ಪಶ್ಚಿಮ ಬಂಗಾಳದ ಒಬಿಸಿ (ಇತರ ಹಿಂದುಳಿದ ವರ್ಗಗಳು) ಪಟ್ಟಿಯಲ್ಲಿದ್ದ ಮುಸ್ಲಿಂ ಸಮುದಾಯಗಳನ್ನು ಕೈಬಿಡುವ ಮೂಲಕ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ನೇತೃತ್ವದ ನೂತನ ಬಿಜೆಪಿ ಸರ್ಕಾರವು ಭಾರಿ ರಾಜಕೀಯ ಸಂಚಲನ ಸೃಷ್ಟಿಸಿದೆ. ಈ ಹಿಂದೆ ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಸರ್ಕಾರ ಜಾರಿಗೆ ತಂದಿದ್ದ ಮುಸ್ಲಿಂ ಸಮುದಾಯಗಳ ಒಬಿಸಿ ಸೇರ್ಪಡೆಯನ್ನು ಬಿಜೆಪಿ “ಮುಸ್ಲಿಂ ಪ್ರೇಮದ ರಾಜಕಾರಣ” (ಅಪೀಸ್‌ಮೆಂಟ್) ಎಂದು ಕರೆದು ರದ್ದುಗೊಳಿಸಿದೆ.
ಪಶ್ಚಿಮ ಬಂಗಾಳದ ವಿಧಾನಸಭಾ ಚುನಾವಣಾ ಫಲಿತಾಂಶ ಪ್ರಕಟವಾದ ಬೆನ್ನಲ್ಲೇ, ಭಾರತೀಯ ಜನತಾ ಪಾರ್ಟಿ (ಬಿಜೆಪಿ) ನಾಯಕ ಮತ್ತು ಪ್ರಸ್ತುತ ರಾಜ್ಯ ಸಚಿವ ದಿಲೀಪ್ ಘೋಷ್ ಅವರು ‘ಭಾತ್ ಮಾಚ್’ (ಮೀನು ಮತ್ತು ಅನ್ನ) ಸವಿಯುತ್ತಾ ಪಕ್ಷದ ಭರ್ಜರಿ ಜಯವನ್ನು ಆಚರಿಸುತ್ತಿರುವುದು ಕಂಡುಬಂದಿತು. ಈ ಮೀನಿನ ಹಬ್ಬವನ್ನು ಬಿಜೆಪಿಯ ರಾಜ್ಯ ಘಟಕದ ಒಬಿಸಿ (ಇತರ ಹಿಂದುಳಿದ ವರ್ಗಗಳ) ಮೋರ್ಚಾ ಆಯೋಜಿಸಿತ್ತು. ಹಿಂದುಳಿದ ಹಿಂದೂ ಜಾತಿಗಳನ್ನು ಪಕ್ಷದ ಪರವಾಗಿ ಸೆಳೆಯಲು ಈ ಮೋರ್ಚಾ ಕಳೆದೊಂದು ದಶಕದಿಂದ ಸಕ್ರಿಯವಾಗಿ ಕೆಲಸ ಮಾಡುತ್ತಿದೆ.
ಒಬಿಸಿ ಗೋವಾಲಾ-ಗೋಪ ಸಮುದಾಯಕ್ಕೆ ಸೇರಿದ ದಿಲೀಪ್ ಘೋಷ್ ಅವರು 2015 ರಲ್ಲಿ ಬಿಜೆಪಿಯ ರಾಜ್ಯ ಘಟಕದ ಅಧ್ಯಕ್ಷರಾದ ನಂತರ ಒಬಿಸಿ ಮೋರ್ಚಾದ ಪ್ರಾಮುಖ್ಯತೆ ಹೆಚ್ಚಾಯಿತು. ಇದು ರಾಜ್ಯದ ರಾಜಕಾರಣದಲ್ಲಿ ಜಾತಿ ಆಧಾರಿತ ಲೆಕ್ಕಾಚಾರಗಳನ್ನು ಮುಂಚೂಣಿಗೆ ತಂದಿತು. 2016 ರಲ್ಲಿ ಕೇವಲ ಮೂರು ಶಾಸಕರನ್ನು ಹೊಂದಿದ್ದ ಬಿಜೆಪಿಯನ್ನು ಘೋಷ್ ಅವರು 2021 ರ ವಿಧಾನಸಭಾ ಚುನಾವಣೆಯಲ್ಲಿ 77 ಸ್ಥಾನಗಳಿಗೆ ಮುನ್ನಡೆಸಿದರು. ಆ ಮೂಲಕ ಸಿಪಿಐ(ಎಂ) ಮತ್ತು ಕಾಂಗ್ರೆಸ್ ಪಕ್ಷಗಳನ್ನು ಹಿಂದಿಕ್ಕಿ ಬಿಜೆಪಿಯನ್ನು ಪ್ರಮುಖ ವಿರೋಧ ಪಕ್ಷವಾಗಿ ಬೆಳೆಸಿದರು.
