ಖಲಾಪುರ (ರಾಯಗಢ): ಗರ್ಭಿಣಿಯನ್ನು ಯೋಗ್ಯವಾದ ರಸ್ತೆ, ಆಂಬ್ಯುಲೆನ್ಸ್ ಇಲ್ಲದ ಕಾರಣ ಬಟ್ಟೆಯ ಜೋಳಿಗೆಯಲ್ಲಿ ಆಸ್ಪತ್ರೆಗೆ ಸಾಗಿಸಿದ ಹೃದಯ ವಿದ್ರಾವಕ ಘಟನೆ ಮಹಾರಾಷ್ಟ್ರದ ರಾಯಗಢ ಜಿಲ್ಲೆಯ ಖಲಾಪುರ ತಾಲ್ಲೂಕಿಗೆ ಸೇರಿದ ಉಂಬರಾನೆ ವಾಡಿಯಲ್ಲಿ ನಡೆದಿದೆ.
ದೇಶದಲ್ಲೇ ಅತ್ಯಂತ ಆಧುನಿಕ ಹಾಗೂ ಸುಸಜ್ಜಿತ ಮೂಲಸೌಕರ್ಯಗಳಿವೆಯೆಂದು ಹೇಳಿಕೊಳ್ಳುವ ಸರ್ಕಾರವಿದ್ದರೂ, ಮುಂಬೈ ಮಹಾನಗರದ ತೀರಾ ಹತ್ತಿರದಲ್ಲೇ ಮೂಲಸೌಕರ್ಯದ ಭೀಕರ ಅಭಾವವಿರುವುದನ್ನು ಸ್ಪಷ್ಟವಾಗಿ ನೆನಪಿಸುವಂತಹ ಈ ಹೃದಯವಿದ್ರಾವಕ ಘಟನೆ ಮರುಕಳಿಸಿದೆ. ಹೆರಿಗೆ ನೋವಿನಿಂದ ತೀವ್ರವಾಗಿ ನರಳುತ್ತಿದ್ದ ಗರ್ಭಿಣಿ ಮಹಿಳೆಯೊಬ್ಬರನ್ನು ವಾಹನ ಸಂಚಾರಕ್ಕೆ ಯೋಗ್ಯವಾದ ರಸ್ತೆಯಿಲ್ಲದ ಕಾರಣ, ಆಂಬ್ಯುಲೆನ್ಸ್ ತಲುಪಲಾಗದೆ ಬಟ್ಟೆಯ ತಾತ್ಕಾಲಿಕ ಜೋಲಿಯಲ್ಲಿ ಮಲಗಿಸಿಕೊಂಡು ಆಸ್ಪತ್ರೆಗೆ ಹೊತ್ತೊಯ್ದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ತೀವ್ರ ಆಕ್ರೋಶಕ್ಕೆ ಕಾರಣವಾಗಿವೆ. ಈ ದುರಂತ ಘಟನೆ ನಡೆದಿರುವುದು ಮಹಾರಾಷ್ಟ್ರದ ರಾಯಗಢ ಜಿಲ್ಲೆಯ ಖಲಾಪುರ ತಾಲ್ಲೂಕಿಗೆ ಸೇರಿದ ಉಂಬರಾನೆ ವಾಡಿಯಲ್ಲಿ. ಇದು ಮುಂಬೈನಿಂದ ಕೇವಲ 80 ಕಿಲೋಮೀಟರ್ ದೂರದಲ್ಲಿದೆ ಹಾಗೂ ದೇಶದ ಅತ್ಯಂತ ಜನನಿಬಿಡ ಹೆದ್ದಾರಿಗಳಲ್ಲಿ ಒಂದಾದ ಮುಂಬೈ-ಪುಣೆ ಎಕ್ಸ್ಪ್ರೆಸ್ವೇಯಲ್ಲಿರುವ ಖಲಾಪುರ ಟೋಲ್ ಪ್ಲಾಜಾದಿಂದ ಕೆಲವೇ ಕಿಲೋಮೀಟರ್ ಅಂತರದಲ್ಲಿದೆ.
