ಶಿವಶಂಕರಪ್ಪ ಸಾಹುಕಾರ್ ಅವರ ಈ ಇಡೀ ಕಥನವು ಕರ್ನಾಟಕದ ಕಾರ್ಯಾಂಗ ಮತ್ತು ರಾಜಕೀಯ ವ್ಯವಸ್ಥೆಯಲ್ಲಿ ಭ್ರಷ್ಟಾಚಾರ ಎಷ್ಟು ಆಳವಾಗಿ ಬೇರೂರಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಬಿಜೆಪಿ ಸರ್ಕಾರವು ನಿಯಮಗಳನ್ನು ಗಾಳಿಗೆ ತೂರಿ, ಒಬ್ಬ ಕನಿಷ್ಠ ಅರ್ಹತೆಯೂ ಇಲ್ಲದ ವ್ಯಕ್ತಿಯನ್ನು ಕೆಪಿಎಸ್ಸಿಯಂತಹ ಪವಿತ್ರ ಸಂವಿಧಾನಾತ್ಮಕ ಸಂಸ್ಥೆಯ ಅಧ್ಯಕ್ಷ ಸ್ಥಾನದಲ್ಲಿ ಕೂರಿಸಿದರೆ, ನಂತರ ಬಂದ ಕಾಂಗ್ರೆಸ್ ಸರ್ಕಾರವು ಆತನ ಭ್ರಷ್ಟಾಚಾರವನ್ನು ಪ್ರಶ್ನಿಸಿದ ದಕ್ಷ ಐಎಎಸ್ ಅಧಿಕಾರಿಗಳಾದ ವಿಕಾಸ್ ಸುರಾಳ್ಕರ್ ಮತ್ತು ಲತಾ ಕುಮಾರಿ ಅವರನ್ನು ಅಮಾನವೀಯವಾಗಿ ಎತ್ತಂಗಡಿ ಮಾಡಿ ಸಾಹುಕಾರ್ಗೆ ಕವಚವಾಗಿ ನಿಂತಿತು.
ಕರ್ನಾಟಕದ ರಾಜಕಾರಣದಲ್ಲಿ ಆಡಳಿತ ಮತ್ತು ವಿರೋಧ ಪಕ್ಷಗಳು ಪ್ರತಿಯೊಂದು ವಿಚಾರಕ್ಕೂ ಕತ್ತಿ ಮಸೆಯುವುದು ಸಾಮಾನ್ಯ. ಆದರೆ, ಕರ್ನಾಟಕ ಲೋಕಸೇವಾ ಆಯೋಗದ (KPSC) ಅಮಾನತುಗೊಂಡ ಅಧ್ಯಕ್ಷ ಶಿವಶಂಕರಪ್ಪ ಎಸ್. ಸಾಹುಕಾರ್ ವಿಷಯದಲ್ಲಿ ಮಾತ್ರ ಬಿಜೆಪಿ ಮತ್ತು ಕಾಂಗ್ರೆಸ್ ಎರಡೂ ಪಕ್ಷಗಳು ಪ್ರದರ್ಶಿಸಿದ ಮೌನ ಮತ್ತು ರಾಜಕೀಯ ಅಭಯ, ರಾಜ್ಯದ ನೇಮಕಾತಿ ವ್ಯವಸ್ಥೆಯಲ್ಲಿನ ಆಳವಾದ ಭ್ರಷ್ಟಾಚಾರವನ್ನು ಎತ್ತಿಹಿಡಿದಿದೆ.
