ಇಸ್ರೇಲ್ ಜೊತೆಗೂಡಿ ಇರಾನ್ ಮೇಲೆ ಅಮೆರಿಕ ನಡೆಸುತ್ತಿರುವ ಜಂಟಿ ದಾಳಿಯು ‘ಅಂತ್ಯವಿಲ್ಲದ್ದು’ ಅಥವಾ ಸುದೀರ್ಘವಾದುದ್ದಲ್ಲ ಎಂದು ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಸೋಮವಾರ (ಮಾ.2) ತಿಳಿಸಿದ್ದಾರೆ. ಈ ಸಂಘರ್ಷವು ಅನಿರ್ದಿಷ್ಟಾವಧಿಯವರೆಗೆ ಮುಂದುವರಿಯುವುದಿಲ್ಲ ಎಂಬ ಅಂಶವನ್ನು ಅವರು ಈ ಮೂಲಕ ಸ್ಪಷ್ಟಪಡಿಸಿದ್ದಾರೆ.
“ಇದು ಇರಾಕ್ ಅಲ್ಲ, ಇದು ಅಂತ್ಯವಿಲ್ಲದ ಯುದ್ಧವೂ ಅಲ್ಲ” ಎಂದು ಹೇಳಿದ ಹೆಗ್ಸೆತ್, “ಅಂತ್ಯವಿಲ್ಲದ ಯುದ್ಧಗಳ” ಬಗ್ಗೆ ಕಳವಳ ವ್ಯಕ್ತಪಡಿಸುತ್ತಿರುವವರ ವಾದವು ತಪ್ಪಾಗಿದೆ ಎಂದು ಪ್ರತಿಪಾದಿಸಿದ್ದಾರೆ.
ಪೆಂಟಗನ್‌ನಲ್ಲಿ ಮಾತನಾಡಿದ ಹೆಗ್ಸೆತ್, ಅಮೆರಿಕದ ಈ ಕಾರ್ಯಾಚರಣೆಯು ಸ್ಪಷ್ಟವಾದ, ವಿನಾಶಕಾರಿಯಾದ ಮತ್ತು ನಿರ್ಣಾಯಕವಾದ ಕಾರ್ಯಾಚರಣೆಯಾಗಿದೆ ಎಂದು ಹೇಳಿದ್ದು, ಇರಾನ್‌ನ ಕ್ಷಿಪಣಿ ಬೆದರಿಕೆಯನ್ನು ನಿರ್ಮೂಲನೆ ಮಾಡುವುದು, ನೌಕಾಪಡೆಯನ್ನು ನಾಶಪಡಿಸುವುದು ಮತ್ತು ಯಾವುದೇ ಪರಮಾಣು ಅಸ್ತ್ರಗಳಿಲ್ಲದಂತೆ ಮಾಡುವುದು ಈ ಯೋಜನೆಯ ಗುರಿಯಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಅಂತಾರಾಷ್ಟ್ರೀಯ ಸಂಸ್ಥೆಗಳು ಏನೇ ಹೇಳಿದರೂ, ಅಮೆರಿಕವು ಇತಿಹಾಸದಲ್ಲೇ ಅತ್ಯಂತ ವಿನಾಶಕಾರಿ ಮತ್ತು ನಿಖರವಾದ ವಾಯುಪಡೆ ಕಾರ್ಯಾಚರಣೆಯನ್ನು ಪ್ರಾರಂಭಿಸುತ್ತಿದೆ… ಇದೆಲ್ಲವೂ ನಮ್ಮದೇ ಷರತ್ತುಗಳ ಮೇಲೆ ಮತ್ತು ಪೂರ್ಣ ಅಧಿಕಾರದೊಂದಿಗೆ ನಡೆಯುತ್ತಿದೆ ಎಂದು ಹೆಗ್ಸೆತ್ ಹೇಳಿದ್ದಾರೆ.
ಇರಾನ್ ಆಡಳಿತವು ಕಳೆದ ಸುಮಾರು ಐದು ದಶಕಗಳಿಂದ ಅಮೆರಿಕದ ವಿರುದ್ಧ ಕ್ರೂರ ಮತ್ತು ಏಕಪಕ್ಷೀಯ ಯುದ್ಧ ನಡೆಸುತ್ತಿದೆ ಎಂದ ರಕ್ಷಣಾ ಕಾರ್ಯದರ್ಶಿ, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನೇತೃತ್ವದಲ್ಲಿ ಅಮೆರಿಕವು ಇದಕ್ಕೆ ಅಂತ್ಯ ಹಾಡಲಿದೆ ಎಂದು ತಿಳಿಸಿದ್ದಾರೆ.
ಇದು ಆಡಳಿತ ಬದಲಾವಣೆಗಾಗಿ ಮಾಡುತ್ತಿರುವ ಯುದ್ಧವಲ್ಲ. ಆದರೆ ಆಡಳಿತವಂತೂ ಖಂಡಿತವಾಗಿಯೂ ಬದಲಾಯಿತು ಮತ್ತು ಇದರಿಂದ ಜಗತ್ತಿಗೆ ಒಳ್ಳೆಯದೇ ಆಗಿದೆ ಎಂದು ಹೆಗ್ಸೆತ್ ಹೇಳಿದ್ದಾರೆ.
ಜಂಟಿ ಮುಖ್ಯಸ್ಥರ ಅಧ್ಯಕ್ಷರಾದ ಜನರಲ್ ಡ್ಯಾನ್ ಕೇನ್ ಅವರು ಸುದ್ದಿಗೋಷ್ಠಿಯಲ್ಲಿ ಭಾಗವಹಿಸಿ, ಕಾರ್ಯಾಚರಣೆಯ ವಿವರಗಳನ್ನು ನೀಡಿದರು. ಇದೇ ವೇಳೆ ಪ್ರಸ್ತುತ ನಡೆಯುತ್ತಿರುವ ಸಂಘರ್ಷದಲ್ಲಿ ಪ್ರಾಣ ಕಳೆದುಕೊಂಡ ನಾಲ್ವರು ಅಮೆರಿಕನ್ ಸೈನಿಕರ ಕುಟುಂಬಗಳಿಗೆ ಅವರು ಸಂತಾಪ ಸೂಚಿಸಿದರು.
ನಾಲ್ಕನೇ ಅಮೆರಿಕನ್ ಸೈನಿಕನ ಸಾವನ್ನು ಅಮೆರಿಕದ ಸೆಂಟ್ರಲ್ ಕಮಾಂಡ್ ಸೋಮವಾರ ದೃಢಪಡಿಸಿದೆ. ಮೃತರ ಕುಟುಂಬದವರಿಗೆ ಮಾಹಿತಿ ನೀಡಿದ 24 ಗಂಟೆಗಳ ನಂತರವಷ್ಟೇ ಅವರ ಹೆಸರು ಮತ್ತು ಗುರುತನ್ನು ಬಹಿರಂಗಪಡಿಸಲಾಗುವುದು ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
