ಒಂದೆಡೆ ವಿಶೇಷ ತೀವ್ರ ಮತಪಟ್ಟಿ ಪರಿಷ್ಕರಣೆ (SIR) ಹೆಸರಿನಲ್ಲಿ ಲಕ್ಷಾಂತರ ಅರ್ಹ ಮತದಾರರ ಹೆಸರುಗಳು ಡಿಲೀಟ್ ಆಗುವ ಭೀತಿ ಎದುರಾಗಿದ್ದರೆ, ಇನ್ನೊಂದೆಡೆ ರಾಜ್ಯದಲ್ಲಿ ಹೊಸದಾಗಿ 1,848 ಹೆಚ್ಚುವರಿ ಮತಗಟ್ಟೆಗಳನ್ನು ಸ್ಥಾಪಿಸಲು ಕೇಂದ್ರ ಚುನಾವಣಾ ಆಯೋಗ ನಿರ್ದೇಶನ ನೀಡಿರುವುದು ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ‘ಅರ್ಹ ಮತದಾರರನ್ನೇ ಪಟ್ಟಿಯಿಂದ ಹೊರಗಿಡುತ್ತಿರುವಾಗ, ಈ ಹೊಸ ಮತಗಟ್ಟೆಗಳನ್ನು ಯಾರಿಗಾಗಿ ಸ್ಥಾಪಿಸಲಾಗುತ್ತಿದೆ? ಮತದಾರರ ಸಂಖ್ಯೆಯೇ ಕಮ್ಮಿಯಾಗುತ್ತಿರುವಾಗ ಹೊಸ ಬೂತ್ಗಳು ಯಾವ ಪುರುಷಾರ್ಥಕ್ಕೆ?’ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿ ಸೃಷ್ಟಿಯಾಗಿದೆ.
ರಾಜ್ಯದ ಮುಖ್ಯ ಚುನಾವಣಾಧಿಕಾರಿ ವಿ. ಅನ್ಬುಕುಮಾರ್ ಅವರು ನೀಡಿರುವ ಮಾಹಿತಿಯಂತೆ, ಪ್ರತಿ ಮತಗಟ್ಟೆಗೆ ಗರಿಷ್ಠ 1,200 ಮತದಾರರು ಹಾಗೂ 2 ಕಿ.ಮೀ. ಅಂತರದ ನಿಯಮಾವಳಿಯಂತೆ ಈ ಪುನರ್ ವಿಂಗಡಣೆ ನಡೆಯುತ್ತಿದೆ. 1,200ಕ್ಕೂ ಹೆಚ್ಚು ಮತದಾರರಿರುವ ಕಡೆ 1,803 ಹೊಸ ಬೂತ್ಗಳು ಮತ್ತು 2 ಕಿ.ಮೀ.ಗಿಂತ ಹೆಚ್ಚು ಅಂತರವಿರುವ ಕಡೆ 60 ಹೊಸ ಮತಗಟ್ಟೆಗಳನ್ನು ಸೃಜಿಸಲಾಗುತ್ತಿದ್ದು, ಅತ್ಯಲ್ಪ ಮತದಾರರಿರುವ ಮತಗಟ್ಟೆಗಳನ್ನು ವಿಲೀನಗೊಳಿಸಲಾಗುತ್ತಿದೆ. ಆಗಸ್ಟ್ 24ರಂದು ಕರಡು ಮತದಾರರ ಪಟ್ಟಿ ಪ್ರಕಟವಾಗಲಿದ್ದು, ಅದೇ ದಿನ ಈ ಹೊಸ ಮತಗಟ್ಟೆಗಳ ವಿಂಗಡಣೆ ಜಾರಿಗೆ ಬರಲಿದೆ.
ಮತ್ತೊಂದೆಡೆ, SIR ಗಡುವು ವಿಸ್ತರಣೆಯಾದ ನಂತರ ಕಳೆದ ಒಂದೇ ವಾರದಲ್ಲಿ 2.41 ಲಕ್ಷಕ್ಕೂ ಹೆಚ್ಚು ಜನರು ನಮೂನೆ ಭರ್ತಿ ಮಾಡಿಕೊಟ್ಟು ‘ಎಎಸ್ಡಿಡಿಒ’ (ಅನುಮಾನಾಸ್ಪದ/ಸ್ಥಳಾಂತರ/ಮೃತ/ದ್ವಿಪ್ರತಿ) ಪಟ್ಟಿಯಿಂದ ಹೊರಬಂದಿದ್ದಾರೆ. ಇದರಿಂದಾಗಿ ಆಗಸ್ಟ್ 5ರಂದು 1.11 ಕೋಟಿಯಷ್ಟಿದ್ದ ಎಎಸ್ಡಿಡಿಒ ಮತದಾರರ ಸಂಖ್ಯೆ 1.08 ಕೋಟಿಗೆ ಇಳಿಕೆಯಾಗಿದೆ. ಶಾಶ್ವತವಾಗಿ ಸ್ಥಳಾಂತರಗೊಂಡಿದ್ದರೆನ್ನಲಾದ 95,037 ಜನರು, ಪತ್ತೆಯಾಗದಿದ್ದ 85,267 ಜನರು, ಅರ್ಜಿ ನೀಡಲು ನಿರಾಕರಿಸಿದ್ದ 80,000 ಜನರು ಹಾಗೂ ದ್ವಿಪ್ರತಿಯಲ್ಲಿದ್ದ 13,000 ಜನರು ಬಿಎಲ್ಒಗಳಿಗೆ ವಿವರ ನೀಡಿ ಪಟ್ಟಿಯಲ್ಲಿ ಹೆಸರು ಉಳಿಸಿಕೊಂಡಿದ್ದಾರೆ.
