ಅರುಣಾಚಲ ಪ್ರದೇಶದಲ್ಲಿ ಭಾರತ ಮತ್ತು ಚೀನಾ ಪಡೆಗಳ ನಡುವೆ ಮುಖಾಮುಖಿ ಮುಂದುವರಿದಿರುವ ವರದಿಗಳ ಕುರಿತು ಕೇಂದ್ರ ಸರ್ಕಾರ ಮೌನ ವಹಿಸಿದೆ ಎಂದು ಶುಕ್ರವಾರ (ಅ.23) ಕಾಂಗ್ರೆಸ್ ವಾಗ್ದಾಳಿ ನಡೆಸಿದೆ. ಗಡಿ ಭದ್ರತೆ ಮತ್ತು ಚೀನಾ ವಿರುದ್ಧ ಭಾರತದ ರಾಜತಾಂತ್ರಿಕ ನೀತಿಯ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಉತ್ತರ ನೀಡುವಂತೆ ಆಗ್ರಹಿಸಿದೆ.
ಚೀನಾದ ಪೀಪಲ್ಸ್ ಲಿಬರೇಷನ್ ಆರ್ಮಿಯೊಂದಿಗೆ (ಪಿಎಲ್‌ಎ) ಇತ್ತೀಚೆಗೆ ನಡೆದ ಮುಖಾಮುಖಿಗಳ ಕುರಿತು ಇಂಡೋ-ಟಿಬೆಟಿಯನ್ ಬಾರ್ಡರ್ ಪೊಲೀಸ್ (ಐಟಿಬಿಪಿ) ಮಹಾನಿರ್ದೇಶಕ ಶತ್ರುಜೀತ್ ಕಪೂರ್ ಅವರ ಹೇಳಿಕೆ ವೈರಲ್ ಆದ ಬೆನ್ನಲ್ಲೇ ಕಾಂಗ್ರೆಸ್ ಪ್ರತಿಕ್ರಿಯಿಸಿದೆ. ಕಪೂರ್ ಅವರ ಹೇಳಿಕೆಗಳ ಕುರಿತಾದ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಿದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (ಎಂಇಎ), ಚೀನಾ ಸೈನಿಕರು ಕೆಲವೊಮ್ಮೆ ತಮಗೆ ನಿಗದಿಪಡಿಸಿದ ದಾರಿಯನ್ನು ಬಿಟ್ಟು, ಬೇರೆ ಕಡೆಗೆ ಬಂದು ಗಸ್ತು ತಿರುಗುತ್ತಿದ್ದಾರೆ ಎಂದು ಹೇಳಿದೆ.
“ಗಡಿಯಲ್ಲಿ ನಿಖರವಾಗಿ ಏನಾಗುತ್ತಿದೆ ಎಂಬ ಸಂಪೂರ್ಣ ಮತ್ತು ತಾಂತ್ರಿಕ ವಿವರಗಳನ್ನು ಮಿಲಿಟರಿ ವ್ಯವಹಾರಗಳನ್ನು ನೋಡಿಕೊಳ್ಳುವ ರಕ್ಷಣಾ ಸಚಿವಾಲಯವೇ ನೀಡಬೇಕು. ಭಾರತ ಮತ್ತು ಚೀನಾ ಗಡಿಯಲ್ಲಿ ಶಾಂತಿ ಕದಡಲು ಚೀನಾ ಪಡೆಗಳೇ ಕಾರಣ. ಅವರು ತಮಗೆ ನಿಗದಿಪಡಿಸಿದ ದಾರಿ ಅಥವಾ ನಿಯಮಗಳನ್ನು ಮೀರಿ ಗಸ್ತು ತಿರುಗಲು ಬಂದಾಗಲೆಲ್ಲಾ, ಗಡಿ ಪ್ರದೇಶದಲ್ಲಿ ಉದ್ವಿಗ್ನ ಪರಿಸ್ಥಿತಿ ಅಥವಾ ಗೊಂದಲ ನಿರ್ಮಾಣವಾಗುತ್ತದೆ. ಇದು ಈಗಷ್ಟೇ ಅಲ್ಲ, ಈ ಹಿಂದೆಯೂ ಹಲವು ಬಾರಿ ನಡೆದಿದೆ” ಎಂದು ಎಂಇಎ ವಕ್ತಾರರು ತಿಳಿಸಿದ್ದಾರೆ.
“ಉಳಿದಿರುವ ಸಮಸ್ಯೆಗಳನ್ನು ಬಗೆಹರಿಸಲು ಮತ್ತು ವಾಸ್ತವ ನಿಯಂತ್ರಣ ರೇಖೆಯುದ್ದಕ್ಕೂ (ಎಲ್‌ಎಸಿ) ಉಂಟಾಗಬಹುದಾದ ತಪ್ಪು ತಿಳುವಳಿಕೆಗಳನ್ನು ತಡೆಗಟ್ಟಲು ಉಭಯ ದೇಶಗಳು ರಾಜತಾಂತ್ರಿಕ ಹಾಗೂ ಮಿಲಿಟರಿ ವ್ಯವಸ್ಥೆಗಳನ್ನು ಬಳಸಿಕೊಳ್ಳುವುದನ್ನು ಮುಂದುವರಿಸಿವೆ” ಎಂದು ವಕ್ತಾರರು ಹೇಳಿದ್ದಾರೆ.
