ಹುಟ್ಟುತ್ತಾ ವಿಶ್ವಮಾನವರಾದ ನಾವು ಬೆಳೆಯುತ್ತಾ ಅಲ್ಪಮಾನವರಾಗುತ್ತೇವೆ. ಜಾತಿ, ಧರ್ಮ, ಬಣ್ಣ, ಲಿಂಗ ಭೇದಗಳನ್ನು ಮಕ್ಕಳಿಗೆ ಮನೆಯಿಂದಲೇ ಕಲಿಸುತ್ತಿರುವುದು ದೊಡ್ಡ ದುರಂತವಾಗಿದೆ. ಆಡಿ ಕುಣಿಯುವ, ಬೆರೆತು ಕಲಿಯುವ ವಯಸ್ಸಿನಲ್ಲಿ ಮಕ್ಕಳಿಗೆ ಶಾಲೆಗಳಾದರೂ ಸಮಾನತೆ, ಪ್ರೀತಿ, ಶಾಂತಿ, ಸೌಹಾರ್ದತೆ, ಸಹಿಷ್ಣುತೆಯನ್ನು ಕಲಿಸುವುದು ಆರೋಗ್ಯಕರ ಸಮಾಜದ ಹಿತದೃಷ್ಟಿಯಿಂದ ಅತೀ ಅಗತ್ಯ. ಶಾಲೆಯಲ್ಲಿ ಸಿಗುವ ಸಾಮಾಜೀಕರಣ ಆ ನಿಟ್ಟಿನಲ್ಲಿರಬೇಕು. ಆದರೆ ಆ ಶಾಲೆಗಳೇ ನಿಮ್ಮ ಜಾತಿಯವರೊಂದಿಗೆ ಮಾತ್ರ ಸ್ನೇಹ ಮಾಡಿ, ಆಟವಾಡಿ, ಊಟ ಮಾಡಿ ಎಂದು ಬೋಧಿಸಿದರೆ, ತಾರತಮ್ಯವೆಸಗಿದರೆ ಮಕ್ಕಳು ವಿಶಾಲ ಹೃದಯಿಗಳಾಗಲು ಸಾಧ್ಯವಿಲ್ಲ. ಬದಲಿಗೆ ಚಿಕ್ಕಂದಿನಿಂದಲೇ ದ್ವೇಷ, ಹಿಂಸೆಗೆ ಬಲಿ ಬೀಳುವ ಅಪಾಯವಿದೆ.
ತಮಿಳುನಾಡು ರಾಜ್ಯವು ಹಲವು ವಿಚಾರಗಳಲ್ಲಿ ಪ್ರಗತಿಪರವೆನಿಸಿಕೊಂಡರೂ ಜಾತಿ ವಿಷಯದಲ್ಲಿ ಮಾತ್ರ ತೀರಾ ಹಿಂದುಳಿದಿದೆ. ದ್ರಾವಿಡ ಚಳವಳಿಯ ಪ್ರಭಾವದ ಕಾರಣ ಹಲವು ಹೇರಿಕೆಗಳನ್ನು (ಹಿಂದಿ, ಹಿಂದುತ್ವ, ಕೇಂದ್ರೀಕರಣ) ಸಹಿಸಿಕೊಳ್ಳದ ಇಲ್ಲಿನ ಜನ ಜಾತಿಯನ್ನು ಮಾತ್ರ ಮತ್ತಷ್ಟು ಹೇರಿಕೊಳ್ಳುತ್ತಿರುವುದು ವಿಪರ್ಯಾಸ. ಹಾಗಾಗಿಯೇ ಇಲ್ಲಿ ಪ್ರತಿಗಾಮಿ ಚಿಂತನೆಗಳಾದ ಅಸ್ಪೃಶ್ಯತೆ, ಜಾತಿದೌರ್ಜನ್ಯಗಳು, ಕೊಲೆ-ಅತ್ಯಾಚಾರಗಳು, ಮರ್ಯಾದಹೀನ ಹತ್ಯೆಗಳು ಹೆಚ್ಚುತ್ತಾ ತಮಿಳುನಾಡಿನ ಖ್ಯಾತಿಗೆ ಧಕ್ಕೆ ತಂದಿವೆ.
