ರಾಂಚಿ: ಜಾರ್ಖಂಡ್ನ ಗುಮ್ಲಾ ಜಿಲ್ಲೆಯ ಘಾಗ್ರಾ ಪೊಲೀಸ್ ಠಾಣಾ ವ್ಯಾಪ್ತಿಯ ಪಾಲ್ಮಾ ಗ್ರಾಮದಲ್ಲಿ ನಾಗರಿಕ ಸಮಾಜವೇ ತಲೆ ತಗ್ಗಿಸುವಂತಹ ವಿಕೃತ ಘಟನೆಯೊಂದು ಬೆಳಕಿಗೆ ಬಂದಿದೆ. ಮೂರು ವರ್ಷದ ಮಗುವಿನ ಮೇಲೆ ನಡೆದ ಭೀಕರ ಅತ್ಯಾಚಾರ ಪ್ರಕರಣವನ್ನು ಮುಚ್ಚಿಹಾಕಲು ಯತ್ನಿಸಿದ ಗ್ರಾಮ ಪಂಚಾಯಿತಿಯೊಂದು, ಆರೋಪಿಗೆ ಕೇವಲ 1ಲಕ್ಷ ರೂ, ದಂಡ ವಿಧಿಸಿ, ಆ ಹಣದಲ್ಲೇ ಮಾಂಸ ಮತ್ತು ಮದ್ಯದ ಪಾರ್ಟಿ ನಡೆಸಿ ಸಂಭ್ರಮಿಸಿದ ಅಮಾನವೀಯ ಘಟನೆ ನಡೆದಿದೆ.
ಘಟನೆಯ ವಿವರಗಳ ಪ್ರಕಾರ, ಶನಿವಾರ ಸಂಜೆ ಸುನಿಲ್ ಲೋಹರಾ ಎಂಬ ಪಾತಕಿ ಸಂತ್ರಸ್ತ ಬಾಲಕಿಯ ಮನೆಗೆ ತೆರಳಿದ್ದ. ಆ ಸಮಯದಲ್ಲಿ ಬಾಲಕಿಯ ತಾಯಿ ಮನೆಯ ದೈನಂದಿನ ಕೆಲಸಗಳಲ್ಲಿ ನಿರತರಾಗಿದ್ದರು. ಮಗುವನ್ನು ಆಟವಾಡಿಸುವುದಾಗಿ ನಂಬಿಸಿ ತಾಯಿಯಿಂದ ಕರೆದೊಯ್ದ ಆರೋಪಿ, ಪಕ್ಕದ ಕೊಠಡಿಯಲ್ಲಿ ಕಂದಮ್ಮನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ. ಮಗುವಿನ ಗಂಭೀರ ಸ್ಥಿತಿ ಹಾಗೂ ಅಸಹನೀಯ ಅಳಲನ್ನು ಕೇಳಿ ಧಾವಿಸಿ ಬಂದ ತಾಯಿ, ತಕ್ಷಣವೇ ಮಗುವನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿದ್ದಾರೆ.
ಆದರೆ, ಈ ಭೀಕರ ಅಪರಾಧಕ್ಕೆ ಕಾನೂನಿನಡಿ ಸೂಕ್ತ ಶಿಕ್ಷೆ ಕೊಡಿಸುವ ಬದಲು, ಗ್ರಾಮದ ಪ್ರಭಾವಿ ಮುಖಂಡರು ಪ್ರಕರಣವನ್ನು ಪೋಲಿಸರ ವರೆಗೆ ತಲುಪದಂತೆ ತಡೆಯಲು ಯತ್ನಿಸಿದ್ದಾರೆ. ಭಾನುವಾರ ಕಂಗಾರೂ ಕೋರ್ಟ್ ಮಾದರಿಯಲ್ಲಿ ಪಂಚಾಯಿತಿ ಸಭೆ ಕರೆದ ಗ್ರಾಮಸ್ಥರು, ಆರೋಪಿಗೆ 1ಲಕ್ಷ ರೂಪಾಯಿ ದಂಡ ವಿಧಿಸಿ, ವಿಷಯವನ್ನು ಸ್ಥಳೀಯವಾಗಿಯೇ ಇತ್ಯರ್ಥಪಡಿಸಲು ಮುಂದಾಗಿದ್ದಾರೆ.
