ಸುಮಾರು 10 ಗಂಟೆಗಳ ಕಾಲ ವೀಡಿಯೊ ಕರೆ ಮೂಲಕ ಡಿಜಿಟಲ್ ಬಂಧನಕ್ಕೆ ಒಳಗಾಗಿದ್ದ ತನ್ನ ಹೆತ್ತವರು ಹಣ ಕಳೆದುಕೊಳ್ಳದಂತೆ 8ನೇ ತರಗತಿಯ ಬಾಲಕನೊಬ್ಬ ರಕ್ಷಿಸಿರುವ ಘಟನೆ ಬೆಳಕಿಗೆ ಬಂದಿದೆ. ಉತ್ತರ ಪ್ರದೇಶದ ಬರೇಲಿಯಲ್ಲಿ ‘ಡಿಜಿಟಲ್ ಬಂಧನದ’ ಪ್ರಕರಣ ದೇಶದ ಗಮನಸೆಳೆದಿದೆ.
ಪ್ರೇಮ್ ನಗರ ಪ್ರದೇಶದಿಂದ ಈ ಘಟನೆ ವರದಿಯಾಗಿದೆ. ಪೊಲೀಸರ ಪ್ರಕಾರ, ಸೈಬರ್ ವಂಚಕರು ಸ್ಥಳೀಯ ವ್ಯಾಪಾರಿ ಸಂಜಯ್ ಸಕ್ಸೇನಾ ಮತ್ತು ಅವರ ಪತ್ನಿಯನ್ನು ಅಪರಿಚಿತ ಸಂಖ್ಯೆಯಿಂದ ಕರೆ ಮಾಡಿ ತನಿಖಾ ಸಂಸ್ಥೆಯ ಅಧಿಕಾರಿಗಳಂತೆ ನಟಿಸುವ ಮೂಲಕ ಡಿಜಿಟಲ್ ಅರೆಸ್ಟ್ ಮಾಡಿದ್ದರು.
ಕರೆ ಮಾಡಿದವರು ಸಕ್ಸೇನಾ ಅವರನ್ನು ಭಯೋತ್ಪಾದಕ ಚಟುವಟಿಕೆಗಳು ಮತ್ತು ಬಹುಕೋಟಿ ಹಗರಣಕ್ಕೆ ಸಂಬಂಧಿಸಿದವರೆಂದು ಆರೋಪಿಸಿದ್ದಾನೆ. ವೀಡಿಯೊ ಕರೆಯ ಸಮಯದಲ್ಲಿ ನಕಲಿ ಬಂಧನ ವಾರಂಟ್ ಅನ್ನು ಸಹ ಪ್ರದರ್ಶಿಸಿದ್ದಾರೆ. ದಂಪತಿಗಳಿಗೆ ಬೆದರಿಕೆ ಹಾಕಿ, ಮಾನಸಿಕವಾಗಿ ಒತ್ತಡ ಹೇರಲಾಯಿತು, ವಂಚಕರು ಡಿಜಿಟಲ್ ಬಂಧನದ ನೆಪದಲ್ಲಿ ಅವರನ್ನು ನಿರಂತರವಾಗಿ ಕ್ಯಾಮೆರಾದಲ್ಲಿ ಇರಿಸಿಕೊಂಡರು.
ವಂಚಕರು ಕಟ್ಟುನಿಟ್ಟಿನ ಷರತ್ತುಗಳನ್ನು ವಿಧಿಸಿ, ದಂಪತಿಗಳು ತಮ್ಮ ಮನೆಯಿಂದ ಹೊರಹೋಗದಂತೆ, ವೀಡಿಯೊ ಕರೆಯನ್ನು ಎಲ್ಲಾ ಸಮಯದಲ್ಲೂ ಸಕ್ರಿಯವಾಗಿರಿಸಿಕೊಳ್ಳುವಂತೆ ಮತ್ತು ಊಟ ಮತ್ತು ವಿಶ್ರಾಂತಿ ಸೇರಿದಂತೆ ಪ್ರತಿಯೊಂದು ಚಟುವಟಿಕೆಯನ್ನು ಕಣ್ಗಾವಲಿನಲ್ಲಿ ನಡೆಸುವಂತೆ ಸೂಚಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ದೀರ್ಘಾವಧಿಯ ಕರೆಯ ಸಮಯದಲ್ಲಿ, ವಂಚಕರು ಸೂಕ್ಷ್ಮ ಬ್ಯಾಂಕ್ ವಿವರಗಳನ್ನು ಹೊರತೆಗೆಯುವಲ್ಲಿ ಯಶಸ್ವಿಯಾದರು. ಹಣ ವರ್ಗಾಯಿಸಿಕೊಳ್ಳಲು ತಯಾರಿ ನಡೆಸುತ್ತಿದ್ದರು.
