ಅಮೆರಿಕದಲ್ಲಿ ಸಿಖ್ ಪ್ರತ್ಯೇಕತಾವಾದಿ ಗುರ್ಪತ್‌ವಂತ್ ಸಿಂಗ್ ಪನ್ನುನ್ ಹೂಡಿರುವ ಖಾಸಗಿ ಸಿವಿಲ್ ಮೊಕದ್ದಮೆಗೆ ಸಂಬಂಧಿಸಿದಂತೆ ಅಮೆರಿಕದ ಫೆಡರಲ್ ನ್ಯಾಯಾಲಯವು ಪ್ರಮುಖ ಆದೇಶ ನೀಡಿದೆ. ಭಾರತದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಮತ್ತು ರಿಸರ್ಚ್ ಅಂಡ್ ಅನಾಲಿಸಿಸ್ ವಿಂಗ್ (RAW) ಮಾಜಿ ಮುಖ್ಯಸ್ಥ ಸಾಮಂತ್ ಗೋಯೆಲ್ ಅವರಿಗೆ ಭಾರತದ ನ್ಯಾಯಾಲಯಗಳ ಮೂಲಕ ಕಾನೂನಾತ್ಮಕವಾಗಿ ಸಮನ್ಸ್ ತಲುಪಿಸಲು ಫೆಡರಲ್ ನ್ಯಾಯಾಧೀಶೆ ಕ್ಯಾಥರೀನ್ ಪೋಲ್ ಫೈಲ್ಲಾ (Katherine Polk Failla) ಅನುಮತಿ ನೀಡಿದ್ದಾರೆ. ಭಾರತ ಸರ್ಕಾರವು 2019 ರಲ್ಲಿ ‘ಸಿಖ್ಸ್ ಫಾರ್ ಜಸ್ಟಿಸ್’ (SFJ) ಸಂಸ್ಥೆಯನ್ನು ನಿಷೇಧಿಸಿದ್ದು, 2020 ರಲ್ಲಿ ಗುರ್ಪತ್‌ವಂತ್ ಸಿಂಗ್ ಪನ್ನುನ್‌ನನ್ನು ಕಾನೂನುಬಾಹಿರ ಚಟುವಟಿಕೆಗಳ ತಡೆ ಕಾಯ್ದೆ (UAPA) ಅಡಿಯಲ್ಲಿ ಭಯೋತ್ಪಾದಕ ಎಂದು ಘೋಷಿಸಿದೆ.
ಈ ತೀರ್ಪಿನ ಪ್ರಕಾರ, ಅಜಿತ್ ದೋವಲ್ ಮತ್ತು ಸಾಮಂತ್ ಗೋಯೆಲ್‌ಗೆ ದೆಹಲಿ ನ್ಯಾಯಾಲಯಗಳ ಮೂಲಕ ಸಮನ್ಸ್ ಜಾರಿ ಮಾಡಲು ಅಮೆರಿಕ ಕೋರ್ಟ್ ಅನುಮತಿ ನೀಡಿದೆ. ಇದಕ್ಕೆ ಅಗತ್ಯವಿರುವ ದಾಖಲೆಗಳನ್ನು ಪನ್ನುನ್ ನವೆಂಬರ್ 30, 2026ರೊಳಗೆ ಸಲ್ಲಿಸಬೇಕಿದೆ. ಈ ದಾಖಲೆಗಳನ್ನು ಅಮೆರಿಕದ ನ್ಯಾಯಾಲಯವು ಸಂಪೂರ್ಣವಾಗಿ ಪರಿಶೀಲಿಸಿದ ನಂತರವಷ್ಟೇ ಭಾರತೀಯ ನ್ಯಾಯಾಲಯಗಳಿಗೆ ಪ್ರಕ್ರಿಯೆಗಾಗಿ ರವಾನಿಸಲಾಗುತ್ತದೆ. ಈ ಮೊದಲು ಅಮೆರಿಕದಲ್ಲಿ ಭಾರತೀಯ ಅಧಿಕಾರಿಗಳಿಗೆ ನೇರವಾಗಿ ಸಮನ್ಸ್ ನೀಡಲು ಪನ್ನುನ್ ಕಡೆಯವರು ನಡೆಸಿದ್ದ ಯತ್ನಗಳನ್ನು ನ್ಯಾಯಾಲಯವು ರದ್ದುಗೊಳಿಸಿತ್ತು.
