ವಾಷಿಂಗ್ಟನ್ ಡಿಸಿ: ಜಾಗತಿಕ ಇಂಧನ ಮಾರುಕಟ್ಟೆಗಳನ್ನು ಅಸ್ತವ್ಯಸ್ತಗೊಳಿಸಿರುವ ಒಂದು ತಿಂಗಳ ಕಾಲ ನಡೆದ ಯುದ್ಧದ ಸಂಭಾವ್ಯ ಅಂತ್ಯದ ಬಗ್ಗೆ ಸುಳಿವು ನೀಡುವ ಮೂಲಕ, ಮುಂದಿನ ಎರಡು ಮೂರು ವಾರಗಳ ಮೊದಲೇ ಇರಾನ್ ವಿರುದ್ಧದ ತನ್ನ ಮಿಲಿಟರಿ ಕಾರ್ಯಾಚರಣೆಯನ್ನು ವಾಷಿಂಗ್ಟನ್ ಕೊನೆಗೊಳಿಸಬಹುದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಂಗಳವಾರ ಹೇಳಿದ್ದಾರೆ.
ಆ ನಂತರ, ಅಧ್ಯಕ್ಷರು ಬುಧವಾರ ರಾತ್ರಿ 9 ಗಂಟೆಗೆ (ಗುರುವಾರ ಬೆಳಿಗ್ಗೆ 6.30 IST) ಇರಾನ್ ಕುರಿತು ಪ್ರಮುಖ ನವೀಕರಣವನ್ನು ನೀಡಲು ರಾಷ್ಟ್ರವನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ ಎಂದು ಶ್ವೇತಭವನ ತಿಳಿಸಿದೆ.
“ನಾವು ಶೀಘ್ರದಲ್ಲೇ ಹೊರಡುತ್ತೇವೆ,” ಎಂದು ಹೇಳಿದ ಟ್ರಂಪ್, “ಎರಡು ವಾರಗಳಲ್ಲಿ, ಬಹುಶಃ ಎರಡು ವಾರಗಳಲ್ಲಿ, ಬಹುಶಃ ಮೂರು ವಾರಗಳಲ್ಲಿ” ಹಿಂತೆಗೆದುಕೊಳ್ಳುವಿಕೆ ಸಂಭವಿಸಬಹುದು ಎಂದು ಹೇಳಿದ್ದಾರೆ.
ಸಂಘರ್ಷವನ್ನು ಕೊನೆಗೊಳಿಸಲು ಅಮೆರಿಕಕ್ಕೆ ಇರಾನ್ ಜೊತೆ ಒಪ್ಪಂದ ಅಗತ್ಯವಿಲ್ಲ ಎಂದು ಟ್ರಂಪ್ ಹೇಳಿದ್ದು, “ಇರಾನ್ ಒಪ್ಪಂದ ಮಾಡಿಕೊಳ್ಳಬೇಕಾಗಿಲ್ಲ,” ಎಂದಿದ್ದಾರೆ. ಅವರು ನನ್ನ ಜೊತೆ ಒಪ್ಪಂದ ಮಾಡಿಕೊಳ್ಳಬೇಕಾಗಿಲ್ಲ” ಎಂದು ಒತ್ತಿ ಹೇಳಿದ್ದಾರೆ.
ಈ ಮಧ್ಯೆ, ಇರಾನ್ ಅನ್ನು “ಶಿಲಾಯುಗಕ್ಕೆ ಇಳಿಸಿದ” ನಂತರ ಮತ್ತು ಪರಮಾಣು ಶಸ್ತ್ರಾಸ್ತ್ರವನ್ನು ತ್ವರಿತವಾಗಿ ಅಭಿವೃದ್ಧಿಪಡಿಸುವ ಸಾಮರ್ಥ್ಯವನ್ನು ಕಳೆದುಕೊಂಡ ನಂತರವೇ ಮಿಲಿಟರಿ ಕಾರ್ಯಾಚರಣೆ ಕೊನೆಗೊಳ್ಳುತ್ತದೆ ಎಂದಿರುವ ಅವರು “ಹಾಗಾದರೆ ನಾವು ಹೊರಡುತ್ತೇವೆ” ಎಂದು ಹೇಳಿದ್ದಾರೆ.
ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಅವರು, ತಮ್ಮ ದೇಶವು ಯುದ್ಧವನ್ನು ಕೊನೆಗೊಳಿಸಲು “ಅಗತ್ಯವಾದ ಇಚ್ಛಾಶಕ್ತಿ” ಹೊಂದಿದೆ ಎಂದು ಹೇಳಿದ ನಂತರ ಟ್ರಂಪ್ ಅವರ ಹೇಳಿಕೆ ಬಂದಿದೆ.
