ದಲಿತ ವ್ಯಕ್ತಿಯೊಬ್ಬರ ಜಾತಿ ತಿಳಿದ ನಂತರ ಅವರ ಮೇಲೆ ಕ್ರೂರವಾಗಿ ಹಲ್ಲೆ ನಡೆಸಿದ ಆರೋಪ ಎದುರಿಸುತ್ತಿರುವ ಬಿಹಾರದ ಮಾಜಿ ಪೊಲೀಸ್ ಅಧಿಕಾರಿಯ ವಿರುದ್ಧ ತಕ್ಷಣವೇ ಎಫ್ಐಆರ್ (FIR) ದಾಖಲಿಸುವಂತೆ ಪಾಟ್ನಾ ಹೈಕೋರ್ಟ್ ನಿರ್ದೇಶಿಸಿದೆ. ಪೊಲೀಸರ ಈ ರೀತಿಯ ದೌರ್ಜನ್ಯಗಳನ್ನು ನಿಯಂತ್ರಿಸದಿದ್ದರೆ ದೇಶವು “ನಾಜಿ ಜರ್ಮನಿಯಂತಹ” ಪರಿಸ್ಥಿತಿಗೆ ತಲುಪಬಹುದು ಎಂದು ನ್ಯಾಯಾಲಯ ಅತ್ಯಂತ ಗಂಭೀರ ಕಳವಳ ವ್ಯಕ್ತಪಡಿಸಿದೆ.
ಮಾಜಿ ಮುರಾರ್ ಸ್ಟೇಷನ್ ಹೌಸ್ ಆಫೀಸರ್ (SHO) ಕಮಲ್ ನಯನ್ ಪಾಂಡೆ ವಿರುದ್ಧ ಎಫ್ಐಆರ್ ದಾಖಲಿಸಲು ನ್ಯಾಯಮೂರ್ತಿ ಜಿತೇಂದ್ರ ಕುಮಾರ್ ಅವರು ಆದೇಶಿಸಿದ್ದಾರೆ. ಅಲ್ಲದೆ, ಪ್ರಕರಣದ ನೋಂದಣಿಗೆ ಸಂಬಂಧಿಸಿದಂತೆ ಅನುಸರಣಾ ವರದಿಯನ್ನು ಪಡೆದುಕೊಳ್ಳುವಂತೆ ಬಿಹಾರದ ಪೊಲೀಸ್ ಮಹಾನಿರ್ದೇಶಕರಿಗೆ (ಡಿಜಿಪಿ) ನಿರ್ದೇಶನ ನೀಡಿದ್ದು, ಪ್ರಕರಣದ ತನಿಖೆಯನ್ನು ಅಪರಾಧ ತನಿಖಾ ಇಲಾಖೆಗೆ (CID) ವರ್ಗಾಯಿಸಿದೆ.
“ಇಂತಹ ನಡವಳಿಕೆಯನ್ನು ನಿಯಂತ್ರಿಸದಿದ್ದರೆ ಮತ್ತು ಪರಿಶೀಲಿಸದಿದ್ದರೆ, ದೇಶದ ನಾಗರಿಕರ ಜೀವನ ಮತ್ತು ಸ್ವಾತಂತ್ರ್ಯದ ಸಂಪೂರ್ಣ ಕಾನೂನಿನ ನಿಯಮ ಹಾಗೂ ಸಾಂವಿಧಾನಿಕ ರಕ್ಷಣೆ ಗಾಳಿಗೆ ತೂರಲ್ಪಡುತ್ತದೆ. ರಾಷ್ಟ್ರೀಯ ಪೊಲೀಸರು ನಾಜಿ ಜರ್ಮನಿಯಂತೆ ಆಗಬಹುದು.” – ನ್ಯಾಯಮೂರ್ತಿ ಜಿತೇಂದ್ರ ಕುಮಾರ್ ಜೂನ್ 16 ರ ಆದೇಶದಲ್ಲಿ ಹೇಳಿದ್ದರು.
