2023ರ ಚುನಾವಣೆಯಲ್ಲಿ ಬಸವನಗುಡಿಯಲ್ಲಿ 1.28 ಲಕ್ಷ ಮತಗಳು ಚಲಾಯಿಸಲ್ಪಟ್ಟಿದ್ದವು. ಆದರೆ ಪ್ರಸ್ತುತ SIR ಪ್ರಕ್ರಿಯೆಯಲ್ಲಿ 1.13 ಲಕ್ಷ ಜನರನ್ನು ಹೊರಗಿಟ್ಟು, ಕರಡು ಪಟ್ಟಿಯಲ್ಲಿ ಕೇವಲ 1.35 ಲಕ್ಷ ಮತದಾರರನ್ನು ಮಾತ್ರ ಉಳಿಸಿಕೊಳ್ಳಲಾಗಿದೆ. ಇದರ ಜೊತೆಗೆ ಮತ್ತೆ 47,000 ಜನರಿಗೆ ವಿಚಾರಣೆಯ ನೋಟಿಸ್ ಜಾರಿ ಮಾಡಲಾಗಿದೆ. ಈ 47,000 ಜನರಲ್ಲಿ ವಿಚಾರಣೆಯಲ್ಲಿ ಹಾಜರಾಗಿ ಎಷ್ಟು ಜನ ಪಟ್ಟಿಯಲ್ಲಿ ಉಳಿಯಲ್ಲಿದ್ದಾರೆ ಎಂಬುದು ಮುಂದೆ ಹೊರಬೀಳುವ ಅಂತಿಮ ಪಟ್ಟಿ ನಿರ್ಧರಿಸಲಿದೆ. ಸದ್ಯದ ಅಂಕಿ ಅಂಶಗಳ ಪ್ರಕಾರ ಅಂದಾಜು 88,600. ಅಂದರೆ, ಕಳೆದ ಚುನಾವಣೆಯಲ್ಲಿ ಚಲಾಯಿಸಲಾದ ಒಟ್ಟು ಮತಗಳಿಗಿಂತಲೂ (1.28 ಲಕ್ಷ) ಅತ್ಯಂತ ಕಡಿಮೆ ಸಂಖ್ಯೆಯ ಮತದಾರರು ಕ್ಷೇತ್ರದಲ್ಲಿ ಬಾಕಿ ಉಳಿಯುವ ಆಘಾತಕಾರಿ ಪರಿಸ್ಥಿತಿ ನಿರ್ಮಾಣವಾಗಲಿದೆ.
ಬೆಂಗಳೂರಿನ ಪ್ರತಿಷ್ಠಿತ ಬಸವನಗುಡಿ ವಿಧಾನಸಭಾ ಕ್ಷೇತ್ರದಲ್ಲಿ ಪ್ರಸ್ತುತ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯು ಪ್ರಜಾಪ್ರಭುತ್ವದ ಮೂಲ ಆಶಯಕ್ಕೇ ಧಕ್ಕೆ ತರುವಂತಹ ಭೀಕರ ಅಂಕಿ-ಅಂಶಗಳನ್ನು ಹೊರಹಾಕಿದೆ. ಚೆನ್ನಮ್ಮನಕೆರೆ ಅಚ್ಚುಕಟ್ಟು ಭಾಗದ ಜಿಬಿಎ ಕಂದಾಯ ಕಚೇರಿಯು ಪ್ರಮುಖ ಕೇಂದ್ರವಾಗಿ ಮಾರ್ಪಟ್ಟಿದೆ. ಸೆಪ್ಟೆಂಬರ್ 5 ರಿಂದ ಪ್ರತಿದಿನ ಮೂರು ಹಂತಗಳಲ್ಲಿ 26 ಕೌಂಟರ್‌ಗಳ ಮೂಲಕ ಸಾವಿರಾರು ಮತದಾರರ ವಿಚಾರಣೆಯನ್ನು ನಡೆಸಲಾಗುತ್ತಿದೆ.