ಅತ್ಯಂತ ಅಸಹ್ಯಕರ ಸಂಗತಿಯೆಂದರೆ, ಆರೋಪಿ ಸುನಿಲ್ ಲೋಹರಾ ಮುಂಗಡವಾಗಿ ಪಾವತಿಸಿದ 20,000 ರೂಪಾಯಿ ದಂಡದ ಹಣದಲ್ಲಿ ಪಂಚಾಯಿತಿ ಸದಸ್ಯರು ಮತ್ತು ಗ್ರಾಮಸ್ಥರು ಮಾಂಸ ಹಾಗೂ ಮದ್ಯದ ಪಾರ್ಟಿ ಆಯೋಜಿಸಿ ಸಂಭ್ರಮಿಸಿದ್ದಾರೆ! ಉಳಿದ 80,000 ರೂಪಾಯಿಗಳನ್ನು ವಾರದೊಳಗೆ ಪಾವತಿಸುವಂತೆ ಆರೋಪಿಗೆ ಗಡುವು ನೀಡಲಾಗಿತ್ತು.
ಗ್ರಾಮಸ್ಥರ ಒತ್ತಡದಿಂದಾಗಿ ಸಂತ್ರಸ್ತೆಯ ಕುಟುಂಬ ಪೋಲಿಸರಿಗೆ ದೂರು ನೀಡಲು ಸಾಧ್ಯವಾಗಿರಲಿಲ್ಲ. ಆದರೆ, ಗ್ರಾಮದಲ್ಲಿ ನಡೆಯುತ್ತಿದ್ದ ಈ ಅಮಾನವೀಯ ಕೃತ್ಯದ ಕುರಿತು ರಹಸ್ಯ ಮಾಹಿತಿಯೊಂದು ಘಾಗ್ರಾ ಪೊಲೀಸರಿಗೆ ತಲುಪಿದೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಪೊಲೀಸರು ಭಾನುವಾರ ಗ್ರಾಮಕ್ಕೆ ಧಾವಿಸಿದಾಗ, ದಂಡದ ಹಣದಲ್ಲೇ ಮದ್ಯದ ಪಾರ್ಟಿ ಭರದಿಂದ ಸಾಗಿರುವುದನ್ನು ಗಮನಿಸಿ ಕೇಸ್ ದಾಖಲಿಸಿಕೊಂಡಿದ್ದಾರೆ.
ಘಾಗ್ರಾ ಪೊಲೀಸ್ ಠಾಣಾ ಉಸ್ತುವಾರಿ ಮೋಹನ್ ಕುಮಾರ್ ನೇತೃತ್ವದ ತಂಡವು ಸ್ಥಳದಲ್ಲೇ ಆರೋಪಿ ಸುನಿಲ್ ಲೋಹರಾನನ್ನು ಬಂಧಿಸಿದೆ. ಸಂತ್ರಸ್ತ ಮಗುವಿನ ತಾಯಿಯಿಂದ ಅಧಿಕೃತ ಹೇಳಿಕೆ ದಾಖಲಿಸಿಕೊಂಡಿರುವ ಪೊಲೀಸರು, ಪೋಕ್ಸೊ (POCSO) ಕಾಯ್ದೆ ಹಾಗೂ ಭಾರತೀಯ ನ್ಯಾಯ ಸಂಹಿತೆಯಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಇನ್ನು ಘಟನೆ ಕುರಿತು ಪ್ರತಿಕ್ರಿಯಿಸಿರುವ ಅರಂಗಿ ಪಂಚಾಯತಿ ಮುಖ್ಯಸ್ಥ ಲೋಡೋ ಎಕ್ಕಾ, ಪಾಲ್ಮಾ ಗ್ರಾಮದಲ್ಲಿ ನಡೆದ ಈ ಕಾನೂನುಬಾಹಿರ ಸಭೆಯ ಬಗ್ಗೆ ತಮಗೆ ಯಾವುದೇ ಮಾಹಿತಿ ಇರಲಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಘೋರ ಅಪರಾಧವನ್ನು ಮುಚ್ಚಿಹಾಕಲು ಯತ್ನಿಸಿದ ಪಂಚಾಯಿತಿ ಸದಸ್ಯರ ವಿರುದ್ಧವೂ ಕಾನೂನು ಕ್ರಮ ಜರುಗಿಸಲು ಪೊಲೀಸರು ಮುಂದಾಗಿದ್ದಾರೆ.