ಲಿಖಿತ ದೂರು ಸಲ್ಲಿಸಿದ್ದರೂ ಆರೋಪಿ ಅಧಿಕಾರಿಯ ವಿರುದ್ಧ ಎಫ್ಐಆರ್ ದಾಖಲಿಸಲು ಪೊಲೀಸರು ವಿಫಲರಾಗಿದ್ದಾರೆ ಎಂದು ಆರೋಪಿಸಿ ಮನೀಶ್ ಕುಮಾರ್ ಎಂಬುವವರು ಹೈಕೋರ್ಟ್ಗೆ ರಿಟ್ ಅರ್ಜಿ ಸಲ್ಲಿಸಿದ್ದರು.
ಅರ್ಜಿದಾರ ಮನೀಶ್ ಕುಮಾರ್ ಅವರ ಪ್ರಕಾರ, ಈ ಘಟನೆ ಜುಲೈ 4, 2024 ರಂದು ಸಂಭವಿಸಿದೆ. ಅವರು ನಿರಾಳವಾಗಲು (ಮಲವಿಸರ್ಜನೆಗೆ) ಹೋಗುತ್ತಿದ್ದಾಗ ತಡೆದ ಠಾಣಾಧಿಕಾರಿ ಕಮಲ್ ನಯನ್ ಪಾಂಡೆ, ಅವರ ಹಿನ್ನೆಲೆ ಹಾಗೂ ಜಾತಿಯ ಬಗ್ಗೆ ಪ್ರಶ್ನಿಸಿದ್ದಾರೆ. ಜಾತಿ ತಿಳಿದ ತಕ್ಷಣವೇ ಅವರ ಮೇಲೆ ಕ್ರೂರವಾಗಿ ಹಲ್ಲೆ ನಡೆಸಿ, ಕಾಲುಗಳನ್ನು ಮುರಿದಿದ್ದಾರೆ ಎಂದು ಅರ್ಜಿಯಲ್ಲಿ ಆರೋಪಿಸಲಾಗಿದೆ.
ಆದರೆ ಬಕ್ಸಾರ್ ಪೊಲೀಸ್ ವರಿಷ್ಠಾಧಿಕಾರಿ (SP) ಈ ಆರೋಪವನ್ನು ನಿರಾಕರಿಸಿದ್ದರು. ಮನೀಶ್ ಕುಮಾರ್ ಅವರ ಮೂಳೆ ಮುರಿತವು ಮಳೆಗಾಲದಲ್ಲಿ ಜಾರಿ ಬಿದ್ದಿದ್ದರಿಂದ ಆಗಿದೆಯೇ ಹೊರತು ಪೊಲೀಸರ ಹಲ್ಲೆಯಿಂದಲ್ಲ ಎಂದು ನ್ಯಾಯಾಲಯಕ್ಕೆ ತಿಳಿಸಿದ್ದರು.
ಪೊಲೀಸರ ವಾದವನ್ನು ತಳ್ಳಿಹಾಕಿದ ಹೈಕೋರ್ಟ್, ಮನೀಶ್ ಕುಮಾರ್ ಅವರ ದೂರು ಪ್ರಾಥಮಿಕವಾಗಿ ಗುರುತಿಸಬಹುದಾದ ಅಪರಾಧವಾಗಿದೆ ಎಂದು ಅಭಿಪ್ರಾಯಪಟ್ಟಿದೆ. ಆಪಾದಿತ ಹಲ್ಲೆಯನ್ನು ಠಾಣಾಧಿಕಾರಿಯ ಅಧಿಕೃತ ಕರ್ತವ್ಯದ ಭಾಗವೆಂದು ಪರಿಗಣಿಸಲು ಸಾಧ್ಯವಿಲ್ಲದ ಕಾರಣ, ವಿಚಾರಣೆಗೆ ಯಾವುದೇ ಪೂರ್ವಾನುಮತಿ ಅಗತ್ಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. “ಈ ಹಂತದಲ್ಲಿ ನ್ಯಾಯಾಲಯವು ಆರೋಪದ ಸತ್ಯಾಸತ್ಯತೆಯನ್ನು ಪರಿಶೀಲಿಸುವ ಅಗತ್ಯವಿಲ್ಲ, ಬದಲಿಗೆ ದೂರಿನ ಆಧಾರದಲ್ಲಿ ಪ್ರಾಥಮಿಕ ಅಪರಾಧ ಕಂಡುಬರುತ್ತದೆಯೇ ಎಂದು ನೋಡಬೇಕು” ಎಂದು ಹೇಳಿದೆ.
