ಜಾತಿ ತಾರತಮ್ಯ ಮತ್ತು ಅಧಿಕಾರಶಾಹಿಗಳ ವಿಳಂಬದ ವಿರುದ್ಧದ ಹೋರಾಟದಲ್ಲಿ, ಗುಜರಾತ್ನ ಸೂರತ್ನಲ್ಲಿ 80 ದಲಿತ ಕುಟುಂಬಗಳು ಮೇ 14, 2025 ರಂದು ಅಮ್ರೋಲಿಯ ಬಾಂಬೆ ಕಾಲೋನಿಯ ಆನಂದ್ ಬುದ್ಧ ವಿಹಾರ್ನಲ್ಲಿ ನಡೆದ ಸಮಾರಂಭದಲ್ಲಿ ಬೌದ್ಧ ಧರ್ಮವನ್ನು ಸ್ವೀಕರಿಸಿದವು.
ತಮ್ಮ ಧರ್ಮವನ್ನು ಬದಲಾಯಿಸಲು ಅಧಿಕೃತ ಅನುಮತಿಯನ್ನು ಪಡೆಯಲು ಎರಡು ವರ್ಷಗಳ ಸುದೀರ್ಘ ಹೋರಾಟದ ನಂತರ ಈ ಮತಾಂತರ ನಡೆದಿದೆ.
ಸಾಂಪ್ರದಾಯಿಕ ಹಿಂದೂ ಆಚರಣೆಗಳಲ್ಲಿ ಪ್ರಚಲಿತದಲ್ಲಿರುವ ಜಾತಿ ಆಧಾರಿತ ತಾರತಮ್ಯದಿಂದ ವಿಮೋಚನೆ ಪಡೆಯಲು ಈ ಕುಟುಂಬಗಳು 2023 ರಲ್ಲಿ ಔಪಚಾರಿಕವಾಗಿ ಬೌದ್ಧ ಧರ್ಮವನ್ನು ಅಳವಡಿಸಿಕೊಳ್ಳಲು ಅರ್ಜಿಗಳನ್ನು ಸಲ್ಲಿಸಿದವು ಎಂದು ‘ದಿ ಮೂಕನಾಯಕ್’ ವರದಿ ಮಾಡಿದೆ.
ಗುಜರಾತ್ನ ನಿಯಮಗಳ ಅಡಿಯಲ್ಲಿ, ಧಾರ್ಮಿಕ ಮತಾಂತರಕ್ಕಾಗಿ ಅರ್ಜಿಗಳನ್ನು (ಫಾರ್ಮ್ ಎ) ಒಂದು ತಿಂಗಳೊಳಗೆ ಜಿಲ್ಲಾಧಿಕಾರಿ ಪರಿಶೀಲಿಸಿ ಅನುಮೋದಿಸಬೇಕು. ಈ ಪ್ರಕ್ರಿಯೆಯು ಎರಡು ವರ್ಷಗಳವರೆಗೆ ಗಮನಾರ್ಹ ವಿಳಂಬವನ್ನು ಎದುರಿಸಿತು, ಇದನ್ನು ಕುಟುಂಬಗಳನ್ನು ಬೆಂಬಲಿಸುವ ದಲಿತ ಸಂಘಟನೆಯಾದ ಸ್ವಯಂ ಸೈನಿಕ್ ದಳ (ಎಸ್ಎಸ್ಡಿ) ಸದಸ್ಯರು ಮತಾಂತರಗಳನ್ನು ನಿರುತ್ಸಾಹಗೊಳಿಸಲು ಉದ್ದೇಶಪೂರ್ವಕವಾದ ವಿಳಂಬ ಮತ್ತು ಮತಾಂತರ ತೆಡಯುವ ತಂತ್ರ ಎಂದು ವಿವರಿಸಿದ್ದಾರೆ.
ಗುಜರಾತ್ನಾದ್ಯಂತ, ಎಸ್ಎಸ್ಡಿ ಮತ್ತು ಇತರ ಬಹುಜನ ಸಂಘಟನೆಗಳು ಸಲ್ಲಿಸಿದ ಸುಮಾರು 40,000–50,000 ಇದೇ ರೀತಿಯ ಅರ್ಜಿಗಳು ಬಾಕಿ ಉಳಿದಿವೆ ಎಂದು ಎಸ್ಎಸ್ಡಿ ನಾಯಕರರು ಹೇಳಿದ್ದಾರೆ ಎಂದು ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಕುಟುಂಬಗಳು ಅಧಿಕಾರಿಗಳಿಗೆ ದೃಢವಾದ ನಿಲುವಿನೊಂದಿಗೆ ಗಡುವು ನೀಡಿ, ತಮ್ಮ ಅರ್ಜಿಗಳನ್ನು ಅನುಮೋದಿಸದಿದ್ದರೆ ಬೀದಿ ಪ್ರತಿಭಟನೆ ನಡೆಸುವುದಾಗಿ ಬೆದರಿಕೆ ಹಾಕಿದರು. ಈ ದೃಢನಿಶ್ಚಯದ ನಿಲುವು ಆಡಳಿತವನ್ನು ಅಂತಿಮವಾಗಿ ಅಗತ್ಯ ಅನುಮೋದನೆಗಳನ್ನು ನೀಡುವಂತೆ ಒತ್ತಾಯಿಸಿತು.
