ಮೋದಿ ಸರ್ವಾಧಿಕಾರ ಇಂದಿರಾಗಾಂಧಿ ಸರ್ವಾಧಿಕಾರ ಒಂದೇನಾ?..: ಪ್ರಭಾತ್ ಪಟ್ನಾಯಕ್

ಓದುಗರಿಗೆ ಸೂಚನೆ:
ಈ ಲೇಖನದ ನಿರೂಪಣೆ ಡಿ.ಎನ್.ಶಂಕರಬಟ್ ಅವರ ಬಾಶಾ ಪ್ರಯೋಗಕ್ಕೆ ಒಳಪಟ್ಟಿದೆ. ಮಹಾಪ್ರಾಣದ ಬಳಕೆ, ಷ-ಶ ಬಳಕೆ ಸೇರಿದಂತೆ ಕೆಲವು ಹೊಸ ಸಂಗತಿಗಳನ್ನು ಅವರು ಬಲವಾಗಿ ಪ್ರತಿಪಾದಿಸುತ್ತಿದ್ದು, ಕೆಲವು ಲೇಕಕರು ಅದನ್ನು ಅನುಸರಿಸಲು ಪ್ರಯತ್ನಿಸುತ್ತಿದ್ದಾರೆ. ಹಾಗಾಗಿ ಈ ಲೇಕನದಲ್ಲಿನ ಬಾಶೆಯ ಬಳಕೆಯಲ್ಲಿ ನಿಮಗೆ ಕಂಡುಬರುವ ವ್ಯತ್ಯಾಸವನ್ನು, ಪ್ರೂಫ್ ವ್ಯತ್ಯಾಸ ಎಂದು ಬಗೆಯಬಾರದೆಂದು ಕೋರುತ್ತೇವೆ.

ಮಾನವ ಹಕ್ಕುಗಳ ಮೇಲೆ ಹಲ್ಲೆ, ಅದಿಕಾರದ ಕೇಂದ್ರೀಕರಣ ಮತ್ತು ಭಯವನ್ನ ಸೃಶ್ಟಿಸುವ ವಾತವರಣ ಈ ಕಾರಣಗಳಿಗೆ ನರೇಂದ್ರ ಮೋದಿಯನ್ನ ಇಂದಿರಾ ಗಾಂದಿಯವರ ತುರ್ತುಪರಿಸ್ಥಿತಿಯ ದಿನಗಳಿಗೆ ಹೋಲಿಸಬಹುದು. ಆದರೆ ಈ ಹೋಲಿಕೆ ಇಲ್ಲಿಗೆ ನಿಲ್ಲುತ್ತದೆ. ವಾಸ್ತವದಲ್ಲಿ ಅನೇಕ ವಿಶಯಗಳಲ್ಲಿ ಇವರಿಬ್ಬರೂ ತುಂಬಾ ಬಿನ್ನವಾಗಿದ್ದಾರೆ. ಮೊದಲನೆಯದಾಗಿ ತುರ್ತುಪರಿಸ್ಥಿತಿಯ ಸಂದರ್ಬದಲ್ಲಿ ದೊಂಬಿ ಹತ್ಯೆಗಳು (lynch mobs) ನಡೆಯುತ್ತಿರಲಿಲ್ಲ, ಮತಾಂದರು ಬೀದಿಯಲ್ಲಿ ನಿಂತು ಜನರನ್ನ ಹೆದರಿಸುತ್ತ ‘ರಾಶ್ಟ್ರೀಯತೆ’ಯ ಪಾಠ ಹೇಳಿಕೊಡುತ್ತಿರಲಿಲ್ಲ. ಈಗ ಸರಕಾರದ ವೈಫಲ್ಯವನ್ನ ಟೀಕೆ ಮಾಡುವವರ ಮೇಲೆ ಹಿಂದುತ್ವದ ಮತೀಯವಾದಿಗಳು ಹಲ್ಲೆ ಮಾಡಿ ತಪ್ಪು ಒಪ್ಪಿಕೊಳ್ಳುವಂತೆ ದೌರ್ಜನ್ಯ ನಡೆಸುತ್ತಿದ್ದಾರೆ. ಮತ್ತು ಈ ಪ್ರಜ್ಞಾವಂತರ ನೆತ್ತಿಯ ಮೇಲೆ ಸದಾ ಬಂದನದ ಬೀತಿಯ ಕತ್ತಿ ತೂಗುತ್ತಲೆ ಇರುತ್ತದೆ. ಫೇಸ್‍ಬುಕ್‍ನಲ್ಲಿ   ಸರಕಾರವನ್ನ ಟೀಕಿಸಿದ ಪ್ರಾದ್ಯಾಪಕರನ್ನ ಮಂಡಿಯೂರಿ ಕ್ಷಮಾಪಣೆ ಕೇಳುವಂತೆ ಮಾಡಿದ ಇತ್ತೀಚಿನ ಘಟನೆಯನ್ನ ಮರೆಯಲು ಸಾದ್ಯವಿಲ್ಲ.

