ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಗ್ಯಾನೇಶ್ ಕುಮಾರ್ ವಿರುದ್ಧ ದೇಶದಾದ್ಯಂತ ಆಕ್ರೋಶದ ಅಲೆ ಎದ್ದಿರುವ ಈ ಸಂದರ್ಭದಲ್ಲಿ, ಸುಮಾರು ಎರಡು ದಶಕಗಳ ಹಿಂದೆ, ಮಲೇಷ್ಯಾದ ಯೋಜನಾ ಅಧಿಕಾರಿಯೊಬ್ಬರ ಆತ್ಮಹತ್ಯೆ ಪತ್ರದಲ್ಲಿ ಗ್ಯಾನೇಶ್ ಕುಮಾರ್ ಅವರ ಹೆಸರು ಇದ್ದ ವಿಚಾರ ಮುನ್ನೆಲೆಗೆ ಬಂದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ಬಗ್ಗೆ ಬಿಸಿ ಬಿಸಿ ಚರ್ಚೆಗಳು ನಡೆಯುತ್ತಿವೆ.
ಸಿಪಿಎಂ ಹಿರಿಯ ನಾಯಕ ಟಿ.ಎಂ ಥಾಮಸ್ ಐಸಾಕ್ ಅವರು ಸಾಮಾಜಿಕ ಮಾಧ್ಯಮದ ಪೋಸ್ಟ್ನಲ್ಲಿ ಈ ಹಳೆಯ ಪ್ರಕರಣವನ್ನು ಉಲ್ಲೇಖಿಸಿದ ಬಳಿಕ, ಕೇರಳದ ಲೋಕೋಪಯೋಗಿ ಇಲಾಖೆಯ ಕಾರ್ಯದರ್ಶಿಯಾಗಿದ್ದಾಗ ಗ್ಯಾನೇಶ್ ಕುಮಾರ್ ವಿರುದ್ಧ ಕೇಳಿ ಬಂದಿದ್ದ ಆರೋಪ ಮತ್ತೆ ಚರ್ಚೆಯ ವಿಷಯವಾಗಿದೆ.
2006-11ರ ಅವಧಿಯಲ್ಲಿ ಕೇರಳ ಸರ್ಕಾರದ ಹಣಕಾಸು ಸಚಿವರಾಗಿದ್ದ ಐಸಾಕ್ ಅವರು, ಮಲೇಷ್ಯಾ ಅಧಿಕಾರಿ ಲೀ ಬೀನ್ ಸೀನ್ ಅವರ ಆತ್ಮಹತ್ಯೆ ಪತ್ರದಲ್ಲಿ ಹೆಸರು ಉಲ್ಲೇಖಿಸಲಾಗಿದ್ದ ಅಧಿಕಾರಿಗಳಲ್ಲಿ ಅಂದಿನ ಲೋಕೋಪಯೋಗಿ ಇಲಾಖೆ (PWD) ಕಾರ್ಯದರ್ಶಿ ಗ್ಯಾನೇಶ್ ಕುಮಾರ್ ಕೂಡ ಒಬ್ಬರು ಎಂಬುದನ್ನು ನೆನಪಿಸಿಕೊಂಡಿದ್ದಾರೆ. ರಾಜ್ಯದ ರಸ್ತೆ ಯೋಜನೆಯೊಂದಕ್ಕಾಗಿ ಮಲೇಷ್ಯಾದ ಪ್ಯಾಟಿ (PATI) ಸಂಸ್ಥೆ ಮತ್ತು ಭಾಗೀರಥಾ ಕನ್ಸ್ಟ್ರಕ್ಷನ್ಸ್ ನಡುವಿನ ಜಂಟಿ ಉದ್ಯಮವಾದ ಪ್ಯಾಟಿ-ಬೆಲ್ (PATI-BEL) ಕಂಪನಿಯ ಕೇರಳದ ಕಾರ್ಯಾಚರಣೆಗಳ ಉಸ್ತುವಾರಿಯನ್ನು ಲೀ ವಹಿಸಿಕೊಂಡಿದ್ದರು. ನವೆಂಬರ್ 2006ರಲ್ಲಿ, ಲೀ ಅವರು ಕೇರಳದಿಂದ ಹಿಂದಿರುಗಿದ ನಂತರ ಕೌಲಾಲಂಪುರ್ನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದರು ಎಂದು ಹೇಳಲಾಗ್ತಿದೆ.
