ಪ್ರಸ್ತುತ ವಿಶ್ವದಲ್ಲಿ 796 ಕೋಟಿಗಿಂತಲೂ ಹೆಚ್ಚು ಜನಸಂಖ್ಯೆಯಿದೆ. ಪ್ರಪಂಚದಲ್ಲಿ ಅತೀಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶ ಚೀನಾವಾಗಿದ್ದು, ಎರಡನೇ ಸ್ಥಾನ ನಮ್ಮ ಭಾರತ ಪಡೆದುಕೊಂಡಿದೆ. ಪ್ರಸ್ತುತ ಭಾರತದ ಜನಸಂಖ್ಯೆ 138 ಕೋಟಿಯಾಗಿದ್ದು, ಚೀನಾದ ಜನಸಂಖ್ಯೆ 144 ಕೋಟಿ. ಇತ್ತೀಚೆಗಿನ ವರದಿಗಳ ಪ್ರಕಾರ ಭಾರತವು ಚೀನಾವನ್ನು ಹಿಂದಿಕ್ಕಿ ಸಧ್ಯದಲ್ಲೆ ಒಂದನೇ ಸ್ಥಾನಕ್ಕೆ ಏರಲಿದೆ.
ಜನಸಂಖ್ಯೆಯು ಅಭಿವೃದ್ಧಿಗೆ ಮಾರಕ ಎಂದು ಹೇಳುವ ಹಾಗೆಯೆ, ಜನಸಂಖ್ಯೆಯು ಒಂದು ಸಂಪನ್ಮೂಲವಾಗಿದ್ದು ಅದು ಅಭಿವೃದ್ಧಿಗೆ ಪೂರಕ ಎಂದೂ ಹೇಳುವವರಿದ್ದಾರೆ. ಮಾರಕ ಎನ್ನುವವರು ಹತ್ತಾರು ಕಾರಣಗಳು ಕೊಟ್ಟರೆ, ಪೂರಕ ಎನ್ನುವವರು ಕೂಡಾ ಅವುಗಳಿಗೆ ಬೇಕಾದ ಸಮರ್ಥನೆಗಳನ್ನೂ ಕೊಡುತ್ತಾರೆ.
ನಾನುಗೌರಿ.ಕಾಂಗೆ ದೇಣಿಗೆ ನೀಡಿ ಬೆಂಬಲಿಸಿ
₹100 ₹200 ₹500 ₹1000 Others
ನಗರಗಳು ಬೆಳೆದಂತೆ ಅಲ್ಲಿಗೆ ವಿವಿಧ ಕಾರಣಕ್ಕಾಗಿ ಜನರು ಬಂದು ಸೇರುತ್ತಲೆ ಇರುತ್ತಾರೆ. ಹೀಗಾಗಿ ನಗರಗಳು ಬೆಳೆಯುತ್ತಾ, ಅಲ್ಲಿನ ಜನಸಂಖ್ಯೆಗಳೂ ಬೆಳೆಯುತ್ತಲೆ ಹೋಗುತ್ತದೆ. ವಿಶ್ವದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ನಗರಗಳು ಯಾವುವು? ವಿಶ್ವದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ಅಗ್ರ ಹತ್ತು ನಗರಗಳ ಪಟ್ಟಿ ಇಲ್ಲಿದೆ.
