ದಕ್ಷಿಣ ಕೊಲಂಬಿಯಾದ ಪುತುಮಾಯೊ ಪ್ರಾಂತ್ಯದ ಪ್ಯೂರ್ಟೊ ಲೆಗುಯಿಜಾಮೊ ಎಂಬಲ್ಲಿ ಸೋಮವಾರ (ಮಾರ್ಚ್ 23) ಬೆಳಿಗ್ಗೆ ವಾಯುಪಡೆಯ ವಿಮಾನವೊಂದು ಪತನಗೊಂಡಿದ್ದು, ದುರಂತದಲ್ಲಿ ಈವರೆಗೆ ಕನಿಷ್ಠ 66 ಜನರು ಸಾವನ್ನಪ್ಪಿದ್ದು, ಹಲವರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
ಪ್ಯೂರ್ಟೊ ಲೆಗುಯಿಜಾಮೊದ ಕೌಕಾಯಾ ವಿಮಾನ ನಿಲ್ದಾಣದಿಂದ ಪ್ಯೂರ್ಟೊ ಅಸಿಸ್‌ಗೆ ಹೊರಟಿದ್ದ ವಿಮಾನ, ರನ್‌ವೇಯ ಕೊನೆಯ ಭಾಗದ ಬಳಿ ನೆಲಕ್ಕಪ್ಪಳಿಸಿದೆ. ಅವಘಡ ನಡೆದ ಸ್ಥಳ ಪೆರು ಮತ್ತು ಈಕ್ವೆಡಾರ್ ಗಡಿಯ ಸಮೀಪವಿರುವ ಅಮೆಝಾನ್ ಅರಣ್ಯ ಪ್ರದೇಶದಲ್ಲಿದೆ.
ವರದಿಗಳ ಪ್ರಕಾರ, ಕೊಲಂಬಿಯಾದ ಸ್ಥಳೀಯ ಕಾಲಮಾನ ಸೋಮವಾರ (ಮಾ.23) ಬೆಳಿಗ್ಗೆ ಸುಮಾರು 9:50ಕ್ಕೆ ವಿಮಾನ ಪತನಗೊಂಡಿದೆ. ಭಾರತ ಮತ್ತು ಕೊಲಂಬಿಯಾ ನಡುವೆ ಸುಮಾರು 10 ಗಂಟೆ 30 ನಿಮಿಷಗಳ ಸಮಯದ ವ್ಯತ್ಯಾಸವಿದೆ. ಭಾರತವು ಕೊಲಂಬಿಯಾಕ್ಕಿಂತ ಮುಂದಿದೆ. ಹಾಗಾಗಿ, ಕೊಲಂಬಿಯಾದಲ್ಲಿ ಸೋಮವಾರ ಬೆಳಿಗ್ಗೆ 9:50 ಆಗಿದ್ದಾಗ, ಭಾರತದಲ್ಲಿ ರಾತ್ರಿ 8:20 ಆಗಿರುತ್ತದೆ.
ಅಪಘಾತಕ್ಕೀಡಾದ ವಿಮಾನವು ವಾಯುಪಡೆಗೆ ಸೇರಿದ C-130 ಹರ್ಕ್ಯುಲಸ್ ಮಾದರಿಯದ್ದಾಗಿದ್ದು, ಅದರಲ್ಲಿ 125ಕ್ಕೂ ಹೆಚ್ಚು ಮಂದಿ ಪ್ರಯಾಣಿಸುತ್ತಿದ್ದರು ಎಂದು ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ.
ವಿಮಾನದಲ್ಲಿ 114 ಸೇನಾ ಸಿಬ್ಬಂದಿ ಹಾಗೂ 11 ಇತರ ಸಿಬ್ಬಂದಿ ಇದ್ದರು ಎಂದು ವಾಯುಪಡೆಯ ಕಮಾಂಡರ್ ಕಾರ್ಲೋಸ್ ಫೆರ್ನಾಂಡೊ ಸಿಲ್ವಾ ರುಯೇಡಾ ತಿಳಿಸಿದ್ದಾಗಿ ಬಿಬಿಸಿ ವರದಿ ಹೇಳಿದೆ.
ರಕ್ಷಣಾ ತಂಡಗಳು ದುರಂತ ಸ್ಥಳದಲ್ಲಿ ಮೃತದೇಹಗಳಿಗಾಗಿ ಹುಡುಕುತ್ತಿವೆ. ಗಾಯಗೊಂಡವರ ರಕ್ಷಣಾ ಕಾರ್ಯ ಭರದಿಂದ ಸಾಗಿದೆ. ಘಟನೆಯ ಕುರಿತು ತನಿಖೆಗೆ ಆದೇಶಿಸಲಾಗಿದೆ ಎಂದು ಬಿಬಿಸಿ ಮಂಗಳವಾರ (ಭಾರತೀಯ ಕಾಲಮಾನ ಮಾ.24) ಬೆಳಿಗ್ಗೆ ವರದಿ ಮಾಡಿದೆ.
