ಕೇರಳದ ಭ್ರಷ್ಟಾಚಾರ ನಿಗ್ರಹ ಮತ್ತು ವಿಜಿಲೆನ್ಸ್ ಬ್ಯೂರೋ (ವಿಎಸಿಬಿ) ಪ್ರಸ್ತುತ ಮುಖ್ಯ ಚುನಾವಣಾ ಆಯುಕ್ತರಾಗಿರುವ ಗ್ಯಾನೇಶ್ ಕುಮಾರ್ ಅವರ ವಿರುದ್ಧ ಕೇಳಿಬಂದಿರುವ ಲಂಚದ ಆರೋಪಗಳ ಕುರಿತು ಪ್ರಾಥಮಿಕ ತನಿಖೆಯನ್ನು ಆರಂಭಿಸಿದೆ.
2006ರಲ್ಲಿ ಗ್ಯಾನೇಶ್ ಕುಮಾರ್ ಕೇರಳದಲ್ಲಿ ಲೋಕೋಪಯೋಗಿ ಇಲಾಖೆಯ (ಪಿಡಬ್ಲ್ಯೂಡಿ) ಕಾರ್ಯದರ್ಶಿಯಾಗಿದ್ದ ಅವಧಿಗೆ ಸಂಬಂಧಿಸಿದಂತೆ ಈ ಆರೋಪ ಕೇಳಿಬಂದಿದೆ. ತನಿಖಾಧಿಕಾರಿಗಳು ಸೋಮವಾರ (ನ.9) ವಿ.ಒ ಸಾಜನ್ ಅವರಿಂದ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದಾರೆ. ಸಾಜನ್ ಅವರು ಈ ಹಿಂದೆ ಕೇರಳ ರಾಜ್ಯ ಸಾರಿಗೆ ಯೋಜನೆ (ಕೆಎಸ್‌ಟಿಪಿ) ಅಡಿಯಲ್ಲಿ ಕಾಮಗಾರಿಗಳನ್ನು ನಿರ್ವಹಿಸುತ್ತಿದ್ದ ಗುತ್ತಿಗೆ ಸಂಸ್ಥೆಯಾದ ‘ಪಾಟಿ-ಬೆಲ್’ (ಪಿಎಟಿಐ-ಬಿಇಎಲ್) ಕನ್ಸೋರ್ಟಿಯಂಗೆ ಸಾಮಗ್ರಿಗಳನ್ನು ಪೂರೈಸುತ್ತಿದ್ದರು.
ಪಾಟಿ-ಬೆಲ್ ಸಂಸ್ಥೆಯ ಮುಖ್ಯ ಪ್ರಾಜೆಕ್ಟ್ ಮ್ಯಾನೇಜರ್ ಆಗಿದ್ದ ಮಲೇಷ್ಯಾ ಮೂಲದ ಲೀ ಸೀ ಬೀನ್ ಅವರು 2006ರಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಈ ಘಟನೆಯು ಆಗಿನ ಪಿಡಬ್ಲ್ಯೂಡಿ ಕಾರ್ಯದರ್ಶಿಯಾಗಿದ್ದ ಗ್ಯಾನೇಶ್ ಕುಮಾರ್ ಸೇರಿದಂತೆ ಇತರ ಅಧಿಕಾರಿಗಳ ವಿರುದ್ಧ ಗಂಭೀರ ಆರೋಪಗಳು ಕೇಳಿಬರಲು ಕಾರಣವಾಗಿತ್ತು. ಬಾಕಿ ಉಳಿದಿರುವ ಬಿಲ್‌ಗಳನ್ನು ಬಿಡುಗಡೆ ಮಾಡಲು ಗ್ಯಾನೇಶ್ ಅವರು ಲಂಚ ಕೇಳಿದ್ದರು ಮತ್ತು ಲೀ ಅವರ ಆತ್ಮಹತ್ಯೆ ಪತ್ರದಲ್ಲಿ ಗ್ಯಾನೇಶ್ ಅವರ ಹೆಸರು ಉಲ್ಲೇಖವಾಗಿದೆ ಎಂದು ಅಂದಿನ ಮಾಧ್ಯಮ ವರದಿಗಳು ಆರೋಪಿಸಿದ್ದವು. ಆದಾಗ್ಯೂ, ಯೋಜನೆಯಲ್ಲಿ ಯಾವುದೇ ಅಕ್ರಮಗಳು ಕಂಡುಬರದ ಕಾರಣ ನೀಡಿ ವಿಜಿಲೆನ್ಸ್ ಇಲಾಖೆಯು ಆಗ ಪ್ರಕರಣವನ್ನು ಕೈಬಿಟ್ಟಿತ್ತು. ಅಲ್ಲದೆ, ಲೀ ಅವರ ಆತ್ಮಹತ್ಯೆ ಪತ್ರದ ವಿವರಗಳನ್ನು ಅವರ ಕುಟುಂಬದವರು ಎಂದಿಗೂ ಸಾರ್ವಜನಿಕವಾಗಿ ಬಹಿರಂಗಪಡಿಸಿರಲಿಲ್ಲ.
