ವಿನಾಯಕ ದಾಮೋದರ ಸಾವರ್ಕರ್ ಅವರು ಗೋಪೂಜೆಯನ್ನು ಸ್ಪಷ್ಟವಾಗಿ ವಿರೋಧಿಸಿದ್ದರು ಮತ್ತು ಹಸುವನ್ನು ಕೇವಲ ಒಂದು ಉಪಯುಕ್ತ ಪ್ರಾಣಿಯನ್ನಾಗಿಷ್ಟೇ ಪರಿಗಣಿಸುತ್ತಿದ್ದರು” ಎಂದು ಅವರ ಮೊಮ್ಮಗ ಸತ್ಯಕಿ ಸಾವರ್ಕರ್ ಪುಣೆಯ ವಿಶೇಷ ಜನಪ್ರತಿನಿಧಿಗಳ ನ್ಯಾಯಾಲಯದಲ್ಲಿ ಹೇಳಿಕೆ ನೀಡಿದ್ದಾರೆ.
ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ವಿರುದ್ಧ ತಾವು ಸಲ್ಲಿಸಿರುವ ಕ್ರಿಮಿನಲ್ ಮಾನನಷ್ಟ ಮೊಕದ್ದಮೆಯ ವಿಚಾರಣೆ ವೇಳೆ, ರಾಹುಲ್ ಗಾಂಧಿ ಪರ ಹಿರಿಯ ವಕೀಲ ಮಿಲಿಂದ್ ಪವಾರ್ ನಡೆಸಿದ ಜಿಜ್ಞಾಸೆಯ ಕ್ರಾಸ್-ಪರೀಕ್ಷೆಯಲ್ಲಿ ಸತ್ಯಕಿ ಸಾವರ್ಕರ್ ಈ ಸತ್ಯವನ್ನು ಒಪ್ಪಿಕೊಂಡಿದ್ದಾರೆ ಎಂದು ‘ಲೈವ್ ಲಾ’ (LiveLaw) ವರದಿ ಮಾಡಿದೆ.
‘ದೇವತೆ ಎನ್ನುವುದು ದೈವತ್ವಕ್ಕೆ ಮಾಡುವ ಅವಮಾನ’
ವಿಚಾರಣೆ ವೇಳೆ ವಿ.ಡಿ. ಸಾವರ್ಕರ್ ಅವರ ವೈಚಾರಿಕ ಪ್ರಬಂಧಗಳ ಕುರಿತು ನ್ಯಾಯಾಲಯದಲ್ಲಿ ಚರ್ಚೆ ನಡೆಯಿತು. ಸಾವರ್ಕರ್ ಅವರು ಬರೆದ ʼಸಾವರ್ಕರಾಂಚೆ ವಿಶ್ವಜ್ಞಾನ ವಿನಬಂಧ’ (ಸಾವರ್ಕರ್ ಅವರ ವಿಜ್ಞಾನ ಆಧಾರಿತ ಪ್ರಬಂಧಗಳು) ಪುಸ್ತಕದಲ್ಲಿ ಧಾರ್ಮಿಕ ಮೂಢನಂಬಿಕೆಗಳು, ಗೋಪೂಜೆ ಹಾಗೂ ದೇವರ ಅಸ್ತಿತ್ವದ ಕುರಿತು ತೀವ್ರ ವಿಮರ್ಶಾತ್ಮಕ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ ಎಂಬುದನ್ನು ಸತ್ಯಕಿ ಸಾವರ್ಕರ್ ಈ ಮುಂಚೆಯೇ ನ್ಯಾಯಾಲಯದ ಗಮನಕ್ಕೆ ತಂದಿದ್ದರು.
ಇದನ್ನೇ ಆಧರಿಸಿ ರಾಹುಲ್ ಗಾಂಧಿ ಪರ ವಕೀಲರು ಪ್ರಶ್ನಿಸಿದಾಗ ಸತ್ಯಕಿ ಸಾವರ್ಕರ್, “ಹಸು ಕೇವಲ ಒಂದು ಪ್ರಾಣಿ. ಅದನ್ನು ದೇವರು ಅಥವಾ ದೇವತೆ ಎಂದು ಭಾವಿಸುವುದು ಮಾನವೀಯತೆಗೆ ಮಾತ್ರವಲ್ಲ, ಸಾಕ್ಷಾತ್ ದೈವತ್ವದ ಪರಿಕಲ್ಪನೆಗೂ ಮಾಡುವ ಅವಮಾನ ಎಂದು ಸಾವರ್ಕರ್ ತಮ್ಮ ಪುಸ್ತಕದಲ್ಲಿ ಬರೆದಿದ್ದಾರೆ” ಎಂದು ನ್ಯಾಯಪೀಠದ ಮುಂದೆ ಸ್ಪಷ್ಟಪಡಿಸಿದರು.