ಆಗಸ್ಟ್ 25, 2026 ರಂದು ಸಾಹುಕಾರ್ ಅವರನ್ನು ಸಸ್ಪೆಂಡ್ ಮಾಡಲಾಯಿತು. ಅವರ ಮಗಳು ಆದಾಯ ಪ್ರಮಾಣಪತ್ರದಲ್ಲಿ ತಂದೆಯ ಆದಾಯವನ್ನು 100 ಪಟ್ಟು ಕಡಿಮೆ ತೋರಿಸಿ ರಾಜ್ಯ ಕೈಗಾರಿಕಾ ಇಲಾಖೆಯ ಉದ್ಯೋಗ ಗಿಟ್ಟಿಸಿಕೊಂಡಿದ್ದು ಹಾಗೂ 400 ಪಶುವೈದ್ಯರ ನೇಮಕಾತಿ ಪರೀಕ್ಷೆಯ ಪ್ರಶ್ನೆ ಪತ್ರಿಕೆ ಸೋರಿಕೆಯಾಗಿದ್ದು ಈ ಅಮಾನತಿಗೆ ತಕ್ಷಣದ ಕಾರಣವಾಯಿತು. ಆದರೆ, ಇಂಡಿಯನ್ ಎಕ್ಸ್ಪ್ರೆಸ್ ನಡೆಸಿದ ತನಿಖೆಯಿಂದ ಸಾಹುಕಾರ್ ಅವರ 7 ವರ್ಷಗಳ ಆಡಳಿತಾವಧಿಯಲ್ಲಿ ನಡೆದ ಸಾಲು ಸಾಲು ಅಕ್ರಮಗಳು ಮತ್ತು ಅದಕ್ಕೆ ಸಿಕ್ಕ ರಾಜಕೀಯ ರಕ್ಷಣೆ ಬಯಲಾಗಿದೆ.
ಅರ್ಹತೆಯಿಲ್ಲದಿದ್ದರೂ ಹುದ್ದೆ: ಬಿಜೆಪಿ ಸರ್ಕಾರದ ಅವಧಿಯಲ್ಲಿ ನೇಮಕ
ಜುಲೈ 31, 2019ರಂದು ಬಿ.ಎಸ್. ಯಡಿಯೂರಪ್ಪ ಅವರು ನಾಲ್ಕನೇ ಬಾರಿಗೆ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದ ಕೇವಲ 36 ದಿನಗಳಲ್ಲೇ, ಅಂದರೆ ಆಗಸ್ಟ್ 31, 2019ರಂದು ಸಾಹುಕಾರ್ ಅವರನ್ನು ‘ಅಧಿಕೃತ’ ವರ್ಗದಡಿ ಕೆಪಿಎಸ್ಸಿ ಸದಸ್ಯರನ್ನಾಗಿ ನೇಮಿಸಲಾಯಿತು.
ಆದರೆ, ‘ಅಧಿಕೃತ’ ವರ್ಗದಡಿ ಕೆಪಿಎಸ್ಸಿ ಸದಸ್ಯರಾಗಲು ಕನಿಷ್ಠ 10 ವರ್ಷಗಳ ಕಾಲ ಸರ್ಕಾರಿ ಸೇವೆಯಲ್ಲಿ ಕಾರ್ಯನಿರ್ವಹಿಸಿರಬೇಕು ಎಂಬ ನಿಯಮವಿದೆ. ಸಾಹುಕಾರ್ ಅವರಿಗೆ ಯಾವುದೇ ಸರ್ಕಾರಿ ಸೇವಾ ಅನುಭವವಿಲ್ಲದಿದ್ದರಿಂದ, ತೀವ್ರ ಆಕ್ಷೇಪಣೆಗಳು ವ್ಯಕ್ತವಾದ ನಂತರ ಅವರನ್ನು ಗಮ್ಮತ್ತಾಗಿ ‘ಅನಧಿಕೃತ’ ವರ್ಗಕ್ಕೆ ವರ್ಗಾಯಿಸಲಾಯಿತು.