ಕಳೆದ ಅಕ್ಟೋಬರ್‌ನಲ್ಲಿ, ಗ್ಯಾನೇಶ್ ಕುಮಾರ್ ಮುಖ್ಯ ಚುನಾವಣಾ ಆಯುಕ್ತರಾಗಿ ತಮ್ಮ ಸ್ಥಾನಕ್ಕೆ ಸಂಬಂಧಿಸಿದಂತೆ ಆರೋಪಗಳನ್ನು ಎದುರಿಸುತ್ತಿರುವ ಹಿನ್ನೆಲೆಯಲ್ಲಿ, ಕೇರಳದ ಗೃಹ ಸಚಿವ ರಮೇಶ್ ಚೆನ್ನಿತ್ತಲ ಅವರು ಹೊಸ ತನಿಖೆಗೆ ಆದೇಶಿಸಿದ್ದರು. ಕಾಂಗ್ರೆಸ್ ಮುಖಂಡ ಮಲಯಂ ಕೀಳು ಗೋಪಾಲಕೃಷ್ಣನ್ ಅವರು ನೀಡಿದ ದೂರಿನ ಆಧಾರದ ಮೇಲೆ ಈ ಆದೇಶ ನೀಡಿದ್ದರು.
ವಿಜಿಲೆನ್ಸ್ ಇಲಾಖೆಗೆ ತನಿಖೆ ಆರಂಭಿಸಲು ಸೂಚಿಸಿದ ಕೆಲವು ವಾರಗಳ ನಂತರ, ಚಡಯಮಂಗಲಂ ಮೂಲದ ಸಾಜನ್ ಗ್ಯಾನೇಶ್ ಅವರು ಲೀ ಅವರಿಂದ 2 ಕೋಟಿ ರೂಪಾಯಿ ಲಂಚ ಕೇಳಿದ್ದರು ಎಂಬ ಆರೋಪದೊಂದಿಗೆ ಮುಂದೆ ಬಂದಿದ್ದಾರೆ. ಅಲ್ಲದೆ, ಈ ಆರೋಪದ ಕುರಿತು ತನಿಖೆ ನಡೆಸುವಂತೆ ಕೋರಿ ಅವರು ವಿಜಿಲೆನ್ಸ್ ನಿರ್ದೇಶಕರಿಗೂ ದೂರು ನೀಡಿದ್ದಾರೆ.
“ನಮ್ಮ ಜೊತೆ ದೂರವಾಣಿ ಮೂಲಕ ಮಾತನಾಡಿರುವ ಸಾಜನ್, ಬಾಕಿ ಇರುವ ಬಿಲ್‌ಗಳನ್ನು ಬಿಡುಗಡೆ ಮಾಡಲು ಗ್ಯಾನೇಶ್ ಅವರು 2 ಕೋಟಿ ರೂಪಾಯಿ ಲಂಚ ಕೇಳಿದ್ದಾಗಿ ಲೀ ತಮಗೆ ತಿಳಿಸಿದ್ದರು ಎಂದು ಹೇಳಿದ್ದಾರೆ. 2001ರಲ್ಲಿ ಪಾಟಿ-ಬೆಲ್ ಸಂಸ್ಥೆಯು ಮುಖ್ಯ ಕೇಂದ್ರ ರಸ್ತೆಯ ನಿರ್ಮಾಣ ಕಾಮಗಾರಿಯನ್ನು ವಹಿಸಿಕೊಂಡ ನಂತರ ಸಾಜನ್ ಅವರಿಗೆ ಸಾಮಗ್ರಿಗಳನ್ನು ಪೂರೈಸುತ್ತಿದ್ದರು” ಎಂದು thenewsminute.com ವರದಿ ಮಾಡಿದೆ.