ಗಡಿಯಲ್ಲಿ ಚೀನಾ ಅಕ್ರಮವಾಗಿ ನುಗ್ಗುತ್ತಿದ್ದರೂ ಕೇಂದ್ರ ಸರ್ಕಾರ ಅವರು ಯಾವುದೇ ತಪ್ಪು ಮಾಡಿಲ್ಲ ಎಂಬಂತೆ ಕ್ಲೀನ್ ಚೀಟ್ ನೀಡುತ್ತಾ ಬಂದಿದೆ ಎಂದು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ವಾಗ್ದಾಳಿ ನಡೆಸಿದ್ದಾರೆ.
ದೇಶದ ಗಡಿ ಸುರಕ್ಷತೆಯ ವಿಚಾರದಲ್ಲಿ ಕೇವಲ ರಾಜತಾಂತ್ರಿಕ ಫೋಟೋ ಶೂಟ್‌ಗಳು ಅಥವಾ ಅಪ್ಪುಗೆಯ ಮುತ್ಸದ್ದಿತನ ಸಾಲದು, ಸರ್ಕಾರವು ದೇಶಕ್ಕೆ ಮತ್ತು ಸಂಸತ್ತಿಗೆ ಗಡಿ ಪರಿಸ್ಥಿತಿಯ ನೈಜ ವಿವರಗಳನ್ನು ನೀಡಿ ಜವಾಬ್ದಾರಿಯಿಂದ ನಡೆದುಕೊಳ್ಳಬೇಕು ಎಂದು ಅವರು ಆಗ್ರಹಿಸಿದ್ದಾರೆ.
ಎಕ್ಸ್ ಜಾಲತಾಣದಲ್ಲಿ ಹಂಚಿಕೊಂಡಿರುವ ಪೋಸ್ಟ್‌ನಲ್ಲಿ ಖರ್ಗೆ ಅವರು ರಾಷ್ಟ್ರೀಯ ಭದ್ರತೆ, ಚೀನಾದ ಮೇಲಿನ ಭಾರತದ ಆರ್ಥಿಕ ಅವಲಂಬನೆ ಮತ್ತು ಉಭಯ ದೇಶಗಳ ನಡುವಿನ ರಾಜತಾಂತ್ರಿಕ ಮಾತುಕತೆಗಳ ಫಲಿತಾಂಶದ ಕುರಿತು ಪ್ರಶ್ನೆಗಳನ್ನು ಎತ್ತಿದ್ದಾರೆ.
“ಅರುಣಾಚಲ ಪ್ರದೇಶದಲ್ಲಿ ಪಿಎಲ್‌ಎ ಜೊತೆಗಿನ ಮುಖಾಮುಖಿ ಮುಂದುವರಿದಿರುವ ಕುರಿತು ಐಟಿಬಿಪಿ ಮಹಾನಿರ್ದೇಶಕರು ನೀಡಿರುವ ದೃಢೀಕರಣವು ತೀವ್ರ ಆತಂಕಕಾರಿಯಾಗಿದೆ. ದೋಕ್ಲಾಂ ಮತ್ತು ಗಲ್ವಾನ್ ಸಂಘರ್ಷಗಳ ನಂತರ, ಮತ್ತೊಂದು ಗಂಭೀರವಾದ ಮುಖಾಮುಖಿ ಸಂಭವಿಸುತ್ತಿದ್ದೆಯೇ? ಆಗಸ್ಟ್‌ನಲ್ಲಿ ತಕ್ಸಿಂಗ್ ಸಮೀಪ ಚೀನಾದ ನುಸುಳುವಿಕೆಯ ವರದಿಗಳು ಹೊರಬಂದಿದ್ದವು. ಅಲ್ಲಿಂದ ಕೇವಲ 180 ಕಿಲೋಮೀಟರ್ ದೂರದಲ್ಲಿದೆ ಎನ್ನಲಾದ ವಾಚಾ-ದಾಮೈನಲ್ಲಿ ಕಾರ್ಪ್ಸ್ ಕಮಾಂಡರ್ ಮಟ್ಟದ ಮಾತುಕತೆ ನಡೆದು 47 ದಿನಗಳು ಕಳೆದಿದ್ದರೂ, ಸಂಘರ್ಷಗಳು ಮುಂದುವರಿದಿವೆ. ಹಾಗಾದರೆ ಭಾರತದ ಗಸ್ತು ತಿರುಗುವಿಕೆಗೆ ಇರುವ ಮುಕ್ತ ಪ್ರವೇಶಕ್ಕೆ ಧಕ್ಕೆಯಾಗಿದೆಯೇ?” ಎಂದು ಖರ್ಗೆ ಪ್ರಶ್ನಿಸಿದ್ದಾರೆ.
