ಮೂರೂವರೆ ವರ್ಷದ ಕಿಂಡರ್ ಗಾರ್ಟನ್ ವಿದ್ಯಾರ್ಥಿನಿ ಮೇಲೆ ಪದೇ ಪದೇ ಅತ್ಯಾಚಾರ ಎಸಗಿದ ಆರೋಪದಲ್ಲಿ ಶಾಲಾ ಬಸ್ ನ ನಿರ್ವಾಹಕೊಬ್ಬನನ್ನು ಜೈಪುರ ಪೊಲೀಸರು ಬಂಧಿಸಿದ್ದಾರೆ.
ಪುಟ್ಟ ಬಾಲಕಿಯ ಮೇಲೆ ನಿರಂತರವಾಗಿ ಅತ್ಯಾಚಾರ ಎಸಗಿ, ಈ ಬಗ್ಗೆ ಯಾರಿಗಾದರೂ ತಿಳಿಸಿದರೆ ನಿಮ್ಮ ತಂದೆ-ತಾಯಿ ಸಾಯಬೇಕಾಗುತ್ತದೆ ಎಂದು ಆ ಬಾಲಕಿಗೆ ಬೆದರಿಕೆ ಹಾಕಿದ್ದನು ಎಂದು ಹೇಳಲಾಗುತ್ತಿದೆ.
ಈ ಪ್ರಕರಣದ ಸಂಬಂಧ ಆರೋಪಿ ಮದನ್ ಲಾಲ್ (34) ಎಂಬಾತನನ್ನು ಬಂಧಿಸಲಾಗಿದೆ. ಚಾಲಕ ಕಮಲ್ ಮತ್ತು ಬಸ್ಸಿನ ಮಹಿಳಾ ಸಹಾಯಕಿ ಪೂಜಾ ಕೂಡಾ ಅತ್ಯಾಚಾರದ ವೇಳೆ ಜೊತೆಗೆ ಇದ್ದರು ಎನ್ನಲಾಗುತ್ತಿದೆ. ಈ ಬಗ್ಗೆ ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ.
ನಿರಂತರ ಅತ್ಯಾಚಾರಕ್ಕೊಳಗಾದ ಬಾಲಕಿಯ ಗುಪ್ತಾಂಗ ಬಾತುಕೊಂಡಿರುವುದನ್ನು ತಾಯಿ ಗಮನಿಸಿದ್ದು, ಈ ಬಗ್ಗೆ ಬಾಲಕಿಯನ್ನು ವಿಚಾರಿಸಿದಾಗ ಬಾಲಕಿ ತನ್ನ ಮೇಲೆ ಲೈಂಗಿಕ ಹಲ್ಲೆ ನಡೆದದ್ದನ್ನು ಬಹಿರಂಗಪಡಿಸಿದ್ದಾಳೆ. ಬಾಲಕಿ ತನ್ನ ಮೇಲೆ ನಡೆದ ದೌರ್ಜನ್ಯವನ್ನು ವಿವರಿಸುವ ವಿಡಿಯೊವನ್ನು ತಾಯಿ ದಾಖಲಿಸಿ ಪೊಲೀಸರಿಗೆ ನೀಡಿದ್ದು, ಇದರ ಆಧಾರದಲ್ಲಿ ಮದನ್ ಲಾಲ್ ನನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ವಿವರಿಸಿದ್ದಾರೆ.
ಈ ಕೃತ್ಯದ ಬಗ್ಗೆ ಮಗು ತನ್ನ ಶಿಕ್ಷಕಿಗೆ ಕೂಡಾ ಮಾಹಿತಿ ನೀಡಿದ್ದಳು. ಆದರೆ ಆಗ ಶಿಕ್ಷಕಿ ಬಾಲಕಿಯನ್ನು ಬೈದು ಊಟ ಮುಗಿಸುವಂತೆ ಹೇಳಿದ್ದರು ಎಂದು ಮಗುವಿನ ತಾಯಿ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ ಎನ್ನಲಾಗಿದೆ.
ಮಗು ಶಾಲೆಗೆ ಬರಲು ಆರಂಭಿಸಿದಾಗಿನಿಂದ ಆರೋಪಿಗೆ ಆ ಮಗುವಿನ ಪರಿಚಯ ಇತ್ತು. ಬಾಲಕಿಯ ಜತೆ ಮದನ್ಲಾಲ್ ಇದ್ದ ಫೋಟೊ ಲಭ್ಯವಾಗಿದೆ ಎಂದು ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: ವಿಕಲಚೇತನ ದಲಿತ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರ