ನೀವು ನಂಬಿಯೇ ಬಿಟ್ಟಿದ್ದ ಈ ವಾರದ ಫೇಕ್‌ನ್ಯೂಸ್‌ಗಳು ಯಾವುವು ಗೊತ್ತೆ?

ಸುಳ್ಳು 1: ವಿಶ್ವದ 35 ದೇಶಗಳಿಗೆ ಮೋದಿ ಜೀವದಾನಿ: ಭಾರತವನ್ನು ಹಾಡಿಹೊಗಳಿದ 35 ವಿಶ್ವನಾಯಕರು

ಈ ರೀತಿಯಾಗಿ ಕನ್ನಡಪ್ರಭ ಪ್ರತ್ರಿಕೆ ವರದಿ ಪ್ರಕಟಿಸಿದೆ. ಇದಕ್ಕೆ ಪತ್ರಿಕೆ ಕೊಟ್ಟಿರುವ ಕಾರಣ ಕೊರೊನಾಗೆ ಸದ್ಯ ಬಳಸುತ್ತಿರುವ ಮಲೆರಿಯಾ ನಿರೋಧಕ ಹೈಡ್ರಾಕ್ಸಿಕ್ಲೋರೋಕ್ವಿನ್ ಮಾತ್ರೆಗಳನ್ನು ಮೋದಿ 35 ದೇಶಗಳಿಗೆ ರಫ್ತು ಮಾಡುತ್ತಿದ್ದಾರೆ ಎಂಬುದಾಗಿದೆ.

ಸತ್ಯ: ಭಾರತ ಏಪ್ರಿಲ್ 6ರವರೆಗೆ ಈ ಮಾತ್ರೆಗಳನ್ನು ರಫ್ತು ಮಾಡುವುದನ್ನು ನಿಷೇಧಿಸಿತ್ತು. ಭಾರತಕ್ಕೆ ಹೆಚ್ಚು ಈ ಮಾತ್ರೆಗಳ ಅಗತ್ಯವಿದೆಯೆಂಬುದು ಅದಕ್ಕೆ ಕಾರಣವಾಗಿತ್ತು. ಆದರೆ ಏಪ್ರಿಲ್ 7 ರಂದು ಅಮೆರಿಕಾದ ಅಧ್ಯಕ್ಷ ಟ್ರಂಪ್ ಆ ಮಾತ್ರೆಗಳನ್ನು ಅಮೆರಿಕಾಕೆ ರಫ್ತು ಮಾಡದಿದ್ದರೆ ಭಾರತದ ವಿರುದ್ಧ ಪ್ರತಿಕಾರ ತೀರಿಸಿಕೊಳ್ಳಬೇಕಾಗುತ್ತದೆ ಎಂದು ಬೆದರಿಕೆ ಹಾಕಿದರು. ಅಂದು ಮಧ್ಯಾಹ್ನದಿಂದಲೇ ಭಾರತ ರಫ್ತು ನಿಷೇಧವನ್ನು ತೆರವುಗೊಳಿಸಿತು.

ಭಾರತವೊಂದೇ ಪ್ರಪಂಚದ ಶೇ.70 ರಷ್ಟು ಹೈಡ್ರಾಕ್ಸಿಕ್ಲೋರೋಕ್ವಿನ್ ಮಾತ್ರೆಗಳನ್ನು ಉತ್ಪಾದಿಸುತ್ತಿದೆ. ಇದಕ್ಕೆ ಕಾರಣ ನಮ್ಮ ದೇಶವಿನ್ನು ಮಲೇರಿಯಾ, ಡೆಂಗ್ಯುನಂತರ ಮಾರಕ ಕಾಯಿಲೆಗಳಿಂದ ಬಳಲುತ್ತಿದೆ ಎಂಬುದೇ ಆಗಿದೆ. ಬೇರೆ ದೇಶಗಳು ಈ ವಿಷಯಲ್ಲಿ ಸುಧಾರಿಸಿರುವುದರಿಂದ ಅವು ಉತ್ಪಾದನೆಯನ್ನು ನಿಲ್ಲಿಸಿವೆ.