ಸ್ಥಳೀಯ ನಿವಾಸಿ ಅನಂತ ಪಾರ್ಧಿ ಅವರ ಪತ್ನಿಗೆ ಇದ್ದಕ್ಕಿದ್ದಂತೆ ತೀವ್ರ ಹೆರಿಗೆ ನೋವು ಕಾಣಿಸಿಕೊಂಡಾಗ, ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ಯಾವುದೇ ರಸ್ತೆಯಿಲ್ಲದ ಕಾರಣ ವಾಹನಗಳಾಗಲಿ ಅಥವಾ ಆಂಬ್ಯುಲೆನ್ಸ್ ಆಗಲಿ ಬರುವುದು ಅಸಾಧ್ಯವಾಗಿತ್ತು. ಬೇರೆ ದಾರಿ ಕಾಣದೆ ಕೊನೆಗೆ ಗ್ರಾಮಸ್ಥರು ಬೆಡ್ಶೀಟ್ ಬಳಸಿ ತಾತ್ಕಾಲಿಕ ಜೋಲಿಯನ್ನು ತಯಾರಿಸಿಕೊಂಡರು. ಮಹಿಳೆಯನ್ನು ಅದರಲ್ಲಿ ಮಲಗಿಸಿಕೊಂಡು ಚೌಕ್ ಆಸ್ಪತ್ರೆಗೆ ತಲುಪಿಸಲು ಒರಟಾದ ಕಾಡಿನ ಹಾದಿಯಲ್ಲಿ ಸಾಗಬೇಕಾಯಿತು. ಜಾರುವ ಬಂಡೆಗಳು, ಕಡಿದಾದ ಅಸಮ ಭೂಪ್ರದೇಶ ಹಾಗೂ ಇತ್ತೀಚಿನ ಮಳೆಯಿಂದಾಗಿ ಉಕ್ಕಿ ಹರಿಯುತ್ತಿದ್ದ ಅರಣ್ಯದ ಹಳ್ಳ-ಕೊಳ್ಳಗಳನ್ನು ದಾಟುತ್ತಾ, ಗ್ರಾಮಸ್ಥರು ಜೀವದ ಹಂಗು ತೊರೆದು ಬಂಡೆಗಳ ಪ್ರದೇಶದಲ್ಲಿ ಹಲವಾರು ಕಿಲೋಮೀಟರ್ ಕಾಲ್ನಡಿಗೆಯಲ್ಲೇ ಸಾಗಿ ಮಹಿಳೆಯನ್ನು ಸುರಕ್ಷಿತವಾಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
ಸ್ವಾತಂತ್ರ್ಯ ಬಂದು ದಶಕಗಳೇ ಕಳೆದಿದ್ದರೂ, ಉಂಬರಣೆ ವಾಡಿ ಸೇರಿದಂತೆ ಪಿರ್ಕಡ್ವಾಡಿ ಮತ್ತು ಅರ್ಕಸ್ವಾಡಿ ಎಂಬ ಈ ಭಾಗದ ನಾಲ್ಕು ಬುಡಕಟ್ಟು ವಸಾಹತುಗಳು ಇಂದಿಗೂ ಎಲ್ಲಾ ಋತುಗಳಲ್ಲೂ ಬಳಸಬಹುದಾದ ರಸ್ತೆಗಳು ಹಾಗೂ ವಿದ್ಯುಚ್ಛಕ್ತಿಯಂತಹ ಕನಿಷ್ಠ ಮೂಲಭೂತ ಸೌಕರ್ಯಗಳಿಂದ ಸಂಪೂರ್ಣವಾಗಿ ವಂಚಿತವಾಗಿವೆ. ನ್ಯೂಸ್ 18 ಮರಾಠಿ ವರದಿಯ ಪ್ರಕಾರ, ಇತ್ತೀಚೆಗೆ ಸುರಿದ ಭಾರೀ ಮಳೆಯಿಂದಾಗಿ ಚೌಕ್ ಗ್ರಾಮಕ್ಕೆ ಈ ಬುಡಕಟ್ಟು ಹಳ್ಳಿಗಳನ್ನು ಸಂಪರ್ಕಿಸುತ್ತಿದ್ದ ಕಿರಿದಾದ ಪಾದಚಾರಿ ಮಾರ್ಗವೂ ಕೊಚ್ಚಿಹೋಗಿದ್ದು, ಜನರ ಪ್ರವೇಶ ಮತ್ತು ಸಂಚಾರ ಇನ್ನಷ್ಟು ಕಷ್ಟಕರವಾಗಿದೆ ಎಂದು ಸ್ಥಳೀಯ ನಿವಾಸಿಗಳು ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.
