“ರೈತರು 3 ತಿಂಗಳು ದುಡಿದು, 9 ತಿಂಗಳು ಮದ್ಯ ಕುಡಿದು-ಜೂಜಾಟದಲ್ಲಿ ಮುಳುಗಿರುತ್ತಾರೆ”: ಮಧ್ಯಪ್ರದೇಶದ ಬಿಜೆಪಿ ಸಂಸದ ಜನಾರ್ಧನ್ ಮಿಶ್ರಾ ವಿವಾದಿತ ಹೇಳಿಕೆ!

ತಮ್ಮ ಅಸಂಸದೀಯ ಹಾಗೂ ವಿವಾದಾತ್ಮಕ ಹೇಳಿಕೆಗಳ ಮೂಲಕವೇ ಪದೇಪದೇ ಸುದ್ದಿಯಾಗುವ ಮಧ್ಯಪ್ರದೇಶದ ರೇವಾ ಕ್ಷೇತ್ರದ ಬಿಜೆಪಿ ಸಂಸದ ಜನಾರ್ಧನ್ ಮಿಶ್ರಾ, ದೇಶದ ಅನ್ನದಾತರ ವಿರುದ್ಧ ನಾಲಿಗೆ ಹರಿಬಿಟ್ಟು ಮತ್ತೆ ತೀವ್ರ ಆಕ್ರೋಶಕ್ಕೆ ಗುರಿಯಾಗಿದ್ದಾರೆ. “ಇಂದಿನ ರೈತರು ವರ್ಷದಲ್ಲಿ ಕೇವಲ ಮೂರು ತಿಂಗಳು ಮಾತ್ರ ಶ್ರಮ ಪಡುತ್ತಾರೆ. ಬಾಕಿ ಒಂಭತ್ತು ತಿಂಗಳು ಗಾಂಜಾ, ಮದ್ಯ ಸೇವನೆ ಹಾಗೂ ಜೂಜಾಟದಲ್ಲಿ ಸಮಯ ವ್ಯರ್ಥ ಮಾಡುತ್ತಾರೆ” ಎಂದು ಮಿಶ್ರಾ ಆರೋಪಿಸಿದ್ದು, ಈ ಹೇಳಿಕೆಯ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ವೈರಲ್ ಆಗಿದೆ.

ಮಧ್ಯಪ್ರದೇಶದ ಮೌಗಂಜ್ ಜಿಲ್ಲೆಯ ರಕರಿ ಗ್ರಾಮ್ ಪಂಚಾಯತ್‌ನ ಕಮಲ್ ಗೋಶಾಲೆಯಲ್ಲಿ ಇತ್ತೀಚೆಗೆ ಆಯೋಜಿಸಲಾಗಿದ್ದ ಜಿಲ್ಲಾ ಮಟ್ಟದ ಗೋವರ್ಧನ ಪೂಜೆ ಕಾರ್ಯಕ್ರಮದಲ್ಲಿ ಸಂಸದ ಮಿಶ್ರಾ ಭಾಗವಹಿಸಿದ್ದರು. ವೇದಿಕೆಯಲ್ಲಿ ರೈತರ ಬದಲಾದ ಜೀವನಶೈಲಿ ಹಾಗೂ ಕೃಷಿ ಪದ್ಧತಿಗಳ ಕುರಿತು ಮಾತನಾಡಲು ಆರಂಭಿಸಿದ ಅವರು, ಇಂದಿನ ರೈತರು ಕಷ್ಟಪಡುವುದನ್ನು ಬಿಟ್ಟು ಆರಾಮಪ್ರಿಯರಾಗಿದ್ದಾರೆ ಎಂದು ವ್ಯಂಗ್ಯವಾಡಿದರು.

ಮಾತು ಮುಂದುವರಿಸಿದ ಸಂಸದರು, “ರೈತರು ವರ್ಷದಲ್ಲಿ ಕೇವಲ 3 ತಿಂಗಳು ಮಾತ್ರ ಶ್ರಮ ಪಡುತ್ತಾರೆ, ಉಳಿದ 9 ತಿಂಗಳು ಏನು ಮಾಡುತ್ತಾರೆ?” ಎಂದು ವೇದಿಕೆಯಿಂದಲೇ ಸಭಿಕರನ್ನು ಪ್ರಶ್ನಿಸಿದರು. ಆಗ ಸಭೆಯಲ್ಲಿದ್ದ ವ್ಯಕ್ತಿಯೊಬ್ಬರು “ತಾಶ್ (ಇಸ್ಪೀಟ್ ಜೂಜು) ಆಡುತ್ತಾರೆ” ಎಂದು ಉದ್ಗರಿಸಿದಾಗ, ಅದನ್ನೇ ಬೆಂಬಲಿಸಿದ ಮಿಶ್ರಾ, “ಹೌದು, ಇಂದಿನ ಕೃಷಿಕ 3 ತಿಂಗಳು ಕೆಲಸ ಮಾಡಿ, ಉಳಿದ 9 ತಿಂಗಳು ಇಸ್ಪೀಟ್ ಆಡುವುದು, ತಂಬಾಕು/ರಾಜ್‌ಶ್ರೀ ಜಗಿಯುವುದು, ಮದ್ಯದ ಬಾಟಲಿ ಹಿಡಿಯುವುದು ಹಾಗೂ ಚೋಂಗಿ-ಗಾಂಜಾ ಸೇದುವುದರಲ್ಲೇ ದಿನ ಕಳೆಯುತ್ತಾನೆ” ಎಂದು ಗಂಭೀರ ಆರೋಪ ಮಾಡಿದರು.

