ಕೇರಳದ ಕೊಲ್ಲಂ ಜಿಲ್ಲೆಯ ದೇವಸ್ಥಾನವೊಂದರ ಉತ್ಸವದಲ್ಲಿ ಕ್ಷುಲ್ಲಕ ಕಾರಣಕ್ಕೆ 18 ವರ್ಷದ ಯುವಕನ ಮೇಲೆ ಗುಂಪು ಹಲ್ಲೆ ನಡೆಸಲಾಗಿದ್ದು, ಗಂಭೀರವಾಗಿ ಗಾಯಗೊಂಡಿದ್ದ ಯುವಕ ಸಾವಿಗೀಡಾಗಿದ್ದಾರೆ.
ಈ ಘಟನೆ ಇಡೀ ರಾಜ್ಯವನ್ನು ಬೆಚ್ಚಿ ಬೀಳಿಸಿದೆ. ಮೃತನ ತಾಯಿಯ ಆಕ್ರಂದನ ಮಾನವೀಯ ಮನಸ್ಸುಗಳನ್ನು ಭಾರವಾಗಿಸಿದೆ.
ಹರಿಕೃಷ್ಣನ್ ಹಲ್ಲೆಗೊಳಗಾಗಿ ಸಾವನ್ನಪ್ಪಿದ ಯುವಕ. ಮಾರ್ಚ್ 1ರಂದು ರಾತ್ರಿ ಕೊಲ್ಲಂನ ಶಕ್ತಿಕುಳಂಗರದ ಮರುತಡಿ ದೇವಿ ದೇವಸ್ಥಾನದ ಮೆರವಣಿಗೆಯ ಸಮಯದಲ್ಲಿ ಈತನ ಮೇಲೆ ಗುಂಪು ದಾಳಿ ನಡೆಸಲಾಗಿತ್ತು.
ಮೆರವಣಿಗೆಯ ವೇಳೆ ಹರಿಕೃಷ್ಣನ್ ಮತ್ತು ಅವರ 23 ವರ್ಷದ ಸಹೋದರ ಜಯಕೃಷ್ಣನ್ ನಿಂತಿದ್ದ ಜಾಗದ ವಿಚಾರವಾಗಿ ಮದ್ಯಪಾನ ಮಾಡಿದ್ದ ಗುಂಪೊಂದು ಗಲಾಟೆ ಆರಂಭಿಸಿತ್ತು. ಮೊದಲು ಮೌಖಿಕವಾಗಿ ನಿಂದಿಸಿದ ಆರೋಪಿಗಳು, ನಂತರ ಹರಿಕೃಷ್ಣನ್ ಅವರನ್ನು ದೇವಸ್ಥಾನದ ಡೈನಿಂಗ್ ಹಾಲ್ ಅಥವಾ ಆಡಿಟೋರಿಯಂ ಬಳಿ ಕರೆದೊಯ್ದು ಮರದ ತುಂಡುಗಳಿಂದ ತಲೆ ಮತ್ತು ಕುತ್ತಿಗೆಗೆ ಬಲವಾಗಿ ಹೊಡೆದಿದ್ದಾರೆ ಎನ್ನಲಾಗಿದೆ.
ತೀವ್ರವಾಗಿ ಗಾಯಗೊಂಡಿದ್ದ ಹರಿಕೃಷ್ಣನ್ ಅವರನ್ನು ಮೊದಲು ಕೊಲ್ಲಂನ ಖಾಸಗಿ ಆಸ್ಪತ್ರೆಗೆ, ನಂತರ ತಿರುವನಂತಪುರಂ ವೈದ್ಯಕೀಯ ಕಾಲೇಜಿಗೆ ದಾಖಲಿಸಲಾಗಿತ್ತು. ಮಾರ್ಚ್ 5ರಂದು ಅವರ ಬ್ರೈನ್‌ ಡೆಡ್ ಆಗಿದ್ದು, ಮಾರ್ಚ್ 6ರಂದು ಹರಿಕೃಷ್ಣನ್ ಕೊನೆಯುಸಿರೆಳೆದಿದ್ದಾರೆ ಎಂದು ವರದಿಯಾಗಿದೆ.
ಹರಿಕೃಷ್ಣನ್ ಕುನ್ನತ್ತೂರು ಮೂಲದವರಾಗಿದ್ದು, ಅಡೂರು ಸರ್ಕಾರಿ ಪಾಲಿಟೆಕ್ನಿಕ್ ಕಾಲೇಜಿನ ಡಿಪ್ಲೋಮಾ ವಿದ್ಯಾರ್ಥಿಯಾಗಿದ್ದರು. ಅವರು ಇತ್ತೀಚೆಗಷ್ಟೇ ರಾಜ್ಯ ಮಟ್ಟದ ಪರೀಕ್ಷೆಯಲ್ಲಿ 12ನೇ ರ‍್ಯಾಂಕ್ ಪಡೆದಿದ್ದರು ಮತ್ತು ಸೇನೆಗೆ ಸೇರುವ ಕನಸು ಕಂಡಿದ್ದರು. ಬಡ ಕುಟುಂಬದವರಾದ ಹರಿಕೃಷ್ಣನ್, ಓದಿನ ಜೊತೆಗೆ ಕೂಲಿ ಕೆಲಸ ಮಾಡಿ ಅನಾರೋಗ್ಯ ಪೀಡಿತ ತಂದೆ-ತಾಯಿಯನ್ನು ನೋಡಿಕೊಳ್ಳುತ್ತಿದ್ದರು ಎಂದು ವರದಿಗಳು ಹೇಳಿವೆ.
