2022 ರ ವೆಂಗೈವಾಯಲ್ ನೀರಿನ ಟ್ಯಾಂಕ್ ಮಾಲಿನ್ಯ ಪ್ರಕರಣದಲ್ಲಿ ತಮಿಳುನಾಡಿನ ಅಪರಾಧ ವಿಭಾಗದ ಅಪರಾಧ ತನಿಖಾ ಇಲಾಖೆ (ಸಿಬಿ-ಸಿಐಡಿ) ಮೂವರು ದಲಿತ ಯುವಕರ ವಿರುದ್ಧ ಆರೋಪಪಟ್ಟಿ ಸಲ್ಲಿಸಿದೆ.
ಡಿಸೆಂಬರ್ 26, 2022 ರಂದು, ವೆಳ್ಳಾಲರ್ ಪೊಲೀಸರು ಉದ್ದೇಶಪೂರ್ವಕವಾಗಿ ಹಾನಿ ಉಂಟುಮಾಡುವ ವಸ್ತುಗಳನ್ನು ನೀಡುವುದಕ್ಕಾಗಿ ಐಪಿಸಿಯ ಸೆಕ್ಷನ್ 328 ಮತ್ತು ಪರಿಶಿಷ್ಟ ಜಾತಿಗಳು ಮತ್ತು ಪರಿಶಿಷ್ಟ ಪಂಗಡಗಳ (ಎಸ್‌ಸಿ/ಎಸ್‌ಟಿ) ವಿರುದ್ಧ ದೌರ್ಜನ್ಯ ತಡೆ ಸೆಕ್ಷನ್ 3(1)(ಬಿ), 3(1)(ಎಕ್ಸ್‌), 3(2) (ವಿಎ) ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಮಲ, ಒಳಚರಂಡಿ ಅಥವಾ ಮೃತದೇಹಗಳಂತಹ ಅಸಹ್ಯಕರ ವಸ್ತುಗಳನ್ನು ಪರಿಶಿಷ್ಟರು ವಾಸಿಸುವ ಆವರಣದಲ್ಲಿ ಅಥವಾ ಹತ್ತಿರ ಎಸೆಯುವ ಮೂಲಕ, ಅವರ ನೀರಿನ ಮೂಲಗಳನ್ನು ಕಲುಷಿತಗೊಳಿಸುವ ಮೂಲಕ ಎಸ್‌ಸಿ/ಎಸ್‌ಟಿ ಸದಸ್ಯರ ವಿರುದ್ಧ ತಾರತಮ್ಯ ಅಥವಾ ಹಾನಿ ಮಾಡುವ ನಿರ್ದಿಷ್ಟ ಕೃತ್ಯಗಳಿಗಾಗಿ ಪ್ರಕರಣ ದಾಖಲಿಸಿದ್ದಾರೆ.
ವೆಂಗೈವಾಯಲ್ ಗ್ರಾಮದಲ್ಲಿ ನೀರಿನ ಟ್ಯಾಂಕ್‌ನಿಂದ ನೀರು ಸೇವಿಸಿದ ಮಕ್ಕಳು ವಾಂತಿ, ಜ್ವರದಿಂದ ಬಳಲುತ್ತಿದ್ದಾರೆ ಮತ್ತು ಆಸ್ಪತ್ರೆಗೆ ದಾಖಲಾಗಬೇಕಾಯಿತು ಎಂಬ ದೂರಿನ ಮೇರೆಗೆ ಎಫ್‌ಐಆರ್‌ ದಾಖಲಿಸಲಾಗಿದೆ.
ದೂರುದಾರರಾದ ಕೆ. ಕನಕರಾಜ್ ಅವರು, ಟ್ಯಾಂಕ್‌ನಲ್ಲಿನ ನೀರಿನ ಮೇಲೆ ಮಾನವ ಮಲ ತೇಲುತ್ತಿರುವುದು ಕಂಡುಬಂದಿದೆ ಎಂದು ಆರೋಪಿಸಿದ್ದಾರೆ.
ಸುದ್ದಿ ಹೊರಬಿದ್ದ ತಕ್ಷಣ, ತಮಿಳುನಾಡಿನಲ್ಲಿ ದಲಿತರ ಸುರಕ್ಷತೆಯ ಬಗ್ಗೆ ವಿರೋಧ ಪಕ್ಷಗಳು ಪ್ರಶ್ನೆಗಳನ್ನು ಎತ್ತುವುದರೊಂದಿಗೆ ಸಾರ್ವಜನಿಕ ಆಕ್ರೋಶ ವ್ಯಕ್ತವಾಯಿತು. ತನಿಖೆಯಲ್ಲಿನ ವಿಳಂಬವನ್ನು ಕೂಡ ವಿರೋಧ ಪಕ್ಷಗಳು ಪ್ರಶ್ನಿಸಿದವು.