ಎರಡನೆಯದಾಗಿ ಈಗಿನ ದಬ್ಬಾಳಿಕೆಯು ಹಿಂದುತ್ವವೆಂದರೆ ಅದು ‘ರಾಶ್ಟ್ರೀಯತೆ’ಯ ಸಿದ್ದಾಂತವೆಂದು ಹುಯಿಲಿಡುತ್ತಿದೆ. ಆದರೆ ಯಾವುದೆ ಸಾಮ್ಯತೆ ಇಲ್ಲದ ಸ್ವಾತಂತ್ರ್ಯ ಸಂದರ್ಬದ ಕಲೋನಿಯಲ್ ವಿರೋದಿ ರಾಶ್ಟ್ರೀಯತೆಯ ಹೆಸರನ್ನ ಬಳಸಿಕೊಂಡು ಲಾಬ ಪಡೆದುಕೊಳ್ಳುತ್ತಿದೆ. ತುರ್ತುಪರಿಸ್ಥಿತಿಯ ಕಾಲದ ದಬ್ಬಾಳಿಕೆಯಲ್ಲಿ ಇಂದಿರಾಗಾಂದಿಯವರ ಟೀಕಾಕಾರರನ್ನ ಗೌರವಾನ್ವಿತರು ಎಂದು ಪರಿಗಣಿಸಲಾಗುತ್ತಿತ್ತು. ಆದರೆ ಈಗಿನ ದಬ್ಬಾಳಿಕೆಯು ಟೀಕಾಕಾರರನ್ನ ತುಚ್ಚವಾಗಿ ಪರಿಗಣಿಸುತ್ತಿದೆ  ಮತ್ತು ಅವರನ್ನ ‘ಜನವಿರೋದಿ’ ಎಂದು ಕರೆಯಲಾಗುತ್ತಿದೆ. ವಿರೋದಪಕ್ಷಗಳನ್ನ ಬ್ರಶ್ಟರು ಎಂದು ದಾಳಿ ಮಾಡಲಾಗುತ್ತಿದೆ. ಜನರ ಮುಂದೆ ಅವರ ನೈತಿಕತೆಯನ್ನ ನಾಶ ಮಾಡುವ ಉದ್ದೇಶದಿಂದ ಈ ದಬ್ಬಾಳಿಕೆ ಮಾಡಲಾಗುತ್ತಿದೆ.

ಮೂರನೆಯ ವ್ಯತ್ಯಾಸವೆಂದರೆ ಸರಕಾರವು ಮಾದ್ಯಮವನ್ನ ಕಬ್ಜಾ ಮಾಡಿಕೊಂಡಿರುವುದು. ತುರ್ತುಪರಿಸ್ಥಿತಿಯ ಸಂದರ್ಬದಲ್ಲಿ ಮುದ್ರಣ ಮಾದ್ಯಮವನ್ನ ಸೆನ್ಸಾರ್‍ಶಿಪ್ ಮಾಡಲಾಗಿತ್ತು. ಇದನ್ನ ವಿರೋದಿಸಿ ಖಾಲಿ ಪುಟಗಳಲ್ಲಿ ಪತ್ರಿಕೆಯನ್ನ ಮುದ್ರಿಸಲಾಗುತ್ತಿತ್ತು. ಈಗ (ಕೆಲವನ್ನ ಹೊರತುಪಡಿಸಿ) ಬಹುಪಾಲು ಮಾದ್ಯಮಗಳು ಹಿಂದುತ್ವದ ಅಂಗಣದಲ್ಲಿವೆ. ಈ ಮಾದ್ಯಮಗಳನ್ನ ಬಳಿಸಿಕೊಂಡು ವಿರೋದ ಪಕ್ಷಗಳನ್ನ ಬಗ್ಗುಬಡಿಯಲಾಗುತ್ತಿದೆ