ಆರೋಪಿ ಪೊಲೀಸ್ ಅಧಿಕಾರಿಯಾಗಿದ್ದಾನೆ ಎಂಬ ಒಂದೇ ಕಾರಣಕ್ಕೆ, ಸಂತ್ರಸ್ತ ವ್ಯಕ್ತಿ ಪದೇ ಪದೇ ಮನವಿ ಮಾಡಿದರೂ ಎಫ್ಐಆರ್ ದಾಖಲಿಸದಿರುವುದು “ಆಘಾತಕಾರಿ ಮತ್ತು ತೊಂದರೆದಾಯಕ” ಎಂದು ನ್ಯಾಯಮೂರ್ತಿ ಕುಮಾರ್ ಆತಂಕ ವ್ಯಕ್ತಪಡಿಸಿದ್ದಾರೆ. ಸಂತ್ರಸ್ತರಿಗೆ ಮ್ಯಾಜಿಸ್ಟ್ರೇಟ್ ಬಳಿ ಹೋಗುವಂತೆ ನಿರ್ದೇಶಿಸುವುದರಿಂದ ಅನ್ಯಾಯ ಇನ್ನಷ್ಟು ಹೆಚ್ಚಾಗುತ್ತದೆ ಎಂದು ಹೇಳಿದ ನ್ಯಾಯಾಲಯ, ತಕ್ಷಣವೇ ಎಫ್ಐಆರ್ ದಾಖಲಿಸುವಂತೆ ಆದೇಶಿಸಿತು.
ಸಂವಿಧಾನದ 21 ನೇ ವಿಧಿಯ ಅಡಿಯಲ್ಲಿ ಅರ್ಜಿದಾರರ ಮೂಲಭೂತ ಹಕ್ಕಿನ ಉಲ್ಲಂಘನೆಯಾಗಿದೆ ಎಂದು ಗಮನಿಸಿದ ನ್ಯಾಯಾಧೀಶರು, ಎಫ್ಐಆರ್ ದಾಖಲಾಗದಿದ್ದರೆ ಜನರು ಪೊಲೀಸರಲ್ಲಷ್ಟೇ ಅಲ್ಲದೆ ರಿಟ್ ನ್ಯಾಯಾಲಯದ ಮೇಲೆಯೂ ನಂಬಿಕೆ ಕಳೆದುಕೊಳ್ಳುತ್ತಾರೆ ಎಂದಿದ್ದಾರೆ.
ಒಂದು ವೇಳೆ ಸಿಐಡಿ (CID) ತನಿಖೆಯ ಬಗ್ಗೆಯೂ ಅರ್ಜಿದಾರರಿಗೆ ಅತೃಪ್ತಿ ಇದ್ದರೆ, ಪ್ರಕರಣವು ಪೊಲೀಸ್ ದೌರ್ಜನ್ಯ ಹಾಗೂ ಮೂಲಭೂತ ಹಕ್ಕುಗಳ ರಕ್ಷಣೆಗೆ ಸಂಬಂಧಿಸಿರುವುದರಿಂದ, ತನಿಖೆಯನ್ನು ಕೇಂದ್ರ ತನಿಖಾ ದಳಕ್ಕೆ (CBI) ವರ್ಗಾಯಿಸಲು ಕೋರಲು ಅರ್ಜಿದಾರರಿಗೆ ಸಂಪೂರ್ಣ ಸ್ವಾತಂತ್ರ್ಯವಿದೆ ಎಂದು ಹೈಕೋರ್ಟ್ ಸ್ಪಷ್ಟಪಡಿಸಿದೆ.