ಮೇ 14 ರಂದು ನಡೆದ ಮತಾಂತರ ಸಮಾರಂಭವು ಕುಟುಂಬಗಳಿಗೆ ಭಾವನಾತ್ಮಕ ಘಟನೆಯಾಗಿತ್ತು. ಅವರು ಬುದ್ಧ ವಂದನೆಯನ್ನು ಪಠಿಸಿದರು, 1956 ರಲ್ಲಿ ಸ್ವತಃ ಬೌದ್ಧಧರ್ಮಕ್ಕೆ ಮತಾಂತರಗೊಂಡ ಭಾರತೀಯ ಸಂವಿಧಾನದ ಶಿಲ್ಪಿ ಮತ್ತು ದಲಿತ ಹಕ್ಕುಗಳ ಪ್ರತಿಪಾದಕ ಡಾ. ಬಿ.ಆರ್. ಅಂಬೇಡ್ಕರ್ ನೀಡಿದ 22 ಪ್ರತಿಜ್ಞೆಗಳನ್ನು ಪಠಿಸಿದರು.
ಜಾತಿ ದಬ್ಬಾಳಿಕೆಯನ್ನು ಸಾರ್ವಜನಿಕವಾಗಿ ತಿರಸ್ಕರಿಸಿ, ಸಮಾನತೆ ಮತ್ತು ಘನತೆಯತ್ತ ಮಾರ್ಗವನ್ನು ಅಳವಡಿಸಿಕೊಂಡಾಗ ಅಲ್ಲಿನ ವಾತಾವರಣವು ವಿಮೋಚನೆ ಮತ್ತು ಭರವಸೆಯಿಂದ ತುಂಬಿತ್ತು.
ಸೂರತ್ ವಜ್ರ ಕಾರ್ಖಾನೆಯಲ್ಲಿ ಯಂತ್ರ ನಿರ್ವಾಹಕ ಮತ್ತು 2019 ರಲ್ಲಿ ಬೌದ್ಧಧರ್ಮಕ್ಕೆ ಮತಾಂತರಗೊಂಡ ಎಸ್ಎಸ್ಡಿ ಸದಸ್ಯ ಮಯೂರ್ರಾಜ್ ನಾಗ್ ಕೂಡ ಮತಾಂತರ ಆದವರಲ್ಲಿ ಒಬ್ಬರು. ಇತ್ತೀಚೆಗೆ ಮತಾಂತರಗೊಂಡ 80 ಕುಟುಂಬಗಳು ಸೇರಿದಂತೆ 110 ಅರ್ಜಿಗಳನ್ನು ಈಗ ತೆರವುಗೊಳಿಸಲಾಗಿದೆ ಎಂದು ಅವರು ಮಾಹಿತಿ ಹಂಚಿಕೊಂಡರು. ಪ್ರೇಮ ವಿವಾಹದಲ್ಲಿ ಅವರು ಮದುವೆಯಾದ ಅವರ ಪತ್ನಿ ಅಶ್ಮಿತಾ ಕೂಡ ಅವರಿಂದ ಬೌದ್ಧಧರ್ಮದ ಬೋಧನೆಗಳ ಬಗ್ಗೆ ತಿಳಿದುಕೊಂಡು ಧರ್ಮ ಸ್ವೀಕರಿಸಿದರು. ಮಯೂರ್ರಾಜ್ ಮತಾಂತರದ ನಂತರ ತಮ್ಮ ಸಮುದಾಯದಲ್ಲಿ ಹೊಸದಾಗಿ ಗೌರವವನ್ನು ಅನುಭವಿಸುತ್ತಿದ್ದಾರೆ ಎಂದು ವ್ಯಕ್ತಪಡಿಸಿದರು.