ಶಕ್ತಿಕುಳಂಗರ ಪೊಲೀಸರು ಪ್ರಕರಣಕ್ಕೆ ಸಂಬಂಧಿಸಿದಂತೆ ಈಗಾಗಲೇ ಆರು ಜನರನ್ನು ಬಂಧಿಸಿದ್ದಾರೆ. ವಿಮಲ್ (48), ಸನಲ್ ಕುಮಾರ್ (52), ರತೀಶ್ ಕುಮಾರ್ (51), ಶಾಮಿಲ್ ರಾಜ್ (50), ಸುನಿಲ್ ಕುಮಾರ್ (58) ಮತ್ತು ಶಿಬಿನ್ (24) ಬಂಧಿತರು. ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (ಬಿಎನ್ಎಸ್) ಅಡಿಯಲ್ಲಿ ಕೊಲೆ ಯತ್ನ, ಅಶ್ಲೀಲ ನಿಂದನೆ ಮತ್ತು ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿದ ಪ್ರಕರಣಗಳನ್ನು ದಾಖಲಿಸಲಾಗಿದೆ ಎಂದು ತಿಳಿದು ಬಂದಿದೆ.
ಹರಿಕೃಷ್ಣನ್ ತಾಯಿಯ ಆಕ್ರಂದನ
ಹರಿಕೃಷ್ಣನ್ ಕುಟುಂಬವು ಈ ಘಟನೆಯಿಂದ ಸಂಪೂರ್ಣವಾಗಿ ಕುಸಿದುಹೋಗಿದೆ. ಅವರ ತಾಯಿ ರಜನಿ, “ನನ್ನ ಮಗುವೇ, ಎದ್ದೇಳು ನನ್ನ ಚಿನ್ನವೇ” ಎಂದು ಹೇಳುತ್ತಾ ಮಗನ ಮೃತದೇಹದ ಮೇಲೆ ಬಿದ್ದು ಕಣ್ಣೀರು ಹಾಕುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಎಂಥವರ ಕಣ್ಣಲ್ಲೂ ನೀರು ತರಿಸುವಂತಿದೆ.
ತಂದೆ ಜಯಸೇನನ್ ಅವರು ಪಾರ್ಕಿನ್ಸನ್ ಕಾಯಿಲೆಯಿಂದ ಬಳಲುತ್ತಿದ್ದು, ಮಗನ ಅಗಲಿಕೆಯಿಂದ ದಿಗ್ಭ್ರಮೆಗೊಂಡಿದ್ದಾರೆ ಎಂದು ವರದಿಗಳು ಹೇಳಿವೆ.
ಹಲ್ಲೆಯ ಸಮಯದಲ್ಲಿ ಜೊತೆಗಿದ್ದ ಸಹೋದರ ಜಯಕೃಷ್ಣನ್, ತಾನು ಮತ್ತು ಹರಿಕೃಷ್ಣನ್ ಯಾವುದೇ ತಪ್ಪು ಮಾಡದಿದ್ದರೂ ಮದ್ಯಪಾನ ಮಾಡಿದ ಗುಂಪು ತಮ್ಮನ್ನು ಗುರಿಯಾಗಿಸಿಕೊಂಡು ಹಲ್ಲೆ ನಡೆಸಿತು ಎಂದು ತಿಳಿಸಿದ್ದಾರೆ.
ಹರಿಕೃಷ್ಣನ್ ಕೂಲಿ ಕೆಲಸ ಮಾಡುತ್ತಾ ತನ್ನ ಓದಿನ ಖರ್ಚನ್ನು ತಾನೇ ಭರಿಸುತ್ತಿದ್ದರು ಮತ್ತು ಬಡ ಕುಟುಂಬಕ್ಕೆ ಆಸರೆಯಾಗಿದ್ದರು ಎಂದು ಸಂಬಂಧಿಕರು ಹೇಳಿದ್ದಾರೆ.
ಪೊಲೀಸರು ಹೇಳಿದ್ದೇನು?
ಉತ್ಸವ ಮೆರವಣಿಗೆ ಸಾಗುವಾಗ ನಿಂತಿದ್ದ ಜಾಗಕ್ಕೆ ಸಂಬಂಧಿಸಿದಂತೆ ಕ್ಷುಲ್ಲಕ ಕಾರಣಕ್ಕಾಗಿ ಗಲಾಟೆ ಶುರುವಾಗಿತ್ತು. ಆರೋಪಿಗಳು ಮದ್ಯದ ಅಮಲಿನಲ್ಲಿದ್ದರು ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ನಗರ ಪೊಲೀಸ್ ಕಮಿಷನರ್ ಅವರ ನಿರ್ದೇಶನದಂತೆ ಈ ಪ್ರಕರಣದ ತನಿಖೆಗಾಗಿ 10 ಸದಸ್ಯರ ವಿಶೇಷ ತಂಡವನ್ನು ರಚಿಸಲಾಗಿದೆ. ಈವರೆಗೆ 6 ಆರೋಪಿಗಳನ್ನು ಬಂಧಿಸಲಾಗಿದೆ. ಇವರ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (ಬಿಎನ್ಎಸ್) ಅಡಿಯಲ್ಲಿ ಕೊಲೆ ಯತ್ನ ಸೇರಿದಂತೆ ವಿವಿಧ ಸೆಕ್ಷನ್‌ಗಳಡಿ ಪ್ರಕರಣ ದಾಖಲಿಸಲಾಗಿದೆ. ಪ್ರತ್ಯಕ್ಷದರ್ಶಿಗಳ ಹೇಳಿಕೆ ಮತ್ತು ಲಭ್ಯವಿರುವ ವಿಡಿಯೋ ತುಣುಕುಗಳ ಆಧಾರದ ಮೇಲೆ ತನಿಖೆ ಮುಂದುವರಿಯುತ್ತಿದೆ ಎಂದು ಹೇಳಿದ್ದಾರೆ.
