ಥಿಯೇಟರ್ಗಳಲ್ಲಿ ಬಿಡುಗಡೆಯಾದ ಮೂರು ದಿನಗಳ ಕಾಲ ಚಲನಚಿತ್ರದ ಕುರಿತು ವಿಮರ್ಷೆ ಮಾಡದಂತೆ ವ್ಯಕ್ತಿಗಳು ಅಥವಾ ಸಾಮಾಜಿಕ ಮಾಧ್ಯಮ ಚಾನಲ್ಗಳನ್ನು ನಿರ್ಬಂಧಿಸಬೇಕು ಎಂದು ಮಧ್ಯಂತರ ಆದೇಶ ನೀಡಬೇಕು ಎಂಬ ಮನವಿಯನ್ನು ಮದ್ರಾಸ್ ಹೈಕೋರ್ಟ್ ನಿರಾಕರಿಸಿದೆ.
ತಮಿಳು ಚಲನಚಿತ್ರ ಸಕ್ರಿಯ ನಿರ್ಮಾಪಕರ ಸಂಘ (ಟಿಎಫ್ಎಪಿಎ) ಸಲ್ಲಿಸಿದ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಸ್. ಸೌಂಥರ್, “ಯಾವುದೇ ಚಲನಚಿತ್ರವನ್ನು ವಿಮರ್ಷಿಸಲು ವಿಮರ್ಶಕರು ಅರ್ಹರಾಗಿದ್ದಾರೆ; ಅದು ಅವರ ಅಭಿಪ್ರಾಯವಾಗಿದೆ” ಎಂದು ಹೇಳಿದ್ದಾರೆ.
‘ಟಿಎಫ್ಎಪಿಎ’ಯನ್ನು ಪ್ರತಿನಿಧಿಸುವ ವಕೀಲ ವಿಜಯನ್ ಸುಬ್ರಮಣಿಯನ್, ಕೆಲವು ವ್ಯಕ್ತಿಗಳು, ಚಲನಚಿತ್ರ ವಿಮರ್ಶೆಗಳ ಸೋಗಿನಲ್ಲಿ, ನಿರ್ದೇಶಕರು, ನಟರು ಮತ್ತು ನಿರ್ಮಾಪಕರ ಮಾನಹಾನಿ, ಅವರ ಪ್ರತಿಷ್ಠೆಗೆ ಹಾನಿಯುಂಟುಮಾಡುತ್ತಾರೆ ಎಂದು ವಾದಿಸಿದರು.
ಅಸೋಸಿಯೇಷನ್ ಈ ಚಟುವಟಿಕೆಗಳ ಮೇಲೆ ನಿರ್ಬಂಧಗಳನ್ನು ಕೋರಿದ್ದು, ಚಲನಚಿತ್ರ ವಿಮರ್ಶೆಗಳ ಉದ್ದೇಶಕ್ಕಾಗಿ ಯೂಟ್ಯೂಬ್ ಚಾನೆಲ್ಗಳು ಸಿನಿಮಾ ಥಿಯೇಟರ್ಗಳಿಗೆ ಪ್ರವೇಶಿಸುವುದನ್ನು ತಡೆಯಲು ನಗರ ಪೊಲೀಸ್ ಆಯುಕ್ತರಿಗೆ ನಿರ್ದೇಶನಗಳನ್ನು ನೀಡುವಂತೆ ನ್ಯಾಯಾಲಯಕ್ಕೆ ಮನವಿ ಮಾಡಿತು.
ಅರ್ಜಿಯು ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ವಿಮರ್ಷೆ ಕುರಿತ ನಿಯಂತ್ರಣ ಮತ್ತು ಸ್ವಯಂ-ಶಿಸ್ತಿನ ಕೊರತೆಯನ್ನು ಎತ್ತಿ ತೋರಿಸಿದೆ. ಇದು ಮಾನಹಾನಿಕರ ಟೀಕೆಗಳಿಗೆ ಮತ್ತು ಚಲನಚಿತ್ರ ರೇಟಿಂಗ್ಗಳನ್ನು ತಿರುಚಲು ಸಂಘಟಿತ ಪ್ರಯತ್ನಗಳಿಗೆ ಕಾರಣವಾಗುತ್ತದೆ, ಇದನ್ನು “ವಿಮರ್ಶೆ ಬಾಂಬ್ ದಾಳಿ” ಎಂದು ಕರೆಯಲಾಗುತ್ತದೆ ಎಂದು ವಾದಿಸಿದ್ದಾರೆ.