“ತಮಿಳುನಾಡಿನ ಬಹುತೇಕ ಕುಟುಂಬಗಳಲ್ಲಿ ಮಕ್ಕಳು ಹುಟ್ಟಿದ ನಂತರ ಅವರು ನಡೆದಾಡಲು, ಮಾತನಾಡಲು ಕಲಿಯುವ ಮುನ್ನವೇ ಅವರಿಗೆ ಜಾತಿಯ ಹೆಮ್ಮೆ ಮತ್ತು ಗುರುತನ್ನು, ತಮ್ಮ ಜಾತಿನಾಯಕರನ್ನು ಹೊಗಳುವ ಹಾಡುಗಳ ಮೂಲಕ ಕಲಿಸಲಾಗುತ್ತದೆ” ಎಂದು ಅಲ್ಲಿನ ಸಾಮಾಜಿಕ ಕಾರ್ಯಕರ್ತರೊಬ್ಬರು ಹೇಳುತ್ತಾರೆ. ಆ ಕಾರಣದಿಂದ ಶಾಲೆಗಳಲ್ಲಿಯೇ ಮಕ್ಕಳು ಜಾತಿ ಕಾರಣಕ್ಕೆ ಹೊಡೆದಾಡುವ, ಕೊಲೆಯಾಗಿರುವ ಹಲವಾರು ಪ್ರಕರಣಗಳು ವರದಿಯಾಗಿವೆ. ತಿರುನೆಲ್ವೇಲಿ ಜಿಲ್ಲೆಯಲ್ಲಿ ಪ್ರತಿದಿನ ಶಾಲೆಗಳು ಮುಗಿಯುವ ವೇಳೆ ಸಂಜೆ 4.30ರ ಸುಮಾರಿಗೆ, ಅಲ್ಲಿನ ರಸ್ತೆಗಳಲ್ಲಿ ಪೊಲೀಸ್ ಜೀಪ್‌ಗಳು ಗಸ್ತು ತಿರುಗುತ್ತವೆ. ವಿದ್ಯಾರ್ಥಿಗಳ ಗುಂಪು ತಮ್ಮ ಜಾತಿಯ ನಾಯಕರನ್ನು ವೈಭವೀಕರಿಸುವ ಹಾಡುಗಳನ್ನು ಬಸ್‌ಗಳಲ್ಲಿ ಹಾಕುತ್ತಾರೆ ಅಥವಾ ಹಾಡುತ್ತಾರೆ. ಹಾಗಾಗಿ ಅಲ್ಲಿ ಹಿಂಸಾಚಾರ ನಡೆಯುವುದನ್ನು ತಪ್ಪಿಸಲು ಕೆಲವು ’ಸೂಕ್ಷ್ಮ’ ಮಾರ್ಗಗಳಲ್ಲಿ ಸಾರಿಗೆ ಇಲಾಖೆಯು ಶಾಲಾ ಶಿಕ್ಷಣ ಇಲಾಖೆಯ ಸಹಯೋಗದಲ್ಲಿ ಬಸ್‌ಗಳ ಒಳಗೆ ಸಿಸಿ ಕ್ಯಾಮೆರಾಗಳನ್ನು ಅಳವಡಿಸಿದೆ!
ಕಪ್ಪು ಚೆಂದ ಬಿಳಿಯದು ಅಂದ
ಕೇಸರಿ ಶುಭವೋ ಹಸಿರು ಸಿರಿಯೋ
ಎಲ್ಲವು ಬೆರೆಯೇ ಕಾಮನಬಿಲ್ಲು
ಬಣ್ಣಗಳ ನಡುವೆ ಭೇದವೇ?
