ಶಾಲಾ ವಾರ್ಷಿಕೋತ್ಸವದಲ್ಲಿ ಬಹಳ ಉತ್ಸಾಹದಿಂದ ಭಾಗವಹಿಸಿದ್ದ ಆರು ಮಂದಿ ಮಕ್ಕಳು, ತಡ ರಾತ್ರಿ ಹೊತ್ತಿಗೆ ಶವವಾದ ಹೃದಯ ವಿದ್ರಾವಕ ಘಟನೆಯೊಂದು ಮಹಾರಾಷ್ಟ್ರದ ದಿಂಡೋರಿಯಲ್ಲಿ ಶುಕ್ರವಾರ (ಏ.3) ನಡೆದಿದೆ.
ನಾಸಿಕ್ ನಗರದಿಂದ 20 ಕಿಲೋ ಮೀಟರ್ ದೂರದಲ್ಲಿರುವ ದಿಂಡೋರಿ ಪಟ್ಟಣದ ಶಿವಾಜಿನಗರ ಪ್ರದೇಶದಲ್ಲಿ ಮಕ್ಕಳು ಮತ್ತು ಅವರ ಪೋಷಕರು ಸಂಚರಿಸುತ್ತಿದ್ದ ವಾಹನ ತಡರಾತ್ರಿ ಬಾವಿಗೆ ಬಿದ್ದು ದುರ್ಘಟನೆ ಸಂಭವಿಸಿದೆ. ದುರಂತದಲ್ಲಿ ಮಕ್ಕಳು ಪೋಷಕರು ಸೇರಿ ಒಟ್ಟು 9 ಮಂದಿ ಸಾವಿಗೀಡಾಗಿದ್ದಾರೆ.
ಮೂರು ಆಂಬ್ಯುಲೆನ್ಸ್‌ಗಳಲ್ಲಿ ಮೃತರ ಶವಗಳನ್ನು ಅವರ ಸ್ವಗ್ರಾಮ ದಿಂಡೋರಿ ತಾಲೂಕಿನ ಇಂದೋರ್‌ಗೆ ಕೊಂಡೊಯ್ದು ಅಂತ್ಯ ಸಂಸ್ಕಾರ ನೆರವೇರಿಸಲಾಗಿದೆ. ಮೃತರೆಲ್ಲರೂ, ಗ್ರಾಮದ ದುರ್ಗಾಡೆ ಎಂಬ ಕೃಷಿಕ ಕುಟುಂಬದವರು ಎಂದು ತಿಳಿದು ಬಂದಿದೆ.
ಒಟ್ಟು ನಾಲ್ಕು ಕುಟುಂಬಗಳ ಜನರು ಸಾವಿಗೀಡಾಗಿದ್ದಾರೆ. ಈ ಪೈಕಿ ಎರಡು ಕುಟುಂಬಗಳ ಯಜಮಾನರು ಅಣ್ಣ-ತಮ್ಮಂದಿರು. ಇನ್ನುಳಿದ ಎರಡು ಕುಟುಂಬಗಳ ಯಜಮಾನರು ಕೂಡ ಅಣ್ಣ-ತಮ್ಮಂದಿರು. ಅಲ್ಲದೆ, ಈ ಎರಡೂ ಗುಂಪುಗಳ ನಡುವೆಯೂ ಪರಸ್ಪರ ಸಂಬಂಧವಿತ್ತು.
ಪೋಷಕರು ಶಾಲಾ ವಾರ್ಷಿಕೋತ್ಸವದಲ್ಲಿ ಮಕ್ಕಳ ಕಾರ್ಯಕ್ರಮ ನೋಡಲು ಹೋಗಿದ್ದರು. ಕಾರ್ಯಕ್ರಮ ಮುಗಿಸಿ ಮನೆಗೆ ಮರಳುವಾಗ, ಅವರು ಸಂಚರಿಸುತ್ತಿದ್ದ ವಾಹನ ಬಾವಿಗೆ ಬಿದ್ದಿದೆ. ಅವಘಡದಲ್ಲಿ ಬದುಕುಳಿದ ಮಕ್ಕಳು ಆಘಾತಕ್ಕೊಳಗಾಗಿವೆ ಎಂದು ಇಂಡಿಯನ್‌ ಎಕ್ಸ್‌ಪ್ರೆಸ್ ವರದಿ ಹೇಳಿದೆ.