‘ಮ್ಯಾಪಿಂಗ್ ಲಭ್ಯವಿಲ್ಲದಿರುವುದು’ ಹಾಗೂ ಹೆಸರು, ವಯಸ್ಸಿಗಿರುವ ವ್ಯತ್ಯಾಸಗಳ ಕುರಿತು ಬಿಎಲ್‌ಒ (BLO)ಗಳಿಂದ ನೋಟಿಸ್ ಪಡೆದ ಮತದಾರರು ಸಹಾಯಕ ಚುನಾವಣಾ ನೋಂದಣಾಧಿಕಾರಿಗಳ (AERO) ಮುಂದೆ ಹಾಜರಾಗುತ್ತಿದ್ದಾರೆ. 2002 ರಲ್ಲೇ ಸಂಪೂರ್ಣ ಮಾಹಿತಿ ನೀಡಿದ್ದರೂ ಮತ್ತೆ ದೋಷಗಳೆಂದು ನೋಟಿಸ್ ಕಳುಹಿಸಿರುವುದಕ್ಕೆ ಹಲವು ಮತದಾರರು ಆಕ್ರೋಶ ವ್ಯಕ್ತಪಡಿಸಿದ್ದು, ವಿಚಾರಣೆಗೆ ಆಧಾರ್ ಕಾರ್ಡ್ ಒಂದನ್ನೇ ತಂದ ಹಲವರು ಸೂಕ್ತ ದಾಖಲೆಗಳಿಲ್ಲದೆ ವಾಪಸ್ ತೆರಳುವಂತಾಗಿದೆ ಎಂದು ಡೆಕ್ಕನ್ ಹೆರಾಲ್ಡ್‌ ವರದಿ ಮಾಡಿದೆ.
ನಿಯಮಗಳ ಪ್ರಕಾರ, 1987 ರ ಜುಲೈ 1 ಕ್ಕಿಂತ ಮುಂಚೆ ಜನಿಸಿದವರು ತಮ್ಮ ಜನ್ಮದಿನಾಂಕ ಅಥವಾ ಸ್ಥಳದ ದಾಖಲೆ ನೀಡಬೇಕಿದ್ದು, 1987 ರ ಜುಲೈ 1 ರಿಂದ 2004 ರ ಡಿಸೆಂಬರ್ 2 ರ ನಡುವೆ ಜನಿಸಿದವರು ತಮ್ಮ ಹಾಗೂ ಪೋಷಕರಲ್ಲೊಬ್ಬರ ದಾಖಲೆ ಒದಗಿಸಬೇಕು. 2004 ರ ಡಿಸೆಂಬರ್ 2 ರ ನಂತರ ಜನಿಸಿದವರು ತಂದೆ-ತಾಯಿ ಇಬ್ಬರ ದಾಖಲೆಗಳನ್ನು ಸಲ್ಲಿಸುವುದು ಕಡ್ಡಾಯವಾಗಿದೆ. ಆಧಾರ್ ಜತೆಗೆ ಎಪಿಕ್ ಕಾರ್ಡ್, ಜನ್ಮ ಪ್ರಮಾಣಪತ್ರ, ಎಸ್‌ಎಸ್‌ಎಲ್‌ಸಿ ಅಂಕಪಟ್ಟಿ, ಪಾಸ್‌ಪೋರ್ಟ್ ಅಥವಾ ಜಾತಿ ಪ್ರಮಾಣಪತ್ರಗಳಲ್ಲಿ ಕನಿಷ್ಠ ಎರಡನ್ನು ತರಲು ಅಧಿಕಾರಿಗಳು ಸೂಚಿಸುತ್ತಿದ್ದಾರೆ. ದಾಖಲೆ ಕೊರತೆಯಾದರೆ ಅರ್ಜಿ ರದ್ದಾಗಲಿದ್ದು, ಮೊದಲ ವಿಚಾರಣೆಗೆ ಗೈರಾದವರಿಗೆ ಮತ್ತೊಂದು ಅವಕಾಶ ನೀಡಲಾಗುತ್ತದೆ.
ಕ್ಷೇತ್ರದ ಒಟ್ಟು ಮತದಾರರ ಸಂಖ್ಯೆ ಹಾಗೂ ಪ್ರಸ್ತುತ ಆಯೋಗ ಕೈಗೊಂಡಿರುವ ಕ್ರಮಗಳನ್ನು ಸೂಕ್ಷ್ಮವಾಗಿ ವಿಶ್ಲೇಷಿಸಿದರೆ, ಬಸವನಗುಡಿಯಲ್ಲಿ ಬಹುತೇಕ ಅರ್ಧಕ್ಕೂ ಹೆಚ್ಚು ಮತದಾರರ ಹಕ್ಕನ್ನು ಕಸಿದುಕೊಳ್ಳುವ ಅಪಾಯ ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ಬಸವನಗುಡಿ ಕ್ಷೇತ್ರದಲ್ಲಿ ಒಟ್ಟು 2,48,600 (2.48 ಲಕ್ಷ) ಮತದಾರರಿದ್ದಾರೆ. ಆದರೆ, ಆಶ್ಚರ್ಯಕರ ರೀತಿಯಲ್ಲಿ ಚುನಾವಣಾ ಆಯೋಗವು ಇದರಲ್ಲಿ 1.13 ಲಕ್ಷ (1,13,000) ಮತದಾರರನ್ನು ‘ಎಎಸ್‌ಡಿಡಿಒ’ (ASDDO – ಗೈರು, ಸ್ಥಳಾಂತರ, ನಕಲಿ, ಮೃತ ಹಾಗೂ ಇತರರು) ಎಂಬ ಪಟ್ಟಿಗೆ ಸೇರಿಸಿ, ಕರಡು ಮತದಾರರ ಪಟ್ಟಿಯಿಂದಲೇ ನೇರವಾಗಿ ತೆಗೆದುಹಾಕಿದೆ. ಅಂದರೆ, ಒಂದೇ ಏಟಿಗೆ ಶೇ. 45 ಕ್ಕೂ ಹೆಚ್ಚು ಮತದಾರರನ್ನು ಕರಡು ಪಟ್ಟಿಯಿಂದ ಹೊರಗಿಡಲಾಗಿದೆ.