ಎಂಬ ಹಾಡನ್ನು ಬರೆಯುವ ಮೂಲಕ ಕನ್ನಡದ ಕವಿ-ಹಾಡುಗಾರ ಜನಾರ್ದನ ಕೆಸರಗದ್ದೆಯವರು ಮನುಷ್ಯ ಜಾತಿ ತಾನೊಂದೇ ವಲಂ, ಮನುಜ ಮತ ವಿಶ್ವ ಪಥ ಎಂಬ ಸಂದೇಶ ಸಾರಲು ಪ್ರಯತ್ನಿಸಿದ್ದಾರೆ. ಆದರೆ ತಮಿಳುನಾಡಿನ ಕೆಲ ಜಿಲ್ಲೆಗಳಲ್ಲಿ ಈ ಬಣ್ಣಗಳೇ ಮಕ್ಕಳ ಭವಿಷ್ಯಕ್ಕೆ ಮಾರಕವಾಗಿವೆ. ಏಕೆಂದರೆ ಜಾತಿಸೂಚಕ ರಿಸ್ಟ್ ಬ್ಯಾಂಡ್‌ಗಳು (ಕೈಗೆ ಹಾಕುವ ಬಣ್ಣದ ಪಟ್ಟಿಗಳು) ಅರಳುವ ಮಕ್ಕಳ ಮನಸ್ಸನ್ನು ಮುದುಡುತ್ತಿವೆ. ತಮಿಳುನಾಡಿನಲ್ಲಿ ಹಿಂದಿನಿಂದಲೂ ಆಚರಣೆಯಲ್ಲಿರುವ ಈ ರಿಸ್ಟ್ ಬ್ಯಾಂಡ್ ಧರಿಸುವ ಪದ್ಧತಿಯಿಂದ ಶಾಲೆಗಳಲ್ಲಿ ನಡೆಯುವ ಹೊಡೆದಾಟದಿಂದ ಹಲವು ಮಕ್ಕಳ ಜೀವ ಹೋಗಿದೆ. ಅಲ್ಲದೆ ಜಾತಿ ಆಧಾರದಲ್ಲಿ ಶಿಕ್ಷಣದಲ್ಲಿ ತಾರತಮ್ಯ ಮಿತಿಮೀರಿದೆ. ತಿರುನೆಲ್ವೇಲಿ ಶಾಲೆಯಲ್ಲಿ ಮೊನ್ನೆಯಷ್ಟೆ ವಿದ್ಯಾರ್ಥಿಯೊಬ್ಬನ ಕೊಲೆಯಾಗಿದ್ದು, ಈ ಚರ್ಚೆಯನ್ನು ಮತ್ತೆ ಮುನ್ನೆಲೆಗೆ ತಂದಿದೆ.
ಏನಿದು ಜಾತಿ ಸೂಚಕ ರಿಸ್ಟ್ ಬ್ಯಾಂಡ್?
