವಂತೆ ಕೋರ್ಟ್‌ಗೆ ಮನವಿ ಮಾಡಿದರು.
ಆದರೆ, ಈ ವಾದವನ್ನು ತಿರಸ್ಕರಿಸಿದ ನ್ಯಾಯಾಧೀಶರು, “ಯಾವುದೇ ಒಂದು ಕಾನೂನುಬಾಹಿರ ಕ್ರಮವನ್ನು ತಾತ್ಕಾಲಿಕ ವ್ಯವಸ್ಥೆ ಎಂದು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಚುನಾವಣಾ ಆಯೋಗದ ನಿರ್ಧಾರ ಬರುವ ಮುನ್ನವೇ, ಪಕ್ಷವು ಎರಡು ಗುಂಪುಗಳಾಗಿ ಸೀಳಾಗಿರುವಾಗ ಸ್ಪೀಕರ್ ಇದನ್ನು ಹೇಗೆ ಮಾಡಿದರು? ಎಂಬುದೇ ನನ್ನ ಪ್ರಶ್ನೆ” ಎಂದು ಹೇಳಿ, ಪ್ರಕರಣದ ಮುಂದಿನ ವಿಚಾರಣೆಯನ್ನು ಬುಧವಾರ ಮಧ್ಯಾಹ್ನ 3 ಗಂಟೆಗೆ ನಿಗದಿಪಡಿಸಿದರು.
ಅಭಿಷೇಕ್ ಬ್ಯಾನರ್ಜಿ ವಿರುದ್ಧ ಕಲ್ಯಾಣ್ ಕಿಡಿ: ಬಳಿಕ ಮಂಗಳವಾರ ಮಾತನಾಡಿದ ತೃಣಮೂಲ ಸಂಸದ ಕಲ್ಯಾಣ್ ಬ್ಯಾನರ್ಜಿ, ಮಮತಾ ಬ್ಯಾನರ್ಜಿ ಅವರ ಸೋದರಳಿಯ ಮತ್ತು ಸಂಸದ ಅಭಿಷೇಕ್ ಬ್ಯಾನರ್ಜಿ ಹಾಗೂ ಅವರು ಏಳು ವರ್ಷಗಳಿಂದ ತೃಣಮೂಲದ ಚುನಾವಣಾ ತಂತ್ರಗಾರಿಕೆಗಾಗಿ ತಂದಿದ್ದ ‘ಐ-ಪ್ಯಾಕ್’ (I-PAC) ಸಂಸ್ಥೆಯ ವಿರುದ್ಧ ಮತ್ತೊಮ್ಮೆ ವಾಗ್ದಾಳಿ ನಡೆಸಿದರು.
“ಕ್ಯಾಮಕ್ ಸ್ಟ್ರೀಟ್ (ಅಭಿಷೇಕ್ ಅವರ ಕಚೇರಿ) ನಮ್ಮನ್ನು ನಾಶಪಡಿಸಿತು” ಎಂದು ಆಕ್ರೋಶ ಹೊರಹಾಕಿದ ಅವರು, ರಿತಬ್ರತ ಸೇರಿದಂತೆ ಸದ್ಯ ಬಂಡಾಯವೆದ್ದಿರುವ ಬಹುತೇಕ ಪ್ರಮುಖ ನಾಯಕರನ್ನು ಪಕ್ಷಕ್ಕೆ ಕರೆತಂದಿದ್ದೇ ಅಥವಾ ಅವರಿಗೆ ಉನ್ನತ ಸ್ಥಾನ ನೀಡಿದ್ದೇ ಅಭಿಷೇಕ್ ಬ್ಯಾನರ್ಜಿ ಎಂದು ದೂರಿದರು. “ನಾನು ಈ ಹಿಂದೆ ಐ-ಪ್ಯಾಕ್ ಸಂಸ್ಥೆಯನ್ನು ಟೀಕಿಸಿದಾಗ ಯಾರೂ ನನ್ನ ಪರವಾಗಿ ನಿಲ್ಲಲಿಲ್ಲ. ಈಗ ಐ-ಪ್ಯಾಕ್ ಮತ್ತು ಅಭಿಷೇಕ್ ಅವರಿಂದ ಎಲ್ಲಾ ಸೌಲಭ್ಯಗಳನ್ನು ಪಡೆದುಕೊಂಡ ನಾಯಕರುಗಳೇ ಇಂದು ಅವರ ವಿರುದ್ಧ ಮಾತನಾಡುತ್ತಿದ್ದಾರೆ” ಎಂದು ಬೇಸರ ವ್ಯಕ್ತಪಡಿಸಿದರು.