ಸಾಹುಕಾರ್ ಅವರ ವೃತ್ತಿಪರ ಹಿನ್ನೆಲೆಯನ್ನು ಪರಿಶೀಲಿಸಿದಾಗಲೂ ಭಾರಿ ಅಕ್ರಮಗಳು ಕಂಡುಬರುತ್ತವೆ. 1988ರಲ್ಲಿ ರಾಯಚೂರಿನ ಕೃಷಿ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಪದವಿ ಮುಗಿಸಿದ್ದ ಅವರು, 1989ರಿಂದ 1991ರವರೆಗೆ ಸೂಪರ್ ವೈಸರ್ ಆಗಿ ಕೆಲಸ ಮಾಡಿದ್ದರು. ನಂತರ ಐದು ವರ್ಷಗಳ ಕಾಲ ಯಾವುದೇ ಕೆಲಸವಿಲ್ಲದೆ, ಜುಲೈ 1996ರಲ್ಲಿ ಗುಲ್ಬರ್ಗದ ರಾಷ್ಟ್ರೀಯ ಸಹಕಾರಿ ಯೂನಿಯನ್ ಲಿಮಿಟೆಡ್ (NCUI) ಯೋಜನೆಯಲ್ಲಿ ತಾತ್ಕಾಲಿಕ ಆಧಾರದಲ್ಲಿ ‘ಫಾರ್ಮ್ ಗೈಡೆನ್ಸ್ ಇನ್ಸ್ಟ್ರಕ್ಟರ್’ ಆಗಿ ಸೇರಿಕೊಂಡರು. ಆದರೆ, ಸಾಹುಕಾರ್ ಅವರ ಕೆಲಸ ತೃಪ್ತಿಕರವಾಗಿಲ್ಲ ಮತ್ತು ಅವರು ಸಮಯಪಾಲನೆ ಮಾಡುತ್ತಿಲ್ಲ ಎಂಬ ಕಾರಣ ನೀಡಿ, ಮಾರ್ಚ್ 2010ರಲ್ಲಿ NCUI ಅವರ ಒಪ್ಪಂದವನ್ನು ನವೀಕರಿಸದೆ, ಪೂರ್ಣ ಅಧಿಕಾರ ಹಸ್ತಾಂತರಿಸಿ ಹೊರನಡೆಯುವಂತೆ ನೋಟಿಸ್ ನೀಡಿತ್ತು.
ಇದರ ನಂತರ 2019ರವರೆಗೆ ಸಾಹುಕಾರ್ ಅವರ ಯಾವುದೇ ಅಧಿಕೃತ ವೃತ್ತಿ ದಾಖಲೆಗಳಿಲ್ಲ. ಸ್ಥಳೀಯರ ಪ್ರಕಾರ, ಅವರು ಸಣ್ಣಪುಟ್ಟ ಕೆಲಸಗಳನ್ನು ಮಾಡುತ್ತಾ, ‘ಖಾಸಗಿ ಮೀಟರ್ ಬಡ್ಡಿ/ಹಣಕಾಸು ದಂಧೆ’ ನಡೆಸುತ್ತಿದ್ದರು. ಆದರೆ, ಕೆಪಿಎಸ್ಸಿಗೆ ಬಂದ ಕೇವಲ ಎರಡೇ ವರ್ಷಗಳಲ್ಲಿ ಭಾರಿ ಪ್ರಭಾವ ಬೆಳೆಸಿಕೊಂಡ ಅವರು, 2021ರಲ್ಲಿ ಹುದ್ದೆ ಖಾಲಿಯಾಗುವ ಮುನ್ನವೇ ಅಧ್ಯಕ್ಷ ಸ್ಥಾನ ಗಿಟ್ಟಿಸಿಕೊಂಡರು! ಮಾರ್ಚ್ 17, 2021ರಂದು ರಾಜ್ಯ ಸಚಿವ ಸಂಪುಟವು ಸಾಹುಕಾರ್ ಅವರನ್ನು ಅಧ್ಯಕ್ಷರನ್ನಾಗಿ ಆಯ್ಕೆ ಮಾಡಿತು. ಹಿಂದಿನ ಅಧ್ಯಕ್ಷ ಕೆ. ಷಡಕ್ಷರಿ ಸ್ವಾಮಿ ಅವರ ಅವಧಿ ಏಪ್ರಿಲ್ 3ಕ್ಕೆ ಮುಕ್ತಾಯಗೊಳ್ಳಲಿದ್ದರೂ, ಯಾವುದೇ ರೀತಿಯ ಸ್ಕ್ರೀನಿಂಗ್ ಅಥವಾ ಪರಿಶೀಲನೆ ನಡೆಸದೆ ತತ್ಕ್ಷಣವೇ ಸಾಹುಕಾರ್ ಅವರಿಗೆ ಅಧ್ಯಕ್ಷ ಪಟ್ಟ ಕಟ್ಟಲಾಗಿತ್ತು.