ಜಾತಿ ಹೆಮ್ಮೆಯ ಕಾರಣಕ್ಕೆ ಹಿಂದಿನಿಂದಲೂ ಮಕ್ಕಳು ನಿರ್ದಿಷ್ಟ ಜಾತಿ ಸೂಚಕ ಬಣ್ಣದ ಬ್ಯಾಂಡ್‌ಗಳನ್ನು ಕೈಗಳಿಗೆ ಧರಿಸುತ್ತಾರೆ. ಅದು ಶಾಲೆಗಳಲ್ಲಿ ತಮ್ಮದೇ ಜಾತಿಯ ಇತರರನ್ನು ಗುರುತಿಸಲು, ಅವರೊಂದಿಗೆ ಸ್ನೇಹ ಬೆಳೆಸಲು, ಆಟ ಆಡಲು, ಊಟ ಮಾಡಲು ಗುರುತಾಗುತ್ತದೆ. ಇನ್ನು ಶಿಕ್ಷಕರಿಗೆ ಪ್ರಶ್ನೆ ಕೇಳಲು ಅಥವಾ ಯಾವುದೇ ಕೆಲಸಕ್ಕೆ ಅನುಮತಿ ಪಡೆಯಲು ಮಕ್ಕಳು ಕೈ ಎತ್ತಿದರೆ ಶಿಕ್ಷಕರಿಗೆ ಆ ವಿದ್ಯಾರ್ಥಿ ಯಾವ ಜಾತಿಗೆ ಸೇರಿದವನು ಎಂದು ಸುಲಭವಾಗಿ ತಿಳಿದುಬಿಡುತ್ತದೆ. ಇದು ಕೂಡಿ ಬಾಳುವ ಸೌಹಾರ್ದ ಸಂಸ್ಕೃತಿಗೆ ವಿರುದ್ಧದ ಅನಿಷ್ಟ
ಆಚರಣೆಯಾಗಿದೆ. ಈ ರಿಸ್ಟ್ ಬ್ಯಾಂಡ್ ವಿಚಾರದಲ್ಲಿ ಇದುವರೆಗೂ ಹತ್ತಾರು ಗಲಾಟೆಗಳು ನಡೆದಿದ್ದು ಹಲವು ವಿದ್ಯಾರ್ಥಿಗಳು ಅಸುನೀಗಿದ್ದರೂ ಇಂದಿಗೂ ಅನೇಕ ಶಾಲೆಗಳಲ್ಲಿ ರಿಸ್ಟ್ ಬ್ಯಾಂಡ್ ಧರಿಸುವುದು ಮಾತ್ರ ನಿಂತಿಲ್ಲ.
ನಾನುಗೌರಿ.ಕಾಂಗೆ ದೇಣಿಗೆ ನೀಡಿ ಬೆಂಬಲಿಸಿ
₹100 ₹200 ₹500 ₹1000 Others
ಬಹುತೇಕ ಗಂಡುಮಕ್ಕಳು, ಕೈಗಳಿಗೆ ಈ ಬ್ಯಾಂಡ್ ಧರಿಸಿದರೆ, ಇನ್ನು ಕೆಲವರು ಹಣೆಗಳಲ್ಲಿ ಇಡುವ ತಿಲಕದ ಬಣ್ಣದಲ್ಲಿ ತಮ್ಮ ಜಾತಿ ಗುರುತಿಸಿಕೊಳ್ಳುತ್ತಾರೆ. ಬರುಬರುತ್ತಾ ಹೆಣ್ಣುಮಕ್ಕಳು ಸಹ ಜಾತಿಸೂಚಕ ಬಣ್ಣದ ರಿಬ್ಬನ್‌ಗಳು, ಕಿವಿಯೋಲೆಯ ಸ್ಟೋನ್‌ಗಳು ಮತ್ತು ಉಗುರು ಬಣ್ಣಗಳನ್ನು ಹಚ್ಚಿಕೊಳ್ಳುವ ಮೂಲಕ ಜಾತಿ ಕೂಪಕ್ಕೆ ಬಿದ್ದಿದ್ದಾರೆ.
ಕಾರಣವೇನು?
