ಸಶಸ್ತ್ರ ಪಡೆಗಳಿಗೆ ಹೊಸ ಅಂಗವೈಕಲ್ಯ ಪಿಂಚಣಿ ನಿಯಮಗಳಲ್ಲಿ ಬಿಜೆಪಿ ಸರ್ಕಾರದ ನಕಲಿ ರಾಷ್ಟ್ರೀಯತೆ ಮತ್ತೆ ಗೋಚರಿಸುತ್ತದೆ ಎಂದು ಕಾಂಗ್ರೆಸ್ ಮುಖ್ಯಸ್ಥ ಮಲ್ಲಿಕಾರ್ಜುನ ಖರ್ಗೆ ವಾಗ್ದಾಳಿ ನಡೆಸಿದರು.
ಈಗಿನ ನೀತಿಯ ಬದಲಾವಣೆಯು ಹಿಂದಿನ ಹಲವು ತೀರ್ಪುಗಳು, ನಿಯಮಗಳು ಮತ್ತು ಸ್ವೀಕಾರಾರ್ಹ ಜಾಗತಿಕ ಮಾನದಂಡಗಳನ್ನು ಉಲ್ಲಂಘಿಸುತ್ತಿದೆ ಎಂದು ಕೇಂದ್ರದ ವಿರುದ್ಧ ಹರಿಹಾಯ್ದರು.
ಸೈನಿಕರ ಕುಂದುಕೊರತೆಗಳನ್ನು ಪರಿಹರಿಸಲು ಶೀಘ್ರವಾಗಿ ಮಾಜಿ ಸೈನಿಕ ಆಯೋಗವನ್ನು ಸ್ಥಾಪಿಸಲು ಅವರು ಒತ್ತಾಯಿಸಿದ್ದಾರೆ. ರಕ್ಷಣಾ ಸಚಿವಾಲಯವು (MoD) ಸಶಸ್ತ್ರ ಪಡೆಗಳ ಸಿಬ್ಬಂದಿಗೆ ವಿಕಲಾಂಗ ಪಿಂಚಣಿ ಮಂಜೂರು ಮಾಡಲು ಹೊಸ ನಿಯಮಗಳನ್ನು ತಂದಿರುವ ಹಿನ್ನೆಲೆಯಲ್ಲಿ ಈ ಹೇಳಿಕೆ ನೀಡಿದ್ದಾರೆ.
ಹೊಸ ನೀತಿಯು ‘ಸಶಸ್ತ್ರ ಪಡೆಗಳ ಸಿಬ್ಬಂದಿಗೆ ಅಪಘಾತದ ಪಿಂಚಣಿ ಮತ್ತು ಅಂಗವೈಕಲ್ಯ ಪರಿಹಾರ ಪ್ರಶಸ್ತಿಗಳ ಅರ್ಹತೆಯ ನಿಯಮಗಳು, 2023’ ವ್ಯಾಖ್ಯಾನವನ್ನು ಬದಲಾಯಿಸುತ್ತದೆ, ಹೊಸ ನಿಯಮಗಳು ಹಿಂದಿನ ಎಲ್ಲಾ ಅರ್ಹತೆಯ ಮಾನದಂಡಗಳನ್ನು ಬದಲಾಯಿಸುತ್ತದೆ ಎಂದು ಟ್ವೀಟ್ ಮೂಲಕ ಹೇಳಿದ್ದಾರೆ.
”ನಮ್ಮ ವೀರ ಸೇನಾಪಡೆಗಳಿಗೆ ಹೊಸ ಅಂಗವೈಕಲ್ಯ ಪಿಂಚಣಿ ನಿಯಮಗಳಲ್ಲಿ ಬಿಜೆಪಿಯ ನಕಲಿ ರಾಷ್ಟ್ರೀಯತೆ ಮತ್ತೊಮ್ಮೆ ಗೋಚರಿಸುತ್ತದೆ. ಸುಮಾರು ಶೇಕಡಾ 40ರಷ್ಟು ಸೇನಾ ಅಧಿಕಾರಿಗಳು ಅಂಗವೈಕಲ್ಯ ಪಿಂಚಣಿಯೊಂದಿಗೆ ನಿವೃತ್ತರಾಗುತ್ತಾರೆ. ಪ್ರಸ್ತುತ ನೀತಿ ಬದಲಾವಣೆಯು ಅನೇಕ ಹಿಂದಿನ ತೀರ್ಪುಗಳು, ನಿಯಮಗಳು ಮತ್ತು ಸ್ವೀಕಾರಾರ್ಹ ಜಾಗತಿಕ ಮಾನದಂಡಗಳನ್ನು ಉಲ್ಲಂಘಿಸುತ್ತದೆ” ಎಂದಿದ್ದಾರೆ.
”ಪೌರಕಾರ್ಮಿಕರಿಗೆ ಹೋಲಿಸಿದರೆ ಸೈನಿಕರಿಗೆ ಅನಾನುಕೂಲವಾಗಿರುವ ಮೋದಿ ಸರ್ಕಾರದ ಈ ಹೊಸ ನೀತಿಗಳು.. ಅಖಿಲ ಭಾರತ ಮಾಜಿ ಸೈನಿಕರ ಕಲ್ಯಾಣ ಸಂಘವು ರಕ್ಷಣಾ ಸಿಬ್ಬಂದಿಯು ಅಂಗವೈಕಲ್ಯ ಮತ್ತು ಮರಣ ಪ್ರಯೋಜನಗಳ ಹೊಸ ನೀತಿಯ ವಿರುದ್ಧ ಬಲವಾಗಿ ಪ್ರತಿಭಟಿಸಿದೆ. ಈ ನೀತಿಯನ್ನು ರಕ್ಷಣಾ ಸಚಿವಾಲಯವು ಬುಧವಾರ ಸಾರ್ವಜನಿಕಗೊಳಿಸಿದೆ.” ಎಂದು ಹೇಳಿದ್ದಾರೆ.
