ನವದೆಹಲಿ: ವಿಡಂಬನಕಾರರು ಮತ್ತು ರಾಜಕೀಯ ವ್ಯಾಖ್ಯಾನಕಾರರಾದ ನೇಹಾ ಸಿಂಗ್ ರಾಥೋಡ್, ಮಾದ್ರಿ ಕಾಕೋಟಿ ಮತ್ತು ಶಮಿತಾ ಯಾದವ್ ಅವರ ವಿರುದ್ಧದ ಕ್ರಿಮಿನಲ್ ಪ್ರಕರಣಗಳನ್ನು ಕೈಬಿಡುವಂತೆ The Network of Women in Media (NWMI) ಭಾರತ ಸರ್ಕಾರವನ್ನು ಒತ್ತಾಯಿಸಿದೆ ಎಂದು ನ್ಯೂಸ್ ಲಾಂಡ್ರಿ ವರದಿ ಮಾಡಿದೆ.
NWMI ಗುರುವಾರ ಬಿಡುಗಡೆಯಾದ ಹೇಳಿಕೆಯಲ್ಲಿ, ಪಹಲ್ಗಾಮ್ ದಾಳಿ ಮತ್ತು ಭದ್ರತಾ ಲೋಪಕ್ಕೆ ಸಂಬಂಧಿಸಿ ಈ ಮೂವರ ಕಾಮೆಂಟ್‌ಗಳ ಮೇಲಿನ ಆರೋಪಗಳು “ಅಸಂಬದ್ಧ” ಮತ್ತು “ಕಠಿಣ” ಎಂದು ಅದು ಕರೆದಿದೆ.
“2025ರ ಏಪ್ರಿಲ್ 22ರ ದುರಂತ ಪಹಲ್ಗಾಮ್ ದಾಳಿಯಲ್ಲಿ ಆಡಳಿತಾತ್ಮಕ ಮತ್ತು ಗುಪ್ತಚರ ವೈಫಲ್ಯಗಳ ಬಗ್ಗೆ ಸಂಬಂಧಪಟ್ಟ ಪ್ರಶ್ನೆಗಳನ್ನು ಕೇಳಿದ ಕಾರಣಕ್ಕೆ ಬೋಜ್ಪುರಿ ಜಾನಪದ ಗಾಯಕಿ ನೇಹಾ ಸಿಂಗ್ ರಾಥೋಡ್ ಮತ್ತು ಮಾದ್ರಿ ಕಾಕೋಟಿ (ಡಾ. ಮೆಡುಸಾ ಎಂಬ ಹೆಸರಿನಿಂದ ಕರೆಯುತ್ತಾರೆ) ವಿರುದ್ಧ ವಿಧ್ವಂಸಕ ಚಟುವಟಿಕೆಗಳ ಅಸಂಬದ್ಧ ಮತ್ತು ಕಠಿಣ ಆರೋಪಗಳನ್ನು ಹೊರಿಸುವುದನ್ನು ಮತ್ತು ಶಮಿತಾ ಯಾದವ್ (ದಿ ರಾಂಟಿಂಗ್ ಗೋಲಾ ಎಂಬ ಹೆಸರಿನಿಂದ ಕರೆಯುತ್ತಾರೆ) ವಿರುದ್ಧ ದೂರು ದಾಖಲಿಸಿರುವುದನ್ನು NWMI ಖಂಡಿಸುತ್ತದೆ.” ಎಂದು ಅದು ಹೇಳಿಕೆಯಲ್ಲಿ ತಿಳಿಸಿದೆ.
ಪಹಲ್ಗಾಮ್ ದಾಳಿಗೆ ಸಂಬಂಧಿಸಿದಂತೆ ನರೇಂದ್ರ ಮೋದಿ ಸರ್ಕಾರವನ್ನು ಟೀಕಿಸಿದ ವೀಡಿಯೊವನ್ನು ಪಾಕಿಸ್ತಾನದ ಸಾಮಾಜಿಕ ಮಾಧ್ಯಮ ಖಾತೆಯೊಂದು ಮರುಹಂಚಿಕೊಂಡ ನಂತರ ಭೋಜ್‌ಪುರಿ ಗಾಯಕಿ ನೇಹಾ ಸಿಂಗ್ ರಾಥೋಡ್ ಅವರ ವಿರುದ್ಧ ಏಪ್ರಿಲ್ 27 ರಂದು 11 ಆರೋಪಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಯಿತು. ಒಂದು ದಿನದ ನಂತರ, ಲಕ್ನೋ ವಿಶ್ವವಿದ್ಯಾಲಯದ ಸಹಾಯಕ ಪ್ರಾಧ್ಯಾಪಕಿ ಮಾದ್ರಿ ಕಾಕೋಟಿಯವರು ದಾಳಿಯ ಕುರಿತು ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದಕ್ಕಾಗಿ ಇದೇ ರೀತಿಯ ಆರೋಪಗಳನ್ನು ಹೊರಿಸಲಾಯಿತು. ಪಹಲ್ಗಾಮ್ ದುರಂತಕ್ಕೆ ಮಾಧ್ಯಮ ಮತ್ತು ಸರ್ಕಾರದ ಪ್ರತಿಕ್ರಿಯೆಯನ್ನು ವಿಡಂಬನಕಾರರು ತಮ್ಮ ಪೋಸ್ಟ್‌ನಲ್ಲಿ ಟೀಕಿಸಿದ್ದರು.
