ಗೋವಾದ ಪಣಜಿಯಲ್ಲಿ ನಡೆದ ನೀಟ್-ಯುಜಿ ಪ್ರತಿಭಟನೆಯಲ್ಲಿ ಉಮರ್ ಖಾಲಿದ್ ಪರ ಘೋಷಣೆಗಳನ್ನು ಕೂಗಿದ ಕೆಲವು ವಿದ್ಯಾರ್ಥಿಗಳ ಪ್ರತಿಭಟನೆ ಹಿಂದಿನ ಹಣಕಾಸು ಮತ್ತು ಉದ್ದೇಶದ ಬಗ್ಗೆ ಗೋವಾ ಪೊಲೀಸರು ಸಂಘಟಕರನ್ನು ವಿಚಾರಣೆಗೆ ಒಳಪಡಿಸಿದ್ದಾರೆ ಎಂದು ತಿಳಿದುಬಂದಿದೆ.
ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆಯನ್ನು ವಿರೋಧಿಸಿ ನಡೆಸುತ್ತಿದ್ದ ಪ್ರತಿಭಟನೆ ಸಂದರ್ಭದಲ್ಲಿ ಜೈಲಿನಲ್ಲಿರುವ ವಿದ್ಯಾರ್ಥಿ ಕಾರ್ಯಕರ್ತ ಉಮರ್ ಖಾಲಿದ್ಗೆ ಬೆಂಬಲ ವ್ಯಕ್ತಪಡಿಸಿದ ಆರೋಪದ ಮೇಲೆ ಗೋವಾ ಪೊಲೀಸರು ಕಳೆದ ವಾರ ಇಬ್ಬರು ಯುವಕರನ್ನು ಬಂಧಿಸಿದ್ದಾರೆ. 2020 ರ ಈಶಾನ್ಯ ದೆಹಲಿ ಗಲಭೆಗೆ ಸಂಬಂಧಿಸಿದ ಪ್ರಕರಣದಲ್ಲಿ ಖಾಲಿದ್ ಅವರನ್ನು ಬಂಧಿಸಲಾಗಿದೆ.
ಪ್ರಧಾನ್ ಅವರ ರಾಜೀನಾಮೆಗೆ ಒತ್ತಾಯಿಸಿ ಕಳೆದ ವಾರ ಗೋವಾದ ಮಾಪುಸಾ ಮತ್ತು ಪಣಜಿಯಲ್ಲಿ ನಡೆದ ಎರಡು ಪ್ರತಿಭಟನೆ ಆಯೋಜಿಸಿದ್ದ ಸಂಘಟಕರನ್ನು ಕರಾವಳಿ ರಾಜ್ಯ ಪೊಲೀಸರು ವಿಚಾರಣೆಗೆ ಒಳಪಡಿಸಿದ್ದರು.
ಎರಡೂ ಕಾರ್ಯಕ್ರಮಗಳನ್ನು ಉಜ್ವಾದ್ ಸಂಸ್ಥೆ ಆಯೋಜಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಉಮರ್ ಖಾಲಿದ್ ಪರ ಫಲಕಗಳಿಗೆ ಆಕ್ಷೇಪಣೆ ವ್ಯಕ್ತಪಡಿಸಿ ಸ್ಥಳೀಯ ಗುಂಪಾದ ‘ಸಿಟಿಜನ್ಸ್ ಆಫ್ ಮಾಪುಸಾ’ ಪೊಲೀಸ್ ದೂರು ದಾಖಲಿಸಿತ್ತು.
ಸಭೆಗಳನ್ನು ಆಯೋಜಿಸಿದ್ದ ಎನ್ಜಿಒದ ಕಾರ್ಯದರ್ಶಿ ಅಮ್ರೀನ್ ಶೇಖ್ ಅವರಿಗೆ ಬುಧವಾರ ಪಣಜಿ ಪೊಲೀಸರು ಸಮನ್ಸ್ ಜಾರಿ ಮಾಡಿದ್ದಾರೆ.
ಶೇಖ್ ಪ್ರತಿಕ್ರಿಯೆಗೆ ಲಭ್ಯವಿಲ್ಲದಿದ್ದರೂ, ತನಿಖಾ ಅಧಿಕಾರಿ ಸುಮಾರು 240 ಪ್ರಶ್ನೆಗಳನ್ನು ಕೇಳಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಪ್ರಾಥಮಿಕವಾಗಿ ಪ್ರತಿಭಟನೆಗೆ ಬರುತ್ತಿದ್ದ ಹಣದ ಮೂಲ, ಉಮರ್ ಖಾಲಿದ್ ಅವರನ್ನು ಬೆಂಬಲಿಸಿ ಘೋಷಣೆಗಳನ್ನು ಕೂಗುವ ಹಿಂದಿನ ಉದ್ದೇಶದ ಬಗ್ಗೆ ಪ್ರಶ್ನಿಸಿದ್ದಾರೆ.
ಮೂಲವೊಂದರ ಪ್ರಕಾರ, “ತನಿಖಾ ಅಧಿಕಾರಿ ಶೇಖ್ ಅವರಿಗೆ, ಪ್ರತಿಭಟನೆಯನ್ನು ಯಾರು ಮುನ್ನಡೆಸುತ್ತಿದ್ದರು? ನೀವು ಪ್ರತಿಭಟನೆಗೆ ಸಂಬಂಧಿಸಿದ ಯಾವುದೇ ವಾಟ್ಸಾಪ್, ಟೆಲಿಗ್ರಾಮ್ ಅಥವಾ ಸಿಗ್ನಲ್ ಗುಂಪಿನ ಸದಸ್ಯರಾಗಿದ್ದೀರಾ? ನೀವು ಸ್ಥಳಕ್ಕೆ ಹೇಗೆ ಪ್ರಯಾಣಿಸಿದ್ದೀರಿ? ಪ್ರತಿಭಟನೆಯ ಮೂಲಕ ನೀವು ಏನನ್ನು ಸಾಧಿಸಲು ಉದ್ದೇಶಿಸಿದ್ದೀರಿ? ನೀವು ಯಾವುದೇ ರಾಜಕೀಯ ಪಕ್ಷ, ಸಾಮಾಜಿಕ ಸಂಘಟನೆ ಅಥವಾ ವಿದ್ಯಾರ್ಥಿ ಸಂಘಟನೆಯೊಂದಿಗೆ ಸಂಬಂಧ ಹೊಂದಿದ್ದೀರಾ” ಎಂದು ಪ್ರಶ್ನಿಸಿದ್ದಾರೆ.
