ಬೆಂಗಳೂರು: “ದೇಶ ಉಳಿಯುವುದು ವೋಟ್ ಉಳಿದರೆ ಮಾತ್ರ. ಮತ ಹೋದರೆ ಎಲ್ಲವನ್ನೂ ಮರೆತಂತೆ ಆಗುತ್ತದೆ. ನಮ್ಮ ಹೋರಾಟ ಗ್ಯಾನೇಶ್ ಕುಮಾರ್ ಅವರ ರಾಜೀನಾಮೆಗಷ್ಟೇ ಅಲ್ಲ, SIR ಪ್ರಕ್ರಿಯೆಯನ್ನೇ ರದ್ದುಪಡಿಸುವವರೆಗೆ ಹೋರಾಟ ಮುಂದುವರಿಯಲಿದೆ” ಎಂದು ಸಿಜೆಪಿಯ ರಾಷ್ಟ್ರೀಯ ಅಧ್ಯಕ್ಷ ಅಭಿಜಿತ್ ದೀಪ್ಕೆ ಹೇಳಿದರು.
ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ವಿರೋಧಿಸಿ ಬೆಂಗಳೂರಿನ ಫ್ರೀಡಂ ಪಾರ್ಕ್‌ನಲ್ಲಿ ಅಕ್ಟೋಬರ್ 8ರಂದು ನಡೆದ ಬೃಹತ್ ಪ್ರತಿಭಟನೆ ಹಾಗೂ ‘ಜನತಾ ನ್ಯಾಯಾಲಯ’ ಸಮಾವೇಶದಲ್ಲಿ ಮಾತನಾಡಿದ ಅವರು, ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಸರ್ಕಾರ ಮತ್ತು ಚುನಾವಣಾ ಆಯೋಗದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು. ಮುಖ್ಯ ಚುನಾವಣಾ ಆಯುಕ್ತ ಗ್ಯಾನೇಶ್ ಕುಮಾರ್ ಅವರನ್ನು ಹುದ್ದೆಯಿಂದ ತೆಗೆದುಹಾಕಬೇಕು ಮತ್ತು SIR ಅನ್ನು ರದ್ದುಗೊಳಿಸಬೇಕು ಎಂದು ಆಗ್ರಹಿಸಿದರು.
“ಪ್ರಧಾನಮಂತ್ರಿ ವೋಟ್ ಚೋರ್. ವೋಟ್ ಅಳಿಸಿ ಪ್ರಧಾನಮಂತ್ರಿ ಆಗಿದ್ದಾರೆ” ಎಂದು ದೀಪ್ಕೆ ಆರೋಪಿಸಿದರು. ಜನರ ಮತಗಳನ್ನು ಅಳಿಸುವ ಮೂಲಕ ಪ್ರಜಾಪ್ರಭುತ್ವದ ಮೇಲೆಯೇ ದಾಳಿ ನಡೆಸಲಾಗುತ್ತಿದೆ ಎಂದು ಅವರು ಹೇಳಿದರು. “ಪ್ರಜಾಪ್ರಭುತ್ವದ ಹಂತಕ ನರೇಂದ್ರ ಮೋದಿ” ಎಂದು ಪ್ರಧಾನಿ ವಿರುದ್ಧ ನೇರ ವಾಗ್ದಾಳಿ ನಡೆಸಿದ ಅವರು, “ಇದು ಭಾರತದೆಲ್ಲೆಡೆ ನಡೆಯುತ್ತಿದೆ. ಯಾಕೆ ನಡೆಯುತ್ತಿದೆ? ದೇಶದ ಮಾಲೀಕರು ತಾವೇ ಆಗಬೇಕು ಎಂಬ ಉದ್ದೇಶದಿಂದ” ಎಂದು ಆರೋಪಿಸಿದರು.
ಇದೇ ವೇಳೆ ಜನರೊಂದಿಗೆ ‘ವೋಟ್ ಚೋರ್, ಗದ್ದಿ ಚೋಡ್’ ಎಂಬ ಘೋಷಣೆಯನ್ನು ಕೂಗಿದ ದೀಪ್ಕೆ, ಬಿಜೆಪಿ ಹೇಳುವ ‘ಒನ್ ನೇಷನ್, ಒನ್ ಎಲೆಕ್ಷನ್’ ಘೋಷಣೆಯ ಹಿಂದೆ ‘ಒನ್ ನೇಷನ್, ಒನ್ ಪಾರ್ಟಿ’ ಉದ್ದೇಶವಿದೆ ಎಂದು ಆರೋಪಿಸಿದರು. “ಅದು ಹಿಟ್ಲರ್‌ನ ಘೋಷಣೆಯಾಗಿತ್ತು. ಹಿಟ್ಲರ್‌ಗೆ ಏನಾಯಿತು ಎಂಬುದನ್ನು ಒಮ್ಮೆ ನೋಡಿಕೊಳ್ಳಿ” ಎಂದು ಅವರು ಹೇಳಿದರು.
