ಕರ್ನಾಟಕ ರಾಜಕೀಯದಲ್ಲಿ ಸಚಿವ ಪ್ರಿಯಾಂಕ್ ಖರ್ಗೆ ಹಾಗೂ ಪ್ರತಿಪಕ್ಷ ನಾಯಕ ಆರ್. ಅಶೋಕ್ ನಡುವೆ ಸೋಶಿಯಲ್ ಮೀಡಿಯಾದಲ್ಲಿ ವಾಕ್ಸಮರ ತೀವ್ರಗೊಂಡಿದೆ. ಸಚಿವ ಪ್ರಿಯಾಂಕ್ ಖರ್ಗೆ ಅವರನ್ನು ಗುರಿಯಾಗಿಸಿಕೊಂಡು ಆರ್. ಅಶೋಕ್ ಮಾಡಿದ ಕಟು ಆರೋಪಗಳಿಗೆ, ಪ್ರಿಯಾಂಕ್ ಖರ್ಗೆ ‘X’ (ಟ್ವಿಟರ್) ಮೂಲಕ ಸರಣಿ ಪ್ರತ್ಯುತ್ತರ ನೀಡಿದ್ದಾರೆ.
ಪ್ರತಿಪಕ್ಷ ನಾಯಕ ಆರ್. ಅಶೋಕ್ ಅವರು ತಮ್ಮ ಅಧಿಕೃತ ಖಾತೆಯಲ್ಲಿ ಪೋಸ್ಟ್ ಮಾಡಿ, ಸಚಿವ ಪ್ರಿಯಾಂಕ್ ಖರ್ಗೆ ಅವರ ವಿರುದ್ದ ತೀವ್ರ ವಾಗ್ದಾಳಿ ನಡೆಸಿದ್ದರು. “ನಿಮ್ಮ ಮಾತು ನಿಮ್ಮ ದುರಹಂಕಾರ ಗ್ರಾಮೀಣ ಜನರ ಬಗೆಗಿನ ತಾತ್ಸಾರ ಮನೋಭಾವಕ್ಕೆ ಹಿಡಿದ ಕನ್ನಡಿ. ನಿಮ್ಮ ಪರಮೋಚ್ಚ ನಾಯಕಿ ಸೋನಿಯಾ ಗಾಂಧಿ ಇಟಲಿಯಿಂದ ಬಂದಿರಬಹುದು, ರಾಹುಲ್ ಗಾಂಧಿ ಇಟಲಿ ಮಾತೆಯ ಪುತ್ರನಾಗಿರಬಹುದು. ಆದರೆ ನಿಮ್ಮ ತಂದೆ ಮಲ್ಲಿಕಾರ್ಜುನ ಖರ್ಗೆಯವರು ಇದೇ ಕರ್ನಾಟಕದ ನೆಲದ ಹಳ್ಳಿಯಿಂದ ಬಂದವರು” ಎಂದು ಪ್ರಿಯಾಂಕ್ ಖರ್ಗೆ ವಿರುದ್ಧ ಅಶೋಕ್ ಆಕ್ರೋಶ ಹೊರಹಾಕಿದ್ದರು. ಅಲ್ಲದೆ, ಡಾ. ರಾಜ್‌ಕುಮಾರ್ ಅಭಿನಯದ ‘ಬಂಗಾರದ ಮನುಷ್ಯ’ ಸಿನಿಮಾವನ್ನು ಸ್ಮರಿಸಿದ್ದ ಅಶೋಕ್, ಹಳ್ಳಿಯವರನ್ನು ಹೀಯಾಳಿಸುವ ಮನಸ್ಥಿತಿಗೆ ನಾಚಿಕೆಯಾಗಬೇಕು ಎಂದು ಸಚಿವರಿಗೆ ಟೀಕಿಸಿದ್ದರು.
ಆರ್. ಅಶೋಕ್ ಅವರ ಈ ರಾಜಕೀಯ ಆರೋಪಗಳಿಗೆ ಸಾಮಾಜಿಕ ಮಾಧ್ಯಮ ‘X’ ಮೂಲಕ ಪ್ರತಿಕ್ರಿಯಿಸಿರುವ ಪ್ರಿಯಾಂಕ್ ಖರ್ಗೆ, ಜೆಡಿಎಸ್ ಹಾಗೂ ಕುಮಾರಸ್ವಾಮಿ ಅವರನ್ನು ಸಮರ್ಥಿಸಿಕೊಳ್ಳಬೇಕಾಗಿ ಬಂದಿರುವುದು ಬಿಜೆಪಿಗೆ ಎದುರಾಗಿರುವ ರಾಜಕೀಯ ದೌರ್ಬಲ್ಯವೋ ಅಥವಾ ಸೈದ್ಧಾಂತಿಕ ದಿವಾಳಿತನವೋ, ಈ ಹಿಂದೆ ಜೆಡಿಎಸ್ ನಾಯಕರು ದಲಿತ ಸಮುದಾಯದ ಬಗ್ಗೆ ಅವಹೇಳನಕಾರಿಯಾಗಿ ಮಾತನಾಡಿದ್ದಾಗ ಬಿಜೆಪಿ ನಾಯಕರ ದಲಿತಪರ ಕಾಳಜಿ ಎಲ್ಲಿ ಹೋಗಿತ್ತು ಎಂದು ಪ್ರಶ್ನಿಸಿದ್ದಾರೆ.