“ಸಾಮಾನ್ಯವಾಗಿ ವೈಯಕ್ತಿಕ ಅಥವಾ ವ್ಯಾಪಾರದ ಪೈಪೋಟಿಯಿಂದ ಪ್ರೇರೇಪಿಸಲ್ಪಟ್ಟಿವೆ. ಸಾರ್ವಜನಿಕ ಅಭಿಪ್ರಾಯವನ್ನು ಋಣಾತ್ಮಕವಾಗಿ ಪ್ರಭಾವಿಸುತ್ತದೆ ಮತ್ತು ಪ್ರೇಕ್ಷಕರು ತನ್ನದೇ ಆದ ತೀರ್ಪು ರೂಪಿಸುವ ಮೊದಲು ಗಲ್ಲಾಪೆಟ್ಟಿಗೆಯ ಸಂಗ್ರಹಣೆಗಳಿಗೆ ಹಾನಿ ಮಾಡುತ್ತದೆ” ಎಂದು ಟಿಎಫ್ಎಪಿಎ ವಾದಿಸಿದೆ.
ಅಭಿವ್ಯಕ್ತಿ ಸ್ವಾತಂತ್ರ್ಯದ ಪ್ರಾಮುಖ್ಯತೆಯನ್ನು ಒತ್ತಿಹೇಳುವ ನ್ಯಾಯಾಧೀಶರು ಈ ನಿಟ್ಟಿನಲ್ಲಿ ಮಧ್ಯಂತರ ಆದೇಶ ಅಥವಾ ನಿರ್ದೇಶನಗಳನ್ನು ನೀಡಲು ನಿರಾಕರಿಸಿದರು. ಪ್ರತಿಕ್ರಿಯೆಗಾಗಿ, ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು, ಯೂಟ್ಯೂಬ್ಗೆ ನೋಟಿಸ್ಗಳನ್ನು ನೀಡಲಾಗಿದೆ. ನಾಲ್ಕು ವಾರಗಳ ನಂತರ ಮುಂದಿನ ವಿಚಾರಣೆಗೆ ಪ್ರಕರಣವನ್ನು ಮುಂದೂಡಲಾಗಿದೆ.
ತಮ್ಮ ಚಲನಚಿತ್ರಗಳ ವಾಣಿಜ್ಯ ಪ್ರದರ್ಶನದ ಮೇಲೆ ಆರಂಭಿಕ ವಿಮರ್ಶೆಗಳ ಪ್ರಭಾವದ ಬಗ್ಗೆ ತಮಿಳು ಚಲನಚಿತ್ರ ನಿರ್ಮಾಪಕರಲ್ಲಿ ಹೆಚ್ಚುತ್ತಿರುವ ಕಳವಳವನ್ನು ಈ ಅರ್ಜಿಯು ಅನುಸರಿಸುತ್ತದೆ.
ಇತ್ತೀಚೆಗೆ, ‘ಕಂಗುವ’, ‘ಇಂಡಿಯನ್ 2’ ಮತ್ತು ‘ವೆಟ್ಟೈಯನ್’ ಚಿತ್ರಗಳು ಯೂಟ್ಯೂಬ್ ಚಾನೆಲ್ಗಳಲ್ಲಿ ನಕಾರಾತ್ಮಕ ವಿಮರ್ಶೆಗಳು ಮತ್ತು ಅಭಿಮಾನಿಗಳ ಸಂದರ್ಶನಗಳಿಂದ ಪ್ರಭಾವಿತವಾಗಿವೆ ಎಂದು ವರದಿಯಾಗಿದೆ.
ಟಿಎಫ್ಎಪಿಎ ಮತ್ತು ತಮಿಳುನಾಡು ನಿರ್ಮಾಪಕರ ಮಂಡಳಿಯು ಆನ್ಲೈನ್ ಚಲನಚಿತ್ರ ವಿಮರ್ಶೆಗಳನ್ನು ನಿಯಂತ್ರಿಸಲು ಮಾರ್ಗಸೂಚಿಗಳಿಗೆ ಕರೆ ನೀಡಿವೆ. ಯೂಟ್ಯೂಬರ್ಗಳು ತಮ್ಮ ಆವರಣದಲ್ಲಿ ಸಂದರ್ಶನಗಳನ್ನು ನಡೆಸುವುದನ್ನು ನಿಷೇಧಿಸುವಂತೆ ಥಿಯೇಟರ್ ಮಾಲೀಕರನ್ನು ಒತ್ತಾಯಿಸಿವೆ.
ಇದನ್ನೂ ಓದಿ; ಸಂಭಾಲ್ಗೆ ಏಕಾಂಗಿಯಾಗಿ ಹೋಗಲು ಸಿದ್ಧ, ಪೊಲೀಸರು ಅನುಮತಿ ನೀಡುತ್ತಿಲ್ಲ: ರಾಹುಲ್ ಗಾಂಧಿ