ಐಸಾಕ್ ಅವರ ವಿವರಣೆಯ ಪ್ರಕಾರ, ಲೀ ಅವರ ಆತ್ಮಹತ್ಯೆ ಪತ್ರದಲ್ಲಿ ಲೋಕೋಪಯೋಗಿ ಇಲಾಖೆ (PWD) ಅಧಿಕಾರಿಗಳಿಂದ ನಡೆದ ಭ್ರಷ್ಟಾಚಾರ, ದುರ್ನಿರ್ವಹಣೆ ಮತ್ತು ಕಿರುಕುಳದ ಆರೋಪಗಳನ್ನು ವಿವರವಾಗಿ ಉಲ್ಲೇಖಿಸಲಾಗಿದ್ದು, ಅದರಲ್ಲಿ ಗ್ಯಾನೇಶ್ ಕುಮಾರ್ ಅವರ ಹೆಸರು ಪ್ರಮುಖವಾಗಿ ಕೇಳಿಬಂದಿತ್ತು. ಲಂಚಕ್ಕಾಗಿ ಬೇಡಿಕೆ ಇಡಲಾಗಿತ್ತು ಎಂಬ ಆರೋಪವೂ ಈ ಪತ್ರದಲ್ಲಿತ್ತು ಎಂದು ವರದಿಯಾಗಿದೆ. ಈ ಆರೋಪಗಳು ಜಾಗೃತ ದಳದ (ವಿಜಿಲೆನ್ಸ್) ತನಿಖೆಗೆ ಕಾರಣವಾದವು ಮತ್ತು 2006ರ ಅಂತ್ಯದೊಳಗೆ ಗ್ಯಾನೇಶ್ ಕುಮಾರ್ ಅವರನ್ನು ಲೋಕೋಪಯೋಗಿ ಇಲಾಖೆಯಿಂದ ವರ್ಗಾವಣೆ ಮಾಡಲಾಯಿತು. ತದನಂತರ ಅವರು ಕೇಂದ್ರ ರಕ್ಷಣಾ ಸಚಿವಾಲಯಕ್ಕೆ ನಿಯೋಜನೆಗೊಂಡರು. ಐಸಾಕ್ ಅವರ ಪ್ರಕಾರ, ಅಲ್ಲಿನ ಅಧಿಕಾರಾವಧಿಯು ಗ್ಯಾನೇಶ್ ಕುಮಾರ್ ಅವರು ಬಿಜೆಪಿ ಸರ್ಕಾರದ ಮೆಚ್ಚುಗೆಗೆ ಪಾತ್ರರಾಗಲು ಸಹಕಾರಿಯಾಯಿತು.
ಐಸಾಕ್ ಅವರ ವಾದದ ಪ್ರಕಾರ, ಮೂಲತಃ 216 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದ್ದ ಈ ಯೋಜನೆಗೆ ಅಂತಿಮವಾಗಿ ಪೂರ್ಣಗೊಳ್ಳಲು ಕನಿಷ್ಠ 330 ಕೋಟಿ ರೂಪಾಯಿಗಳ ಅಗತ್ಯವಿತ್ತು. ಹಣ ಪಾವತಿಯಲ್ಲಿನ ವಿಳಂಬ ಮತ್ತು ಗುತ್ತಿಗೆದಾರರಿಗೆ ನೀಡಲಾದ ಕಿರುಕುಳವನ್ನು ಅವರು ಲೀ ಅವರ ಆತ್ಮಹತ್ಯೆಗೆ ಲಿಂಕ್ ಮಾಡಿದ್ದಾರೆ. ಅಲ್ಲದೆ, ಸರ್ಕಾರಿ ಅಧಿಕಾರಿಗಳು ಆ ಕಂಪನಿಯೊಂದಿಗೆ ನಡೆಸಿಕೊಂಡ ರೀತಿಗೆ ಲೀ ಅವರ ಸಾವು ಒಂದು ದುರಂತ ಪರಿಣಾಮವಾಗಿದೆ ಎಂದು ಅವರು ಹೇಳಿದ್ದಾರೆ.