ಎರಡೂ ಪ್ರಕರಣಗಳಲ್ಲಿನ ಎಫ್‌ಐಆರ್‌ಗಳು ‘ದೇಶದ್ರೋಹ’ ಎಂಬ ಪದವನ್ನು ಬಳಸದೆಯೇ, ಪ್ರತ್ಯೇಕತೆ, ದಂಗೆ ಅಥವಾ ವಿಧ್ವಂಸಕ ಚಟುವಟಿಕೆಗಳನ್ನು ಪ್ರಚೋದಿಸುವ ಅಥವಾ ಪ್ರತ್ಯೇಕತಾವಾದದ ಭಾವನೆಗಳನ್ನು ಪ್ರೋತ್ಸಾಹಿಸುವ, ಭಾರತದ ಸಾರ್ವಭೌಮತ್ವ, ಏಕತೆ ಮತ್ತು ಸಮಗ್ರತೆಗೆ ಅಪಾಯವನ್ನುಂಟುಮಾಡುವ ಕೃತ್ಯಗಳನ್ನು ಅಪರಾಧೀಕರಿಸುವ ಆರೋಪಗಳನ್ನು ಹೊರಿಸಿವೆ.
“ಅಧಿಕಾರದಲ್ಲಿರುವವರನ್ನು ಟೀಕೆ ಮಾಡುವ ತಮ್ಮ ಪ್ರಜಾಸತ್ತಾತ್ಮಕ ಹಕ್ಕನ್ನು ಚಲಾಯಿಸಿದ ಕಾರಣಕ್ಕೆ ರಾಥೋಡ್ ಮತ್ತು ಕಾಕೋಟಿ ಅವರ ಮೇಲೆ “ಪ್ರತ್ಯೇಕತೆಯನ್ನು ಪ್ರಚೋದಿಸುವ, ಸಶಸ್ತ್ರ ದಂಗೆಯನ್ನು ಪ್ರಚೋದಿಸುವ” ಆರೋಪ ಹೊರಿಸಲಾಗಿದೆ ಎಂಬುದು “ಅಗಾಧ ಕಳವಳಕಾರಿ ವಿಷಯ” ಎಂದು NWMI ಹೇಳಿದೆ.
NWMI ಪ್ರಕಾರ, ಪಹಲ್ಗಾಮ್ ದಾಳಿಯಲ್ಲಿನ ಭದ್ರತಾ ಲೋಪಗಳನ್ನು ಖಂಡಿಸಿ ಮತ್ತು ಕೇಂದ್ರ ಸರ್ಕಾರದಿಂದ ಹೊಣೆಗಾರಿಕೆಯನ್ನು ಕೋರಿ ಸರಣಿ ವೀಡಿಯೊಗಳನ್ನು ಹಂಚಿಕೊಂಡ ನಂತರ ಶಮಿತಾ ಯಾದವ್ ಅವರ ವಿರುದ್ಧ “ಭಾರತ ವಿರೋಧಿ ಪ್ರಚಾರ” ಹರಡಿದ ಆರೋಪದ ಮೇಲೆ ದೂರು ದಾಖಲಿಸಲಾಗಿದೆ.
ವಿಡಂಬನಕಾರರು ಎತ್ತಿದ ಪ್ರಶ್ನೆಗಳಿಗೆ ಹಲವಾರು ನಾಗರಿಕರು ಸಹ ಧ್ವನಿ ನೀಡಿದ್ದಾರೆ ಎಂದು NWMI ಹೇಳಿದೆ. “ಈ ದುರಂತದ ಸಂತ್ರಸ್ತರು ಸಹ ಭದ್ರತಾ ಲೋಪದ ಕುರಿತು ಮಾತನಾಡಿದ್ದಾರೆ…” ಎಂದು ಅದು ಹೇಳಿಕೆಯಲ್ಲಿ ತಿಳಿಸಿದೆ.
“ರಾಜಕೀಯ ವಿಮರ್ಶಕರ ವಿರುದ್ಧ ಪ್ರತ್ಯೇಕತೆ ಅಥವಾ ಪ್ರತ್ಯೇಕತಾವಾದದ ಗಂಭೀರ ಆರೋಪಗಳನ್ನು ವಿಧಿಸುವುದು ಭಿನ್ನಾಭಿಪ್ರಾಯಗಳಿಗೆ ಸರ್ವಾಧಿಕಾರಿ ಪ್ರತಿಕ್ರಿಯೆಯ ಭಯಾನಕ ಸೂಚಕವಾಗಿದೆ ಮತ್ತು ಅಂತಿಮವಾಗಿ ಪ್ರಜಾಪ್ರಭುತ್ವದ ಅಡಿಪಾಯದ ಮೇಲೆಯೇ ದಾಳಿ ಮಾಡುತ್ತದೆ” ಎಂದು ಹೇಳಿಕೆಯಲ್ಲಿ ಉಲ್ಲೇಖಿಸಲಾಗಿದೆ.