ಈ ಬೃಹತ್ ಕಡಿತದ ನಂತರ ಕ್ಷೇತ್ರದಲ್ಲಿ ಬಾಕಿ ಉಳಿದದ್ದು ಕೇವಲ 1.35 ಲಕ್ಷ (1,35,600) ಮತದಾರರು. ಆದರೆ ಆಯೋಗದ ಕಿರುಕುಳ ಇಲ್ಲೇ ಮುಗಿದಿಲ್ಲ. ಈ ಬಾಕಿ ಉಳಿದ 1.35 ಲಕ್ಷ ಮತದಾರರ ಪೈಕಿ ಮತ್ತೆ 47,000 ಜನರಿಗೆ ‘ಮ್ಯಾಪಿಂಗ್ ದೋಷ’ ಹಾಗೂ ‘ಹೆಸರಿನ ಅಕ್ಷರಗಳ ವ್ಯತ್ಯಾಸ’ದ ನೆಪವೊಡ್ಡಿ ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್ ಜಾರಿ ಮಾಡಲಾಗಿದೆ.
ಈಗ ನಾವು ಸರಳ ಗಣಿತದ ಮೂಲಕ ಲೆಕ್ಕಾಚಾರ ಮಾಡಿ ನೋಡಿದರೆ ಆಘಾತಕಾರಿ ಸತ್ಯವೊಂದು ಬಯಲಾಗುತ್ತದೆ. ಒಟ್ಟು 2,48,600 ಮತದಾರರಲ್ಲಿ ಈಗಾಗಲೇ ತೆಗೆದುಹಾಕಲಾದ 1.13 ಲಕ್ಷ ಮತ್ತು ನೋಟಿಸ್ ಪಡೆದು ವಿಚಾರಣೆಯ ತೂಗುಕತ್ತಿಯಲ್ಲಿರುವ 47,000 ಜನರನ್ನು ಹೊರತುಪಡಿಸಿದರೆ, ಕ್ಷೇತ್ರದಲ್ಲಿ ಯಾವುದೇ ಅಡೆತಡೆ ಇಲ್ಲದೆ ಅಧಿಕೃತವಾಗಿ ಉಳಿಯುವ ಮತದಾರರ ಸಂಖ್ಯೆ ಕೇವಲ 88,600 (ಸುಮಾರು 88 ಸಾವಿರ)! ಅಂದರೆ ಕ್ಷೇತ್ರದ ಶೇಕಡಾ 64 ಕ್ಕೂ ಹೆಚ್ಚು ಮತದಾರರು ತಮ್ಮ ಮತದಾನದ ಹಕ್ಕನ್ನು ಕಳೆದುಕೊಳ್ಳುವ ಭೀತಿಯಲ್ಲಿದ್ದಾರೆ.
ನೋಟಿಸ್ ಪಡೆದಿರುವ 47,000 ಜನರ ಪೈಕಿ ಸಾವಿರಾರು ಅನಿವಾಸಿ ಕನ್ನಡಿಗರು, ಉದ್ಯೋಗನಿಮಿತ್ತ ಹೊರ ರಾಜ್ಯದಲ್ಲಿರುವವರು, ವಯೋಸಹಜ ಕಾಯಿಲೆಯಿಂದ ಬಳಲುತ್ತಿರುವ ಹಿರಿಯ ನಾಗರಿಕರಿದ್ದಾರೆ. ಇವರೆಲ್ಲರೂ ಚೆನ್ನಮ್ಮನಕೆರೆ ಅಚ್ಚುಕಟ್ಟು ಕೇಂದ್ರಕ್ಕೆ ಖುದ್ದು ಹಾಜರಾಗಿ ದಾಖಲೆ ನೀಡಲು ಸಾಧ್ಯವಾಗದಿದ್ದರೆ, ಅವರ ಹೆಸರುಗಳೂ ಅಂತಿಮ ಪಟ್ಟಿಯಿಂದ ಅಳಿಸಿಹೋಗುವುದು ಖಚಿತ. 2002 ರಲ್ಲೇ ಸರಿಯಾದ ದಾಖಲೆ ನೀಡಿದ್ದರೂ ಮತ್ತೆ ನೋಟಿಸ್ ನೀಡುತ್ತಿರುವುದು ಆಡಳಿತಶಾಹಿಯ ನಿರ್ಲಕ್ಷ್ಯವೋ ಅಥವಾ ಬೃಹತ್ ಪ್ರಮಾಣದಲ್ಲಿ ನಿಜವಾದ ಮತದಾರರನ್ನು ಪಟ್ಟಿಯಿಂದ ಹೊರಗಿಡುವ ತಂತ್ರವೋ ಎಂಬ ಗಂಭೀರ ಅನುಮಾನಗಳನ್ನು ಸಾರ್ವಜನಿಕರು ಹಾಗೂ ಮತ ಹಕ್ಕುಗಳ ಹೋರಾಟಗಾರರು ವ್ಯಕ್ತಪಡಿಸುತ್ತಿದ್ದಾರೆ.