ಐಸಾಕ್ ಅವರ ಪ್ರಕಾರ, ಭೂಸ್ವಾಧೀನದಲ್ಲಿನ ಸಮಸ್ಯೆಗಳಿಂದಾಗಿ ಈ ಯೋಜನೆ ಮುಖ್ಯವಾಗಿ ವಿಳಂಬವಾಗಿತ್ತು. ಯೋಜನೆಯ ಮಂದಗತಿಗೆ ಯಾರು ಕಾರಣ ಎಂಬ ವಿಷಯದಲ್ಲಿ ಗುತ್ತಿಗೆದಾರರು ಮತ್ತು ಲೋಕೋಪಯೋಗಿ ಇಲಾಖೆ (PWD) ಪರಸ್ಪರರ ಮೇಲೆ ಆರೋಪ ಪ್ರತ್ಯಾರೋಪಗಳನ್ನು ಮಾಡಿಕೊಂಡಿದ್ದರು.
https://www.facebook.com/share/p/19cmEzD194
“ಇಲಾಖೆಯ ನಿರ್ಲಕ್ಷ್ಯವು ಇಡೀ ದೋಷಾರೋಪಣೆಯನ್ನು ಕೇರಳ ಸರ್ಕಾರದ ಮೇಲೆ ತಂದುಹಾಕಿತು. ಹಳೆಯ ದಾಖಲೆಗಳನ್ನು ಸಾಮಾನ್ಯವಾಗಿ ನಾಶಪಡಿಸುವುದರಿಂದ, ಜಾಗೃತ ದಳದ (ವಿಜಿಲೆನ್ಸ್) ಇಲಾಖೆಯ ಬಳಿ ಈಗಲೂ ಈ ತನಿಖೆಯ ದಾಖಲೆಗಳು ಇವೆಯೇ ಇಲ್ಲವೇ ಎಂಬುದು ನನಗೆ ಖಚಿತವಿಲ್ಲ. ಇದು 20 ವರ್ಷಗಳ ಹಿಂದೆ ನಡೆದ ಘಟನೆ. ಬಹುಶಃ, ಮಲೇಷ್ಯಾದ ಕಂಪನಿಯೂ ಸಹ ಈ ಪ್ರಕರಣವನ್ನು ಮುಂದುವರಿಸಲಿಲ್ಲ ಅನಿಸುತ್ತದೆ” ಎಂದು ಐಸಾಕ್ ಅವರು ಹೇಳಿರುವುದಾಗಿ ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಉಲ್ಲೇಖಿಸಿದೆ.
“ನಾನು ವೈಯಕ್ತಿಕವಾಗಿ ಲೀ ಬೀನ್ ಸೀನ್ ಅವರ ಆತ್ಮಹತ್ಯೆ ಪತ್ರವನ್ನು ಓದಿಲ್ಲ, ಆದರೆ ಅಧಿಕಾರಿಗಳಿಂದ ಲಂಚದ ಬೇಡಿಕೆ ಮತ್ತು ಹಣಕ್ಕಾಗಿ ಪೀಡಿಸಲಾದ ಆರೋಪಗಳು ಆ ಸಮಯದಲ್ಲಿ ವ್ಯಾಪಕವಾಗಿ ಚರ್ಚೆಯಾಗುತ್ತಿದ್ದವು. ಈ ಆರೋಪಗಳಲ್ಲಿ ಗ್ಯಾನೇಶ್ ಕುಮಾರ್ ಅವರ ಹೆಸರು ಕೂಡ ಕೇಳಿಬಂದಿತ್ತು” ಎಂದು ಐಸಾಕ್ ಹೇಳಿದ್ದಾರೆ.