ಹಸಿರು ಗದ್ದೆಗಳಿಂದ ಆವೃತವಾಗಿರುವ ಇಂದೋರ್ ಗ್ರಾಮದ ದುರ್ಗಾಡೆ ಕುಟುಂಬದ ಹೆಚ್ಚಿನ ಸದಸ್ಯರು ಕೃಷಿಕರು. ತಮ್ಮ ಮಕ್ಕಳೆಲ್ಲರಿಗೂ ಇಂಗ್ಲಿಷ್ ಶಿಕ್ಷಣ ಸಿಗುವಂತೆ ಅವರು ನೋಡಿಕೊಂಡಿದ್ದರು. ಮಕ್ಕಳು ಓದಿನಲ್ಲಿ ಉತ್ತಮವಾಗಿ ಪ್ರಗತಿ ಸಾಧಿಸುತ್ತಿದ್ದ ಬಗ್ಗೆ ಅವರಿಗೆ ಹೆಮ್ಮೆಯಿತ್ತು ಎಂದು ವರದಿ ಬಣ್ಣಿಸಿದೆ.
ಮೃತ ದುರ್ದೈವಿಗಳು
1. ದುರ್ಗಾಡೆ ಕುಟುಂಬದ ಪ್ರತಿಭಾವಂತ ಬಾಲಕಿ ರಾಖಿ (ಗುಣವತಿ) ಮೃತರಲ್ಲಿ ಒಬ್ಬಳು. ಈಕೆ, ಸುನಿಲ್ ಮತ್ತು ರೇಷ್ಮಾ ದುರ್ಗಾಡೆ ದಂಪತಿಯ ಮಗಳು. ‘ಜನತಾ ಇಂಗ್ಲಿಷ್ ಸ್ಕೂಲ್’ನಲ್ಲಿ 4ನೇ ತರಗತಿಯಲ್ಲಿ ಓದುತ್ತಿದ್ದ ಬಾಲಕಿ, ತನ್ನ ತರಗತಿಗೆ ಟಾಪರ್ (ಪ್ರಥಮ ಸ್ಥಾನ) ಆಗಿದ್ದಳು. ಶಾಲೆಯ ವಾರ್ಷಿಕೋತ್ಸವದಂದು ಈ ಶೈಕ್ಷಣಿಕ ಸಾಧನೆಗಾಗಿ ಆಕೆಯನ್ನು ಗೌರವಿಸಲಾಗಿತ್ತು (ಸನ್ಮಾನಿಸಲಾಗಿತ್ತು). ದುರದೃಷ್ಟವಶಾತ್, ತನ್ನ ಸಾಧನೆಯ ಖುಷಿಯಲ್ಲಿದ್ದ ಈ ಬಾಲಕಿ ಅದೇ ದಿನ ರಾತ್ರಿ ನಡೆದ ಅಪಘಾತದಲ್ಲಿ ಮೃತಪಟ್ಟಳು.
2. ಮತ್ತೊಬ್ಬ ಪ್ರತಿಭಾವಂತ ಬಾಲಕಿ ಶ್ರದ್ಧಾ ಮೃತರಲ್ಲಿ ಒಬ್ಬಳು. ಈಕೆ ಅನಿಲ್ ಮತ್ತು ಆಶಾ ದುರ್ಗಾಡೆ ದಂಪತಿ ಮಗಳು. ಈಕೆ ಕೂಡ ಜನತಾ ಇಂಗ್ಲಿಷ್ ಸ್ಕೂಲ್’ನಲ್ಲಿ 7ನೇ ತರಗತಿಯಲ್ಲಿ ಓದುತ್ತಿದ್ದಳು. ಶ್ರದ್ಧಾ ನೃತ್ಯದಲ್ಲಿ ಬಹಳ ಆಸಕ್ತಿ ಹೊಂದಿದ್ದಳು.ಶಾಲೆಯ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಈಕೆ ಕೂಡ ನೃತ್ಯ ಪ್ರದರ್ಶನ ನೀಡಿದ್ದಳು.