ಕಾಂಗ್ರೆಸ್ ಸರ್ಕಾರದಲ್ಲೂ ಅಭಯ:
ಮೇ 2023ರಲ್ಲಿ ಸಿದ್ದರಾಮಯ್ಯ ನೇತೃತ್ವದ ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದಾಗ, ಸಾಹುಕಾರ್ ಅವರು ಕೆಪಿಎಸ್ಸಿ ಕಾರ್ಯದರ್ಶಿಯಾಗಿದ್ದ ಐಎಎಸ್ ಅಧಿಕಾರಿ ವಿಕಾಸ್ ಸುರಾಳ್ಕರ್ ಅವರೊಂದಿಗೆ ಸಂಘರ್ಷಕ್ಕಿಳಿದಿದ್ದರು. ಜುಲೈ 2022ರಲ್ಲಿ ಕಾರ್ಯದರ್ಶಿಯಾಗಿದ್ದ ಸುರಾಳ್ಕರ್, ಕೆಪಿಎಸ್ಸಿ ವೆಬ್ಸೈಟ್ ಹಾಗೂ ಸಾಮಾಜಿಕ ಜಾಲತಾಣಗಳ ಮೂಲಕ ನೇಮಕಾತಿ ಪ್ರಕ್ರಿಯೆಯಲ್ಲಿ ಪಾರದರ್ಶಕತೆ ತರಲು ಯತ್ನಿಸಿದ್ದರು. ಆದರೆ ಸಾಹುಕಾರ್ ಮತ್ತು ಅವರ ಬೆಂಬಲಿತ ಸದಸ್ಯರು ಇದನ್ನು ತೀವ್ರವಾಗಿ ವಿರೋಧಿಸಿದರು. ಸಾಹುಕಾರ್ ಅವರು ಕಾರ್ಯದರ್ಶಿಯನ್ನೇ ಬೈಪಾಸ್ ಮಾಡಿ ಸಭೆಗಳನ್ನು ನಡೆಸುವುದು ಮತ್ತು ಫೈಲ್ಗಳಿಗೆ ಅನುಮೋದನೆ ನೀಡದೆ ತಡೆಹಿಡಿಯುವುದನ್ನು ಮಾಡಿದರು.
ಸೆಪ್ಟೆಂಬರ್ 13, 2023ರಂದು ವಿಕಾಸ್ ಸುರಾಳ್ಕರ್ ಅವರು ಡಿಪಿಎಆರ್ಗೆ (DPAR) ಸುದೀರ್ಘ ವರದಿ ಸಲ್ಲಿಸಿ, ಸಾಹುಕಾರ್ ಅವರು ನಿಯಮಗಳನ್ನು ಗಾಳಿಗೆ ತೂರಿ, ಅಧಿಕಾರ ದುರುಪಯೋಗಪಡಿಸಿಕೊಳ್ಳುತ್ತಿದ್ದಾರೆ ಮತ್ತು ಅರ್ಹ ಅಭ್ಯರ್ಥಿಗಳಿಗೆ ಅನ್ಯಾಯ ಮಾಡುತ್ತಿದ್ದಾರೆ ಎಂದು ದಾಖಲೆ ಸಮೇತ ದೂರು ನೀಡಿದರು. ಆದರೆ, ಕೇವಲ ಒಂದೇ ದಿನದಲ್ಲಿ, ಅಂದರೆ ಸೆಪ್ಟೆಂಬರ್ 14, 2023ರಂದು ಕಾಂಗ್ರೆಸ್ ಸರ್ಕಾರ ವಿಕಾಸ್ ಸುರಾಳ್ಕರ್ ಅವರನ್ನು ಕೆಪಿಎಸ್ಸಿ ಕಾರ್ಯದರ್ಶಿ ಹುದ್ದೆಯಿಂದಲೇ ಎತ್ತಂಗಡಿ ಮಾಡಿತು!