SIR ಪ್ರಕ್ರಿಯೆಯ ಸಮಯಾವಕಾಶ ವಿಸ್ತರಿಸಿದ್ದರಿಂದ ಕಳೆದ ಒಂದೇ ವಾರದಲ್ಲಿ 2.41 ಲಕ್ಷ ಮತದಾರರು ಅಗತ್ಯ ದಾಖಲೆ ನೀಡಿ ಎಎಸ್ಡಿಡಿಒ (ASDDO) ಪಟ್ಟಿಯಿಂದ ಹೊರಬಂದಿದ್ದಾರೆ. ಬುಧವಾರದ ಅಂತ್ಯದ ವೇಳೆಗೆ ರಾಜ್ಯದಲ್ಲಿ ಎಎಸ್ಡಿಡಿಒ ಪಟ್ಟಿಯಲ್ಲಿರುವ ಮತದಾರರ ಸಂಖ್ಯೆ 1.08 ಕೋಟಿಗೆ ಇಳಿಕೆಯಾಗಿದೆ. ಹಾಗಾಗಿ ಸೆಪ್ಟೆಂಬರ್ ವರೆಗೆ ಸಮಯವನ್ನು ವಿಸ್ತರಿಸಬೇಕೆಂ ಒತ್ತಾಯಗಳು ಕೇಳಿಬಂದಿದೆ.
ಈ 1.08 ಕೋಟಿ ಎಎಸ್ಡಿಡಿಒ ಮತದಾರರ ಸಂಪೂರ್ಣ ಪಟ್ಟಿಯನ್ನು ಎಲ್ಲಾ ಪ್ರಮುಖ ರಾಜಕೀಯ ಪಕ್ಷಗಳಿಗೆ ಹಸ್ತಾಂತರಿಸಲಾಗಿದೆ ಹಾಗೂ ಸಾರ್ವಜನಿಕರ ಮಾಹಿತಿಗಾಗಿ ಆಯೋಗದ ವೆಬ್ಸೈಟ್ನಲ್ಲೂ ಪ್ರಕಟಿಸಲಾಗಿದೆ. ಗಡುವು ಮುಗಿಯಲು 2 ದಿನಗಳಿರುವಾಗ, ಅಂದರೆ ಆಗಸ್ಟ್ 15 ರಂದು ಎಎಸ್ಡಿಡಿಒ ಪಟ್ಟಿಯನ್ನು ಮತ್ತೊಮ್ಮೆ ಅಂತಿಮವಾಗಿ ನವೀಕರಿಸಿ (Update) ಪ್ರಕಟಿಸಲಾಗುತ್ತದೆ.
ಸಾರ್ವಜನಿಕರು ತಕ್ಷಣವೇ ವೆಬ್ಸೈಟ್ನಲ್ಲಿ ತಮ್ಮ ಹೆಸರು ಎಎಸ್ಡಿಡಿಒ ಪಟ್ಟಿಯಲ್ಲಿದೆಯೇ ಎಂದು ಪರಿಶೀಲಿಸಬೇಕು. ಒಂದು ವೇಳೆ ಹೆಸರಿದ್ದರೆ, ಸಂಬಂಧಪಟ್ಟ ಬಿಎಲ್ಒ (BLO – ಬೂತ್ ಮಟ್ಟದ ಅಧಿಕಾರಿ) ಅವರನ್ನು ಸಂಪರ್ಕಿಸಿ ಅಗತ್ಯ ದಾಖಲೆ ಒದಗಿಸುವ ಮೂಲಕ ತಮ್ಮ ಹೆಸರನ್ನು ಮುಖ್ಯ ಮತದಾರರ ಪಟ್ಟಿಗೆ ಮರುಸೇರ್ಪಡೆ (Rollback) ಮಾಡಿಸಿಕೊಳ್ಳಬಹುದು.