ಮಾದ್ಯಮಗಳ ಬದಲಾದ ಪಾತ್ರವು ತುರ್ತುಪರಿಸ್ಥಿತಿ ಮತ್ತು ಈಗಿನ ಪರಿಸ್ಥಿತಿಯ ನಡುವಿನ ನಾಲ್ಕನೆ ಮುಖ್ಯ ವ್ಯತ್ಯಾಸ. ಬಂಡವಾಳಶಾಹಿಗಳ ಹಿತಾಸಕ್ತಿಯೊಂದಿಗೆ ಸಂಪೂರ್ಣವಾಗಿ  ಅಡವಿಟ್ಟಿರುವ ಮೋದಿ ಸರಕಾರಕ್ಕೆ ಹೋಲಿಸಿದರೆ ಇಂದಿರಾಗಾಂದಿ ಸರಕಾರವು ಬಂಡವಾಳಶಾಹಿಗಳೊಂದಿಗೆ ಅಂತರವನ್ನ ಕಾಯ್ದುಕೊಂಡಿತ್ತು  ಮತ್ತು ಬಂಡವಾಳಶಾಹಿ ವಿರೋದಿ ಮುಂಗಡಪತ್ರ ಮಂಡಿಸಿತ್ತು. ಸ್ವಾತಂತ್ರೋತ್ತರ ನಂತರ ಯಾವುದೆ ಸರಕಾರವು ಮೋದಿ ಸರಕಾರದಶ್ಟು ಬಂಡವಾಳಶಾಹಿಗಳ ಜೊತೆ ಅನೋನ್ಯತೆಯಿಂದ ಇರಲಿಲ್ಲ. ಇದು ಅಡಾನಿಯ ಖಾಸಗಿ ವಿಮಾನಗಳಲ್ಲಿ ಮೋದಿ ಸುತ್ತಾಡುವಶ್ಟರ ಮಟ್ಟಿಗೆ ಗೆಳೆತನ ಹೊಂದಿದೆ. (ತಮ್ಮ ಪತ್ನಿ ಕಮಲಾ ನೆಹರೂ ಅವರು ಸ್ವಿಸ್ ದೇಶದ ಆರೋಗ್ಯದಾಮದಲ್ಲಿ ಕ್ಷಯರೋಗಕ್ಕೆ ಚಿಕಿತ್ಸೆ ಪಡೆಯುತ್ತಿದ್ದಾಗ ಹಿಂದುತ್ವವಾದಿಗಳು ಸದಾ ಹೀಗೆಳೆಯುವ ನೆಹರೂ ಅವರಿಗೆ ವಿದೇಶಕ್ಕೆ ತೆರಳಲು ಅವಶ್ಯಕವಾದ ಹಣವಿರಲಿಲ್ಲ. ಜಿ.ಡಿ.ಬಿರ್ಲಾ ಹಣಕಾಸು ನೆರವು ಒದಗಿಸಲು ಮುಂದಾದಾಗ ನೆಹರೂ ಆ ನೆರವನ್ನ ತಿರಸ್ಕರಿಸಿದರು. ಬದಲಿಗೆ ತಾವೆ ಹಣದ ವ್ಯವಸ್ಥೆ  ಮಾಡಿಕೊಂಡರು)