ಒಬಿಸಿ ವರ್ಗಕ್ಕೆ ಸೇರಿದ ನಾದರ್ ಸಮುದಾಯದವರು ಹಸಿರು ಮತ್ತು ನೀಲಿ ಬಣ್ಣದ ಬ್ಯಾಂಡ್‌ಗಳನ್ನು, ಥೇವರ್ ಮತ್ತು ಮಾರವರ್ ಸಮುದಾಯದವರು ಹಳದಿ ಮತ್ತು ಕಿತ್ತಳೆ ಬಣ್ಣದ, ಯಾದವ ಮತ್ತು ಕೊಣಾರ್ ಸಮುದಾಯದವರು ಹಳದಿ ಮತ್ತು ನೀಲಿ ಬಣ್ಣದ ಬ್ಯಾಂಡ್‌ಗಳನ್ನು ಧರಿಸುತ್ತಾರೆ. ಪರಿಶಿಷ್ಟ ಜಾತಿಯ ಅರುಂಧತಿಯಾರ್ ಸಮುದಾಯದವರು ಕೆಂಪು ಮತ್ತು ನೀಲಿ ಬಣ್ಣದ, ದೇವೇಂದ್ರಕುಲ ವೆಲ್ಲಲಾರ್ ಸಮುದಾಯದವರು ಕೆಂಪು ಮತ್ತು ಹಸಿರು ಬಣ್ಣದ ರಿಸ್ಟ್ ಬ್ಯಾಂಡ್‌ಗಳನ್ನು ಧರಿಸುತ್ತಾರೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
ಮಧುರೈನ ಗ್ರಾಮವೊಂದರ ಪಂಚಾಯಿತಿ ಶಾಲೆಯಲ್ಲಿ 40 ವರ್ಷಗಳಿಂದ ದಲಿತ ಮಕ್ಕಳಿಗೆ ಪ್ರವೇಶವಿರಲಿಲ್ಲ. ಇನ್ನು ರಾಜ್ಯದ ಹಲವಾರು ಶಾಲೆಗಳಲ್ಲಿ ಮಧ್ಯಾಹ್ನದ ಬಿಸಿಯೂಟ ತಿನ್ನಲು ದಲಿತ ಮಕ್ಕಳು ತಮ್ಮ ತಟ್ಟೆ ತಾವೇ ತರಬೇಕು, ಅವರಿಗಾಗಿ ನಿಗದಿಪಡಿಸಿದ ನಲ್ಲಿಗಳಲ್ಲಿ ಮಾತ್ರ ಊಟದ ನಂತರ ಅವರ ತಟ್ಟೆ ತೊಳೆಯಬೇಕು ಎಂಬ ಅಸ್ಪೃಶ್ಯತೆಯ ನಿಯಮ ಹೇರಲಾಗಿದೆ. ಇಂದಿಗೂ ಜಾತಿ ದೌರ್ಜನ್ಯ, ಕೊಲೆ, ಮರ್ಯಾದಹೀನ ಹತ್ಯೆಗಳು ಹೆಚ್ಚಾಗಿವೆ. ಇವುಗಳನ್ನು ಅಲ್ಲಿನ ದಲಿತ ದಮನಿತರು ಪ್ರಶ್ನಿಸುತ್ತಲೇ ಬಂದಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ದಲಿತ ಪ್ರತಿರೋಧ ಮತ್ತು ಸಾಮಾಜಿಕ ಸಮಾನತೆಗಾಗಿನ ಹೋರಾಟ ಬಿರುಸು ಪಡೆದುಕೊಂಡಿದೆ. ಜಾತಿ ಪ್ರತಿರೋಧದ ಸಿನಿಮಾಗಳು ತಮಿಳು ಭಾಷೆಯಲ್ಲಿ ನಿರ್ಮಾಣವಾಗಿ ಗಮನ ಸೆಳೆದಿವೆ. ಈ ದಿಟ್ಟ ಪ್ರತಿರೋಧವನ್ನು ಸಹಿಸದ ಪ್ರಬಲ ಜಾತಿಯವರು ತಮ್ಮ ಮಕ್ಕಳಿಗೆ ಜಾತಿ ಹೆಮ್ಮೆಯ ಕುರಿತು ಹೆಚ್ಚಾಗಿ ಹೇಳುವುದರ ಜೊತೆಗೆ ರಿಸ್ಟ್ ಬ್ಯಾಂಡ್ ತರಹದ ಜಾತಿಸೂಚಕಗಳನ್ನು ಧರಿಸುವಂತೆ ಪ್ರಚೋದಿಸುತ್ತಿದ್ದಾರೆ. ಹಿಂದಿನಿಂದಲೂ ಧರಿಸುತ್ತಿದ್ದರೂ ಈಗ ಮತ್ತಷ್ಟು ಹೆಚ್ಚಾಗಲು ಇದೇ ಕಾರಣವಾಗಿದೆ. ಹಾಗಾಗಿ ದಲಿತರು ಸಹ ಈ ಬ್ಯಾಂಡ್‌ಗಳನ್ನು ಧರಿಸುತ್ತಿದ್ದಾರೆ.