ಆಗಸ್ಟ್ 15ರಂದು ನವೀಕರಿಸಿದ ಎಎಸ್ಡಿಡಿಒ ಪಟ್ಟಿ ಮತ್ತೆ ಪ್ರಕಟವಾಗಲಿದ್ದು, ಸಾರ್ವಜನಿಕರು ಆನ್ಲೈನ್ನಲ್ಲಿ ಹೆಸರು ಪರಿಶೀಲಿಸಿಕೊಳ್ಳಬಹುದು. ಪಟ್ಟಿಯಲ್ಲಿ ಹೆಸರಿಲ್ಲದಿದ್ದರೆ ತಕ್ಷಣವೇ ಬಿಎಲ್ಒಗಳನ್ನು ಸಂಪರ್ಕಿಸಿ ಅಗತ್ಯ ದಾಖಲೆ ಒದಗಿಸಿ ‘ರೋಲ್ಬ್ಯಾಕ್’ ಮಾಡಿಸಿಕೊಳ್ಳಲು ಆಯೋಗ ಕೋರಿದೆ.
ಆಯೋಗವು ಹೊಸ 1,848 ಮತಗಟ್ಟೆಗಳನ್ನುಸ್ಥಾಪಿಸಲು ಉದ್ದೇಶಿಸಿರುವುದನ್ನು ಯಾರೂ ಪ್ರಶ್ನಿಸುತ್ತಿಲ್ಲ, ಅದು ಸ್ವಾಗತಾರ್ಹವೆ, ಆದರೆ ಅದಕ್ಕೂ ಮೊದಲು ಅರ್ಹ ಮತದಾರರನ್ನು ಮತಪಟ್ಟಿಯಿಂದ ಹೊರಗಿಡುವ ಪ್ರಕ್ರಿಯೆ ನಿಲ್ಲಬೇಕು ಎಂದು ನಾಗರಿಕ ಮತ ಕಾವಲು ಸಮಿತಿ ಹಾಗೂ ಸಂಘ ಸಂಸ್ಥೆಗಳ ಒತ್ತಾಯಿಸಿವೆ.
ಎನ್ಯೂಮರೇಷನ್ ಫಾರಂಗಳನ್ನು ಮರಳಿಸುವ ಕಾಲಾವಧಿಯನ್ನು ಚುನಾವಣಾ ಅಯೋಗ ವಿಸ್ತರಿಸಿದರಿಂದ ಆಗಸ್ಟ್ 5ರಂದು 1.11 ಕೋಟಿಯಷ್ಟಿದ್ದ ಎಎಸ್ಡಿಡಿಒ ಮತದಾರರ ಸಂಖ್ಯೆ 1.08 ಕೋಟಿಗೆ ಇಳಿಕೆಯಾಗಿದೆ, ಈ ಸಂಖ್ಯೆ ಇನ್ನಷ್ಟು ಕಡಿಮೆಯಾಗುವ ಸಾಧ್ಯತೆ ಇದ್ದು ಗಡುವನ್ನು ಸೆಪ್ಟಂಬರ್ ವರಗೆ ವಿಸ್ತರಿಸಬೇಕು, ಆಮೂಲಕ ಯಾವುದೇ ಅರ್ಹ ಮತದಾರರ ಹೆಸರು ಮತ ಪಟ್ಟಿಯಿಂದ ಹೊರಗುಳಿಯದಂತೆ ನೋಡಿಕೊಳ್ಳಬೇಕು ಎಂದಿದೆ.
ಇದಲ್ಲದೆ ‘ಲಾಜಿಕಲ್ ಡಿಸ್ಕ್ರಿಪೆನ್ಸಿ’ (ತಾರ್ಕಿಕ ವೈರುದ್ಯ) ಎಂಬ ಮತ್ತೊಂದು ವಿಧಾನದಿಂದ ಮತದಾರರು ತಮ್ಮ ಹಕ್ಕುಗಳನ್ನು ಉಳಿಸಿಕೊಳ್ಳಲು ಹರಸಾಹಸ ಪಡಬೇಕಿದೆ. ಹಾಗಾಗಿ ಈ ‘ಲಾಜಿಕಲ್ ಡಿಸ್ಕ್ರಿಪೆನ್ಸಿ’ ಎಂಬ ವರ್ಗವನ್ನು ಚುನಾವಣಾ ಆಯೋಗ ಕೈಬಿಡಬೇಕು, ಆಗ ಮಾತ್ರವೇ ಆಯೋಗ ಹೊಸ ಮತಗಟ್ಟೆ ಸ್ಥಾಪಿಸುವ ಉದ್ದೇಶ ಸಾರ್ಥಕವಾಗುತ್ತದೆ ಎಂದು ನಾಗರಿಕ ಮತ ಕಾವಲು ಸಮಿತಿ ಒತ್ತಾಯಿಸಿದೆ.
