ದೆಹಲಿಯಲ್ಲಿ ಪ್ರಾಮಾಣಿಕ ಸರ್ಕಾರ ಇರುವವರೆಗೆ, ಯಾವುದೇ ಖಾಸಗಿ ಶಾಲೆಗಳು ಅನಿಯಂತ್ರಿತವಾಗಿ ಶುಲ್ಕವನ್ನು ಹೆಚ್ಚಿಸಲು ಸಾಧ್ಯವಿಲ್ಲ ಎಂದು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಹೇಳಿದ್ದಾರೆ.
ಕಳೆದ ಐದು ವರ್ಷಗಳಂತೆ ದೆಹಲಿಯಲ್ಲಿ ಖಾಸಗಿ ಶಾಲಾ ಶುಲ್ಕವನ್ನು ನಿಯಂತ್ರಿಸುವುದನ್ನು ಮುಂದುವರಿಸುತ್ತೇನೆ ಎಂದು ಪೋಷಕರಿಗೆ ಭರವಸೆ ನೀಡಿದ್ದಾರೆ.
“ದೆಹಲಿಯಲ್ಲಿ ಪ್ರಾಮಾಣಿಕ ಸರ್ಕಾರ ಇರುವವರೆಗೂ ಪೋಷಕರು ಚಿಂತಿಸಬೇಕಾಗಿಲ್ಲ. ದೆಹಲಿಯ ಯಾವುದೇ ಖಾಸಗಿ ಶಾಲೆ ತನ್ನ ಶುಲ್ಕವನ್ನು ಅನಿಯಂತ್ರಿತವಾಗಿ ನಿರ್ಧರಿಸಲು ಅನುಮತಿಸುವುದಿಲ್ಲ. ಕಳೆದ ಐದು ವರ್ಷಗಳಂತೆ ನಾವು ಶುಲ್ಕವನ್ನು ನಿಯಂತ್ರಿಸುವುದನ್ನು ಮುಂದುವರಿಸುತ್ತೇವೆ ” ಎಂದು ಕೇಜ್ರಿವಾಲ್ ಟ್ವೀಟ್ ಮಾಡಿದ್ದಾರೆ.
ಫೆಬ್ರವರಿ 8 ರ ದೆಹಲಿ ವಿಧಾನಸಭಾ ಚುನಾವಣೆಗೆ ಮುಂಚಿತವಾಗಿ ಅವರ ಅಭಿಪ್ರಾಯಗಳು ಬಂದಿವೆ. ಹತ್ತು ಅಂಶಗಳ ಚುನಾವಣಾ ಭರವಸೆಯೊಂದಿಗೆ ಖಾಸಗಿ ಶಾಲಾ ಪೋಷಕರ ಹಿತಕಾಯುವುದಾಗಿಯೂ ಸಹ ಕೇಜ್ರಿವಾಲ್ ತಿಳಿಸಿದ್ದಾರೆ.
2018ರ ಏಪ್ರಿಲ್ನಲ್ಲಿ ದೆಹಲಿ ಸರ್ಕಾರವು ಸರ್ಕಾರಿ ಭೂಮಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಖಾಸಗಿ ಅನುದಾನರಹಿತ ಶಾಲೆಗಳನ್ನು ಶಿಕ್ಷಣ ನಿರ್ದೇಶನಾಲಯದ ಅನುಮೋದನೆಯಿಲ್ಲದೆ ಬೋಧನಾ ಶುಲ್ಕವನ್ನು ಹೆಚ್ಚಿಸುವುದನ್ನು ನಿಷೇಧಿಸಿ ಸುತ್ತೋಲೆ ಹೊರಡಿಸಿತ್ತು.
ಅದೇ ವರ್ಷದ ಮೇ ತಿಂಗಳಲ್ಲಿ, 575 ಖಾಸಗಿ ಶಾಲೆಗಳು ವಿಧಿಸಿದ ಹೆಚ್ಚುವರಿ ಶುಲ್ಕವನ್ನು – ಜೂನ್ 2016 ರಿಂದ ಜನವರಿ 2018 ರ ನಡುವೆ – ಶೇಕಡಾ 9 ಬಡ್ಡಿಯೊಂದಿಗೆ ಮರುಪಾವತಿಸುವಂತೆ ಸರ್ಕಾರ ನಿರ್ದೇಶಿಸಿ ವಸೂಲಿ ಮಾಡಿತ್ತು. ಈ ಕ್ರಮವನ್ನು ಎಲ್ಲಾ ಪೋಷಕರು ಶ್ಲಾಘಿಸಿದ್ದರು.