ದೀರ್ಘಕಾಲದ ವಿಚಾರಣೆಯಿಂದ ಅನುಮಾನಗೊಂಡ ಅವರ ಮಗ, 8 ನೇ ತರಗತಿಯ ವಿದ್ಯಾರ್ಥಿ ತನ್ಮಯ್, ಏನೋ ತಪ್ಪಾಗಿದೆ ಎಂದು ಗ್ರಹಿಸಿದ್ದಾನೆ. ಅಪಾರ ಭಯದಲ್ಲಿದ್ದ ಅವನ ಪೋಷಕರ ಆರಂಭಿಕ ಪ್ರತಿರೋಧದ ಹೊರತಾಗಿಯೂ, ಹುಡುಗ ತಡರಾತ್ರಿ ಮಧ್ಯಪ್ರವೇಶಿಸಿ ಫೋನ್ ಅನ್ನು ಫ್ಲೈಟ್ ಮೋಡ್ಗೆ ಬದಲಾಯಿಸಿದ್ದಾನೆ. ಆ ಮೂಲಕ ವಂಚಕರೊಂದಿಗಿನ ಸಂವಹನವನ್ನು ಹಠಾತ್ತನೆ ಕಡಿತಗೊಳಿಸಿ ಸಮಯಪ್ರಜ್ಞೆ ತೋರಿಸಿದ್ದಾನೆ.
ಅವನ ಕೃತ್ಯವು ನಿರ್ಣಾಯಕ ಕ್ಷಣದಲ್ಲಿ ವಂಚನೆಯನ್ನು ತಪ್ಪಿಸಿತು. ಪೋಷಕರಿಗೆ ಆಗುತ್ತಿದ್ದ ಸಂಭವನೀಯ ಆರ್ಥಿಕ ನಷ್ಟವನ್ನು ತಪ್ಪಿಸಿದ್ದಾನೆ.
ಮರುದಿನ ಬೆಳಿಗ್ಗೆ, ಕುಟುಂಬವು ಪ್ರೇಮ್ ನಗರ ಪೊಲೀಸ್ ಠಾಣೆಯನ್ನು ಸಂಪರ್ಕಿಸಿತು. ಫೋನ್ ಅನ್ನು ಮತ್ತೆ ಆನ್ ಮಾಡಿದಾಗ, ವಂಚಕರು ಮರುಸಂಪರ್ಕಿಸಲು ಪ್ರಯತ್ನಿಸಿದರು. ಆದರೆ ಕರೆಗೆ ಉತ್ತರಿಸಿದ ಪೊಲೀಸ್ ಅಧಿಕಾರಿಗಳು ಅವರನ್ನು ಎದುರಿಸಿದರು.
ಪ್ರಕರಣ ದಾಖಲಿಸಲಾಗಿದೆ ಎಂದು ಎಸ್ಪಿ ಸಿಟಿ ಮನುಷ್ ಪರೀಕ್ ದೃಢಪಡಿಸಿದರು. ಈ ಬಗ್ಗೆ ನಾಗರಿಕರು ಜಾಗರೂಕರಾಗಿರಲು ಒತ್ತಾಯಿಸಿದರು. ಡಿಜಿಟಲ್ ಬಂಧನ ಅಥವಾ ಬೆದರಿಕೆಗಳನ್ನು ಒಳಗೊಂಡಿರುವ ಯಾವುದೇ ಕರೆಗಳನ್ನು ತಕ್ಷಣ ಪೊಲೀಸರಿಗೆ ವರದಿ ಮಾಡಬೇಕು. ಒತ್ತಡದಲ್ಲಿ ಯಾವುದೇ ಹಣಕಾಸಿನ ವಿವರಗಳನ್ನು ಹಂಚಿಕೊಳ್ಳಬಾರದು ಎಂದು ಅವರು ಸಲಹೆ ನೀಡಿದರು.