BJP's Fake Nationalism is yet again visible in the new disability pension rules for our brave Armed Forces !
Around 40% of Army officers retire with disability pension, and the present policy change shall flout multiple past judgements, rules and acceptable global norms.
The…
— Mallikarjun Kharge (@kharge) September 30, 2023
”ಜೂನ್ 2019 ರಲ್ಲಿ, ಮೋದಿ ಸರ್ಕಾರವು ಅಂಗವಿಕಲರ ಪಿಂಚಣಿಗೆ ತೆರಿಗೆ ವಿಧಿಸುವುದಾಗಿ ಘೋಷಿಸಿದಾಗ ಇದೇ ರೀತಿಯ ದ್ರೋಹ ಎಸಗಿತ್ತು” ಎಂದು ಖರ್ಗೆ ಆರೋಪಿಸಿದ್ದಾರೆ.
”ಮೋದಿ ಸರ್ಕಾರವು ನಮ್ಮ ಯೋಧರು, ಮಾಜಿ ಸೈನಿಕರು ಮತ್ತು ಯೋಧರ ಕಲ್ಯಾಣಕ್ಕೆ ವಿರುದ್ಧವಾಗಿ ಕೆಲಸ ಮಾಡುವ ಮೂಲಕ ಅಪರಾಧ ಎಸಗುತ್ತಿದೆ” ಎಂದು ಅವರು ಹೇಳಿದರು.
”ಮೋದಿ ಸರ್ಕಾರದ ಬಳಿ ಸೈನಿಕರಿಗೆ ಹಣವಿಲ್ಲ ಎಂಬುದನ್ನು ಅಗ್ನಿಪಥ ಯೋಜನೆ ಸ್ಪಷ್ಟವಾಗಿ ಒಪ್ಪಿಕೊಳ್ಳುತ್ತದೆ” ಎಂದು ಖರ್ಗೆ ಪ್ರತಿಪಾದಿಸಿದರು.
”OROP-2 (ಒಂದು ಶ್ರೇಣಿಯ ಒಂದು ಪಿಂಚಣಿ) ನಲ್ಲಿ ದೊಡ್ಡ ಪ್ರಮಾಣದ ಅವ್ಯವಹಾರಗಳಿವೆ” ಎಂದು ಅವರು ಆರೋಪಿಸಿದರು.
”ಶಾರ್ಟ್ ಸರ್ವಿಸ್ ಕಮಿಷನ್ ಅಡಿಯಲ್ಲಿ ರಾಷ್ಟ್ರಕ್ಕೆ ಶೌರ್ಯದಿಂದ ಸೇವೆ ಸಲ್ಲಿಸಿದ ಯೋಧರಿಗೆ ವೈದ್ಯಕೀಯ ಪ್ರಯೋಜನಗಳು / ಪಿಂಚಣಿಗಳನ್ನು ಕಸಿದುಕೊಳ್ಳುತ್ತಾರೆ” ಎಂದರು.
”ಆರ್ಡಿನೆನ್ಸ್ ಫ್ಯಾಕ್ಟರಿ ಮಂಡಳಿಯ ಖಾಸಗೀಕರಣ ಮತ್ತು ಸಿಎಸ್‌ಡಿ ಔಟ್‌ಲೆಟ್‌ಗಳಲ್ಲಿ ಪಡಿತರೀಕರಣವು ಸಶಸ್ತ್ರ ಪಡೆಗಳ ಸಿಬ್ಬಂದಿಯ ಕಲ್ಯಾಣಕ್ಕೆ ವಿರುದ್ಧವಾಗಿದೆ” ಎಂದು ಅವರು ಹೇಳಿದರು.
”ಈ ಹಿನ್ನೆಲೆಯಲ್ಲಿ ಸೇನಾ ಯೋಧರ ಕುಂದುಕೊರತೆಗಳನ್ನು ಪರಿಹರಿಸಲು ಶೀಘ್ರವೇ ಮಾಜಿ ಸೈನಿಕ ಆಯೋಗವನ್ನು ಸ್ಥಾಪಿಸಬೇಕೆಂಬ ತನ್ನ ಬೇಡಿಕೆಯನ್ನು ಕಾಂಗ್ರೆಸ್ ಪಕ್ಷ ಪುನರುಚ್ಚರಿಸುತ್ತದೆ” ಎಂದು ಖರ್ಗೆ ಹೇಳಿದರು.
ಇದನ್ನೂ ಓದಿ: ಬಿಜೆಪಿ ಸಂಸದನ ಅಸಂಸದೀಯ ಭಾಷೆ ಖಂಡಿಸಬೇಕು, ಸೂಕ್ತ ಭದ್ರತೆ ನೀಡಬೇಕು: ಪ್ರಧಾನಿ ಮೋದಿಗೆ ಡ್ಯಾನಿಶ್ ಅಲಿ ಪತ್ರ
