ಪಾಕಿಸ್ತಾನದ ದೇಶದ ಕೋಡ್‌ನಲ್ಲಿ ನೋಂದಾಯಿಸಲಾದ ವಿದೇಶಿ ಸಂಖ್ಯೆಯೊಂದಿಗೆ ಭದ್ರತಾ ಕಚೇರಿಗಳು, ತನಿಖಾ ಸಂಸ್ಥೆಗಳು ಮತ್ತು ರೈಲ್ವೆ ನಿಲ್ದಾಣಗಳಂತಹ ಸಾರ್ವಜನಿಕ ಸ್ಥಳಗಳ ಬಗ್ಗೆ ಸೂಕ್ಷ್ಮ ಮಾಹಿತಿಯನ್ನು ಚಿತ್ರೀಕರಿಸಿ ಹಂಚಿಕೊಂಡ ಆರೋಪದ ಮೇಲೆ ಗಾಜಿಯಾಬಾದ್‌ನಲ್ಲಿ ಮಹಿಳೆ ಸೇರಿದಂತೆ ಆರು ಜನರನ್ನು ಬಂಧಿಸಲಾಗಿದೆ ಎಂದು ಅಧಿಕಾರಿಗಳು ಭಾನುವಾರ (ಮಾ.15) ತಿಳಿಸಿದ್ದಾರೆ.
ಶಂಕಿತರು ಬೇಹುಗಾರಿಕೆ ಚಟುವಟಿಕೆಯ ಭಾಗವಾಗಿ ದೆಹಲಿಯಲ್ಲಿ ಸೌರಶಕ್ತಿ ಚಾಲಿತ ಸಿಸಿಟಿವಿ ಕ್ಯಾಮೆರಾವನ್ನು ಸಹ ಅಳವಡಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಪೊಲೀಸರ ಪ್ರಕಾರ, ಆರೋಪಿಗಳನ್ನು ಬಿಜ್ನೋರ್ ನಿವಾಸಿ ಸುಹೇಲ್ ಮಲಿಕ್ (23), ಪ್ರವೀಣ್ (19), ಗಾಜಿಯಾಬಾದ್‌ನ ಕೌಶಂಬಿ ನಿವಾಸಿ ಸಾನೆ ಇರಾಂ ಅಲಿಯಾಸ್ ಮೆಹೆಕ್ (25), ಔರೈಯಾ ನಿವಾಸಿ ರಾಜ್ ವಾಲ್ಮೀಕಿ (19), ಬದೌನ್ ನಿವಾಸಿ ಶಿವ ವಾಲ್ಮೀಕಿ; ಶಹಜಹಾನ್‌ಪುರ ನಿವಾಸಿ ರಿತಿಕ್ ಗಂಗ್ವಾರ್ (23) ಎಂದು ಗುರುತಿಸಲಾಗಿದೆ.
“ಶನಿವಾರ, ಗಾಜಿಯಾಬಾದ್‌ನಲ್ಲಿ ಮೊಬೈಲ್ ಫೋನ್‌ಗಳನ್ನು ಬಳಸಿಕೊಂಡು ಸಾರ್ವಜನಿಕ ಸ್ಥಳಗಳು ಮತ್ತು ಭದ್ರತಾ ಸಂಸ್ಥೆಗಳನ್ನು ಚಿತ್ರೀಕರಿಸುತ್ತಿರುವ ಶಂಕಿತ ಗ್ಯಾಂಗ್ ಬಗ್ಗೆ ನಮಗೆ ಸುಳಿವು ಸಿಕ್ಕಿತು. ಗಾಜಿಯಾಬಾದ್‌ನ ಭೋವಾಪುರದಲ್ಲಿ ಶಂಕಿತರನ್ನು ಪತ್ತೆಹಚ್ಚಿ ಬಂಧಿಸಲಾಗಿದೆ” ಎಂದು ಗಾಜಿಯಾಬಾದ್‌ನ ಹೆಚ್ಚುವರಿ ಪೊಲೀಸ್ ಆಯುಕ್ತ (ಕಾನೂನು ಮತ್ತು ಸುವ್ಯವಸ್ಥೆ) ರಾಜ್ ಕರಣ್ ನಯ್ಯರ್ ಹೇಳಿದರು.
“ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸಿ ಅವರ ಎಲೆಕ್ಟ್ರಾನಿಕ್ ಸಾಧನಗಳನ್ನು ಸ್ಕ್ಯಾನ್ ಮಾಡಿದಾಗ, ಅವರು ವಿದೇಶಿ ಸಂಖ್ಯೆಗೆ ಹಲವಾರು ಛಾಯಾಚಿತ್ರಗಳನ್ನು ಕಳುಹಿಸಿದ್ದಾರೆ ಎಂದು ಕಂಡುಬಂದಿದೆ. ಸುಹೇಲ್ ಮಲಿಕ್ ಈ ಕಾರ್ಯವನ್ನು ನಿರ್ವಹಿಸಲು ಇತರರನ್ನು ನೇಮಿಸಿಕೊಂಡಿದ್ದರು” ಎಂದು ಅವರು ಹೇಳಿದರು.
“ವಿದೇಶಿ ಸಂಖ್ಯೆ ಪಾಕಿಸ್ತಾನದ ದೇಶದ ಸಂಕೇತವನ್ನು ಹೊಂದಿದೆ ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ. ಆದರೂ, ಅದು ಕಾರ್ಯನಿರ್ವಹಿಸುತ್ತಿರುವ ನಿಖರವಾದ ಸ್ಥಳವನ್ನು ಕಂಡುಹಿಡಿಯಲು ಪ್ರಯತ್ನಗಳು ನಡೆಯುತ್ತಿವೆ” ಎಂದು ಹೆಸರು ಹೇಳಿಲಿಚ್ಚಸದ ಪೊಲೀಸ್ ಅಧಿಕಾರಿಬ್ಬರು ತಿಳಿಸಿದ್ದಾರೆ ಎಂದು ‘ಹಿಂದೂಸ್ಥಾನ್ ಟೈಮ್ಸ್‌’ ವರದಿ ಮಾಡಿದೆ.