ಟಿಎಂಸಿಯ ಜಾತಿ ಆಧಾರಿತ ರಾಜಕಾರಣದ ಪತನ
ಎಡಪಕ್ಷಗಳ ವರ್ಗ ಆಧಾರಿತ ರಾಜಕಾರಣ ಅಥವಾ ಮಮತಾ ಬ್ಯಾನರ್ಜಿ ಅವರ ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಪ್ರೋತ್ಸಾಹಿಸುತ್ತಿದ್ದ ಸ್ಥಳೀಯ ಪ್ರಭಾವಿಗಳ ನೆಟ್‌ವರ್ಕ್ ಆಧಾರಿತ ರಾಜಕಾರಣದ ನಡುವೆ, ದಿಲೀಪ್ ಘೋಷ್ ನಾಯಕತ್ವದ ಬಿಜೆಪಿ ರಾಜ್ಯದ ಹಿಂದುಳಿದ ಹಿಂದೂ ಜಾತಿಗಳನ್ನು ರಾಜಕೀಯವಾಗಿ ಸಂಘಟಿಸಿ ಅವರ ಮತಗಳನ್ನು ಸೆಳೆಯಿತು. 2018 ರ ಪಂಚಾಯತ್ ಚುನಾವಣೆಗೆ ಮುನ್ನ, ದೇಶದ ಇತರ ರಾಜ್ಯಗಳಂತೆ ಬಂಗಾಳದಲ್ಲೂ ಒಬಿಸಿಗಳಿಗೆ ಶೇಕಡಾ 27 ರಷ್ಟು ಮೀಸಲಾತಿ ನೀಡಬೇಕು ಮತ್ತು ಹೆಚ್ಚಿನ ಹಿಂದುಳಿದ ಜಾತಿಗಳನ್ನು ಇದಕ್ಕೆ ಸೇರಿಸಬೇಕು ಎಂದು ಬಿಜೆಪಿ ಒತ್ತಾಯಿಸಿತ್ತು.
ಆದರೆ, ಅಧಿಕಾರಕ್ಕೆ ಬಂದ ತಕ್ಷಣ ಪಶ್ಚಿಮ ಬಂಗಾಳದ ನೂತನ ಬಿಜೆಪಿ ಸರ್ಕಾರವು ಒಬಿಸಿ ಮೀಸಲಾತಿಯನ್ನು ಶೇಕಡಾ 17 ರಿಂದ ಶೇಕಡಾ 7 ಕ್ಕೆ ಇಳಿಸಿರುವುದು ಒಂದು ವಿಪರ್ಯಾಸವೇ ಸರಿ. ರಾಜ್ಯದ ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆ ಹೊರಡಿಸಿರುವ ಅಧಿಸೂಚನೆಯಲ್ಲಿ, 2024 ರ ಮೇ 22 ರ ಕಲ್ಕತ್ತಾ ಹೈಕೋರ್ಟ್ ತೀರ್ಪನ್ನು ಉಲ್ಲೇಖಿಸಲಾಗಿದೆ. ಇದು ರಾಜ್ಯದ ಒಬಿಸಿ ಪಟ್ಟಿಯಲ್ಲಿದ್ದ ವರ್ಗ ‘ಎ’ (ಅತ್ಯಂತ ಹಿಂದುಳಿದ – ಶೇ. 10) ಮತ್ತು ವರ್ಗ ‘ಬೆ’ (ಹಿಂದುಳಿದ – ಶೇ. 