ಪ್ರಕರಣವನ್ನು ಜನವರಿ 1, 2023 ರಂದು ಸಿಬಿ-ಸಿಐಡಿಗೆ ವರ್ಗಾಯಿಸಲಾಯಿತು. 397 ಸಾಕ್ಷಿಗಳೊಂದಿಗೆ ವಿಚಾರಣೆ ನಡೆಸಲಾಗಿದ್ದು, 196 ಮೊಬೈಲ್ ಫೋನ್ ಸಂಖ್ಯೆಗಳನ್ನು ಸಹ ತನಿಖೆ ಮಾಡಲಾಯಿತು. 87 ಟವರ್‌ಗಳ ನಡುವೆ ನಡೆದ ಒಂದು ಲಕ್ಷಕ್ಕೂ ಹೆಚ್ಚು ಕರೆಗಳನ್ನು ವಿಶ್ಲೇಷಿಸಲಾಯಿತು.
ತಮಿಳುನಾಡು ಪೊಲೀಸರು ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ, “ಈ ಘಟನೆ ವರದಿ ಮಾಡುವ ಎರಡು ತಿಂಗಳ ಮೊದಲು, ಮುತ್ತುಕಾಡು ಪಂಚಾಯತ್ ಯೂನಿಯನ್ ಅಧ್ಯಕ್ಷೆ ಪದ್ಮಾ ಅವರ ಪತಿ ಮುತ್ತಯ್ಯ ಅವರು ಕಾನ್‌ಸ್ಟೆಬಲ್ ಮುರಳಿರಾಜ ಅವರ ತಂದೆ ಜೀವನಾನಂದಮ್ ಅವರನ್ನು ನೀರಿನ ಟ್ಯಾಂಕ್ ನಿರ್ವಹಣೆಯ ಬಗ್ಗೆ ಪ್ರಶ್ನೆಗಳನ್ನು ಎತ್ತಿದ್ದಕ್ಕಾಗಿ ಅವಮಾನಿಸಿದ್ದಾರೆ” ಎಂದು ತಿಳಿಸಿದ್ದಾರೆ.
“ಈ ಘಟನೆಯನ್ನು ಮುರಳಿರಾಜ ಸೇಡಿನ ಕ್ರಮವಾಗಿ ಯೋಜಿಸಿ ನಡೆಸಿದ್ದಾನೆ ಎಂದು ತನಿಖೆಯಿಂದ ತಿಳಿದುಬಂದಿದೆ. ಮುರಳಿರಾಜ, ಸುದರ್ಶನ್, ಮುತ್ತಯ್ಯ ಮತ್ತು ಆರ್ ಮುತ್ತುಕೃಷ್ಣನ್ ಅವರ ಸ್ಮಾರ್ಟ್‌ಫೋನ್‌ಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಅವುಗಳಿಂದ ಅಳಿಸಲಾದ ಚಿತ್ರಗಳು ಮತ್ತು ಆಡಿಯೊ ರೆಕಾರ್ಡಿಂಗ್‌ಗಳನ್ನು ಮರುಪಡೆಯಲಾಗಿದೆ, ಇದು ಘಟನೆಯನ್ನು ಸಾಬೀತುಪಡಿಸುತ್ತದೆ” ಎಂದು ಪೊಲೀಸ್ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಸಾಕ್ಷ್ಯಾಧಾರಗಳ ಆಧಾರದ ಮೇಲೆ, ಮುರಳಿರಾಜ, ಸುದರ್ಶನ್ ಮತ್ತು ಮುತ್ತುಕೃಷ್ಣನ್ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಮತ್ತು ಪುದುಕೊಟ್ಟೈ ವಿಶೇಷ ನ್ಯಾಯಾಲಯದಲ್ಲಿ ಆರೋಪಪಟ್ಟಿ ಸಲ್ಲಿಸಲಾಗಿದೆ.
ಪ್ಲಾಸ್ಟಿಕ್ ಚೀಲದಲ್ಲಿ ಮಾನವ ಮಲದೊಂದಿಗೆ ನೀರಿನ ಟ್ಯಾಂಕ್ ಮೇಲೆ ಇಬ್ಬರು ಪುರುಷರು ಕುಳಿತು ಮಾತನಾಡುತ್ತಿರುವ ವೀಡಿಯೊ ಕಾಣಿಸಿಕೊಂಡಿದೆ. ಅಲ್ಲದೆ, ಸುದರ್ಶನ್ ತನ್ನ ತಾಯಿ ಮತ್ತು ಚಿಕ್ಕಮ್ಮನೊಂದಿಗೆ ಘಟನೆಯ ಬಗ್ಗೆ ಮಾತನಾಡುತ್ತಿದ್ದ ಎರಡು ಆಡಿಯೊ ತುಣುಕುಗಳು ಸಹ ಬೆಳಕಿಗೆ ಬಂದವು ಮತ್ತು ವೈರಲ್ ಆಗಿವೆ. ಈ ವಿಷಯದ ಕುರಿತು ಹೆಚ್ಚಿನ ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ; ತಮಿಳುನಾಡು ನೀರಿನ ಟ್ಯಾಂಕ್ ಮಾಲಿನ್ಯ ಪ್ರಕರಣ: ಆರೋಪ ಪಟ್ಟಿಯಲ್ಲಿ ಮೂವರು ದಲಿತರ ಹೆಸರು