3. ಅನಿಲ್ ದುರ್ಗಾಡೆ ಅವರ ಮತ್ತೊಬ್ಬಳು ಮಗಳು ಶ್ರಾವಣಿ ಕೂಡ ಅಪಘಾತದಲ್ಲಿ ಕೊನೆಯುಸಿರೆಳೆದಿದ್ದಾಳೆ. ‘ಜನತಾ ಇಂಗ್ಲಿಷ್ ಸ್ಕೂಲ್’ನಲ್ಲಿ 5ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದ ಈಕೆ, ಶಾಲೆಯ ವಾರ್ಷಿಕೋತ್ಸವದ ಸಮಾರಂಭದಲ್ಲಿ ನಡೆದ ನೃತ್ಯ ಪ್ರದರ್ಶನದಲ್ಲಿ ಭಾಗವಹಿಸಿದ್ದಳು.
4. ಸುನಿಲ್ ಮತ್ತು ರೇಷ್ಮಾ ದಂಪತಿ ಮೃತ ದುರ್ದೈವಿಗಳಲ್ಲಿ ಸೇರಿದ್ದಾರೆ. ಸುನಿಲ್ ರೈತರಾಗಿದ್ದರು. ಮಕ್ಕಳನ್ನು ಶಾಲಾ ಕಾರ್ಯಕ್ರಮಕ್ಕೆ ಕರೆದೊಯ್ಯಲು ತಾವೇ ಸ್ವತಃ ವಾಹನ ಚಲಾಯಿಸುವ ಜವಾಬ್ದಾರಿ ವಹಿಸಿಕೊಂಡಿದ್ದರು. ಭೀಕರ ಅಪಘಾತದಲ್ಲಿ ಈ ದಂಪತಿ ಮತ್ತು ಅವರ ಮಕ್ಕಳೂ ಸೇರಿದಂತೆ ಇಡೀ ಕುಟುಂಬವೇ ದುರಂತ ಸಾವು ಕಂಡಿದೆ.
5. ಅನಿಲ್ ದುರ್ಗಾಡೆ ಅವರ ಪತ್ನಿಯಾದ ಆಶಾ, ಮಕ್ಕಳನ್ನು ಶಾಲಾ ಸಮಾರಂಭಕ್ಕೆ ಕರೆದೊಯ್ಯಲು ತನ್ನ ಮೈದುನನ (ಸುನಿಲ್) ಜೊತೆಗೂಡಿದ್ದರು. ಈ ದುರಂತದಲ್ಲಿ ಇವರೂ ಕೂಡ ಪ್ರಾಣ ಕಳೆದುಕೊಂಡಿದ್ದಾರೆ.
6. ಜನತಾ ಇಂಗ್ಲಿಷ್ ಸ್ಕೂಲ್‌ನಲ್ಲಿ 8ನೇ ತರಗತಿಯಲ್ಲಿ ಓದುತ್ತಿದ್ದ ಸೃಷ್ಟಿ, ಶಾಲೆಯ ವಾರ್ಷಿಕೋತ್ಸವದ ಸಮಾರಂಭದಲ್ಲಿ ನೃತ್ಯ ಪ್ರದರ್ಶನ ನೀಡಿದ್ದಳು. ಈಕೆ ಕೂಡ ಈ ಭೀಕರ ಅಪಘಾತದಲ್ಲಿ ಮೃತಪಟ್ಟ ದುರ್ದೈವಿಗಳಲ್ಲಿ ಒಬ್ಬಳು.