7) ಅನ್ನು ರದ್ದುಗೊಳಿಸಲು ಮುಂದಾಗಿದೆ. ಅಲ್ಲದೆ, 2010 ರವರೆಗೆ ಸೇರ್ಪಡೆಗೊಂಡಿದ್ದ 66 ಸಮುದಾಯಗಳನ್ನು (11 ಮುಸ್ಲಿಂ ಜಾತಿಗಳು ಸೇರಿ) ಒಳಗೊಂಡ ಹೊಸ ಒಬಿಸಿ ಪಟ್ಟಿಯನ್ನು ಬಿಡುಗಡೆ ಮಾಡಲಾಗಿದ್ದು, ಹಿಂದಿನ ಸರ್ಕಾರಗಳು ಒಬಿಸಿ ಸ್ಥಾನಮಾನ ನೀಡಿದ್ದ 77 ಸಮುದಾಯಗಳ ಮೀಸಲಾತಿ ಸೌಲಭ್ಯವನ್ನು ಕೊನೆಗೊಳಿಸಿದೆ. ವಿಶೇಷವೆಂದರೆ, ಹೀಗೆ ಹೊರದಬ್ಬಲ್ಪಟ್ಟ 77 ಸಮುದಾಯಗಳಲ್ಲಿ 75 ಸಮುದಾಯಗಳು ಮುಸ್ಲಿಂ ಧರ್ಮಕ್ಕೆ ಸೇರಿದವಾಗಿವೆ.
ನಗರಾಭಿವೃದ್ಧಿ ಮತ್ತು ಮಹಿಳಾ ಹಾಗೂ ಮಕ್ಕಳ ಕಲ್ಯಾಣ ಸಚಿವೆ ಅಗ್ನಿಮಿತ್ರ ಪಾಲ್ ಅವರು, ರಾಜ್ಯದಲ್ಲಿ ಹಿಂದುಳಿದ ಜಾತಿಗಳ ಹೊಸ ಸಮೀಕ್ಷೆ ನಡೆಸಿ, ನಂತರ ಒಬಿಸಿ ಮೀಸಲಾತಿ ನೀತಿಯನ್ನು ಮರುಪರಿಶೀಲಿಸುವುದಾಗಿ ಭರವಸೆ ನೀಡಿದ್ದಾರೆ. ಆದರೆ ಈ ಕ್ರಮವು ಹಿಂದಿನ ಟಿಎಂಸಿ ಸರ್ಕಾರ ನಡೆಸುತ್ತಿದ್ದ ಸುದೀರ್ಘ ಕಾನೂನು ಹೋರಾಟಕ್ಕೆ ತಾರ್ಕಿಕ ಅಂತ್ಯ ಹಾಡಿದಂತಾಗಿದೆ. 2024 ರ ಕಲ್ಕತ್ತಾ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ಟಿಎಂಸಿ ಸರ್ಕಾರ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು.
ಕಳೆದ ವರ್ಷದ ಮಾರ್ಚ್‌ನಲ್ಲಿ, ರಾಜ್ಯ ಸರ್ಕಾರದ ಪರ ವಕೀಲ ಕಪಿಲ್ ಸಿಬಲ್ ಅವರು ಸುಪ್ರೀಂ ಕೋರ್ಟ್‌ಗೆ ಮಾಹಿತಿ ನೀಡಿ, ತಾವು ಮೇಲ್ಮನವಿಯನ್ನು ಹಿಂಪಡೆಯುವುದಾಗಿಯೂ ಮತ್ತು ರಾಜ್ಯದ ಸಾಮಾಜಿಕ ಹಾಗೂ ಶೈಕ್ಷಣಿಕವಾಗಿ ಹಿಂದುಳಿದ ಸಮುದಾಯಗಳನ್ನು ಅಧ್ಯಯನ ಮಾಡಿದ ನಂತರ ಒಬಿಸಿ ಸಮುದಾಯಗಳ ಹೊಸ ಪಟ್ಟಿಯನ್ನು ಸಿದ್ಧಪಡಿಸುವುದಾಗಿಯೂ ತಿಳಿಸಿದ್ದರು.
