ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲಿ ಮಿಲಿಟರಿ ನಡೆಸಿದ ದಾಳಿಗಳನ್ನು ನ್ಯೂಯಾರ್ಕ್ ನಗರದ ಮೇಯರ್ ಝೊಹ್ರಾನ್ ಮಮ್ದಾನಿ ಖಂಡಿಸಿದ್ದು, “ಅಕ್ರಮ ಆಕ್ರಮಣಕಾರಿ ಯುದ್ಧದಲ್ಲಿ ದುರಂತದ ಉಲ್ಬಣ” ಎಂದು ಹೇಳಿದ್ದಾರೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರ ಮಿಲಿಟರಿ ಕ್ರಮವನ್ನು ಘೋಷಿಸಿದ ಬಳಿಕ ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಮಮ್ದಾನಿ ಪ್ರತಿಕ್ರಿಯಿಸಿದ್ದಾರೆ.
“ನಗರಗಳ ಮೇಲೆ ಬಾಂಬ್ ದಾಳಿ. ನಾಗರಿಕರನ್ನು ಕೊಲ್ಲುವುದು. ಹೊಸ ಯುದ್ಧ ರಂಗವನ್ನು ತೆರೆಯುವುದನ್ನು ಅಮೆರಿಕನ್ನರು ಬಯಸುವುದಿಲ್ಲ. ಆಡಳಿತ ಬದಲಾವಣೆಯನ್ನು ಮಾಡುವ ಸಲುವಾಗಿ ಮತ್ತೊಂದು ಯುದ್ಧವನ್ನು ಅಮೆರಿಕನ್ನರು ಬಯಸುವುದಿಲ್ಲ” ಎಂದು ಮಮ್ದಾನಿ ತಮ್ಮ ಪೋಸ್ಟ್‌ನಲ್ಲಿ ಹೇಳಿದ್ದಾರೆ.
“ಅಮೆರಿಕನ್ನರು ಬಿಕ್ಕಟ್ಟಿಗೆ ಸುಲಭ ಪರಿಹಾರ ಬಯಸುತ್ತಾರೆ. ಅವರು ಶಾಂತಿ ಬಯಸುತ್ತಾರೆ” ಎಂದು ಬರೆದುಕೊಂಡಿದ್ದಾರೆ.
“ಆಡಳಿತ ಬದಲಾವಣೆ ಉತ್ತೇಜಿಸುವ ಉದ್ದೇಶದಿಂದ ಅಮೆರಿಕವು ಇರಾನ್‌ನೊಳಗೆ ‘ಪ್ರಮುಖ ಯುದ್ಧ ಕಾರ್ಯಾಚರಣೆಗಳನ್ನು’ ಪ್ರಾರಂಭಿಸಿದೆ” ಎಂದು ಟ್ರಂಪ್ ವಿಡಿಯೋ ಮೂಲಕ ಘೋಷಿಸಿದ್ದರು. ದಾಳಿಗಳು ಕೊನೆಗೊಂಡ ನಂತರ ತಮ್ಮ ಸರ್ಕಾರದ ನಿಯಂತ್ರಣವನ್ನು ಪಡೆದುಕೊಳ್ಳಿ ಎಂದು ಇರಾನಿಯನ್ನರಿಗೆ ಹೇಳಿದ್ದರು.
ನ್ಯೂಯಾರ್ಕ್ ನಗರದಲ್ಲಿ ವಸತಿ ಅಭಿವೃದ್ಧಿ, ಸ್ಥಳೀಯ ಸವಾಲುಗಳ ಕುರಿತು ಸಹಕಾರ ಸೇರಿದಂತೆ ವಿವಿಧ ವಿಷಯಗಳ ಬಗ್ಗೆ ಚರ್ಚಿಸಲು ಮಮ್ದಾನಿ ಶ್ವೇತಭವನದಲ್ಲಿ ಟ್ರಂಪ್ ಅವರನ್ನು ಭೇಟಿಯಾಗಿದ ಎರಡು ದಿನಗಳ ನಂತರ, ಟ್ರಂಪ್ ಕ್ರಮಕ್ಕೆ ಮಮ್ದಾನಿ ಖಂಡನೆ ವ್ಯಕ್ತಪಡಿಸಿರುವುದು ಗಮನಾರ್ಹ.
ಟ್ರಂಪ್ ಭೇಟಿಗೂ ಮುನ್ನ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದ ಮಮ್ದಾನಿ ಮೇಕಿಂಗ್ ಅಮೆರಿಕ ಗ್ರೇಟ್ (ಎಂಎಜಿಎ) ನಾಯಕರೊಂದಿಗೆ (ಟ್ರಂಪ್ ಜೊತೆ) ಪ್ರೊಡಕ್ಟಿವ್ ಮಾತುಕತೆ ನಡೆಸುತ್ತೇವೆ. ಒಟ್ಟಿಗೆ ಕೆಲಸ ಮಾಡುವುದನ್ನು ಎದುರು ನೋಡುತ್ತೇವೆ ಎಂದಿದ್ದರು.
ಮಮ್ದಾನಿ ಚುನಾವಣೆಗೆ ನಿಂತಾಗ ಟ್ರಂಪ್ ವಿರುದ್ದ ಕಟು ಟೀಕೆ ವ್ಯಕ್ತಪಡಿಸಿದ್ದರು. ಆದರೆ, ಚುನಾವಣೆ ಗೆದ್ದು ನ್ಯೂಯಾರ್ಕ್ ಮೇಯರ್ ಆದ ಬಳಿಕ ಟ್ರಂಪ್ ಅವರನ್ನು ಭೇಟಿಯಾಗಿ ಉತ್ತಮ ಆಡಳಿತಕ್ಕೆ ಸಹಕಾರ ಕೋರಿದ್ದರು. ಈಗಲೂ ಟ್ರಂಪ್ ಅವರ ಮನುಷ್ಯ ವಿರೋಧಿ ಕ್ರಮಗಳನ್ನು ಟೀಕಿಸುವ ಮಮ್ದಾನಿ, ಆಡಳಿತದ ವಿಚಾರದಲ್ಲಿ ಅವರೊಂದಿಗೆ ಪರಸ್ಪರ ಸಹಕಾರದೊಂದಿಗೆ ಮುನ್ನಡೆಯಲು ಬಯಸಿದ್ದಾರೆ.
ಸೈದ್ದಾಂತಿಕ ಮತ್ತು ರಾಜಕೀಯವಾಗಿ ಮಮ್ದಾನಿ ಮತ್ತು ಟ್ರಂಪ್ ಪರಸ್ಪರ ವಿರೋಧಿಗಳು. ಮಮ್ದಾನಿ ಚುನಾವಣೆ ನಿಂತಾಗ ಟ್ರಂಪ್ ತೀವ್ರವಾಗಿ ಟೀಕಿಸಿದ್ದರು. ಮಮ್ದಾನಿ ಗೆದ್ದರೆ ಅಪಾಯ ಎಂಬಂತೆ ಮಾತನಾಡಿದ್ದರು.