ಈ ಅನಿಷ್ಟ ಪದ್ಧತಿಗೆ ಶಿಕ್ಷಕರ ಪ್ರೋತ್ಸಾಹ
2018ರ ಬ್ಯಾಚ್‌ನ ಐಎಎಸ್ ತರಬೇತಿ ತಂಡದ 180 ಸದಸ್ಯರು ಈ ರಿಸ್ಟ್ ಬ್ಯಾಂಡ್ ವಿಚಾರವಾಗಿ ಒಂದು ಅಧ್ಯಯನ ನಡೆಸಿದ್ದಾರೆ. ಸುಮಾರು 50 ಶಾಲೆಗಳಿಗೆ ಭೇಟಿ ನೀಡಿ ವಿದ್ಯಾರ್ಥಿಗಳು, ಶಿಕ್ಷಕರು ಮತ್ತು ಪೋಷಕರನ್ನು ಮಾತನಾಡಿಸಿದಾಗ ಈ ಅನಿಷ್ಟ ಪದ್ಧತಿಗೆ ಶಿಕ್ಷಕರೆ ಹೆಚ್ಚು ಕುಮ್ಮಕ್ಕು ನೀಡುತ್ತಿದ್ದಾರೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಆನಂತರ ಈ ತಂಡವು ಶಾಲೆಗಳಲ್ಲಿ ರಿಸ್ಟ್ ಬ್ಯಾಂಡ್ ಧರಿಸುವುದನ್ನು ನಿಷೇಧಿಸಬೇಕೆಂದು ಶಿಕ್ಷಣ ಇಲಾಖೆಗೆ ಪತ್ರಿಕಾ ವರದಿಗಳ ಜೊತೆ ಪಿಟಿಷನ್ ಸಲ್ಲಿಸಿತ್ತು. ಇದರ ಆಧಾರದಲ್ಲಿ ತಮಿಳುನಾಡು ಶಾಲಾ ಶಿಕ್ಷಣ ನಿರ್ದೇಶನಾಲಯವು 2019ರಲ್ಲಿ ಎಲ್ಲಾ ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ಈ ಜಾತಿತಾರತಮ್ಯ ಆಚರಿಸುವ ಶಾಲೆಗಳನ್ನು ಗುರುತಿಸಿ ಮುಖ್ಯೋಪಾಧ್ಯಾಯರಿಗೆ ಸೂಚನೆ ನೀಡುವಂತೆ ನಿರ್ದೇಶಿಸಿ ಸುತ್ತೋಲೆ ಹೊರಡಿಸಿತ್ತು. ಇಂತಹ ಅಭ್ಯಾಸವನ್ನು ತಕ್ಷಣವೇ ತಡೆಗಟ್ಟಬೇಕು ಮತ್ತು ತಾರತಮ್ಯಕ್ಕೆ ಕಾರಣರಾದವರ ಮೇಲೆ ಕಾನೂನುಕ್ರಮ ಕೈಗೊಳ್ಳುವಂತೆ ಸುತ್ತೋಲೆಯಲ್ಲಿ ತಿಳಿಸಲಾಗಿತ್ತು. ಆದರೆ ಆಗಿನ ಎಐಎಡಿಎಂಕೆ ಸರ್ಕಾರದ ಶಿಕ್ಷಣ ಸಚಿವರಾಗಿದ್ದ ಕೆ.ಎ ಸಂಗೊತ್ತಿಯನ್ ಆ ಸುತ್ತೋಲೆಯನ್ನು ರದ್ದುಗೊಳಿಸಿದ್ದಲ್ಲದೆ ಆ ರೀತಿಯ ಆಚರಣೆ ನಡೆಯುತ್ತಿಲ್ಲ ಎಂದು ಹೇಳಿಕೆ ನೀಡಿದ್ದರು.