ಜೂನ್ ತಿಂಗಳಲ್ಲಿ, ಸಮೀಕ್ಷೆಯೊಂದರ ಆಧಾರದ ಮೇಲೆ ಮಮತಾ ಬ್ಯಾನರ್ಜಿ ಸರ್ಕಾರವು 142 ಸಮುದಾಯಗಳನ್ನು ಒಳಗೊಂಡ ಹೊಸ ಒಬಿಸಿ ಪಟ್ಟಿಯನ್ನು ಪ್ರಕಟಿಸಿದಾಗ, ಈ ಹಿಂದೆ ರದ್ದುಗೊಳಿಸಲಾಗಿದ್ದ ಕೇವಲ ಎರಡು ಮುಸ್ಲಿಂ ಜಾತಿಗಳನ್ನು ಹೊರತುಪಡಿಸಿ ಉಳಿದೆಲ್ಲವನ್ನೂ ಉಳಿಸಿಕೊಂಡಿತ್ತು. ಈ ಹೊಸ ಪಟ್ಟಿಯೂ ಕಾನೂನು ಸಂಕಷ್ಟಕ್ಕೆ ಸಿಲುಕಿತು ಮತ್ತು ಕಲ್ಕತ್ತಾ ಹೈಕೋರ್ಟ್ 2025 ರ ಜೂನ್ 17 ರಂದು ಇದಕ್ಕೆ ತಡೆ ನೀಡಿತು. ಇದರಿಂದಾಗಿ ರಾಜ್ಯ ಸರ್ಕಾರ ಮತ್ತೆ ಸುಪ್ರೀಂ ಕೋರ್ಟ್‌ಗೆ ಧಾವಿಸಿತು.
1992 ರ ಇಂದಿರಾ ಸಾಹ್ನಿ ಪ್ರಕರಣದ ಒಂಬತ್ತು ನ್ಯಾಯಾಧೀಶರ ಪೀಠದ ತೀರ್ಪಿನ ಪ್ರಕಾರ, ಸಮಾಜದಲ್ಲಿನ ಹಿಂದುಳಿದ ವರ್ಗಗಳನ್ನು ಸರ್ಕಾರದ ಕಾರ್ಯಾಂಗದ ನಿರ್ದೇಶನಗಳ ಮೂಲಕ ಗುರುತಿಸಬಹುದು ಎಂದು ಹೇಳುವ ಮೂಲಕ ಸುಪ್ರೀಂ ಕೋರ್ಟ್ ಅಂದು ಸರ್ಕಾರದ ಪರವಾಗಿ ತೀರ್ಪು ನೀಡಿತ್ತು. ಹೀಗಾಗಿ, ಮಮತಾ ಬ್ಯಾನರ್ಜಿ ಸರ್ಕಾರ ಅನುಸರಿಸುತ್ತಿರುವ ಒಬಿಸಿ ನೀತಿಯು ಹಿಂದೂ ಒಬಿಸಿ ಸಮುದಾಯಗಳ ವೆಚ್ಚದಲ್ಲಿ ಮುಸ್ಲಿಂ ಜಾತಿ ಸಮೂಹಗಳಿಗೆ ಅನುಕೂಲ ಮಾಡಿಕೊಡುತ್ತಿದೆ ಎಂದು ಆರೋಪಿಸಿ, ಇದನ್ನು ಕೊನೆಗೊಳಿಸುವುದಾಗಿ ಬಿಜೆಪಿ 2026 ರ ವಿಧಾನಸಭಾ ಚುನಾವಣೆಯಲ್ಲಿ ಪ್ರಚಾರ ನಡೆಸಿ ಗೆದ್ದಿದೆ.