ಸುರಾಳ್ಕರ್ ನಂತರ ಸೆಪ್ಟೆಂಬರ್ 2023ರಲ್ಲಿ ಕೆಪಿಎಸ್ಸಿ ಕಾರ್ಯದರ್ಶಿಯಾಗಿ ಬಂದ ಮತ್ತೊಬ್ಬ ಐಎಎಸ್ ಅಧಿಕಾರಿ ಲತಾ ಕುಮಾರಿ ಅವರು, ಸಾಹುಕಾರ್ ನೇತೃತ್ವದ ಸಮಿತಿಯು ಕಾನೂನು ಕೋಶದ ಮುಖ್ಯಸ್ಥರ ನೇಮಕಾತಿಯಲ್ಲಿ ಪಾರದರ್ಶಕತೆ ಕಾಯ್ದುಕೊಳ್ಳದ ಕಾರಣ ಆ ಫೈಲ್ಗೆ ಸಹಿ ಹಾಕಲು ನಿರಾಕರಿಸಿದರು. ಇದಕ್ಕೆ ಪ್ರತಿಯಾಗಿ ಸಾಹುಕಾರ್ ಮತ್ತು ಐದು ಮಂದಿ ಸದಸ್ಯರು ಪ್ರಮುಖ ಸಭೆಗಳನ್ನು ಬಹಿಷ್ಕರಿಸಿ, ತಮ್ಮ ಅಭ್ಯರ್ಥಿಯನ್ನು ನೇಮಿಸುವವರೆಗೆ ಯಾವುದೇ ಫೈಲ್ಗೆ ಸಹಿ ಹಾಕುವುದಿಲ್ಲ ಎಂದು ಪಟ್ಟು ಹಿಡಿದರು. ಇದರಿಂದಾಗಿ ಸುಮಾರು 2,000ಕ್ಕೂ ಹೆಚ್ಚು ಸರ್ಕಾರಿ ಹುದ್ದೆಗಳ ನೇಮಕಾತಿ ಪ್ರಕ್ರಿಯೆ ಸಂಪೂರ್ಣ ಸ್ಥಗಿತಗೊಂಡಿತು.
ಜನವರಿ 25, 2024ರಂದು ಲತಾ ಕುಮಾರಿ ಅವರು ರಾಜ್ಯಪಾಲರಿಗೆ ಬರೆದ ಸುದೀರ್ಘ ಪತ್ರದಲ್ಲಿ, ಸಾಹುಕಾರ್ ಅವರು ಅರ್ಹತಾ ಮಾನದಂಡಗಳನ್ನು ತಮಗೆ ಬೇಕಾದಂತೆ ಬದಲಾಯಿಸುತ್ತಿದ್ದಾರೆ, ಟೆಂಡರ್ ಹಾಗೂ ಇಂಟರ್ವ್ಯೂ ಪ್ಯಾನೆಲ್ಗಳನ್ನು ತಮಗೆ ಬೇಕಾದಂತೆ ನಿಯಂತ್ರಿಸುತ್ತಿದ್ದಾರೆ ಎಂದು ಆರೋಪಿಸಿ, ಸಂವಿಧಾನದ ವಿಧಿ 317ರ ಅಡಿಯಲ್ಲಿ ಸಾಹುಕಾರ್ ಮತ್ತು ನಾಲ್ವರು ಸದಸ್ಯರನ್ನು ವಜಾಗೊಳಿಸುವಂತೆ ಶಿಫಾರಸು ಮಾಡಿದರು. ಆದರೆ, ಫೆಬ್ರವರಿ 6, 2024ರಂದು ಸರ್ಕಾರದ ಉನ್ನತ ಅಧಿಕಾರಿಯೊಬ್ಬರು ಲತಾ ಕುಮಾರಿ ಅವರನ್ನು ಕರೆಸಿ, “ದೂರನ್ನು ವಾಪಸ್ ಪಡೆಯಿರಿ, ಇಲ್ಲವೇ ರಜೆಯ ಮೇಲೆ ಹೋಗಿ” ಎಂದು ಬೆದರಿಕೆಯೊಡ್ಡಿದರು! ಮರುದಿನವೇ (ಫೆಬ್ರವರಿ 7) ಲತಾ ಕುಮಾರಿ ಅವರನ್ನು ‘ಸಂಬಳಸಹಿತ ಕಡ್ಡಾಯ ರಜೆ’ಗೆ ಕಳುಹಿಸಿ, ಫೆಬ್ರವರಿ 13ರಂದು ಸಾಹುಕಾರ್ ಆಯ್ಕೆ ಮಾಡಿದ್ದ ಕಾನೂನು ಸಲಹೆಗಾರನ ನೇಮಕಕ್ಕೆ ಕೆಪಿಎಸ್ಸಿ ಒಪ್ಪಿಗೆ ನೀಡಿತು.