ಮುಂದುವರಿದು ಮಾತನಾಡಿದ ಅವರು, “ಮಾನವನಿಗೆ ನಾಯಿ, ಕುದುರೆ ಮತ್ತು ಕತ್ತೆ ಎಷ್ಟು ಉಪಯುಕ್ತ ಪ್ರಾಣಿಗಳೋ, ಹಸುವೂ ಅಷ್ಟೇ. ನಾಯಿ, ಕುದುರೆ, ಕತ್ತೆಗಳನ್ನು ಹೇಗೆ ಉಪಯುಕ್ತತೆಗಾಗಿ ರಕ್ಷಿಸಲಾಗುತ್ತದೆಯೋ, ಹಾಗೆಯೇ ಹಸುವನ್ನೂ ರಕ್ಷಿಸಬೇಕು. ಆದರೆ ಅದನ್ನು ಪೂಜಿಸುವುದು ಮೂಢನಂಬಿಕೆ ಎಂಬುದು ಸಾವರ್ಕರ್ ಅವರ ನಿಲುವಾಗಿತ್ತು” ಎಂದು ಕೋರ್ಟ್ಗೆ ತಿಳಿಸಿದರು.
ಸಾವರ್ಕರ್ ತಮ್ಮ ಪುಸ್ತಕದಲ್ಲಿ ಉಲ್ಲೇಖಿಸಿದ್ದ ಇತಿಹಾಸದ ಪ್ರಸಂಗವೊಂದನ್ನು ಸತ್ಯಕಿ ಸಾವರ್ಕರ್ ಕೋರ್ಟ್ನಲ್ಲಿ ಉಲ್ಲೇಖಿಸಿದರು. “ಮೊಘಲ್ ದಾಳಿಕೋರರು ಹಿಂದೂ ಸೇನೆಗಳ ವಿರುದ್ಧ ಯುದ್ಧ ಮಾಡುವಾಗ ಹಸುಗಳನ್ನು ಮಾನವ ಗುರಾಣಿಯಾಗಿ (Shield) ಬಳಸಿಕೊಳ್ಳುತ್ತಿದ್ದರು. ಹಿಂದೂ ಸೈನಿಕರು ‘ಗೋಹತ್ಯೆ’ ಮಹಾಪಾಪ ಎಂಬ ಧಾರ್ಮಿಕ ನಂಬಿಕೆಯಿಂದಾಗಿ ಯುದ್ಧಭೂಮಿಯಿಂದ ಹಿಂದೆ ಸರಿಯುತ್ತಿದ್ದರು. ಈ ಧಾರ್ಮಿಕ ಕುರುಡುತನವೇ ಹಿಂದುಗಳ ಸೋಲಿಗೆ ಕಾರಣವಾಯಿತು ಎಂದು ಸಾವರ್ಕರ್ ವಿಶ್ಲೇಷಿಸಿದ್ದರು” ಎಂದು ಅವರು ವಿವರಿಸಿದರು.
ಪ್ರಕರಣದ ಹಿನ್ನೆಲೆ ಏನು?
2023ರ ಮಾರ್ಚ್ನಲ್ಲಿ ಲಂಡನ್ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ರಾಹುಲ್ ಗಾಂಧಿ, “ಸಾವರ್ಕರ್ ಮತ್ತು ಅವರ ಸ್ನೇಹಿತರು ಒಮ್ಮೆ ಮುಸ್ಲಿಂ ವ್ಯಕ್ತಿಯೊಬ್ಬನನ್ನು ತೀವ್ರವಾಗಿ ಥಳಿಸಿ ಆನಂದಿಸಿದ್ದರು ಎಂದು ಅವರ ಪುಸ್ತಕದಲ್ಲೇ ಬರೆದುಕೊಂಡಿದ್ದಾರೆ” ಎಂದು ಆರೋಪಿಸಿದ್ದರು.
ರಾಹುಲ್ ಗಾಂಧಿ ಅವರ ಈ ಹೇಳಿಕೆಯು ಸಂಪೂರ್ಣ ಸುಳ್ಳು ಮತ್ತು ಸಾವರ್ಕರ್ ಅವರಿಗೆ ಮಾಡಿದ ಮಾನಹಾನಿ ಎಂದು ಆರೋಪಿಸಿ ಸತ್ಯಕಿ ಸಾವರ್ಕರ್ ಪುಣೆ ಕೋರ್ಟ್ನಲ್ಲಿ ಕ್ರಿಮಿನಲ್ ಮಾನನಷ್ಟ ಪ್ರಕರಣ ದಾಖಲಿಸಿದ್ದರು. ಆದರೆ, ಈ ಮೊಕದ್ದಮೆಯ ವಿಚಾರಣೆಯಲ್ಲೇ ಸಾವರ್ಕರ್ ಅವರ ಗೋಪೂಜೆ ವಿರೋಧಿ ಹಾಗೂ ವೈಜ್ಞಾನಿಕ ವಿಚಾರಗಳ ಕುರಿತು ಅವರ ಕುಟುಂಬಸ್ಥರೇ ಕೋರ್ಟ್ನಲ್ಲಿ ಅಧಿಕೃತವಾಗಿ ಒಪ್ಪಿಕೊಂಡಿರುವುದು ಈಗ ದೇಶಾದ್ಯಂತ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