“ರಾಷ್ಟ್ರೀಯ ಭದ್ರತೆ ಅಥವಾ ಸಾರ್ವಜನಿಕ ಸುವ್ಯವಸ್ಥೆ”ಗೆ ಸಂಬಂಧಿಸಿದ ಸರ್ಕಾರಿ ಆದೇಶದ ಕಾರಣದಿಂದಾಗಿ ಭಾರತದಲ್ಲಿ ನಿಷೇಧಿಸಲಾದ YouTube ಸುದ್ದಿ ಚಾನೆಲ್ 4PM ನ ಮಾಲೀಕ ಮತ್ತು ಪ್ರಧಾನ ಸಂಪಾದಕ ಸಂಜಯ್ ಶರ್ಮಾ ಅವರಿಗೆ NWMI ಬೆಂಬಲ ನೀಡಿದೆ. ಚಾನೆಲ್ ಅನ್ನು ನಿರ್ಬಂಧಿಸಿದ್ದರ ಹಿಂದೆ ಸರ್ಕಾರದಿಂದ ವಿವರಣೆಯನ್ನು ಮತ್ತು ನಿಷೇಧವನ್ನು ತೆಗೆದುಹಾಕಬೇಕೆಂದು ಅದು ಒತ್ತಾಯಿಸಿದೆ.
ಏತನ್ಮಧ್ಯೆ, ಡಿಜಿಐಪಬ್ ನ್ಯೂಸ್ ಇಂಡಿಯಾ ಫೌಂಡೇಶನ್ ಯೂಟ್ಯೂಬ್ ಚಾನೆಲ್ 4PM ಅನ್ನು “ಪ್ರಜಾಪ್ರಭುತ್ವ ವಿರೋಧಿಯಾಗಿ ಮತ್ತು “ಅಸಂವಿಧಾನಿಕ”ವಾಗಿ ನಿಷೇಧಿಸಿರುವುದನ್ನು ಖಂಡಿಸಿದೆ.
“ರಾಷ್ಟ್ರೀಯ ಭದ್ರತೆ ಅಥವಾ ಸಾರ್ವಜನಿಕ ಸುವ್ಯವಸ್ಥೆ”ಗೆ ಸಂಬಂಧಿಸಿದ ಸರ್ಕಾರಿ ಆದೇಶದ ಕಾರಣ ನೀಡಿ ಮಂಗಳವಾರ ಭಾರತದಲ್ಲಿ ಚಾನೆಲ್ ಅನ್ನು ನಿಷೇಧಿಸಲಾಯಿತು.
ಸರ್ಕಾರದ ನಿರ್ದೇಶನಗಳ ಪ್ರಕಾರ ಚಾನೆಲ್ ಅನ್ನು ಮುಚ್ಚಲಾಗಿದೆ ಎಂದು ಮಂಗಳವಾರ ಬೆಳಿಗ್ಗೆ ಯೂಟ್ಯೂಬ್‌ನಿಂದ ಇಮೇಲ್ ಬಂದಿದೆ ಎಂದು ಚಾನೆಲ್‌ನ ಮಾಲೀಕ ಮತ್ತು ಪ್ರಧಾನ ಸಂಪಾದಕ ಸಂಜಯ್ ಶರ್ಮಾ ಹೇಳಿದ್ದಾರೆ. ರಾಷ್ಟ್ರೀಯ ಭದ್ರತೆಯ ಬಗ್ಗೆ ತಮಗೆ ಕಾಳಜಿ ಇದೆ ಮತ್ತು ಸರ್ಕಾರಕ್ಕೆ ಪ್ರಶ್ನೆಗಳನ್ನು ಮಾತ್ರ ಕೇಳುತ್ತಿದ್ದೇನೆ ಎಂದು ಶರ್ಮಾ ಹೇಳಿದರು. ಸರ್ಕಾರದ ವಿನಂತಿಯನ್ನು ಏನು ಪ್ರಚೋದಿಸಿತು ಎಂಬುದು ತಕ್ಷಣಕ್ಕೆ ಸ್ಪಷ್ಟವಾಗಿಲ್ಲ.
ಮಂಗಳೂರು | ಮುಸ್ಲಿಂ ಮೀನು ವ್ಯಾಪಾರಿಯ ಕೊಲೆಯತ್ನ: ದುಷ್ಕರ್ಮಿಗಳಿಂದ ಕಾಪಾಡಿದ ಹಿಂದೂ ಮಹಿಳೆ