ಎಸ್ಐಟಿ ತನಿಖೆಯೂ ರದ್ದು:
ಜುಲೈ 2023ರಲ್ಲಿ ನಡೆದ 24 ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ (AEE) ಹುದ್ದೆಗಳ ಪರೀಕ್ಷೆಯ ಒಎಂಆರ್ (OMR) ಉತ್ತರ ಪತ್ರಿಕೆಗಳನ್ನು ತಿದ್ದುಪಡಿ ಮಾಡಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿತ್ತು. ಕಾರ್ಯದರ್ಶಿ ಲತಾ ಕುಮಾರಿ ಅವರು ಬಾಹ್ಯ ತನಿಖೆಗೆ ಒತ್ತಾಯಿಸಿದರೂ, ಸಾಹುಕಾರ್ ಆಂತರಿಕ ತನಿಖೆಗೆ ಆದೇಶಿಸಿದರು.
ಫೆಬ್ರವರಿ 2025ರಲ್ಲಿ ಕೆಪಿಎಸ್ಸಿಯ ಆಂತರಿಕ ತನಿಖೆಯು 10 ಅಭ್ಯರ್ಥಿಗಳು ಒಎಂಆರ್ ಶೀಟ್ ತಿದ್ದುಪಡಿ ಮಾಡಿರುವುದು ನಿಜ ಎಂದು ವರದಿ ನೀಡಿ, ಅವರ ಆಯ್ಕೆಯನ್ನು ರದ್ದುಗೊಳಿಸಲು ಶಿಫಾರಸು ಮಾಡಿತು. ಈ ಅಭ್ಯರ್ಥಿಗಳು ಹೈಕೋರ್ಟ್ ಮೆಟ್ಟಿಲೇರಿದರು. ಮಾರ್ಚ್ 18, 2025ರಂದು ಹೈಕೋರ್ಟ್ನ ನ್ಯಾಯಮೂರ್ತಿ ಕೃಷ್ಣ ದೀಕ್ಷಿತ್ ಮತ್ತು ರಮೇಶ್ಚಂದ್ರ ಹುಡ್ದಾರ್ ಅವರಿದ್ದ ಪೀಠವು ಈ ಪ್ರಕರಣವನ್ನು ಸಿಬಿಐ (CBI) ತನಿಖೆಗೆ ವಹಿಸುವ ಸುಳಿವು ನೀಡಿತು.
ಏಪ್ರಿಲ್ 2025ರಲ್ಲಿ ಅಡ್ವೊಕೇಟ್ ಜನರಲ್ ಅವರು ವಿಶೇಷ ತನಿಖಾ ತಂಡ (SIT) ರಚಿಸುವುದಾಗಿ ಹೇಳಿ, ಮೂವರು ಪೊಲೀಸ್ ಅಧಿಕಾರಿಗಳ ಹೆಸರುಗಳನ್ನು ಮುಚ್ಚಿದ ಲಕೋಟೆಯಲ್ಲಿ ಕೋರ್ಟ್ಗೆ ಸಲ್ಲಿಸಿದರು. ಏಪ್ರಿಲ್ 28, 2025ರಂದು ಪೀಠವು ತೀರ್ಪನ್ನು ಕಾಯ್ದಿರಿಸಿತು. ಆದರೆ, ಮೇ 1, 2025ರಂದು ನ್ಯಾಯಮೂರ್ತಿ ಕೃಷ್ಣ ದೀಕ್ಷಿತ್ ಅವರು ಒಡಿಶಾ ಹೈಕೋರ್ಟ್ಗೆ ವರ್ಗಾವಣೆಯಾದರು. ನಂತರ ಆಗಸ್ಟ್ 22, 2025ರಂದು ಬಂದ ಹೊಸ ಪೀಠವು (ನ್ಯಾಯಮೂರ್ತಿ ಎಸ್.ಜಿ. ಪಂಡಿತ್ ಮತ್ತು ಕೆ.ವಿ. ಅರವಿಂದ್) ಈ ಪ್ರಕರಣವನ್ನು ತನಿಖೆಗೆ ವಹಿಸದೇ ಕೆಎಸ್ಎಟಿಗೇ (KSAT) ವಾಪಸ್ ಕಳುಹಿಸಿತು. ಇದರೊಂದಿಗೆ ಭಾರಿ ಸದ್ದು ಮಾಡಬೇಕಿದ್ದ ಎಸ್ಐಟಿ ತನಿಖೆ ಸದ್ದಿಲ್ಲದೆ ಗೂಡುಸೇರಿತು.