2023ರ ಬಸವನಗುಡಿ ವಿಧಾನಸಭಾ ಕ್ಷೇತ್ರ: ಚುನಾವಣೆ ಫಲಿತಾಂಶ ಚಿತ್ರಣ
| ಅಭ್ಯರ್ಥಿ / ಪಕ್ಷ | ಪಡೆದ ಮತಗಳು | ಮತಗಳ ಶೇಕಡಾವಾರು (%) |
| ಎಲ್. ಎ. ರವಿ ಸುಬ್ರಹ್ಮಣ್ಯ (BJP) | 78,854 | 61.47% |
| ಯು. ಬಿ. ವೆಂಕಟೇಶ್ (INC – ಕಾಂಗ್ರೆಸ್) | 23,876 | 18.61% |
| ಅರಮನೆ ಶಂಕರ್ (JD-S) | 19,931 | 15.54% |
| ಡಾ. ರಜಿನಿ ಜಿ (UPP) | 2,192 | 1.71% |
| ನೋಟಾ (NOTA) | 1,656 | 1.29% |
| ಒಟ್ಟು ಚಲಾವಣೆಯಾದ ಸಿಂಧು ಮತಗಳು | 1,28,286 | 54.93% (ಮತದಾನ) |
| ಗೆಲುವಿನ ಅಂತರ (Margin of Victory) | 54,978 | 42.86% |
| ಒಟ್ಟು ನೋಂದಾಯಿತ ಮತದಾರರು (2023) | 2,33,600 | — |
2023ರ ಚುನಾವಣೆಯಲ್ಲಿ ಬಸವನಗುಡಿಯಲ್ಲಿ 1.28 ಲಕ್ಷ ಮತಗಳು ಚಲಾಯಿಸಲ್ಪಟ್ಟಿದ್ದವು. ಆದರೆ ಪ್ರಸ್ತುತ SIR ಪ್ರಕ್ರಿಯೆಯಲ್ಲಿ 1.13 ಲಕ್ಷ ಜನರನ್ನು ಹೊರಗಿಟ್ಟು, ಕರಡು ಪಟ್ಟಿಯಲ್ಲಿ ಕೇವಲ 1.35 ಲಕ್ಷ ಮತದಾರರನ್ನು ಮಾತ್ರ ಉಳಿಸಿಕೊಳ್ಳಲಾಗಿದೆ. ಇದರ ಜೊತೆಗೆ ಮತ್ತೆ 47,000 ಜನರಿಗೆ ವಿಚಾರಣೆಯ ನೋಟಿಸ್ ಜಾರಿ ಮಾಡಲಾಗಿದೆ. ಈ 47,000 ಜನರಲ್ಲಿ ವಿಚಾರಣೆಯಲ್ಲಿ ಹಾಜರಾಗಿ ಎಷ್ಟು ಜನ ಪಟ್ಟಿಯಲ್ಲಿ ಉಳಿಯಲ್ಲಿದ್ದಾರೆ ಎಂಬುದು ಮುಂದೆ ಹೊರಬೀಳುವ ಅಂತಿಮ ಪಟ್ಟಿ ನಿರ್ಧರಿಸಲಿದೆ. ಸದ್ಯದ ಅಂಕಿ ಅಂಶಗಳ ಪ್ರಕಾರ ಅಂದಾಜು 88,600. ಅಂದರೆ, ಕಳೆದ ಚುನಾವಣೆಯಲ್ಲಿ ಚಲಾಯಿಸಲಾದ ಒಟ್ಟು ಮತಗಳಿಗಿಂತಲೂ (1.28 ಲಕ್ಷ) ಅತ್ಯಂತ ಕಡಿಮೆ ಸಂಖ್ಯೆಯ ಮತದಾರರು ಕ್ಷೇತ್ರದಲ್ಲಿ ಬಾಕಿ ಉಳಿಯುವ ಆಘಾತಕಾರಿ ಪರಿಸ್ಥಿತಿ ನಿರ್ಮಾಣವಾಗಲಿದೆ.