ಅಲ್ಪಸಂಖ್ಯಾತರ ವಿರುದ್ದ ಅದರಲ್ಲೂ ಮುಸ್ಲಿಂರ ವಿರುದ್ದ ಮೋದಿ ಸರಕಾರದ ದೌರ್ಜನ್ಯ ಐದನೆ ವ್ಯತ್ಯಾಸ. ಇಂದಿರಾಗಾಂದಿಯವರ ದಬ್ಬಾಳಿಕೆಯು ಯಾವುದೆ ಜಾತಿ, ದರ್ಮ, ಜನಾಂಗದ ವಿರುದ್ದವಿರಲಿಲ್ಲ. ಇದು ತುಂಬಾ ಸರಳವಾಗಿ ತನ್ನ ರಾಜಕೀಯ ವಿರೋದಿಗಳ ವಿರುದ್ದ ಅದರಲ್ಲೂ ಮೋಸದ ಚಟುವಟಿಕೆ ಮಾಡುತ್ತಿದ್ದ ಅವರ ಮಗ ಸಂಜಯ ಗಾಂದಿಯವರ ವಿರೋದಿಗಳ ವಿರುದ್ದವಾಗಿತ್ತು. ಜೊತೆಗೆ ಇತಿಹಾಸವನ್ನ ತಿರುಚಿ ಸತ್ಯವನ್ನ ಮರೆಮಾಚಿ ಮಕ್ಕಳ ತಲೆಯೊಳಗೆ ಸುಳ್ಳುಗಳನ್ನ ತುರುಕಿ ತಮ್ಮದೆ ದೇಶದ ಪ್ರಜೆಗಳ ವಿರುದ್ದ ದ್ವೇಶ ಹುಟ್ಟಿಸುವಂತಹ ಕೆಲಸವನ್ನ ಇಂದಿರಾಗಾಂದಿ ಎಂದಿಗೂ ಮಾಡಲಿಲ್ಲ.

ವೈಜ್ಞಾನಿಕ ಮನೋದರ್ಮವನ್ನ ತಿರಸ್ಕರಿಸಿ ಅವೈಜ್ಞಾನಿಕವಾದ, ಕಟ್ಟು ಕತೆಗಳ ಸಿದ್ದಾಂತವನ್ನ ವಿಜ್ಞಾನವೆಂದು ಪ್ರತಿಪಾದಿಸುವ ಪ್ರಮಾಣಿಸಿ ನೋಡುವ ಮನೋದರ್ಮವನ್ನ ಗೇಲಿ ಮಾಡುವ ಈಗಿನ ಮೋದಿ ಸರಕಾರದ ಮನಸ್ಥಿತಿ ಆರನೆ ವ್ಯತ್ಯಾಸವಾಗಿದೆ. ಕಳೆದ ಅನೇಕ ದಶಕಗಳಿಂದ ಆರೆಸ್ಸಸ್ ಈ ತರಹದ ಮತಿಹೀನ ಸಿದ್ದಾಂತಗಳನ್ನ ಪ್ರಚಾರ ಮಾಡುತ್ತಿತ್ತು ಇಂದು ಇದು ಸರಕಾರದ ಇಲಾಖೆಗಳಲ್ಲಿ ವ್ಯಾಪಿಸಿಕೊಂಡಿದೆ. ಬಾರತೀಯ ವಿಜ್ಞಾನ ಕಾಂಗ್ರೆಸ್ ಸಹ ಇದರಿಂದ ಹೊರತಾಗಿಲ್ಲ.

ಮೋದಿ ಸರಕಾರವು ಸಾರ್ವಜನಿಕ ಸಂಸ್ಥೆಗಳನ್ನ ಅದರಲ್ಲೂ ಕೇಂದ್ರೀಯ ವಿಶ್ವವಿದ್ಯಾಲಯಗಳು, ರಾಜ್ಯ ವಿವಿಗಳನ್ನ ನೈತಿಕವಾಗಿ ನಾಶ ಮಾಡಿದ್ದು ಏಳನೆ ವ್ಯತ್ಯಾಸವಾಗಿದೆ. ವಿಮರ್ಶಾತ್ಮಕ ಚಿಂತನೆಗಳನ್ನ ಹತ್ತಿಕ್ಕುವುದರ ಮೂಲಕ ಬೌದ್ದಿಕವಾಗಿ ಅವುಗಳನ್ನ ಸಾಯಿಸಲಾಗುತ್ತಿದೆ. ಒಂದುವೇಳೆ ವಿಮರ್ಶಾತ್ಮಕ ಚಿಂತನೆ, ಬೋದನೆಗಳಿಗೆ ಒತ್ತಾಯಿಸಿದರೆ  ಆ ಸಾರ್ವಜನಿಕ ಸಂಸ್ಥೆಗಳಿಗೆ ಅನುದಾನವನ್ನ ನಿರಾಕರಿಸಲಾಗುತ್ತದೆ ಮತ್ತು ಜೆಎನ್‍ಯುನಲ್ಲಿ ನಡೆದಂತೆ “ರಾಶ್ಟ್ರವಿರೋದಿ”ಗಳಿಗೆ ಆಶ್ರಯ ನೀಡಲಾಗುತ್ತಿದೆ ಎಂದು ಅಪಪ್ರಚಾರ ಮಾಡಲಾಗುತ್ತದೆ. ಈ ದೇಶದ ಅತ್ಯುತ್ತಮ ವಿಶ್ವವಿದ್ಯಾಲಯಗಳಾದ ಜೆಎನ್‍ಯು, ಹೈದರಬಾದ್ ವಿವಿ, ಪುಣೆಯ ಫಿಲ್ಮ ಇನ್ಸಟ್ಯೂಟ್, ಟಾಟಾ ಇನ್ಸಿಟ್ಯೂಟ್ ಆಫ್ ಸೋಶಿಯಲ್ ಸೈನ್ಸ್ ಇತ್ಯಾದಿಗಳು ಇಂದು ಉಸಿರಾಡಲು ಕಶ್ಟಪಡುತ್ತಿರುವುದನ್ನ ಕಂಡಾಗ ಇದು ಈ ಕಾಲದ ದುರಂತವನ್ನ ಹೇಳುತ್ತದೆ. ಈ ಮುಂಚೆ ಈ ರೀತಿ ಎಂದಿಗೂ ನಡೆದಿರಲಿಲ್ಲ ಯಾವುದೆ ಸರಕಾರವು ಸ್ವತಂತ್ರ ಚಿಂತನೆಗೆ ಇಂತಹ ಅಸಡ್ಡೆ, ತಿರಸ್ಕರಾರ ತೋರಿರಲಿಲ್ಲ