“ಚಡಯಮಂಗಲಂನಲ್ಲಿದ್ದ ಪಾಟಿ-ಬೆಲ್ ಸಂಸ್ಥೆಯ ಕ್ಯಾಂಪ್ ಆಫೀಸ್ ನನ್ನ ಮನೆಗೆ ಹತ್ತಿರದಲ್ಲಿತ್ತು. ನಾನೂ ಮತ್ತು ನನ್ನ ಸ್ನೇಹಿತರು ಸಾಮಗ್ರಿ ಹಾಗೂ ಯಂತ್ರೋಪಕರಣಗಳನ್ನು ಪೂರೈಸುವ ಗುತ್ತಿಗೆ ಹೊಂದಿದ್ದೆವು. ನಮಗೆ ಹಣ ಸರಿಯಾದ ಸಮಯಕ್ಕೆ ಸಿಗುತ್ತಿತ್ತು, ಆದರೆ ಒಂದು ದಿನ ಅದು ದಿಢೀರನೆ ನಿಂತುಹೋಯಿತು. ನಮ್ಮಲ್ಲಿ ಕೆಲವರು ಪ್ರತಿಭಟಿಸಲು ಲೀ ಅವರ ಕ್ಯಾಬಿನ್‌ಗೆ ಹೋಗಿದ್ದೆವು. ಆಗಲೇ ನಮಗೆ ಪಿಡಬ್ಲ್ಯೂಡಿ ಕಾರ್ಯದರ್ಶಿ ಗ್ಯಾನೇಶ್ ಅವರು ಸುಮಾರು 14 ಕೋಟಿ ರೂಪಾಯಿ ಮೌಲ್ಯದ ನಾಲ್ಕು ಬಿಲ್‌ಗಳನ್ನು ತಡೆಹಿಡಿದಿರುವುದು ತಿಳಿಯಿತು. ಗ್ಯಾನೇಶ್ ಅವರು 2 ಕೋಟಿ ರೂಪಾಯಿ ಲಂಚ ಕೇಳಿದ್ದಾರೆ ಎಂದು ಲೀ ಮತ್ತು ಪಾಟಿ-ಬೆಲ್ ಸಂಸ್ಥೆಯ ಮತ್ತೊಬ್ಬ ಇಂಜಿನಿಯರ್ ಸುಕುಮಾರನ್ ನಮಗೆ ತಿಳಿಸಿದ್ದರು” ಎಂದು ಸಾಜನ್ ಹೇಳಿದ್ದಾಗಿ thenewsminute.com ವರದಿ ಉಲ್ಲೇಖಿಸಿದೆ.
“ನಂತರ, ಸುಕುಮಾರನ್ ಸರ್ ನನಗೆ ಆತ್ಮಹತ್ಯೆ ಮತ್ತು ಡೆತ್‌ನೋಟ್‌ಗಳ ಬಗ್ಗೆ ತಿಳಿಸಿದ್ದರು. ತಾವು ಆ ಪತ್ರಗಳನ್ನು ನೋಡಿರುವುದಾಗಿಯೂ ಮತ್ತು ಅದರಲ್ಲಿ ಗ್ಯಾನೇಶ್ ಅವರ ಹೆಸರಿತ್ತು ಎಂದೂ ಅವರು ನನಗೆ ಹೇಳಿದ್ದರು” ಎಂದು ಸಾಜನ್ ತಿಳಿಸಿದ್ದಾರೆ.