ಲೀ ಅವರ ಮರಣದ ನಂತರ, ರಾಜ್ಯ ಜಾಗೃತ ದಳ (ವಿಜಿಲೆನ್ಸ್) ಇಲಾಖೆಯು ಈ ಬಗ್ಗೆ ತನಿಖೆ ನಡೆಸಿದರೂ ಸಹ, ನ್ಯಾಯವ್ಯಾಪ್ತಿಯ (ಜೂರಿಸ್ಡಿಕ್ಷನ್) ಸಮಸ್ಯೆಗಳು ಮತ್ತು ಅಧಿಕಾರಿಗಳ ಆಸಕ್ತಿಯ ಕೊರತೆಯಿಂದಾಗಿ ಆ ತನಿಖೆಯು ಯಾವುದೇ ತಾರ್ಕಿಕ ಅಂತ್ಯವನ್ನು ತಲುಪಲಿಲ್ಲ.
“ಆ ಸಮಯದಲ್ಲಿ ಕರ್ತವ್ಯದಲ್ಲಿದ್ದ ಹಿರಿಯ ಪೊಲೀಸ್ ಅಧಿಕಾರಿಗಳು ಈ ಪ್ರಕರಣದ ಫಲಿತಾಂಶದ ಬಗ್ಗೆ ತಮಗೆ ಏನೂ ತಿಳಿಯದಂತೆ ನಟಿಸಿದರು. ಜಾಗೃತ ದಳವು (ವಿಜಿಲೆನ್ಸ್) ತನಿಖೆ ನಡೆಸಿತು ನಿಜ. ಆದರೆ, ಅದು ಯಾವುದೇ ತಾರ್ಕಿಕ ಅಂತ್ಯವನ್ನು ತಲುಪಲಿಲ್ಲ. ಆ ದಿನಗಳಲ್ಲಿ ಸಾರ್ವಜನಿಕವಾಗಿ ತೀವ್ರ ಆಕ್ರೋಶ ವ್ಯಕ್ತವಾಗಿದ್ದರೂ ಸಹ, ಪ್ರಕರಣವನ್ನು ಮುಂದುವರಿಸಲು ಸರ್ಕಾರಿ ಯಾಂತ್ರಿಕ ವ್ಯವಸ್ಥೆಯು ಹೆಚ್ಚಿನ ಆಸಕ್ತಿ ತೋರಿಸಿರಲಿಲ್ಲ” ಎಂದು ನಿವೃತ್ತ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾಗಿ ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಉಲ್ಲೇಖಿಸಿದೆ.
ಆ ಸಮಯದಲ್ಲಿ, ಈ ವಿವಾದವು ಕೇರಳದ ಮೂಲಸೌಕರ್ಯ ವಲಯವನ್ನು ತಲ್ಲಣಗೊಳಿಸಿತ್ತು. ಲೀ ಅವರ ಮರಣವು ಯೋಜನೆಯ ಅಕ್ರಮಗಳ ಆರೋಪಗಳು ಮತ್ತು ಗುತ್ತಿಗೆದಾರರಿಗೆ ಹಣ ಪಾವತಿಸುವಲ್ಲಿ ಸರ್ಕಾರದ ನಿಲುವಿನ ಕುರಿತು ತೀವ್ರ ರಾಜಕೀಯ ಬಿರುಗಾಳಿಯನ್ನೇ ಎಬ್ಬಿಸಿತ್ತು ಎಂದು ವರದಿ ಹೇಳಿದೆ.