ಇಲ್ಲಿರುವ ಬಹುದೊಡ್ಡ ವಿಪರ್ಯಾಸವೆಂದರೆ, ಈ ದೂರದ ಬುಡಕಟ್ಟು ಹಳ್ಳಿಗಳು ನವಿ ಮುಂಬೈ ನಗರಕ್ಕೆ ಕುಡಿಯುವ ನೀರನ್ನು ಪೂರೈಸುವ ‘ಮೋರ್ಬೆ ಅಣೆಕಟ್ಟು’ ಮತ್ತು ಪ್ರಸಿದ್ಧ ಮುಂಬೈ-ಪುಣೆ ಎಕ್ಸ್ಪ್ರೆಸ್ವೇಯ ತೀರಾ ಸಮೀಪದಲ್ಲೇ ಇವೆ. ದಿನನಿತ್ಯ ಸಾವಿರಾರು ವಾಹನ ಚಾಲಕರು ಖಲಾಪುರ ಟೋಲ್ ಪ್ಲಾಜಾದಲ್ಲಿ ಲಕ್ಷಾಂತರ ರೂಪಾಯಿ ಟೋಲ್ ಪಾವತಿಸಿ ಸುಸಜ್ಜಿತ ಹೆದ್ದಾರಿಯಲ್ಲಿ ಪ್ರಯಾಣಿಸುತ್ತಿದ್ದರೆ, ಅದಕ್ಕೆ ಕೆಲವೇ ಕಿಲೋಮೀಟರ್ ಅಂತರದಲ್ಲಿರುವ ಬುಡಕಟ್ಟು ನಿವಾಸಿಗಳು ತುರ್ತು ವೈದ್ಯಕೀಯ ಚಿಕಿತ್ಸೆಗೂ ಸರಿಯಾದ ರಸ್ತೆಯಿಲ್ಲದೆ ರೋಗಿಗಳನ್ನು ಕಾಲ್ನಡಿಗೆಯಲ್ಲೇ ಹೊತ್ತೊಯ್ಯಬೇಕಾದ ಕಟು ವಾಸ್ತವ ಎದುರಾಗಿದೆ.
ಈ ತೀವ್ರ ವ್ಯತ್ಯಾಸವು ಸರ್ಕಾರದ ಅಭಿವೃದ್ಧಿಯ ಹೇಳಿಕೆಗಳನ್ನು ನೇರವಾಗಿ ಪ್ರಶ್ನಿಸುವಂತೆ ಮಾಡಿದೆ. ಮಳೆಗಾಲದಲ್ಲಿ ಕಾಡುಗಳು ಮತ್ತು ಉಕ್ಕಿ ಹರಿಯುವ ಹೊಳೆಗಳ ಮೂಲಕ ರೋಗಿಗಳನ್ನು ಸಾಗಿಸುವ ಗ್ರಾಮಸ್ಥರ ಸಾಹಸದ ಮೇಲೆಯೇ ಸ್ಥಳೀಯ ಆರೋಗ್ಯ ಸೇವೆಗಳು ಅವಲಂಬಿತವಾಗಿರಬಾರದು ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಸ್ಥಳೀಯರು, ಎಲ್ಲಾ ಹವಾಮಾನಕ್ಕೂ ಅನುಕೂಲಕರವಾದ ರಸ್ತೆ, ವಿದ್ಯುತ್ ಹಾಗೂ ಇತರ ಮೂಲಭೂತ ನಾಗರಿಕ ಸೌಲಭ್ಯಗಳನ್ನು ತಕ್ಷಣವೇ ಒದಗಿಸಬೇಕೆಂದು ಸರ್ಕಾರವನ್ನು ಒತ್ತಾಯಿಸಿದ್ದಾರೆ.