ಧರ್ಮದ ಚೌಕಟ್ಟಿನಲ್ಲಿ ಜಾತಿ
ಮಂಡಲ್ ಕಮಿಷನ್ ವರದಿಯು ಸಾಮಾಜಿಕ ನ್ಯಾಯ ಮತ್ತು ಒಳಗೊಳ್ಳುವಿಕೆಯ ತತ್ವದ ಆಧಾರದ ಮೇಲೆ ಹಿಂದೂಯೇತರ ಸಮುದಾಯಗಳನ್ನು ಒಬಿಸಿ ವ್ಯಾಪ್ತಿಗೆ ಸೇರಿಸುವ ಮಾನದಂಡಗಳನ್ನು ವಿವರವಾಗಿ ಚರ್ಚಿಸಿತ್ತಾದರೂ, ಮಮತಾ ಬ್ಯಾನರ್ಜಿ ಸರ್ಕಾರವು ಜಾತಿಯನ್ನು ಧರ್ಮದ ಚೌಕಟ್ಟಿನಲ್ಲಿ ನೋಡಲು ಯತ್ನಿಸಿತು. ಇದು ಪಶ್ಚಿಮ ಬಂಗಾಳದಲ್ಲಿ ಜಾತಿ ಕುರಿತಾದ ಚರ್ಚೆಯ ದಿಕ್ಕನ್ನೇ ಬದಲಿಸಿತು.
2011 ರಲ್ಲಿ ಅಧಿಕಾರಕ್ಕೆ ಬಂದ ತಕ್ಷಣ, ಅವರು ತಮ್ಮ ಸರ್ಕಾರವು ಮುಸ್ಲಿಂ ಜನಸಂಖ್ಯೆಯ ಶೇಕಡಾ 99 ರಷ್ಟನ್ನು ಒಬಿಸಿ ವರ್ಗಕ್ಕೆ ಸೇರಿಸಿದೆ ಮತ್ತು ಬುದ್ಧದೇವ್ ಭಟ್ಟಾಚಾರ್ಯ ಅವರ ಸರ್ಕಾರದ ಅವಧಿಯಲ್ಲಿದ್ದ ಶೇಕಡಾ 7 ರಷ್ಟು ಮೀಸಲಾತಿಯನ್ನು ಶೇಕಡಾ 17 ಕ್ಕೆ ಹೆಚ್ಚಿಸಿದೆ ಎಂದು ಹೆಮ್ಮೆಯಿಂದ ಘೋಷಿಸಿದ್ದರು. ಇದು ಸ್ವಾತಂತ್ರ್ಯೋತ್ತರ ಅವಧಿಯಲ್ಲಿ ರಾಜ್ಯದಲ್ಲಿ ಮೊದಲ ಬಾರಿಗೆ ಮುಸ್ಲಿಂ ಮಧ್ಯಮ ವರ್ಗದ ಬೆಳವಣಿಗೆಗೆ ಕಾರಣವಾದರೂ, ಮತ್ತೊಂದೆಡೆ ಇದು ಧರ್ಮ ಆಧಾರಿತ ಮೀಸಲಾತಿ ಎಂದು ಬಿಂಬಿಸಿ ಒಬಿಸಿ ನೀತಿಯ ವಿರುದ್ಧ ಪ್ರಚಾರ ಮಾಡಲು ಬಿಜೆಪಿಗೆ ದೊಡ್ಡ ಅಸ್ತ್ರವನ್ನೇ ಒದಗಿಸಿಕೊಟ್ಟಿತು.
ಈಗಿನ ಬಿಜೆಪಿ ನೇತೃತ್ವದ ಪಶ್ಚಿಮ ಬಂಗಾಳ ಸರ್ಕಾರದ ಹೊಸ ಅಧಿಸೂಚನೆಯ ನಂತರವೂ, ಮಂಡಲ್ ಕಮಿಷನ್ ವರದಿಯಲ್ಲಿ ಉಲ್ಲೇಖಿಸಲಾಗಿದ್ದ ಜೊಲಾ (ಅನ್ಸಾರಿ-ಮೋಮಿನ್), ಫಕೀರ್, ಸೈನ್, ಕಸಾಯಿ, ನಾಶ್ಯ ಶೇಖ್, ಪಹಾಡಿಯಾ ಮುಸ್ಲಿಂ, ರಯೀನ್ (ಕುಂಜ್ರಾ), ಶೇರ್ಷಬಾಡಿಯಾ, ಹಜ್ಜಾಮ್ (ಮುಸ್ಲಿಂ), ಚೌದುಲಿ (ಮುಸ್ಲಿಂ), ಕಹಾರ್, ಹವಾರಿ/ಧೋಬಿಯಂತಹ ಬಹುತೇಕ ಹಿಂದುಳಿದ ಮುಸ್ಲಿಂ ಜಾತಿ ಸಮುದಾಯಗಳು ಒಬಿಸಿ ಪಟ್ಟಿಯಲ್ಲೇ ಉಳಿದುಕೊಂಡಿವೆ.