ಭಾರತವು ಹೈಡ್ರಾಕ್ಸಿಕ್ಲೋರೋಕ್ವಿನ್ ಉತ್ಪಾದಿಸಲು ಬೇಕಾಗುವ ಮಿಶ್ರಣಾಂಶ ಎಪಿಐ ಅನ್ನು ಚೀನಾದಿಂದ ಆಮದು ಮಾಡಿಕೊಳ್ಳುತ್ತಿದೆ. ಚೀನಾ ನೀಡದಿದ್ದರೆ ನಮ್ಮ ಉತ್ಪಾದನೆ ಕಷ್ಟ.

ಹೈಡ್ರಾಕ್ಸಿಕ್ಲೋರೋಕ್ವಿನ್ ಮಾತ್ರೆಗಳು ಕಡಿಮೆ ಬೆಲೆಗೆ ಸಿಗಲು ಕಾರಣ ಹಿಂದಿನ ನೆಹರೂ ಕಾಲದ ಭಾರತದ ಪೆಟೇಂಟ್ ನೀತಿ ಕಾರಣ.

ಹೈಡ್ರಾಕ್ಸಿಕ್ಲೋರೋಕ್ವಿನ್ ಮಾತ್ರೆಗಳು ಹೆಚ್ಚು ಉತ್ಪಾದನೆಯಾಗಲು 2014ರ ನಂತ ಬಂದ ಮೋದಿ ಸರ್ಕಾರ ಕಾರಣವಲ್ಲ. ಅದಕ್ಕೂ ಮುಂಚೆ ಇದ್ದ ಸರ್ಕಾರಗಳ ದೂರದೃಷ್ಟಿಯೇ ಕಾರಣ.

ಮೋದಿ ಅಮೆರಿಕಾದ ಬೆದರಿಕೆಗೆ ಮಣಿದು ಮಾತ್ರೆಗಳನ್ನು ರಫ್ತು ಮಾಡುತ್ತಿರುವುದರಿಂದ ಮುಂದೊಂದು ದಿನ ಕೊರೊನಾ ಉಲ್ಭಣಿಸಿದರೆ ಭಾರತಕ್ಕೆ ಕೊರತೆಯುಂಟಾಗುವ ಅಪಾಯವಿದೆ.

ಸುಳ್ಳು 2: ಅಮೆರಿಕಾದಲ್ಲಿ ಕೊರೊನಾ ಚಿಕಿತ್ಸೆಗೆ 55 ಲಕ್ಷ ರೂ (73 ಸಾವಿರ ಡಾಲರ್) ಖರ್ಚು. ಭಾರತದಲ್ಲಿ ಫ್ರಿ?

ಇದು ಪೋಸ್ಟ್‌ಕಾರ್ಡ್‌ನ ಮತ್ತೊಂದು ಸುಳ್ಳು ಸುದ್ದಿಯಾಗಿದೆ. ಭಾರತವನ್ನು ಹೊಗಳುವ ಭರದಲ್ಲಿ ಬಾಯಿಗೆ ಬಂದಷ್ಟು ವೆಚ್ಚವನ್ನು ಅಮೆರಿಕಾದಲ್ಲಿ ಮಾಡಲಾಗುತ್ತಿದೆ ಎಂದು ಬರೆದುಕೊಂಡಿದೆ. ಇದಕ್ಕೆ ಯಾವುದೇ ಮೂಲವನ್ನು ಅದು ಉಲ್ಲೇಖಿಸಿಲ್ಲ.

ಸತ್ಯ: ಚಿಕಿತ್ಸೆಯಲ್ಲಿ ಕೆಲವು ವ್ಯಕ್ತಿಗಳಿಗೆ ಅವರ ಪರಿಸ್ಥಿತಿ ನೋಡಿ ತೀರ್ಮಾನವಾಗುತ್ತದೆಯೇ ಹೊರತು ಎಲ್ಲರಿಗೂ 55 ಲಕ್ಷ ಅಥವಾ 73 ಸಾವಿರ ಡಾಲರ್ ಮಾಡಲು ಸಾಧ್ಯವಿಲ್ಲ.

