ಇರಾನ್‌ನ ಸರ್ವೋಚ್ಚ ನಾಯಕ ಅಲಿ ಖಮೇನಿ ಮೇಲಿನ ಯಾವುದೇ ದಾಳಿಯನ್ನು ಇರಾನ್ ರಾಷ್ಟ್ರದ ವಿರುದ್ಧ “ಸಂಪೂರ್ಣ ಯುದ್ಧ” ಘೋಷಣೆ ಎಂದು ಪರಿಗಣಿಸಲಾಗುತ್ತದೆ ಎಂದು ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಎಚ್ಚರಿಸಿದ್ದಾರೆ.
“ಇರಾನ್‌ನಲ್ಲಿ ಹೊಸ ನಾಯಕತ್ವವನ್ನು ಹುಡುಕುವ ಸಮಯ” ಎಂದು ಟ್ರಂಪ್ ಶನಿವಾರ ಪೊಲಿಟಿಕೊಗೆ ಹೇಳಿದ ನಂತರ ಉದ್ವಿಗ್ನತೆ ಹೆಚ್ಚಿದೆ. ಈ ನಡುವೆ, ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ಪೆಜೆಶ್ಕಿಯಾನ್ ಅವರು ಎಚ್ಚರಿಕೆ ಸಂದೇಶ ನೀಡಿದ್ದಾರೆ.
“ನಮ್ಮ ಮಹಾನ್ ನಾಯಕನ ಮೇಲಿನ ಯಾವುದೇ ದಾಳಿಯು ಇರಾನ್ ರಾಷ್ಟ್ರದ ವಿರುದ್ಧ ಸಂಪೂರ್ಣ ಯುದ್ಧಕ್ಕೆ ಸಮಾನವಾಗಿರುತ್ತದೆ” ಎಂದು ಪೆಜೆಶ್ಕಿಯಾನ್ ಬರೆದಿದ್ದಾರೆ.
ಇರಾನ್ ಅಧ್ಯಕ್ಷರು ದೇಶದ ಆರ್ಥಿಕ ಸಂಕಷ್ಟಗಳಿಗೆ ವಾಷಿಂಗ್ಟನ್ ಅನ್ನು ದೂಷಿಸಿದರು. “ದೀರ್ಘಕಾಲದ ದ್ವೇಷ ಮತ್ತು ಯುನೈಟೆಡ್ ಸ್ಟೇಟ್ಸ್, ಅದರ ಮಿತ್ರರಾಷ್ಟ್ರಗಳು ವಿಧಿಸಿರುವ ಅಮಾನವೀಯ ನಿರ್ಬಂಧಗಳು ಇರಾನಿನ ಜನರಿಗೆ ಸಂಕಷ್ಟಕ್ಕೆ ಪ್ರಾಥಮಿಕವಾಗಿ ಕಾರಣ” ಎಂದು ಉಲ್ಲೇಖಿಸಿದ್ದಾರೆ ಎಂದು ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಶನಿವಾರ ಖಮೇನಿ ಟ್ರಂಪ್ ಅವರನ್ನು ಅಪರಾಧಿ ಎಂದು ಕರೆದಾಗ ಉಭಯ ರಾಷ್ಟ್ರಗಳ ರಾಜತಾಂತ್ರಿಕ ತಿಕ್ಕಾಟ ತೀವ್ರಗೊಂಡಿದೆ. ಇರಾನ್‌ನಲ್ಲಿ ಇತ್ತೀಚಿನ ದೇಶೀಯ ಅಶಾಂತಿಯ ಅವಧಿಯಲ್ಲಿ ಉಂಟಾದ ಸಾವುನೋವುಗಳು ಮತ್ತು ಹಾನಿಗಳಿಗೆ ಅವರನ್ನು ಹೊಣೆಗಾರರನ್ನಾಗಿ ಮಾಡಿದರು.
ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ದಶಕಗಳ ಆಡಳಿತವನ್ನು ಕೊನೆಗೊಳಿಸಲು ಟ್ರಂಪ್ ಕರೆ ನೀಡಿದರು. ದೇಶವು ನಿರಂತರ ಸಾರ್ವಜನಿಕ ಅಶಾಂತಿಯನ್ನು ಎದುರಿಸುತ್ತಿರುವ ಕಾರಣ ದೇಶಕ್ಕೆ ಹೊಸ ನಾಯಕತ್ವದ ಅಗತ್ಯವಿದೆ ಎಂದು ಹೇಳಿದರು.
ಶನಿವಾರ ಪೊಲಿಟಿಕೊ ಜೊತೆ ಮಾತನಾಡಿದ ಟ್ರಂಪ್, “ಇರಾನ್‌ನಲ್ಲಿ ಹೊಸ ನಾಯಕತ್ವವನ್ನು ಹುಡುಕುವ ಸಮಯ ಬಂದಿದೆ” ಎಂದು ಹೇಳಿದರು. ರಾಜಕೀಯ ದಬ್ಬಾಳಿಕೆ, ಆರ್ಥಿಕ ಸಂಕಷ್ಟ ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆಯ ಮೇಲಿನ ಸಾರ್ವಜನಿಕ ಕೋಪದಿಂದ ಈ ಪ್ರದರ್ಶನಗಳು ನಡೆದಿವೆ ಎಂದು ಹೇಳಿದ್ದರು.
ಹಿಂಸೆ ಮತ್ತು ಭಯದ ಮೂಲಕ ಆಡಳಿತ ನಡೆಸುತ್ತಿದೆ ಎಂದು ಆರೋಪಿಸಿದ ಟ್ರಂಪ್, ಇರಾನ್ ನಾಯಕತ್ವವನ್ನು ತೀವ್ರವಾಗಿ ಟೀಕಿಸಿದರು. ಮರಣದಂಡನೆ ವಿಧಿಸಲಾಗಿದೆ ಎಂದು ಆರೋಪಿಸುತ್ತಾ, “ಎರಡು ದಿನಗಳ ಹಿಂದೆ 800 ಕ್ಕೂ ಹೆಚ್ಚು ಜನರನ್ನು ಗಲ್ಲಿಗೇರಿಸದಿರುವುದು ಅವರು ತೆಗೆದುಕೊಂಡ ಅತ್ಯುತ್ತಮ ನಿರ್ಧಾರ” ಎಂದರು.
ಇರಾನ್‌ನ ಪ್ರಸ್ತುತ ನಾಯಕತ್ವವು ಅಧಿಕಾರದಲ್ಲಿ ಉಳಿಯಲು ದಮನವನ್ನು ಅವಲಂಬಿಸಿದೆ ಎಂದು ಅಮೆರಿಕ ಅಧ್ಯಕ್ಷರು ವಾದಿಸಿದರು. ದೇಶದ ಪತನಕ್ಕೆ ಖಮೇನಿ ಅವರನ್ನು ದೂಷಿಸಿದ ಟ್ರಂಪ್, “ದೇಶದ ಸಂಪೂರ್ಣ ವಿನಾಶ”ದ ಅಧ್ಯಕ್ಷತೆಯನ್ನು ಸರ್ವೋಚ್ಚ ನಾಯಕ ವಹಿಸಿದ್ದಾರೆ. ಭಿನ್ನಾಭಿಪ್ರಾಯವನ್ನು ನಿಗ್ರಹಿಸಲು ಭಾರೀ ಹಿಂಸಾಚಾರವನ್ನು ಬಳಸುತ್ತಿದ್ದಾರೆ ಎಂದು ಟ್ರಂಪ್ ಆರೋಪಿಸಿದರು.
