ದೆಹಲಿಯ ಮಾಳವೀಯ ನಗರದಲ್ಲಿ ಅರುಣಾಚಲ ಪ್ರದೇಶದ ಮೂವರು ಮಹಿಳೆಯರಿಗೆ ಜನಾಂಗೀಯ ನಿಂದನೆ ಮಾಡಿ, ಕಿರುಕುಳ ನೀಡಿದ ಆರೋಪ ಕೇಳಿ ಬಂದಿದೆ.
ಫೆಬ್ರವರಿ 20 ಎಸಿ ದುರಸ್ತಿ ಸಂದರ್ಭದಲ್ಲಿ ಉಂಟಾದ ಸಣ್ಣ ಜಗಳವೊಂದು ಜನಾಂಗೀಯ ನಿಂದನೆಗೆ ತಿರುಗಿದೆ. ದಕ್ಷಿಣ ದೆಹಲಿಯ ಮಾಳವೀಯ ನಗರದ ನಿವಾಸಿಗಳಾದ ಹರ್ಷ್ ಸಿಂಗ್ ಮತ್ತು ರೂಬಿ ಜೈನ್ ದಂಪತಿ ಅರುಣಾಚಲ ಪ್ರದೇಶ ಮಹಿಳೆಯರನ್ನು “ಮೋಮೋ” ಮತ್ತು “ದಂಧೇವಾಲಿ” (ಲೈಂಗಿಕ ಕಾರ್ಯಕರ್ತರು) ಎಂದು ಕರೆದು ಅವಮಾನಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ಸಂತ್ರಸ್ತ ಮಹಿಳೆಯರು ನೀಡಿದ ದೂರಿನ ಮೇರೆಗೆ ದೆಹಲಿ ಪೊಲೀಸರು ಭಾರತೀಯ ನ್ಯಾಯ ಸಂಹಿತೆಯ (ಬಿಎಎನ್‌ಎಸ್‌) ಮಹಿಳೆಯ ಘನತೆಗೆ ಧಕ್ಕೆ ತರುವುದು, ಕ್ರಿಮಿನಲ್ ಬೆದರಿಕೆ ಮತ್ತು ಜನಾಂಗದ ಆಧಾರದ ಮೇಲೆ ದ್ವೇಷ ಹರಡುವುದು ಸೇರಿದಂತೆ ವಿವಿಧ ಸೆಕ್ಷನ್‌ಗಳ ಅಡಿಯಲ್ಲಿ ಎಫ್‌ಐಆರ್ ಎಫ್‌ಐಆರ್ ದಾಖಲಿಸಿದ್ದಾರೆ.
ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಈಶಾನ್ಯ ಭಾರತದ ನಾಯಕರು ಮತ್ತು ನಾಗರಿಕರು ತೀವ್ರ ಖಂಡನೆ ವ್ಯಕ್ತಪಡಿಸಿದ್ದಾರೆ.
ಘಟನೆ ವಿವರ : ಫೆ.20ರಂದು ಸಂಜೆ 3:30 ರ ಸುಮಾರಿಗೆ, ಕಟ್ಟಡದ ನಾಲ್ಕನೇ ಮಹಡಿಯಲ್ಲಿ ವಾಸವಿದ್ದ ಸಂತ್ರಸ್ತ ಮಹಿಳೆಯರು ತಮ್ಮ ಫ್ಲಾಟ್‌ನಲ್ಲಿ ಎಸಿ ಅಳವಡಿಸಲು ಎಲೆಕ್ಟ್ರಿಷಿಯನ್ ಒಬ್ಬರನ್ನು ಕರೆಸಿದ್ದರು. ಗೋಡೆಗೆ ಡ್ರಿಲ್ಲಿಂಗ್ ಮಾಡುವಾಗ ಉಂಟಾದ ಧೂಳು ಮತ್ತು ಕಲ್ಲುಗಳು ಕೆಳಗಿನ ಮಹಡಿಯ ನಿವಾಸಿಗಳ ಬಾಲ್ಕನಿಗೆ ಬಿದ್ದಿದ್ದವು.
ಇದರಿಂದ ಕುಪಿತರಾದ ಕೆಳಗಿನ ಮಹಡಿಯ ದಂಪತಿ (ಹರ್ಷ್ ಸಿಂಗ್ ಮತ್ತು ರೂಬಿ ಜೈನ್), ಎಲೆಕ್ಟ್ರಿಷಿಯನ್ ಜೊತೆ ಜಗಳ ಆರಂಭಿಸಿದ್ದರು. ಮಹಿಳೆಯರು ಎಲೆಕ್ಟ್ರಿಷಿಯನ್ ಪರವಾಗಿ ಮಾತನಾಡಿದಾಗ, ವಿವಾದವು ದಂಪತಿ ಮತ್ತು ಮಹಿಳೆಯರ ನಡುವೆ ತಿರುಗಿದೆ.
ನಂತರ ಜಗಳ ತಾರಕಕ್ಕೇರಿದ್ದು, ದಂಪತಿ ಮಹಿಳೆಯರನ್ನು “ಮೋಮೋ” ಎಂದು ಕರೆದು, ಅವರು ಮಸಾಜ್ ಪಾರ್ಲರ್‌ಗಳಲ್ಲಿ ಕೆಲಸ ಮಾಡುವವರು (“ದಂಧೇವಾಲಿ”) ಎಂದು ಅವರ ಚಾರಿತ್ರ್ಯದ ಮೇಲೆ ಆಕ್ರಮಣಕಾರಿ ಮತ್ತು ಜನಾಂಗೀಯ ನಿಂದನೆ ಮಾಡಿದರು ಎಂದು ಆರೋಪಿಸಲಾಗಿದೆ.
ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಈ ನಡುವೆ ಕಟ್ಟಡದ ಬ್ರೋಕರ್ ಮಹಿಳೆಯರಿಗೆ ಎರಡು ತಿಂಗಳೊಳಗೆ ಮನೆ ಖಾಲಿ ಮಾಡುವಂತೆ ಸೂಚಿಸಿದ್ದಾರೆ ಎಂದು ವರದಿಯಾಗಿದೆ.