ವಾಯುಪಡೆಯ ವಿಮಾನವಾದ್ದರಿಂದ ಅದರಲ್ಲಿ ಮದ್ದುಗುಂಡುಗಳು ಇತ್ತು. ವಿಮಾನಪತನಗೊಂಡ ವೇಳೆ ಆ ಮದ್ದುಗುಂಡುಗಳು ಸ್ಪೋಟಗೊಂಡು ಹೆಚ್ಚಿನ ಬೆಂಕಿ ಆವರಿಸಿದೆ ಎಂದು ಕೊಲಂಬಿಯಾದ ರಕ್ಷಣಾ ಸಚಿವ ಪೆಡ್ರೊ ಸ್ಯಾಂಚೆಜ್ ತಿಳಿಸಿದ್ದಾರೆ.
ಈ ಘಟನೆಯು ಕೊಲಂಬಿಯಾದ ವಾಯುಪಡೆಯ ಇತಿಹಾಸದಲ್ಲಿ ನಡೆದ ಅತ್ಯಂತ ಭೀಕರ ದುರಂತ ಎಂದು ಹೇಳಲಾಗ್ತಿದೆ. ಸ್ಥಳೀಯ ಮಾಧ್ಯಮಗಳು ಹಂಚಿಕೊಂಡ ಫೋಟೋಗಳಲ್ಲಿ, ಘಟನಾ ಸ್ಥಳದಲ್ಲಿ ದಟ್ಟವಾದ ಹೊಗೆ ಮತ್ತು ಸೈನಿಕರನ್ನು ಹೊತ್ತ ಟ್ರಕ್‌ಗಳು ಆ ಪ್ರದೇಶಕ್ಕೆ ಹೋಗುತ್ತಿರುವುದನ್ನು ತೋರಿಸಿವೆ ಎಂದು ಬಿಬಿಸಿ ವರದಿ ಉಲ್ಲೇಖಿಸಿದೆ.
ಕೊಲಂಬಿಯಾದ ಅಧ್ಯಕ್ಷ ಗುಸ್ಟಾವೊ ಪೆಟ್ರೋ “ಈ ಭಯಾನಕ ಅಪಘಾತ ಸಂಭವಿಸಬಾರದಿತ್ತು” ಎಂದು ಸಾಮಾಜಿಕ ಜಾಲತಾನ ಎಕ್ಸ್‌ನಲ್ಲಿ ಬರೆದುಕೊಂಡಿದ್ದಾರೆ.
ಸಶಸ್ತ್ರ ಪಡೆಗಳ ಶಸ್ತ್ರಾಸ್ತ್ರ ಮತ್ತು ವಿಮಾನಗಳನ್ನು ಹೊಸದಾಗಿ ಮೇಲ್ದರ್ಜೆಗೆ ಏರಿಸುವ ಯೋಜನೆಗೆ ಸರ್ಕಾರಿ ಕೆಲಸಗಳ ವಿಳಂಬವೇ ಕಾರಣ ಎಂದು ಅವರು ತಮ್ಮ ಸುದೀರ್ಘ ಬರಹದಲ್ಲಿ ದೂರಿದ್ದಾರೆ.
“ನಾನು ಇನ್ನು ಮುಂದೆ ಯಾವುದೇ ವಿಳಂಬವನ್ನು ಸಹಿಸುವುದಿಲ್ಲ, ನಮ್ಮ ಯುವಜನರ ಜೀವ ಪಣಕ್ಕಿಡಲಾಗಿದೆ” ಎಂದು ಬರೆದುಕೊಂಡಿರುವ ಅವರು, ಅಪಘಾತಕ್ಕೆ ನಿಖರ ಕಾರಣವೇನಿರಬಹುದು ಎಂಬ ಬಗ್ಗೆ ಯಾವುದೇ ಸ್ಪಷ್ಟನೆ ನೀಡಿಲ್ಲ.
ಕಳೆದ ತಿಂಗಳು, ಬ್ಯಾಂಕ್‌ನೋಟುಗಳನ್ನು (ನಗದು) ಸಾಗಿಸುತ್ತಿದ್ದ ಬೊಲಿವಿಯನ್ ವಾಯುಪಡೆಯ C-130 ಹರ್ಕ್ಯುಲಸ್ ವಿಮಾನವು ದೇಶದ ಪಶ್ಚಿಮ ಭಾಗದಲ್ಲಿ ಪತನಗೊಂಡು, ಕನಿಷ್ಠ 20 ಜನರು ಸಾವನ್ನಪ್ಪಿದ್ದರು.