ಗಾಂಧಿ, ಅಂಬೇಡ್ಕರ್ ಮತ್ತು ನೆಹರು ಅವರ ವಿಚಾರಗಳನ್ನು ಪ್ರಸ್ತಾಪಿಸಿದ ದೀಪ್ಕೆ, “ಗಾಂಧಿ ದೇಶದ ಆತ್ಮ, ಬಾಬಾಸಾಹೇಬರು ದೇಶದ ಬೆನ್ನೆಲುಬು, ನೆಹರು ದೇಶದ ಮನಸ್ಸು. ದೇಶದ ಅಡಿಪಾಯ ಹಾಕಿದವರು ಇವರೇ” ಎಂದರು. ಆರ್‌ಎಸ್‌ಎಸ್‌ ಸಿದ್ಧಾಂತಕ್ಕೆ ಅಂಬೇಡ್ಕರ್, ಸಂವಿಧಾನ ಮತ್ತು ಗಾಂಧಿಯವರ ಚಿಂತನೆಗಳಲ್ಲಿ ನಂಬಿಕೆ ಇಲ್ಲ ಎಂದು ಆರೋಪಿಸಿದ ಅವರು, ಗೋಡ್ಸೆಯ ವಿಚಾರಧಾರೆಗೆ ಮಾತ್ರ ನಂಬಿಕೆ ಇದೆ ಎಂದು ವಾಗ್ದಾಳಿ ನಡೆಸಿದರು.
ಜವಾಹರಲಾಲ್ ನೆಹರು ಅವರನ್ನು ಮೋದಿ ನಿರಂತರವಾಗಿ ವಿರೋಧಿಸುತ್ತಾರೆ ಎಂದು ಹೇಳಿದ ದೀಪ್ಕೆ, “ಜನರಿಗೆ ಮತದಾನದ ಅರ್ಥವೇ ಗೊತ್ತಿಲ್ಲದಿದ್ದಾಗಲೂ ನೆಹರು ಮತದಾನದ ಹಕ್ಕು ನೀಡಿದರು. ಆದರೆ ಇಂದು ಅದೇ ಹಕ್ಕನ್ನು ಜನರಿಂದ ಕಸಿದುಕೊಳ್ಳಲಾಗುತ್ತಿದೆ” ಎಂದು ಆರೋಪಿಸಿದರು.
2024ರ ಲೋಕಸಭಾ ಚುನಾವಣೆಯನ್ನು ಉಲ್ಲೇಖಿಸಿದ ಅವರು, ಬಿಜೆಪಿಯ ಗೆಲುವಿನ ಅಂತರ ಕೇವಲ ಶೇ.2ರಷ್ಟಿತ್ತು ಮತ್ತು 240 ಸ್ಥಾನಗಳನ್ನು ಗೆದ್ದಿತ್ತು ಎಂದು ಹೇಳಿದರು. “ದೇಶ ತಮ್ಮ ವಿರುದ್ಧ ತಿರುಗಿದೆ ಎಂದು ಅವರಿಗೆ ಗೊತ್ತಾಯಿತು. ಹಾಗಾಗಿ ಯಾರು ನಮಗೆ ವೋಟ್ ಮಾಡುವುದಿಲ್ಲವೋ ಅವರ ವೋಟ್ ತೆಗೆದುಬಿಡುವ ಕೆಲಸ ಮಾಡುತ್ತಿದ್ದಾರೆ” ಎಂದು ಆರೋಪಿಸಿದರು. ವಿವಿಧ ರಾಜ್ಯಗಳಲ್ಲಿ ಮತಗಳನ್ನು ತೆಗೆದುಹಾಕುವ ಮೂಲಕ ಪ್ರಾದೇಶಿಕ ಪಕ್ಷಗಳ ನಾಯಕರನ್ನು ದುರ್ಬಲಗೊಳಿಸುವುದು ಬಿಜೆಪಿಯ ಗುರಿಯಾಗಿದೆ ಎಂದರು.
“ದೇಶವನ್ನು ರಕ್ಷಿಸಬೇಕಾದರೆ ನಿಮ್ಮ ಮತದಾನದ ಹಕ್ಕನ್ನು ರಕ್ಷಿಸಬೇಕು” ಎಂದು ಹೇಳಿದ ದೀಪ್ಕೆ, ಮತದಾರರ ಪಟ್ಟಿಯಿಂದ ಹೆಸರು ಕಳೆದುಕೊಂಡಿರುವ ನೈಜ ಜನರನ್ನು ಭೇಟಿ ಮಾಡಿ ಅವರ ಸಮಸ್ಯೆಗಳನ್ನು ತಿಳಿದುಕೊಳ್ಳಬೇಕು ಎಂದು ಒತ್ತಾಯಿಸಿದರು. “ನಾವು ನಂಬರ್ ಹೇಳಿದರೆ ಸಾಕಾಗುವುದಿಲ್ಲ. ನಿಜವಾಗಿ ವೋಟ್ ಕಳೆದುಕೊಂಡು ಅನ್ಯಾಯಕ್ಕೊಳಗಾದ ಜನರನ್ನು ಭೇಟಿಯಾಗಬೇಕು” ಎಂದರು.