- ಟೋಕಿಯೊ: ಈ ನಗರವು ಜಪಾನ್ ದೇಶದ ರಾಜಧಾನಿಯಾಗಿದ್ದು, ಇಲ್ಲಿನ ಜನಸಂಖ್ಯೆ 3.74 ಕೋಟಿ. ಇದು ಒಟ್ಟು ದೇಶಿಯ ಉತ್ಪನ್ನದ ಮೂಲಕ ವಿಶ್ವದ ಅತಿದೊಡ್ಡ ನಗರ ಆರ್ಥೀಕತೆಯಾಗಿದೆ. ಅಲ್ಲದೆ ಈ ನಗರವೂ ಜಪಾನ್‌ನ ವ್ಯಾಪಾರ ಮತ್ತು ಹಣಕಾಸಿನ ಪ್ರಮುಖ ಕೇಂದ್ರವಾಗಿದೆ. 2022ರಲ್ಲಿ ನ್ಯೂಯಾರ್ಕ್, ಲಂಡನ್ , ಶಾಂಘೈ ನಂತರ ಜಾಗತಿಕ ಹಣಕಾಸು ಕೇಂದ್ರಗಳ ಸೂಚ್ಯಂಕದಲ್ಲಿ ಟೋಕಿಯೊ 4ನೇ ಸ್ಥಾನ ಪಡೆದಿದೆ. ವಿಶ್ವದ ಅತೀ ಎತ್ತರದ ಟವರ್‌ ಟೋಕಿಯೋ ಸ್ಕೈಟ್ರೀ ಇದೇ ನಗರದಲ್ಲಿದೆ.
ಟೊಕಿಯೊ | Tokyo - ದೆಹಲಿ: ಭಾರತದ ರಾಜಧಾನಿಯಾಗಿರುವ ಈ ನಗರವು ಗಂಗಾನದಿಯ ಉಪನದಿ ಯಮುನ ನದಿಯ ದಡದಲ್ಲಿದೆ. ದೆಹಲಿಯ ಜನಸಂಖ್ಯೆ 2.93 ಕೋಟಿಯಾಗಿದೆ. ದೆಹಲಿಯೂ ಐತಿಹಾಸಿಕ ಪ್ರದೇಶ ಕೂಡಾ ಹೌದು. ಇಲ್ಲಿ ಹಲವಾರು ಚಾರಿತ್ರಿಕ ಮಹತ್ವದ ಸ್ಥಳಗಳೂ ಇವೆ. ಭಾರತದ ಸುಪ್ರೀಂಕೋರ್ಟ್, ಸಂಸತ್ ಭವನ ಸೇರಿದಂತೆ ಸರ್ಕಾರದ ಕಾರ್ಯಾಂಗ, ಶಾಸಕಾಂಗ ಹಾಗೂ ನ್ಯಾಯಾಂಗಗಳ ತವರು ಇದು. ವಾಯು ಮಾಲಿನ್ಯ ಸಮಸ್ಯೆಯೂ ಅತೀ ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿದೆ.
ದೆಹಲಿ | Delhi - ಶಾಂಘೈ: ಇದು ಚೀನಾದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ನಗರ ಪ್ರದೇಶವಾಗಿದ್ದು, ಇಲ್ಲಿನ ಜನಸಂಖ್ಯೆ 2.63 ಕೋಟಿ. ಇದು ಪೂರ್ವ ಏಷ್ಯಾದ ದೇಶಗಳಲ್ಲಿ ರಾಜಧಾನಿಗಿಂತ ಹೆಚ್ಚಿನ GDP ಹೊಂದಿರುವ ಏಕೈಕ ನಗರವಾಗಿದೆ. ಈ ನಗರವೂ ವಿಶ್ವದ 3 ನೇ ಅತ್ಯಂತ ಸ್ಪರ್ಧಾತ್ಮಕ ಮತ್ತು ಅತಿದೊಡ್ಡ ಹಣಕಾಸು ಕೇಂದ್ರವಾಗಿದ್ದು, ವಿಶ್ವದ ಅತಿದೊಡ್ಡ ಮೆಟ್ರೋ ನೆಟ್‌ವರ್ಕ್ ಅನ್ನು ಹೊಂದಿದೆ.