“ಎಂಟು ವರ್ಷಗಳ ಹಿಂದೆ, ನಾನು ದಾರಿ ತಪ್ಪಿದ್ದೆ, ಧೂಮಪಾನ, ಗುಟ್ಕಾ ಅಗಿಯುವುದು, ನನ್ನ ಕುಟುಂಬವನ್ನು ನಿರ್ಲಕ್ಷಿಸುವುದು ನಡೆದಿತ್ತು. 2017 ರಲ್ಲಿ ಎಸ್ಎಸ್ಡಿಯನ್ನು ಭೇಟಿಯಾಗಿ ಬಾಬಾಸಾಹೇಬರ ಬಗ್ಗೆ ತಿಳಿದುಕೊಂಡ ನಂತರ ನಾನು ಬದಲಾಗಿದ್ದೆ. ನಾನು ನನ್ನ ಅಭ್ಯಾಸಗಳನ್ನು ತ್ಯಜಿಸಿದೆ, ನನ್ನ ಹೆತ್ತವರನ್ನು ನೋಡಿಕೊಳ್ಳಲು ಪ್ರಾರಂಭಿಸಿದೆ ಮತ್ತು ನನ್ನ ಬದುಕಿನ ಉದ್ದೇಶವನ್ನು ಕಂಡುಕೊಂಡೆ” ಎಂದು ಅವರು ಹೇಳಿದರು.
ಬೌದ್ಧಧರ್ಮಕ್ಕೆ ಮತಾಂತರಗೊಳ್ಳುವ ನಿರ್ಧಾರವನ್ನು ದಲಿತರು ಹೆಚ್ಚಾಗಿ ಜಾತಿ ವ್ಯವಸ್ಥೆಗೆ ಸಂಬಂಧಿಸಿದ ಕಠಿಣ ಶ್ರೇಣಿ ಮತ್ತು ತಾರತಮ್ಯದಿಂದ ತಪ್ಪಿಸಿಕೊಳ್ಳುವ ಮಾರ್ಗವೆಂದು ನೋಡುತ್ತಾರೆ. ಸಮಾನತೆ ಮತ್ತು ಸಾಮಾಜಿಕ ನ್ಯಾಯದ ಮೇಲೆ ಒತ್ತು ನೀಡುವ ಬೌದ್ಧಧರ್ಮವು ಘನತೆ ಮತ್ತು ಗೌರವವನ್ನು ಬಯಸುವವರಿಗೆ ಪರ್ಯಾಯ ಮಾರ್ಗವನ್ನು ನೀಡುತ್ತದೆ.
ಸೂರತ್ನಲ್ಲಿ ನಡೆದ ಈ ಘಟನೆಯು ಭಾರತದಲ್ಲಿ ಜಾತಿ ತಾರತಮ್ಯದ ವಿರುದ್ಧ ನಡೆಯುತ್ತಿರುವ ಹೋರಾಟ ಮತ್ತು ಸಾಮಾಜಿಕ ಮತ್ತು ಧಾರ್ಮಿಕ ಸ್ವಾತಂತ್ರ್ಯವನ್ನು ಪಡೆಯುವ ಅಂಚಿನಲ್ಲಿರುವ ಸಮುದಾಯಗಳ ಬಯಕೆಯನ್ನು ಒತ್ತಿಹೇಳುತ್ತದೆ.
ಇದು ಪ್ರತ್ಯೇಕ ಘಟನೆಯಲ್ಲ. ಇತ್ತೀಚಿನ ವರ್ಷಗಳಲ್ಲಿ ಗುಜರಾತ್ನಲ್ಲಿ ದಲಿತರು ಸಾಮೂಹಿಕವಾಗಿ ಬೌದ್ಧಧರ್ಮಕ್ಕೆ ಮತಾಂತರಗೊಂಡ ಘಟನೆಗಳು ನಡೆದಿವೆ, ಇವು ಹೆಚ್ಚಾಗಿ ಜಾತಿ ಆಧಾರಿತ ಹಿಂಸೆ ಅಥವಾ ತಾರತಮ್ಯದ ನಿರ್ದಿಷ್ಟ ಘಟನೆಗಳಿಂದ ಉಂಟಾಗುತ್ತವೆ. ಈ ಮತಾಂತರಗಳು ಡಾ. ಅಂಬೇಡ್ಕರ್ ಅವರ ದಲಿತ ವಿಮೋಚನೆಗೆ ಒಂದು ಸಾಧನ, ತಾರತಮ್ಯದ ಆಚರಣೆಗಳ ಸಾಮಾಜಿಕ ಮತ್ತು ರಾಜಕೀಯ ಪ್ರಾಬಲ್ಯವನ್ನು ಪ್ರಶ್ನಿಸುವ ಒಂದು ಮಾರ್ಗ ಎಂಬ ತತ್ವಶಾಸ್ತ್ರದ ನಿರಂತರ ಪ್ರಸ್ತುತತೆಯನ್ನು ಎತ್ತಿ ತೋರಿಸುತ್ತವೆ.