SIR ಹೆಸರಿನಲ್ಲಿ ಮತದಾರರ ಪಟ್ಟಿಯನ್ನು ‘ಕ್ಲೀನ್’ ಮಾಡುವುದಲ್ಲ, ಜನರ ಹೆಸರುಗಳನ್ನು ತೆಗೆದುಹಾಕುವ ಕೆಲಸ ನಡೆಯುತ್ತಿದೆ ಎಂದು ಅವರು ಆರೋಪಿಸಿದರು. “ಬಡವರ, ಯುವಕರ ಮತಗಳನ್ನು ತೆಗೆಯುತ್ತಿದ್ದಾರೆ. ಅವರು ವೋಟ್ ಮಾಡಬಾರದು ಎಂಬ ಉದ್ದೇಶ ಇದರಲ್ಲಿ ಇದೆ” ಎಂದು ಹೇಳಿದರು. ಇಂದಿನ ಹೋರಾಟ ಕೇವಲ ಒಂದು ಮಾದರಿ ಮಾತ್ರವಾಗಿದ್ದು, SIR ರದ್ದಾಗುವವರೆಗೆ ಶಾಂತಿಯುತ ಹೋರಾಟ ಮುಂದುವರಿಯಲಿದೆ ಎಂದು ಘೋಷಿಸಿದರು.
ಗ್ಯಾನೇಶ್ ಕುಮಾರ್ ಅವರನ್ನು ಗುರಿಯಾಗಿಸಿ, “ಮೊದಲ ವಿಕೆಟ್ ಧರ್ಮೇಂದ್ರ ಪ್ರಸಾದ್, ಮುಂದಿನ ವಿಕೆಟ್ ಇವರದ್ದು” ಎಂದು ದೀಪ್ಕೆ ಹೇಳಿದರು. ಗ್ಯಾನೇಶ್ ಕುಮಾರ್ ಅವರ ವಿರುದ್ಧವೂ ಕ್ರಮಕ್ಕೆ ಒತ್ತಾಯಿಸಿದ ಅವರು, “ಮೊದಲು SIR ರದ್ದು ಮಾಡಿ, ಗ್ಯಾನೇಶ್ ಕುಮಾರ್ ಮೇಲೆ ಕೇಸ್ ಮಾಡಿ. ಅಲ್ಲಿಯವರೆಗೆ ಸುಮ್ಮನಿರಲ್ಲ” ಎಂದರು.
ದಕ್ಷಿಣ ಭಾರತದ ರಾಜಕೀಯ ಭವಿಷ್ಯವನ್ನೂ ಪ್ರಸ್ತಾಪಿಸಿದ ಅವರು, ಗ್ಯಾನೇಶ್ ಕುಮಾರ್ ಹುದ್ದೆಯಲ್ಲಿ ಮುಂದುವರಿದರೆ ಡಿಲಿಮಿಟೇಷನ್ ಮೂಲಕ ದಕ್ಷಿಣ ಭಾರತದ ಲೋಕಸಭಾ ಸ್ಥಾನಗಳಿಗೆ ಧಕ್ಕೆಯಾಗಬಹುದು ಎಂದು ಹೇಳಿದರು. “ದಕ್ಷಿಣ ಭಾರತವೇ ಭವಿಷ್ಯದಲ್ಲಿ ಇಡೀ ಭಾರತವನ್ನು ಮುನ್ನಡೆಸಲಿದೆ” ಎಂದು ದೀಪ್ಕೆ ಹೇಳಿದರು.
“ಈಗ ರಸ್ತೆಗಳು ನಮ್ಮವು. ಈ ರಸ್ತೆಗಳಿಂದಲೇ ನಮ್ಮ ಪ್ರಜಾಪ್ರಭುತ್ವವನ್ನು ಮರಳಿ ಪಡೆಯುತ್ತೇವೆ” ಎಂದು ಘೋಷಿಸಿದ ಅವರು, “ಗ್ಯಾನು, ನಿನ್ನ ಸರದಿ ಬಂತು” ಎಂಬ ಘೋಷಣೆಯೊಂದಿಗೆ ತಮ್ಮ ಭಾಷಣ ಮುಕ್ತಾಯಗೊಳಿಸಿದರು.