ಶಾಂಘೈ | Shanghai - ಸಾವೊ ಪಾಲೊ: ಇದು ಬ್ರೆಜಿಲ್‌ ದೇಶದ ನಗರವಾಗಿದ್ದು, ಲ್ಯಾಟಿನ್ ಅಮೇರಿಕಾ ಮತ್ತು ದಕ್ಷಿಣ ಗೋಳಾರ್ಧದ ಅತಿ ದೊಡ್ಡ ಆರ್ಥಿಕತೆಯ ನಗರವಾಗಿದೆ. ಇಲ್ಲಿನ ಜನಸಂಖ್ಯೆ 2.18 ಕೋಟಿ. ಜೊತೆಗೆ ಸಾವೊ ಪಾಲೊ ಸ್ಟಾಕ್‌ ಎಕ್ಸ್‌ಚೇಂಜ್‌ನ ನೆಲೆಯಾಗಿದೆ. ಈ ನಗರವು ವಿಶ್ವದ 23ನೇ ಅತಿ ಹೆಚ್ಚು GDPಯನ್ನು ಹೊಂದಿದೆ. ಈ ಮಹಾನಗರವು ಬ್ರೆಜಿಲ್‌ನ ಹಲವಾರು ಎತ್ತರದ ಗಗನಚುಂಬಿ ಕಟ್ಟಡಗಳಿಗೆ ನೆಲೆಯಾಗಿದೆ. ಇಲ್ಲಿ ಸ್ಮಾರಕಗಳು, ಉದ್ಯಾನವನಗಳು ಮತ್ತು ವಸ್ತುಸಂಗ್ರಹಾಲಯಗಳು ಇವೆ.
ಸಾವೊ ಪಾಲೊ । Sao Paulo - ಮೆಕ್ಸಿಕೊ ಸಿಟಿ: ಈ ನಗರವು ನಾಗರಿಕತೆಯ ತೊಟ್ಟಿಲಾದ ‘ಯುನೈಟೆಡ್ ಮೆಕ್ಸಿಕನ್ ಸ್ಟೇಟ್ಸ್(ಮೆಕ್ಸಿಕೊ)’ ದೇಶದ ರಾಜಧಾನಿಯಾಗಿದೆ. ಉತ್ತರ ಅಮೆರಿಕಾ ಖಂಡದ ದಕ್ಷಿಣ ಭಾಗದಲ್ಲಿರುವ ಈ ನಗರ 2.16 ಕೋಟಿ ಜನಸಂಖ್ಯೆಯನ್ನು ಹೊಂದಿದೆ. ಅತ್ಯಂತ ಎತ್ತರದಲ್ಲಿ ಇರುವ ರಾಜಧಾನಿಗಳಲ್ಲಿ ಇದೂ ಒಂದಾಗಿದೆ. ಚಾರಿತ್ರಿಕ ನಗರವಾಗಿರುವ ಮೆಕ್ಸಿಕೊ ಸಿಟಿಯಲ್ಲಿ 13 ನೇ ಶತಮಾನದ ಅಜ್ಟೆಕ್ ದೇವಾಲಯ, ಸ್ಪ್ಯಾನಿಷ್ ವಿಜಯಶಾಲಿಗಳ ಐತಿಹಾಸಿಕ ಭಿತ್ತಿಚಿತ್ರಗಳನ್ನು ಹೊಂದಿರುವ ‘ಪ್ಯಾಲಾಸಿಯೊ ನ್ಯಾಶನಲ್‌’ ಇಲ್ಲಿದೆ.