7. ಈ ಗುಂಪಿನಲ್ಲೇ ಅತ್ಯಂತ ಕಿರಿಯವಳಾಗಿದ್ದ ಸಮೃದ್ಧಿ, ನಾಸಿಕ್ ನಗರದ ಶಾಲೆಯೊಂದರಲ್ಲಿ 1ನೇ ತರಗತಿಯಲ್ಲಿ ಓದುತ್ತಿದ್ದಳು. ದುರದೃಷ್ಟವಶಾತ್, ತನ್ನ ಅಕ್ಕ-ತಂಗಿಯರ ಸಾಧನೆಯನ್ನು ಸಂಭ್ರಮಿಸಲು ತೆರಳಿದ್ದ ಈ ಪುಟ್ಟ ಬಾಲಕಿ ಕೂಡ ಈ ಭೀಕರ ಅಪಘಾತದಲ್ಲಿ ಬಲಿಯಾದಳು.
8. ಜನತಾ ಇಂಗ್ಲಿಷ್ ಸ್ಕೂಲ್‌ನಲ್ಲಿ 5ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದ ಶ್ರೇಯಸ್, ಕ್ರಿಕೆಟ್‌ನಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿದ್ದ ಬಾಲಕನಾಗಿದ್ದ. ಈ ಅಪಘಾತದಲ್ಲಿ ಮೃತಪಟ್ಟ 9 ಮಂದಿಯ ಪಟ್ಟಿಯಲ್ಲಿ ಈ ಪುಟ್ಟ ಕ್ರಿಕೆಟ್ ಪ್ರತಿಭೆ ಕೂಡ ಒಬ್ಬನಾಗಿದ್ದಾನೆ.
ದುರಂತಕ್ಕೆ ಕಾರಣವೇನು?
ನಾಸಿಕ್ ಜಿಲ್ಲೆಯ ದಿಂಡೋರಿ ಪಟ್ಟಣದ ಶಿವಾಜಿನಗರದ ಕಾಂಕ್ರೀಟ್ ರಸ್ತೆಯ ಕೊನೆಯಲ್ಲಿದ್ದ, ಸುಮಾರು 40 ಅಡಿ ಆಳದ ತೆರೆದ ಬಾವಿಯು ಶುಕ್ರವಾರ ರಾತ್ರಿ ಒಂಬತ್ತು ಜನರ ಪ್ರಾಣ ಬಲಿಪಡೆದಿದೆ. ಈ ಬಾವಿಯ ಗೋಡೆ ಕೇವಲ ಕೆಲವೇ ಅಡಿಗಳಷ್ಟು ಎತ್ತರವಿದ್ದು, ಯಾವುದೇ ಸುರಕ್ಷಿತ ಮುಚ್ಚಳವನ್ನು ಹೊಂದಿರಲಿಲ್ಲ. ಇದಲ್ಲದೆ, ಈ ಘಟನೆಗೆ ಇತರ ಹಲವಾರು ಕಾರಣಗಳನ್ನು ಗುರುತಿಸಲಾಗಿದೆ.
ಕೃಷಿ ಭೂಮಿಯನ್ನು ಕೃಷಿಯೇತರ ಭೂಮಿಯಾಗಿ ಪರಿವರ್ತಿಸಿರುವುದು. ಸ್ಥಳೀಯ ಭೂಮಾಲೀಕ ಮತ್ತು ನಗರ ಪಂಚಾಯತ್ ನಡುವೆ ನಡೆಯುತ್ತಿದ್ದ ಕಾನೂನು ಹೋರಾಟ. ಹೊಸದಾಗಿ ನಿರ್ಮಿಸಲಾದ ಕಾಂಕ್ರೀಟ್ ರಸ್ತೆಯು ಯಾವುದೇ ಮುನ್ನೆಚ್ಚರಿಕೆ ಇಲ್ಲದೆ ಬಾವಿಯ ಬಳಿಯೇ ಕೊನೆಗೊಂಡಿರುವುದು. ಅಧಿಕಾರಿಗಳ ಮತ್ತು ಸಂಬಂಧಪಟ್ಟವರ ಗಂಭೀರ ನಿರ್ಲಕ್ಷ್ಯ ಈ ದುರಂತಕ್ಕೆ ಕಾರಣವೆಂದು ಹೇಳಲಾಗುತ್ತಿದೆ.