ಆದರೆ, ಹೊಸ ಒಬಿಸಿಗಳನ್ನು ಗುರುತಿಸಿ ಅವರಿಗೆ ಮೀಸಲಾತಿ ನೀಡಲು ಮಮತಾ ಬ್ಯಾನರ್ಜಿ ಸರ್ಕಾರವು ಸಮಗ್ರ ಜಾತಿ ಸಮೀಕ್ಷೆ ನಡೆಸುವ ಬದಲು, ಅವಸರದಲ್ಲಿ ಕೇವಲ ‘ಮಾದರಿ ಸಮೀಕ್ಷೆ’ (Sample Survey) ನಡೆಸಿದ್ದು ಮುಸ್ಲಿಂ ಜಾತಿ ಸಮೂಹಗಳ ಸಾಮಾಜಿಕ ನ್ಯಾಯದ ಹಕ್ಕಿಗೆ ಧಕ್ಕೆ ತಂದಿದೆ.
ನಿಜ ಹೇಳಬೇಕೆಂದರೆ, ಶರತ್ ಚಂದ್ರ ಚಟರ್ಜಿ ಅವರ ಪ್ರಸಿದ್ಧ ಕಾದಂಬರಿ ‘ಶ್ರೀಕಾಂತ’ದಲ್ಲಿ ಅಪಹಾಸ್ಯಕ್ಕೆ ಒಳಗಾಗುವ ಸಮುದಾಯ ಎಂದು ಉಲ್ಲೇಖಿಸಲಾದ ‘ಖೊಟ್ಟಾ ಮುಸ್ಲಿಮರು’, ಅಥವಾ 1931 ರ ಜಾತಿ ಜನಗಣತಿಯಲ್ಲಿ ‘ಹಿಂದುಳಿದವರು’ ಎಂದು ಉಲ್ಲೇಖಿಸಲಾದ ‘ಮುಸ್ಲಿಂ ದಫಾದಾರ್’, ಅಥವಾ ಹಿಂದೂ ಪರಿಶಿಷ್ಟ ಜಾತಿಯ ಸಮಾನಾಂತರವಾಗಿರುವ ‘ಮುಸ್ಲಿಂ ಭಂಗಿ’ ಅಥವಾ ‘ಹಲಾಲ್‌ಖೋರ್’ ಅವರಂತಹ ಮುಸ್ಲಿಂ ಜಾತಿ ಸಮೂಹಗಳು ತಮ್ಮ ಹಿಂದುಳಿದಿರುವಿಕೆಗಾಗಿ ಒಬಿಸಿ ಸ್ಥಾನಮಾನವನ್ನು ಪಡೆಯಬೇಕಿತ್ತು. ಆದರೆ ದುರದೃಷ್ಟವಶಾತ್ ಅವರನ್ನು ಕೈಬಿಡಲಾಗಿದೆ.
‘ಎರಡನೇ ಎಸ್ಐಆರ್’ ಭೀತಿ
ಪ್ರಸ್ತುತ ಪಶ್ಚಿಮ ಬಂಗಾಳದ ಕ್ಯಾಬಿನೆಟ್ ಸಚಿವ ಕ್ಷುದಿರಾಮ್ ತುಡು ಅವರು ಮಮತಾ ಬ್ಯಾನರ್ಜಿ ಆಡಳಿತಾವಧಿಯಲ್ಲಿ ವಿತರಿಸಲಾದ ಜಾತಿ ಪ್ರಮಾಣಪತ್ರಗಳನ್ನು ಮರು-ಪರಿಶೀಲನೆ ಮಾಡಲಾಗುವುದು ಎಂದು ಘೋಷಿಸಿರುವುದರಿಂದ, ಸರ್ಕಾರಿ ಉದ್ಯೋಗದಲ್ಲಿರುವ ಹೆಚ್ಚಿನ ಸಂಖ್ಯೆಯ ಮುಸ್ಲಿಮರು “ಎರಡನೇ ಎಸ್ಐಆರ್” (SIR) ಭೀತಿಯಿಂದ ಆತಂಕಕ್ಕೆ ಒಳಗಾಗಿದ್ದಾರೆ. ಈ ಹಿಂದೆ ಮತದಾನದ ಮುನ್ನ ನಡೆದ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯಲ್ಲಿ ಕನಿಷ್ಠ 27 ಲಕ್ಷ ಮತದಾರರನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿತ್ತು.