ಸಮಾಜದಲ್ಲಿಯೂ ಬದಲಾವಣೆ ಬೇಕಿದೆ
ತಮಿಳುನಾಡಿನಲ್ಲಿ ಸಮಾನ ಶಿಕ್ಷಣಕ್ಕಾಗಿ ಹೋರಾಡುತ್ತಿರುವ ಪ್ರಿನ್ಸ್ ಗಜೇಂದ್ರ ಬಾಬುರವರು ಈ ವಿಷಯದ ಕುರಿತು ನ್ಯಾಯಪಥದೊಂದಿಗೆ ಮಾತನಾಡಿ, “ಇಂತಹ ಸಮಸ್ಯೆಗಳು 20 ವರ್ಷಗಳಿಂದ ಆಚರಣೆಯಲ್ಲಿದ್ದರೂ ಸಮಾಜ ಇದನ್ನು ಸಾಮಾಜಿಕ ಸಮಸ್ಯೆ ಎಂದು ಪರಿಗಣಿಸುತ್ತಿಲ್ಲ. ಆದರೆ ಈ ಅನಿಷ್ಟ ಪದ್ಧತಿಗೆ ಮಕ್ಕಳು ಬಲಿಯಾಗುತ್ತಿದ್ದಾರೆ. ಎಲ್ಲೇ ಈ ರೀತಿಯ ಘಟನೆಗಳು ನಡೆದರೂ ಇದಕ್ಕೂ ಜಾತಿಗೂ ಯಾವುದೇ ಸಂಬಂಧವಿಲ್ಲ ಎಂದು ಅಧಿಕಾರಿಗಳು ನಿರಾಕರಿಸುತ್ತಾರೆ. ಏಕೆಂದರೆ ಇದು ದೊಡ್ಡ ಸುದ್ದಿಯಾಗಲು ಅವರು ಬಯಸುವುದಿಲ್ಲ.
ಆದ್ದರಿಂದ ಅದು ಸಮಾಜದ ಗಮನಕ್ಕೆ ಬರುತ್ತಿಲ್ಲ. ಶಾಲೆಗಳು ಸಾಮಾಜಿಕ ತಾರತಮ್ಯವನ್ನು ಹೋಗಲಾಡಿಸಲು ಉದ್ದೇಶಿಸಿರುವ ಸ್ಥಳಗಳಾಗಿವೆ. ಆದರೆ ಸಮಾಜದಲ್ಲಿ ಜಾತಿತಾರತಮ್ಯ ನೆಲೆಯೂರಿರುವಾಗ ಅದು ಶಾಲೆಗಳತ್ತಲೂ ಸುಳಿಯುತ್ತದೆ. ಪೊಲೀಸರ ಕ್ರಮ ಮತ್ತು ವಿದ್ಯಾರ್ಥಿಗಳ ವಿರುದ್ಧ ಶಿಕ್ಷಾರ್ಹ ಕ್ರಮದಿಂದ ಈ ಸಮಸ್ಯೆ ಬಗೆಹರಿಯುವುದಿಲ್ಲ. ಸಮಾಜದಲ್ಲಿ ಜಾಗೃತಿ ಮತ್ತು ಬದಲಾವಣೆ ಬರಬೇಕು. ಅದರಂತೆ ಶಾಲಾ ಶಿಕ್ಷಣದಲ್ಲಿ ಜಾತೀಯತೆ, ತಾರತಮ್ಯ ತಪ್ಪು ಎಂದು ತಿಳಿವಳಿಕೆ ನೀಡುವ ಪಠ್ಯಗಳನ್ನು ಅಳವಡಿಸಬೇಕು. ಆ ರೀತಿಯಾಗಿ ಹಂತ ಹಂತವಾಗಿ ಸಮಸ್ಯೆಯನ್ನು ಪರಿಹರಿಸಲು ಸರ್ಕಾರ ಇಚ್ಛಾಶಕ್ತಿ ಪ್ರದರ್ಶಿಸಬೇಕು” ಎಂದರು.
