ಚೀನಾದ ಉನ್ನತ ತಂತ್ರಜ್ಞಾನ ಕಂಪನಿಗಳಾದ ಅಲಿಬಾಬಾ ಮತ್ತು ಬೈಡೂ ಆನ್ಲೈನ್ನಲ್ಲಿ ಲಭ್ಯವಿರುವ ತಮ್ಮ ಡಿಜಿಟಲ್ ನಕ್ಷೆಗಳಿಂದ ಇಸ್ರೇಲ್ನ ಅಧಿಕೃತ ಹೆಸರನ್ನು ಕೈಬಿಟ್ಟಿವೆ. ಈ ಮೂಲಕ ಪ್ಯಾಲೆಸ್ತೀನ್ಗೆ ಚೀನಾ ಬೆಂಬಲ ಸೂಚಿಸಿದೆ.
ಇಸ್ರೇಲ್ ಮತ್ತು ಸಶಸ್ತ್ರ ಸಂಘಟನೆ ಹಮಾಸ್ ನಡುವಿನ ಯುದ್ಧದ ನಂತರ ಚೀನೀ ಅಂತರ್ಜಾಲವು ಈ ಕ್ರಮ ತೆಗೆದುಕೊಂಡಿದೆ. ಬೈಡೂ ಮತ್ತು ಅಲಿಬಾಬಾ ಇನ್ನು ಮುಂದೆ ಇಸ್ರೇಲ್ನ್ನು ಹೆಸರಿನಿಂದ ಉಲ್ಲೇಖಿಸುವುದಿಲ್ಲ ಎಂದು ವಾಲ್ ಸ್ಟ್ರೀಟ್ ಜರ್ನಲ್ ಸೋಮವಾರ ವರದಿ ಮಾಡಿದೆ.
”ಬೈಡೂವಿನ ಚೈನೀಸ್ ಭಾಷೆಯ ಆನ್ಲೈನ್ ನಕ್ಷೆಗಳು ಇಸ್ರೇಲ್ನ ಅಂತರಾಷ್ಟ್ರೀಯವಾಗಿ ಗುರುತಿಸಲ್ಪಟ್ಟ ಗಡಿಗಳು, ಹಾಗೆಯೇ ಪ್ಯಾಲೆಸ್ತೀನಿಯನ್ ಪ್ರದೇಶಗಳು ಮತ್ತು ಪ್ರಮುಖ ನಗರಗಳನ್ನು ಗುರುತಿಸುತ್ತವೆ, ಆದರೆ ದೇಶವನ್ನು ಹೆಸರಿನಿಂದ ಸ್ಪಷ್ಟವಾಗಿ ಗುರುತಿಸುವುದಿಲ್ಲ” ಎಂದು ವರದಿ ಹೇಳಿದೆ.
ಇನ್ನೂ ಆ ನಕ್ಷೆಯಲ್ಲಿ ಲಕ್ಸೆಂಬರ್ಗ್ನಂತಹ ಚಿಕ್ಕ ರಾಷ್ಟ್ರಗಳ ಹೆಸರುಗಳನ್ನು ಸಂಪೂರ್ಣವಾಗಿ ನೋಡಬಹುದು, ಆದರೆ ಇಸ್ರೇಲ್ ಹೆಸರನ್ನು ಕೈಬಿಟ್ಟಿದೆ. ಚೀನಾದ ಕಂಪನಿಗಳು ಈ ಕ್ರಮದ ಹಿಂದೆ ಯಾವುದೇ ವಿವರಣೆಯನ್ನು ನೀಡಿಲ್ಲ.
ಚೀನಾ ಅಧ್ಯಕ್ಷ ಷಿ ಜಿನ್ಪಿಂಗ್ ಅವರು ಸ್ವತಃ ಪ್ಯಾಲೆಸ್ತೀನ್ಗೆ ಬೆಂಬಲ ನೀಡಿದ್ದು, ”ಅಮೆರಿಕವು ಗಾಜಾ ಇತಿಹಾಸದ ಬಗ್ಗೆ ತಪ್ಪಾಗಿ ಚಿತ್ರಿಸಿದ್ದಕ್ಕಾಗಿ ಚೀನಾದ ಮಾಧ್ಯಮಗಳು ಛೀಮಾರಿ ಹಾಕುತ್ತಿವೆ ಎಂದು ಹೇಳಿದ್ದಾರೆ.
ಪ್ಯಾಲೆಸ್ತೀನ್ ಜನರು ಅನುಭವಿಸಿದ ಅನ್ಯಾಯ ಮುಂದುವರಿಯಬಾರದು ಎಂದು ಸೌದಿ ಅರೇಬಿಯಾದಲ್ಲಿ ಸಹಕಾರ ಮತ್ತು ಅಭಿವೃದ್ಧಿಗಾಗಿ ರಿಯಾದ್-ಗಲ್ಫ್-ಚೀನೀ ಶೃಂಗಸಭೆಯ ಉದ್ಘಾಟನಾ ಸಮಾರಂಭದಲ್ಲಿ ಚೀನಾ ಅಧ್ಯಕ್ಷರು ಹೇಳಿದ್ದಾರೆ.
ಇದನ್ನೂ ಓದಿ: ಗಾಝಾದ ನಿರಾಶ್ರಿತರ ಶಿಬಿರದ ಮೇಲೆ ಇಸ್ರೇಲ್ ದಾಳಿ: ಅಲ್ ಜಝೀರಾ ಸಿಬ್ಬಂದಿಯ ಕುಟುಂಬದ 19 ಮಂದಿ ಬಲಿ