ಮೆಕ್ಸಿಕೊ ಸಿಟಿ । Mexico City - ಕೈರೋ: ಐತಿಹಾಸಿಕ ನಗರ ಕೈರೋ ಈಜಿಪ್ಟ್‌ನ ರಾಜಧಾನಿಯಾಗಿದ್ದು, ಇಲ್ಲಿನ ಜನಸಂಖ್ಯೆ2.04 ಕೋಟಿ. ಅಲ್ಲದೆ ಅರಬ್ ಜಗತ್ತಿನ ಅತಿದೊಡ್ಡ ನಗರವಾಗಿದೆ. ಜಗತ್ತಿನ ಅತ್ಯಂತ ಪ್ರಾಚೀನಾ ನಾಗರೀಕತೆಯ ತೊಟ್ಟಿಲಾಗಿರುವ ಈಜಿಫ್ಟ್‌‌ನ ಕೈರೋ ಹಲವು ಐತಿಹಾಸಿಕ ಮತ್ತು ಚಾರಿತ್ರಿಕೆ ಸ್ಥಳಗಳನ್ನು ಹೊಂದಿದೆ. ನಗರವೂ ವಿಶ್ವದ ಅತ್ಯಂತ ಉದ್ದವಾದ ನೈಲ್ ನದಿಯ ದಡದಲ್ಲಿದೆ. ನಗರವೂ ಪ್ರಾಚೀನ ಕಾಲದಿಂದಲೂ ರಾಜಕೀಯ ಮತ್ತು ಸಾಂಸ್ಕೃತಿಕ ಜೀವನದ ಕೇಂದ್ರವಾಗಿದೆ. ಅತ್ಯಂತ ಸುಂದರವಾದ ಇಸ್ಲಾಮಿಕ್ ವಾಸ್ತುಶಿಲ್ಪ ಹೊಂದಿರುವ ಕೈರೋವನ್ನು ‘ಸಾವಿರ ಮಿನಾರ್‌ಗಳ ನಗರ’ ಎಂದೂ ಕರೆಯಲಾಗುತ್ತದೆ. ಹಾಗೆಯೆ ವಿಶ್ವದ ಎರಡನೇ ಅತ್ಯಂತ ಹಳೆಯ ಉನ್ನತ ಶಿಕ್ಷಣ ಸಂಸ್ಥೆ ಅಲ್-ಅಜರ್ ವಿಶ್ವವಿದ್ಯಾಲಯವನ್ನು ಹೊಂದಿದೆ.
ಕೈರೋ । Cairo - ಢಾಕಾ: ಬಾಂಗ್ಲಾದೇಶದ ರಾಜಧಾನಿಯಾಗಿರುವ ಈ ನಗರವು, ಐತಿಹಾಸಿಕವಾಗಿ ಮೊಘಲ್ ಸಾಮ್ರಾಜ್ಯದ ಪ್ರಾಂತೀಯ ರಾಜಧಾನಿಯಾಗಿತ್ತು. ವೇಗವಾಗಿ ಬೆಳೆಯುತ್ತಿರುವ ಆಧುನಿಕ ಮಹಾನಗರಗಳಲ್ಲಿ ಒಂದಾಗಿರುವ ಇಲ್ಲಿನ ಜನಸಂಖ್ಯೆ ಜನಸಂಖ್ಯೆ 2.02 ಕೋಟಿ. ಈ ನಗರವು ವಾಣಿಜ್ಯ ಕೇಂದ್ರವಾಗಿ 17 ನೇ ಶತಮಾನದಿಂದಲೆ ಪ್ರಸಿದ್ದಿಯಾಗಿದೆ. ಇದನ್ನು 1962 ರಲ್ಲಿ ಪಾಕಿಸ್ತಾನದ ಶಾಸಕಾಂಗ ರಾಜಧಾನಿ ಎಂದು ಘೋಷಿಸಲಾಯಿತು. 1971 ರ ವಿಮೋಚನಾ ಯುದ್ಧದ ನಂತರ ಇದು ಸ್ವತಂತ್ರ ಬಾಂಗ್ಲಾದೇಶದ ರಾಜಧಾನಿಯಾಯಿತು.
ಢಾಕಾ । Dhaka - ಮುಂಬೈ: ಈ ನಗರ ಭಾರತದ ಆರ್ಥಿಕ, ವಾಣಿಜ್ಯ ಮತ್ತು ಮನರಂಜನಾ ರಾಜಧಾನಿಯಾಗಿದೆ. ಇಲ್ಲಿನ ಜನಸಂಖ್ಯೆ 2.01 ಕೋಟಿ. ದೇಶದ ಪ್ರಮುಖ ಸಿನಿಮಾ ರಂಗವಾದ ಬಾಲಿವುಡ್‌ ಇಲ್ಲೆ ಇದೆ. ಹಿಂದೆ ಈ ನಗರವನ್ನು ‘ಬಾಂಬೆ’ ಎಂದು ಕರೆಯಲಾಗುತ್ತಿತ್ತು. ಜಾಗತಿಕ ಹಣಕಾಸು ಹರಿವಿನ ದೃಷ್ಟಿಯಿಂದ ಇದು ವಿಶ್ವದ ಹತ್ತು ಪ್ರಮುಖ ವಾಣಿಜ್ಯ ಕೇಂದ್ರಗಳಲ್ಲಿ ಒಂದಾಗಿದೆ. ಮುಂಬೈ ಮೂರು UNESCO ವಿಶ್ವ ಪರಂಪರೆಯ ತಾಣಗಳಿಗೆ ನೆಲೆಯಾಗಿದೆ.