ಶಿಕ್ಷಣ ಪಡೆಯುವುದರ ಮೂಲಕ ಸಾಮಾಜಿಕ ಸಮಸ್ಯೆಗಳನ್ನು ಹೋಗಲಾಡಿಸಬೇಕು ಎಂಬುದು ಪ್ರಜ್ಞಾವಂತರ ಆಶಯ. ಆದರೆ ಶಿಕ್ಷಣವೇ ತಾರತಮ್ಯವನ್ನು ಬೋಧಿಸುವಂತಾಗಬಾರದು. ಹಾಗಾಗಿ ಜಾತೀಯತೆ ಆಚರಿಸುವುದು ನಾಚಿಕೆಯ ವಿಷಯ ಎಂದು ವಿದ್ಯಾರ್ಥಿಗಳಿಗೆ ಮನವರಿಕೆ ಮಾಡಿಕೊಡಬೇಕಿದೆ. ಅದೇರೀತಿಯಾಗಿ ಮೀಸಲಾತಿ ಸೇರಿದಂತೆ ಹಲವು ವಿಷಯಗಳ ಬಗ್ಗೆ ವಿದ್ಯಾರ್ಥಿಗಳಿಗಿರುವ ತಪ್ಪು ಅಭಿಪ್ರಾಯವನ್ನು ಪಠ್ಯ ಮತ್ತು ಪಠ್ಯೇತರ ಚಟುವಟಿಕೆಗಳ ಮೂಲಕ ದೂರ ಮಾಡಬೇಕು. ಇಂತಹ ಬದಲಾವಣೆಗಳಿಗೆ ದೀರ್ಘ ಸಮಯ ಹಿಡಿಯುತ್ತದೆ ಎಂಬುದನ್ನು ಅರಿತು ಪಟ್ಟುಬಿಡದೆ ಸಾಧಿಸಬೇಕಿದೆ. ಹಲವು ವಿಷಯಗಳಲ್ಲಿ ಪ್ರಗತಿಪರ ಧೋರಣೆ ಹೊಂದಿರುವ ತಮಿಳುನಾಡಿನಲ್ಲಿ ಸದ್ಯ ಡಿಎಂಕೆ ಸರ್ಕಾರ ಅಧಿಕಾರದಲ್ಲಿದ್ದು, ಅದರ ಮುಂದೆ ಈ ದೊಡ್ಡ ಜವಾಬ್ದಾರಿಯಿದೆ. ಅದನ್ನು ಯಶಸ್ವಿಯಾಗಿ ನಿಭಾಯಿಸುವ ಮೂಲಕ ಅದು ಉಳಿದ ರಾಜ್ಯಗಳಿಗೂ ಮಾದರಿಯಾಗಬೇಕಿದೆ.
ನಾನುಗೌರಿ.ಕಾಂಗೆ ದೇಣಿಗೆ ನೀಡಿ ಬೆಂಬಲಿಸಿ
₹100 ₹200 ₹500 ₹1000 Others
ಇದನ್ನೂ ಓದಿ: ಜೈ ಭೀಮ್‌ ವಿವಾದ: ಸೂರ್ಯ, ಜ್ಞಾನವೇಲ್‌, ಜ್ಯೋತಿಕಾ ವಿರುದ್ಧ ಎಫ್‌ಐಆರ್‌ ದಾಖಲಿಸಲು ಕೋರ್ಟ್ ಆದೇಶ