ತುರ್ತುಪರಿಸ್ಥಿತಿಯ ದಿನಗಳಿಗೂ ಮೋದಿಯ ವರ್ಶಗಳಿಗೂ ಇರುವ ಮೇಲಿನ ಈ ವ್ಯತ್ಯಾಸಗಳನ್ನ ಸಂಕ್ಷಿಪ್ತವಾಗಿ ಈ ರೀತಿ ಮಂಡಿಸಬಹುದು

ತುರ್ತುಪರಿಸ್ಥಿತಿಯು ಪ್ರಬುತ್ವದಿಂದ ಹೇರಲ್ಪಟ್ಟ ನಿರಂಕುಶ ಅದಿಕಾರವಾಗಿತ್ತು. ಸಂಪೂರ್ಣ ಕೇಂದ್ರೀಕರಣಗೊಂಡಿತ್ತು. ಅದು ಪ್ರಜಾಪ್ರಬುತ್ವದ ಸಮಾಜ ವ್ಯವಸ್ಥೆ ಮತ್ತು ಬಂಡವಾಳಶಾಹಿ ಅಬಿವೃದ್ದಿಯ ನಡುವಿನ ವೈರುಧ್ಯಗಳ ಕಾರಣದಿಂದ ಉಂಟಾಗಿತ್ತು. ಆದರೆ ಆಗ ಬಂಡವಾಳಶಾಹಿ ನೇರವಾಗಿ ಆಡಳಿತದ ಪ್ರತಿನಿದಿ ಆಗಿರಲಿಲ್ಲ. ಮೋದಿಯವರ ಈ ವರ್ಶಗಳು ಸಮಾಜದ ಮೇಲೆ ಪ್ರಬುತ್ವದ ನಿರಂಕುಶ ಅದಿಕಾರದ ದಬ್ಬಾಳಿಕೆಯ ಜೊತೆಗೆ ಅತಿಯಾಗಿ ಕೇಂದ್ರೀಕರಣಗೊಂಡಿತ್ತು. ದ್ವೇಶ ಸಾದಿಸುವ ಭಕ್ತರ ಒಂದು ಪಡೆಯನ್ನ ಪ್ರೋತ್ಸಾಹಿಸುತ್ತಿರುವ ಮೋದಿಯವರ ಆಡಳಿತ ಒಬ್ಬರನ್ನ ಮತ್ತೊಬ್ಬರ ವಿರುದ್ದ ಎತ್ತಿಕಟ್ಟುತ್ತಿದೆ. ಮತ್ತು ಬಂಡವಾಳಶಾಹಿಗಳ ಹಿತಾಸಕ್ತಿಯ ಪರವಾಗಿ ಕೆಲಸ ಮಾಡುತ್ತಿದೆ.

ಮುಂದಿನ ಕಂತು ಓದಲು ಇಲ್ಲಿ ಕ್ಲಿಕ್ಕಿಸಿ