ಕೃಷಿಕರ ಹಾಗೂ ವಿಪಕ್ಷಗಳ ತೀವ್ರ ಆಕ್ರೋಶ:

ಕೃಷಿ ಎಂದರೆ ಕೇವಲ ಬಿತ್ತನೆ ಮತ್ತು ಕೊಯ್ಲು ಮಾತ್ರವಲ್ಲ; ವರ್ಷವಿಡೀ ಬೆಳೆ ಕಾಯುವುದು, ನೀರು ಹಾಯಿಸುವುದು, ಮಳೆ-ಬೆಳೆ ಹಾನಿ ಹಾಗೂ ಆರ್ಥಿಕ ಸಂಕಷ್ಟಗಳ ವಿರುದ್ಧ ನಿರಂತರ ಹೋರಾಡುವುದಾಗಿದೆ. ಹೀಗಿರುವಾಗ ಇಡೀ ರೈತ ಸಮುದಾಯವನ್ನು ‘ಸೋಮಾರಿಗಳು’ ಹಾಗೂ ‘ವ್ಯಸನಿಗಳು’ ಎಂದು ಬಿಂಬಿಸಿರುವ ಸಂಸದರ ಹೇಳಿಕೆಗೆ ರೈತ ಸಂಘಟನೆಗಳು ಹಾಗೂ ವಿಪಕ್ಷಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಬಹಿರಂಗ ಕ್ಷಮೆಯಾಚನೆಗೆ ಆಗ್ರಹಿಸಿವೆ.

ಜನಾರ್ಧನ್ ಮಿಶ್ರಾ ಅವರ ಹಿಂದಿನ ವಿವಾದಾಸ್ಪದ ಸರಣಿ ಹೇಳಿಕೆಗಳು:

ಸಂಸದ ಜನಾರ್ಧನ್ ಮಿಶ್ರಾ ಇಂತಹ ವಿವಾದಾತ್ಮಕ ಹೇಳಿಕೆ ನೀಡುತ್ತಿರುವುದು ಇದೇ ಮೊದಲೇನಲ್ಲ. ಇತ್ತೀಚಿನ ತಿಂಗಳುಗಳಲ್ಲಿ ಅವರು ಹಲವು ಬಾರಿ ಸಾರ್ವಜನಿಕ ವೇದಿಕೆಗಳಲ್ಲಿ ಬೇಜವಾಬ್ದಾರಿ ಮಾತುಗಳನ್ನಾಡಿ ಸುದ್ದಿಯಾಗಿದ್ದಾರೆ:

• ಎಲಾನ್ ಮಸ್ಕ್ ಕುರಿತು ತುಚ್ಛ ಮಾತು: ರೇವಾದಲ್ಲಿ ನಡೆದ ಸೇತುವೆ ನಿರ್ಮಾಣದ ಭೂಮಿಪೂಜೆ ಕಾರ್ಯಕ್ರಮದಲ್ಲಿ ಅಮೆರಿಕದ ಉದ್ಯಮಿ ಎಲಾನ್ ಮಸ್ಕ್ ಭಾರತಕ್ಕೆ ಬರುವ ವಿಷಯ ಕುರಿತು ಮಾತನಾಡುತ್ತಾ, “ಎಲಾನ್ ಮಸ್ಕ್‌ಗೆ ಎರಡು ಗುದ್ದಿದ್ರೆ ಭಾರತದಿಂದ ಓಡಿಹೋಗ್ತಾನೆ” ಎಂದು ಉಪಮುಖ್ಯಮಂತ್ರಿ ರಾಜೇಂದ್ರ ಶುಕ್ಲ ಸಮ್ಮುಖದಲ್ಲೇ ಹೇಳಿಕೆ ನೀಡಿರುವುದಾಗಿ ವರದಿಗಳಾಗಿವೆ.
• ಪೆಟ್ರೋಲ್ ಬೆಲೆ ಹಾಗೂ ಇಂಧನ ವಿವಾದ: ರೇವಾ ವಿಮಾನ ನಿಲ್ದಾಣದ ಕಾರ್ಯಕ್ರಮದಲ್ಲಿ ಪೆಟ್ರೋಲ್‌ನಲ್ಲಿ ಎಥನಾಲ್ ಮಿಶ್ರಣವನ್ನು ವಿರೋಧಿಸುವವರನ್ನು ಪ್ರಶ್ನಿಸುತ್ತಾ, “ಶುದ್ಧ ಪೆಟ್ರೋಲ್ ನಿನ್ನ ಅಪ್ಪನ ಮನೆಯಿಂದ ಬರುತ್ತದೆಯೇ?” (Pure petrol comes from your father’s house?) ಎಂದು ಸಾರ್ವಜನಿಕ ವೇದಿಕೆಯಲ್ಲೇ ಏಕವಚನದಲ್ಲಿ ಬೈದಿರುವಾಗಿ ವರದಿಗಳಾಗಿವೆ.