ಮತ್ತೊಂದೆಡೆ, ಭಾರತ ಸರ್ಕಾರಕ್ಕೆ ಸಂಬಂಧಿಸಿದಂತೆ ಅಮೆರಿಕದ ವಿದೇಶಾಂಗ ಇಲಾಖೆಯು ಅಕ್ಟೋಬರ್ 9, 2026ರಂದೇ ವಾಷಿಂಗ್ಟನ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಗೆ ರಾಜತಾಂತ್ರಿಕ ನೋಟ್ ಮೂಲಕ ಅಧಿಕೃತ ಸಮನ್ಸ್ ತಲುಪಿಸಿದೆ. ಭಾರತ ಸರ್ಕಾರವು ಇದಕ್ಕೆ ಉತ್ತರಿಸಲು 60 ದಿನಗಳ ಕಾಲಾವಕಾಶ ನೀಡಲಾಗಿದ್ದು, ಡಿಸೆಂಬರ್ 8, 2026ರೊಳಗೆ ಅಮೆರಿಕ ನ್ಯಾಯಾಲಯಕ್ಕೆ ಪ್ರತಿಕ್ರಿಯಿಸಬೇಕಿದೆ. ಆದರೆ ದೋವಲ್ ಮತ್ತು ಗೋಯೆಲ್ ಅವರಿಗೆ ವೈಯಕ್ತಿಕವಾಗಿ ನೀಡಬೇಕಾದ ಸಮನ್ಸ್ ಪ್ರಕ್ರಿಯೆ ಇನ್ನೂ ಭಾರತೀಯ ನ್ಯಾಯಾಲಯಗಳ ಮೂಲಕ ಆರಂಭವಾಗಬೇಕಿದೆ.
2023 ರಲ್ಲಿ ಕೆನಡಾದಲ್ಲಿ ನಡೆದ ಹರ್ದೀಪ್ ಸಿಂಗ್ ನಿಜ್ಜರ್ ಹತ್ಯೆ ಹಾಗೂ ಅಮೆರಿಕದಲ್ಲಿ ತನ್ನ ವಿರುದ್ಧ ನಡೆಯಿತು ಎನ್ನಲಾದ ಹತ್ಯೆ ಸಂಚಿನ ಹಿನ್ನೆಲೆಯಲ್ಲಿ ನಷ್ಟಪರಿಹಾರ ಕೋರಿ ಪನ್ನುನ್ ಈ ಖಾಸಗಿ ಸಿವಿಲ್ ಅರ್ಜಿಯನ್ನು ಸಲ್ಲಿಸಿದ್ದಾನೆ. ಪ್ರಕರಣವು ಪ್ರಸ್ತುತ ಆರಂಭಿಕ ಹಂತದಲ್ಲಿದ್ದು, ಸಾರ್ವಭೌಮ ರಾಷ್ಟ್ರದ ಉನ್ನತಾಧಿಕಾರಿಗಳಿಗೆ ಲಭ್ಯವಿರುವ ‘ರಾಜತಾಂತ್ರಿಕ ವಿನಾಯಿತಿ’ ಆಧಾರದ ಮೇಲೆ ಪ್ರಕರಣವನ್ನು ವಜಾಗೊಳಿಸುವಂತೆ ಅರ್ಜಿ ಸಲ್ಲಿಸಲು ಅಮೆರಿಕದ ಕಾನೂನು ಪ್ರಕ್ರಿಯೆಯಲ್ಲಿ ಅವಕಾಶವಿದೆ ಎಂದು ವರದಿಗಳು ತಿಳಿಸಿವೆ