ತಮ್ಮ ವಿರುದ್ಧ ನಡೆದ ವೈಯಕ್ತಿಕ ಹಾಗೂ ಜಾತಿ ಆಧಾರಿತ ದಾಳಿಗಳನ್ನು ಉಲ್ಲೇಖಿಸಿದ ಪ್ರಿಯಾಂಕ್ ಖರ್ಗೆ, ಬಿಜೆಪಿ ಶಾಸಕರು ಹಾಗೂ ಮುಖಂಡ ಛಲವಾದಿ ನಾರಾಯಣಸ್ವಾಮಿ ಅವರು ತಮ್ಮನ್ನು ‘ಕಾನ್ವೆಂಟ್ ದಲಿತ’, ‘ಪೈಲ್ಸ್’ ಹಾಗೂ ‘ನಾಯಿ’ ಎಂದು ನಿಂದಿಸಿದಾಗ ಅಶೋಕ್ ಅವರ ಸಂಸ್ಕೃತಿ ಮತ್ತು ನೈತಿಕತೆ ಎಲ್ಲಡಗಿತ್ತು ಎಂದು ತೀವ್ರವಾಗಿ ಪ್ರಶ್ನಿಸಿದ್ದಾರೆ. ಚಿತ್ತಾಪುರದ ಬಿಜೆಪಿ ಅಭ್ಯರ್ಥಿ ತಮ್ಮ ಕುಟುಂಬವನ್ನು ಮುಗಿಸುವುದಾಗಿ ಬೆದರಿಕೆ ಹಾಕಿದಾಗ, ಆರ್‌ಎಸ್‌ಎಸ್ ಕಾರ್ಯಕರ್ತರು ತಮಗೆ ಕೊಲೆ ಬೆದರಿಕೆ ಒಡ್ಡಿದಾಗ ಹಾಗೂ ಬಿಜೆಪಿ ಸಂಸದರು ದಲಿತರಿಗೂ ಆರ್‌ಎಸ್‌ಎಸ್‌ಗೂ ಏನು ಸಂಬಂಧ ಎಂದು ಪ್ರಶ್ನಿಸಿದಾಗ ಅಶೋಕ್ ಅವರ ಪ್ರಜ್ಞೆ ಏಕಾಗಿ ಮೌನವಾಗಿತ್ತು ಎಂದು ತರಾಟೆಗೆ ತೆಗೆದುಕೊಂಡಿದ್ದಾರೆ. ಹಾಗೂ ಹಾಸನದ ಪ್ರಜ್ವಲ್ ರೇವಣ್ಣ ಅವರಿಂದ ಸಂತ್ರಸ್ತರಾದ ಮಹಿಳೆಯರ ಪರವಾಗಿ ಅಥವಾ ಸೂರಜ್ ರೇವಣ್ಣ ಪ್ರಕರಣದಲ್ಲಿ ಬಿಜೆಪಿ ನಾಯಕರು ಧ್ವನಿ ಎತ್ತದೇ ಇರುವುದನ್ನು ಬೆಟ್ಟು ಮಾಡಿ ತೋರಿಸಿದ್ದಾರೆ. ಬಿಜೆಪಿ ನಾಯಕರ ನೈತಿಕ ಪ್ರಜ್ಞೆ ಜಾಗೃತವಾಗುವುದು ಕೇವಲ ಆಯ್ದ ವ್ಯಕ್ತಿಗಳ ವಿರುದ್ಧ ಮಾತ್ರವೇ ಎಂದು ಆಕ್ರೋಶ ಹೊರಹಾಕಿರುವ ಅವರು, ಹಿಂದೆ ಬಿ.ಎಸ್. ಯಡಿಯೂರಪ್ಪ ಅವರ ವಿರುದ್ಧ ಹೆಚ್.ಡಿ. ದೇವೇಗೌಡರು ಬಳಸಿದ್ದ ಕಟು ಪದಗಳು ನಾಡಿನ ಸಮುದಾಯಗಳಿಗೆ ನೋವುಂಟು ಮಾಡಿರಲಿಲ್ಲವೇ ಎಂದು ನೆನಪಿಸಿದ್ದಾರೆ.