ಬಿಹಾರ ಅಥವಾ ತೆಲಂಗಾಣ ಮಾದರಿಯನ್ನು ಅನುಸರಿಸಿ ಸಮಗ್ರ ಜಾತಿ ಸಮೀಕ್ಷೆಯನ್ನು ನಡೆಸಲು ಮಮತಾ ಬ್ಯಾನರ್ಜಿ ಸರ್ಕಾರಕ್ಕೆ ಸಾಕಷ್ಟು ಅವಕಾಶಗಳಿದ್ದವು. ಹಾಗೆ ಮಾಡಿದ್ದರೆ ಅದು ಖಂಡಿತವಾಗಿಯೂ ನ್ಯಾಯಾಲಯದ ಪರಿಶೀಲನೆಯಲ್ಲೂ ಉತ್ತೀರ್ಣವಾಗುತ್ತಿತ್ತು. ಆದರೆ ಅವರು ಈ ಹಾದಿಯನ್ನು ತುಳಿಯಲಿಲ್ಲ.
2024 ರ ಲೋಕಸಭಾ ಚುನಾವಣೆಗೆ ಮುನ್ನ ನಡೆದ ವಿರೋಧ ಪಕ್ಷಗಳ ‘ಇಂಡಿಯಾ’ (INDIA) ಒಕ್ಕೂಟದ ಸಭೆಯಲ್ಲಿ, ರಾಹುಲ್ ಗಾಂಧಿ ಪ್ರಸ್ತಾಪಿಸಿದ ದೇಶವ್ಯಾಪಿ ಜಾತಿ ಜನಗಣತಿಯನ್ನು ವಿರೋಧಿಸಿದ ಏಕೈಕ ಪಕ್ಷ ಟಿಎಂಸಿ ಆಗಿತ್ತು. ರಾಜ್ಯದ ಮುಸ್ಲಿಂ ನಾಯಕತ್ವವೂ ಸಹ ಜಾತಿ ಗುರುತುಗಳ ರಾಜಕೀಯೀಕರಣದಿಂದ ದೂರ ಉಳಿದು, ಈ ಸಮುದಾಯಗಳ ಹಿಂದುಳಿದಿರುವಿಕೆಯನ್ನು ಟಿಎಂಸಿ ನಾಯಕರಂತೆಯೇ ಕೇವಲ “ಮುಸ್ಲಿಂ ಸಮಸ್ಯೆ” ಎಂಬಂತೆ ನೋಡಿತು.
ಇದರ ಪರಿಣಾಮವಾಗಿ, ಇಂದು ನೈಜವಾಗಿ ಹಿಂದುಳಿದಿರುವ ಅನೇಕ ಮುಸ್ಲಿಂ ಜಾತಿ ಸಮುದಾಯಗಳ ಭವಿಷ್ಯ ಕತ್ತಲಿಗೆ ತಳ್ಳಲ್ಪಟ್ಟಿದೆ. ಈಗಿನ ನಿಜವಾದ ಅಗತ್ಯವೆಂದರೆ, ರಾಜಕೀಯ ಲಾಭದ ಆಚೆಗೆ ಸಾಮಾಜಿಕ ನ್ಯಾಯ ಮತ್ತು ಪೌರತ್ವದ ಆದರ್ಶಗಳ ಅಡಿಯಲ್ಲಿ ಅವರ ಹಿಂದುಳಿದಿರುವಿಕೆಯ ಬಗ್ಗೆ ಗಂಭೀರ ಚರ್ಚೆ ನಡೆಯಬೇಕಿದೆ ಆದರೆ ಈ ಬಗ್ಗೆ ವಿರೋಧ ಪಕ್ಷಕ್ಕಾಗಲಿ, ಆಡಳಿತ ಪಕ್ಷಕ್ಕಾಗಲಿ ನೈಜ ಕಾಳಜಿ ಇದಂತೆ ಕಾಣುತ್ತಿಲ್ಲ.