ಮುಂಬೈ । Mumbai - ಬೀಜಿಂಗ್: ಈ ನಗರವು ಚೀನಾ ದೇಶದ ರಾಜಧಾನಿಯಾಗಿದ್ದು, ಇಲ್ಲಿನ ಜನಸಂಖ್ಯೆ 2 ಕೋಟಿ. ಜಾಗತಿಕ ನಗರವಾಗಿರುವ ಬೀಜಿಂಗ್ ಸಂಸ್ಕೃತಿ, ರಾಜತಾಂತ್ರಿಕತೆ, ರಾಜಕೀಯ, ಹಣಕಾಸು, ವ್ಯಾಪಾರ ಮತ್ತು ಅರ್ಥಶಾಸ್ತ್ರ, ಶಿಕ್ಷಣ, ಸಂಶೋಧನೆ, ಭಾಷೆ, ಪ್ರವಾಸೋದ್ಯಮ, ಮಾಧ್ಯಮ, ಕ್ರೀಡೆ, ವಿಜ್ಞಾನ ಮತ್ತು ತಂತ್ರಜ್ಞಾನ ಮತ್ತು ಸಾರಿಗೆಗಾಗಿ ವಿಶ್ವದ ಪ್ರಮುಖ ಕೇಂದ್ರಗಳಲ್ಲಿ ಒಂದಾಗಿದೆ. ಬೀಜಿಂಗ್ ನಗರವೂ ಶಾಂಘೈ ನಂತರ ಚೀನಾದ ಎರಡನೇ ಅತಿ ಹೆಚ್ಚು ಜನಸಂಖ್ಯೆ ಇರುವ ಪ್ರದೇಶವಾಗಿದೆ. ಚೀನಾದ ಹೆಚ್ಚಿನ ಸರ್ಕಾರಿ ಸ್ವಾಮ್ಯದ ಕಂಪನಿಗಳ ಪ್ರಧಾನ ಕಛೇರಿಗಳು ಇಲ್ಲಿಯೆ ಇದೆ.
ಬೀಜಿಂಗ್ । Beijing - ಒಸಾಕಾ: ಜಪಾನಿನ ಹೊನ್ಶು ದ್ವೀಪದಲ್ಲಿರುವ ‘ಒಸಾಕಾ’ ನಗರವು ದೇಶ ಅತ್ಯಂತ ದೊಡ್ಡ ಬಂದರು ನಗರ ಮತ್ತು ವಾಣಿಜ್ಯ ಕೇಂದ್ರವಾಗಿದೆ. ಇಲ್ಲಿನ ಜನಸಂಖ್ಯೆ 1.92 ಕೋಟಿ. ನಗರವೂ ಆಧುನಿಕ ವಾಸ್ತುಶಿಲ್ಪ ಹೊಂದಿದ್ದು, ರಾತ್ರಿಯಲ್ಲೂ ಎಚ್ಚರವಾಗಿರುವ ನಗರವಾಗಿದೆ. ಅಲ್ಲದೆ ನಗರವೂ ಬೀದಿಬದಿ ಆಹಾರಕ್ಕಾಗಿ ಹೆಸರುವಾಸಿಯಾಗಿದೆ. ಶೀಂಟೊ ಧರ್ಮದ ಅತ್ಯಂತ ಹಳೆಯ ದೇವಾಲಯಗಳಲ್ಲಿ ಒಂದಾಗಿರುವ ‘ಸುಮಿಯೋಶಿ-ತೈಶಾ’ ಈ ನಗರದಲ್ಲಿ ಇದೆ.
ಒಸಾಕಾ । Osaka