“ಗ್ಯಾನೇಶ್ ಅವರಿಗೆ ಈ ಪ್ರಕರಣದಲ್ಲಿ ಕ್ಲೀನ್ ಚಿಟ್ ನೀಡಲಾಗಿದೆ ಎಂಬ ವಿಷಯ ಇತ್ತೀಚೆಗಷ್ಟೇ ನನಗೆ ತಿಳಿಯಿತು. ಒಂದು ವೇಳೆ ವಿಜಿಲೆನ್ಸ್ ಇಲಾಖೆಯು ಅಂದೇ ಸುಕುಮಾರನ್ ಅವರಂತಹ ಪಾಟಿ-ಬೆಲ್ ಸಂಸ್ಥೆಯ ನೌಕರರಿಂದ ಹೇಳಿಕೆಗಳನ್ನು ದಾಖಲಿಸಿಕೊಂಡಿದ್ದರೆ, ಆಗಲೇ ಈ ಪ್ರಕರಣವನ್ನು ಭೇದಿಸಬಹುದಿತ್ತು” ಎಂಬುವುದಾಗಿ ಸಾಜನ್ ಹೇಳಿದ್ದಾರೆ ಎಂದು thenewsminute.com ವಿವರಿಸಿದೆ.
ಪಾಟಿ-ಬೆಲ್ ಸಂಸ್ಥೆಯು ಚಡಯಮಂಗಲಂನಲ್ಲಿ ಕಚೇರಿಯನ್ನು ಹೊಂದಿತ್ತು ಮತ್ತು ಮಲೇಷ್ಯಾ ಮೂಲದವರಾದ ಸುಕುಮಾರನ್ ಅವರು ಅಲ್ಲಿನ ಉದ್ಯೋಗಿಯಾಗಿದ್ದರು ಎಂಬುದನ್ನು ನಾವು ಸ್ವತಂತ್ರವಾಗಿ ಪರಿಶೀಲಿಸಿ ಖಚಿತಪಡಿಸಿಕೊಂಡಿದ್ದೇವೆ ಎಂದು thenewsminute.com ಹೇಳಿದೆ.
ಲೀ ಅವರ ನಿಧನದ ಕೆಲ ಸಮಯದ ನಂತರ ಮಲೇಷ್ಯಾಕ್ಕೆ ಹಿಂತಿರುಗಿದ ಸುಕುಮಾರನ್ ಅವರನ್ನು ಪತ್ತೆಹಚ್ಚಲು ನಮಗೆ ಸಾಧ್ಯವಾಗಿಲ್ಲ. ಈ ಯೋಜನೆಯ ಭಾಗವಾಗಿದ್ದ, ಆದರೆ ಹೆಸರು ಬಹಿರಂಗಪಡಿಸಲು ಬಯಸದ ಮೂಲಗಳು ತಿಳಿಸಿರುವ ಪ್ರಕಾರ, ಅವರಿಗೆ ಈ ಲಂಚದ ಆರೋಪದ ಬಗ್ಗೆ ಯಾವುದೇ ಮಾಹಿತಿ ಇರಲಿಲ್ಲ ಮತ್ತು ಲೀ ಅವರು ನವೆಂಬರ್ 2006ರಲ್ಲಿ ಮಲೇಷ್ಯಾಕ್ಕೆ ಹೊರಡುವ ಮೊದಲು ಈ ಬಗ್ಗೆ ಅವರ ಬಳಿ ಎಂದೂ ಪ್ರಸ್ತಾಪಿಸಿರಲಿಲ್ಲ. ಅವರ ಪ್ರಕಾರ, ಬಿಲ್‌ಗಳನ್ನು ತಡೆಹಿಡಿದಿದ್ದು ಹಣಕಾಸು ಇಲಾಖೆಯೇ ಹೊರತು ಲೋಕೋಪಯೋಗಿ ಇಲಾಖೆ ಅಲ್ಲ. ಈ ಬಿಕ್ಕಟ್ಟನ್ನು ಬಗೆಹರಿಸಲು ಕಂಪನಿಯು ಹೆಚ್ಚಿನ ಹಣವನ್ನು ಬಿಡುಗಡೆ ಮಾಡಬಹುದು ಎಂಬ ಭರವಸೆಯೊಂದಿಗೆ ಲೀ ಮಲೇಷ್ಯಾಕ್ಕೆ ಹೋಗಿದ್ದರು thenewsminute.com ವರದಿ ಉಲ್ಲೇಖಿಸಿದೆ.