ಶಿವಶಂಕರಪ್ಪ ಸಾಹುಕಾರ್ ಅವರ ಈ ಇಡೀ ಕಥನವು ಕರ್ನಾಟಕದ ಕಾರ್ಯಾಂಗ ಮತ್ತು ರಾಜಕೀಯ ವ್ಯವಸ್ಥೆಯಲ್ಲಿ ಭ್ರಷ್ಟಾಚಾರ ಎಷ್ಟು ಆಳವಾಗಿ ಬೇರೂರಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಬಿಜೆಪಿ ಸರ್ಕಾರವು ನಿಯಮಗಳನ್ನು ಗಾಳಿಗೆ ತೂರಿ, ಒಬ್ಬ ಕನಿಷ್ಠ ಅರ್ಹತೆಯೂ ಇಲ್ಲದ ವ್ಯಕ್ತಿಯನ್ನು ಕೆಪಿಎಸ್ಸಿಯಂತಹ ಪವಿತ್ರ ಸಂವಿಧಾನಾತ್ಮಕ ಸಂಸ್ಥೆಯ ಅಧ್ಯಕ್ಷ ಸ್ಥಾನದಲ್ಲಿ ಕೂರಿಸಿದರೆ, ನಂತರ ಬಂದ ಕಾಂಗ್ರೆಸ್ ಸರ್ಕಾರವು ಆತನ ಭ್ರಷ್ಟಾಚಾರವನ್ನು ಪ್ರಶ್ನಿಸಿದ ದಕ್ಷ ಐಎಎಸ್ ಅಧಿಕಾರಿಗಳಾದ ವಿಕಾಸ್ ಸುರಾಳ್ಕರ್ ಮತ್ತು ಲತಾ ಕುಮಾರಿ ಅವರನ್ನು ಅಮಾನವೀಯವಾಗಿ ಎತ್ತಂಗಡಿ ಮಾಡಿ ಸಾಹುಕಾರ್ಗೆ ಕವಚವಾಗಿ ನಿಂತಿತು.
ಲಕ್ಷಾಂತರ ಬಡ ಮತ್ತು ಗ್ರಾಮೀಣ ಯುವಕರು ರಾತ್ರಿ-ಹಗಲೆನ್ನದೆ ಓದಿ ಬರೆಯುವ ಕೆಪಿಎಸ್ಸಿ ಪರೀಕ್ಷೆಗಳು, ಕೇವಲ ಬಡ್ಡಿ ಧಂದೆ ನಡೆಸುತ್ತಿದ್ದ ವ್ಯಕ್ತಿಯೊಬ್ಬನ ಕೈಯಲ್ಲಿ ವ್ಯಾಪಾರದ ವಸ್ತುವಾಗಿದ್ದು ಈ ನಾಡಿನ ದುರಂತ. ರಾಜಕೀಯ ಪಕ್ಷಗಳು ತಮ್ಮ ಪಕ್ಷಬೇದ ಮರೆತು, ಸಾಹುಕಾರ್ನಂತಹ ಭ್ರಷ್ಟರ ಹಿತಾಸಕ್ತಿ ಕಾಯಲು ಒಂದಾಗುತ್ತವೆ ಎಂಬುದಕ್ಕೆ ಇದೊಂದು ಸ್ಪಷ್ಟ ನಿದರ್ಶನ.