“ಗಾಲ್ವಾನ್‌ನಲ್ಲಿ ಭಾರತೀಯ ಸೇನೆಯ 20 ವೀರ ಯೋಧರು ಬಲಿದಾನಗೈದ ನಂತರದ ಅವಧಿಯಲ್ಲಿ (2020-21ನೇ ಹಣಕಾಸು ವರ್ಷ), ಚೀನಾದಿಂದ ಆಮದು ಪ್ರಮಾಣವು 102% ರಷ್ಟು ಹೆಚ್ಚಾಗಿದೆ. ಅದೇ ಸಮಯದಲ್ಲಿ, ಚೀನಾದೊಂದಿಗಿನ ಭಾರತದ ವ್ಯಾಪಾರ ಕೊರತೆಯು 155% ರಷ್ಟು ಏರಿಕೆಯಾಗಿ, 112.16 ಶತಕೋಟಿ ಡಾಲರ್‌ಗೆ ತಲುಪಿದೆ… ಹೀಗಿರುವಾಗ, ‘ಮೇಕ್ ಇನ್ ಇಂಡಿಯಾ’ (Make in India) ಎಂಬುದು ‘ಚೀನಾದಿಂದ ಆಮದು’ (Import from China) ಆಗಿ ಬದಲಾಗಿದೆಯೇ?” ಎಂದು ಖರ್ಗೆ ಪ್ರಶ್ನೆ ಎತ್ತಿದ್ದಾರೆ.
ಅರುಣಾಚಲ ಪ್ರದೇಶದಲ್ಲಿ ವರದಿಯಾದ ಮುಖಾಮುಖಿ ಘಟನೆಗಳನ್ನು ಪರಿಹರಿಸುವಲ್ಲಿ ವಿಫಲವಾಗಿರುವ ಸರ್ಕಾರವು, ಚೀನಾಕ್ಕೆ ರಿಯಾಯಿತಿಗಳನ್ನು ನೀಡುತ್ತಿದೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜೈರಾಮ್ ರಮೇಶ್ ಕಿಡಿಕಾರಿದ್ದಾರೆ.
“ಸ್ವಯಂಘೋಷಿತ ‘ವಿಶ್ವಗುರು’ ಚೀನಾದ ವಿಷಯದಲ್ಲಿ ಒಂದರ ಮೇಲೊಂದರಂತೆ ರಿಯಾಯಿತಿಗಳನ್ನು ನೀಡುತ್ತಲೇ ಇದ್ದಾರೆ. ಇತ್ತ, ಅರುಣಾಚಲ ಪ್ರದೇಶದಲ್ಲಿ ಪಿಎಲ್‌ಎ ಜೊತೆ ಇತ್ತೀಚೆಗೆ ನಡೆದ ಮುಖಾಮುಖಿಗಳಲ್ಲಿ ಐಟಿಬಿಪಿ ತೋರಿದ ಕಾರ್ಯಕ್ಷಮತೆಯನ್ನು ಅದರ ಮಹಾನಿರ್ದೇಶಕರು ಶ್ಲಾಘಿಸಿದ್ದಾರೆ – ಇದು ಸಮರ್ಥನೀಯವೂ ಹೌದು. ಆದರೆ, ಈ ಘಟನೆಗಳ ಬಗ್ಗೆ ಪ್ರಧಾನಿ ಮತ್ತು ಅವರ ಆಡಳಿತ ವ್ಯವಸ್ಥೆಯು ಸಂಪೂರ್ಣ ಮೌನ ವಹಿಸಿದೆ” ಎಂದು ರಮೇಶ್ ಎಕ್ಸ್ ಪೋಸ್ಟ್ ಹೇಳಿದ್ದಾರೆ.
ಅರುಣಾಚಲ ಪ್ರದೇಶದಲ್ಲಿನ ಸ್ಥಳಗಳಿಗೆ ಚೀನಾ ಮರುನಾಮಕರಣ ಮಾಡಿರುವುದನ್ನು ಹಾಗೂ ಬ್ರಹ್ಮಪುತ್ರ ನದಿಯ ಮೇಲೆ 60,000 ಮೆಗಾವ್ಯಾಟ್ ಸಾಮರ್ಥ್ಯದ ಅಣೆಕಟ್ಟನ್ನು ನಿರ್ಮಿಸುತ್ತಿರುವುದನ್ನು ರಮೇಶ್ ಪ್ರಸ್ತಾಪಿಸಿದ್ದು, ಇವು ಭಾರತದ ಪರಿಸರ ಮತ್ತು ಜಲ ಭದ್ರತೆಯ ಮೇಲೆ ಉಂಟುಮಾಡಬಹುದಾದ ಪರಿಣಾಮಗಳ ಬಗ್ಗೆ ಎಚ್ಚರಿಕೆ ನೀಡಿದ್ದಾರೆ.