ಈ ಕುರಿತು ಅಮೆರಿಕಾ ಪ್ರಮುಖ ಪತ್ರಿಕೆಗಳಾದ ಟೈಮ್, ದಿ ನ್ಯೂಯಾರ್ಕ್ ಟೈಮ್ಸ್ ಮತ್ತು ವಾಲ್‌ಸ್ಟ್ರೀಟ್ ಜರ್ನಲ್ ಲೇಖನಗಳನ್ನು ಪರಿಶೀಲಿಸಿದಾಗ ಆರೋಗ್ಯ ವಿಮೆ ಇದ್ದವರಿಗೆ 9 ಸಾವಿರ ಡಾಲರ್ ಮತ್ತು ಇಲ್ಲದವರಿಗೆ 23 ಸಾವಿರ ಡಾಲರ್‌ವರೆಗೆ ಹಣ ಖರ್ಚಾದ ಉಲ್ಲೇಖವಿದೆ ಅಷ್ಟೇ. 73 ಸಾವಿರ ಎಂಬುದು ಕೇವಲ ವದಂತಿ ಅಷ್ಟೇ.

ಸುಳ್ಳು 3: ಲಾಕ್‌ಡೌನ್ ಉಲ್ಲಂಘಿಸಿದವರಿಗೆ ಕೆರೆ ಸ್ವಚ್ಛಗೊಳಿಸುವ ಶಿಕ್ಷೆ ಕೊಟ್ಟ ಕರ್ನಾಟಕ ಪೊಲೀಸರು

ಈ ಟೈಟಲ್‌ನಲ್ಲಿ Awesome things in India ಎಂಬ ಫೇಸ್‌ಬುಕ್ ಪೇಜ್‌ನಲ್ಲಿ ಕೆರೆ ಸ್ವಚ್ಛ ಮಾಡುವ ಫೋಟೊವೊಂದು ಪ್ರಕಟಿಸಿದ್ದು ಅದು ವೈರಲ್ ಆಗಿದೆ.

ಸತ್ಯ: ಈ ಕುರಿತು ಫ್ಯಾಕ್ಟ್‌ಚೆಕ್ ನಡೆಸಿದಾಗ ಇದು ಸುಳ್ಳೆಂದು ಸಾಬೀತಾಗಿದೆ. ಜುಲೈ 3, 2017ರಂದೇ ಬೆಂಗಳೂರು ಮಿರರ್ ಪತ್ರಿಕೆ ಕೆಲವು ಟೆಕ್ಕಿಗಳು ಕೆರೆ ಸ್ವಚ್ಚಗೊಳಿಸುತ್ತಿರುವುದು ಎಂದು ಈ ಫೋಟೊವನ್ನು ಪ್ರಕಟಿಸಿದೆ.

ಸುಳ್ಳು 4: ಕೊರೊನಾ ತಗುಲಿ ಒಂದೇ ದಿನ ಇಟಲಿಯಲ್ಲಿ 200 ವೈದ್ಯರು, ದಾದಿಯರ ಸಾವು.

Bem vindo ಎಂಬ ಫೇಸ್‌ಬುಕ್ ಬಳಕೆದಾರ ಚಿತ್ರವೊಂದನ್ನು ಪ್ರಕಟಿಸಿ ಏಪ್ರಿಲ್ 13ರ ಒಂದೇ ದಿನ ಇಟಲಿಯಲ್ಲಿ 200 ವೈದ್ಯರು, ದಾದಿಯರ ಸಾವು ಎಂಬ ಸುದ್ದಿ ಹರಡಿದ್ದಾರೆ.

ಸತ್ಯ: ಫೋಟೊವನ್ನು ರಿವರ್ಸ್ ಸರ್ಚ್ ಮಾಡಿದಾಗ ಅದು ಅಮೆರಿಕಾದ ಟಿವಿ ಧಾರವಾಹಿ “Grey’s Anatomy” ಯ ಫೋಟೊ ಎಂದು ತಿಳಿದುಬಂದಿದೆ. ‘Wishin’ and Hopin’ ಎಪಿಸೋಡ್‌ನಲ್ಲಿ ಬರುವ ಚಿತ್ರವನ್ನು ನಿಜವೆಂದು ಹರಡಲಾಗಿದೆ ಅಷ್ಟೆ.