“ಗೆಲುವಿಗೆ ಎಲ್ಲರೂ ಅಪ್ಪ-ಅಮ್ಮ, ಸೋಲು ಅನಾಥ” ಎನ್ನುವ ಮಾತು ಕಟು ವಾಸ್ತವವೇ ಸರಿ. ಆದರೆ ಗೆಲುವನ್ನೂ ಅನಾಥಗೊಳಿಸುವ, ಬಿಜೆಪಿಯನ್ನು ಅಜೇಯಗೊಳಿಸುವ, ನಾಗರಿಕ ಸಮಾಜದ ಪ್ರಯತ್ನವನ್ನು ನಗಣ್ಯಗೊಳಿಸುವ ಕೆಲವು ಬರಹಗಳನ್ನು ನಮ್ಮ ಮಿತ್ರರೇ ಬರೆಯುತ್ತಿರುವುದನ್ನು ಕಂಡು ಸೋಜಿಗವಾಗದಿದ್ದರೂ ‘ಏಕಪ್ಪಾ ಈ ಸ್ಥಿತಿ’ ಎಂದು ಮನಸ್ಸು ಪರಿತಪಿಸಿದ್ದಂತೂ ವಾಸ್ತವ. ನಿಲ್ಲದ ಓಟದಲ್ಲಿದ್ದುದರಿಂದ ಗಮನಿಸಿದರೂ ಯಾವ ಪ್ರತಿಕ್ರಿಯೆಯೆನ್ನೂ ನೀಡಲು ಹೋಗಲಿಲ್ಲ. ಈಗಲೂ ಓಟ ನಿಂತಿಲ್ಲ. ಆದರೆ “ನಿಮ್ಮ ಅನುಭವ ಹಾಗೂ ಅಭಿಪ್ರಾಯವನ್ನು ಬರೆಯಲೇಬೇಕು” ಎಂದು ಕೆಲ ಯುವ ಸಂಗಾತಿಗಳು ಬಹಳ ಒತ್ತಡ ಹಾಕಿದ್ದರಿಂದ ನನ್ನ ಅನುಭವವನ್ನು ಇಲ್ಲಿ ದಾಖಲಿಸಿದ್ದೇನೆ. (ಒಟ್ಟು ನಾಲ್ಕು ಕಂತುಗಳಲ್ಲಿ ಈ ಅನುಭವ ಮಾಲೆ ಪ್ರಕಟಗೊಳ್ಳುತ್ತಿದೆ.)
ಮೊದಲಿಗೆ: 1. ಈ ಸಕರಾತ್ಮಕ ಫಲಿತಾಂಶಕ್ಕೆ ಎದ್ದೇಳು ಕರ್ನಾಟಕವೇ ಕಾರಣ ಅಥವಾ ಅದೇ ಪ್ರಧಾನ ಕಾರಣ ಎಂದು ನನಗೆ ತಿಳಿದ ಮಟ್ಟಿಗೆ ಯಾರೂ ಮಾತನಾಡಿಲ್ಲ ಅಥವಾ ಅಂದುಕೊಂಡಿಲ್ಲ. 2. ಸಾಮಾಜಿಕ ಶಕ್ತಿಗಳ ಮಧ್ಯಪ್ರವೇಶ ಎಂದರೆ ಎದ್ದೇಳು ಕರ್ನಾಟಕ ಮಾತ್ರವೇ ಎಂಬ ಅಹಂಕಾರವನ್ನೂ ನಾನೆಲ್ಲೂ ಕಂಡಿಲ್ಲ. 3. ಬಿಜೆಪಿ ನೆಲಕಚ್ಚಿದೆ, ಹಿಂದುತ್ವ ಹಿಮ್ಮೆಟ್ಟಿದೆ, ಫ್ಯಾಸಿಸಂ ಅಪಾಯದಿಂದ ಕರ್ನಾಟಕ ಪಾರಾಗಿದೆ ಎಂದು ಅಂದುಕೊಳ್ಳುವಷ್ಟು ಮೂರ್ಖರು ಕರ್ನಾಟಕದ ಸಾಮಾಜಿಕ ಚಳವಳಿಯಲ್ಲೆ ಯಾರೂ ಇಲ್ಲ. 4. ಕಾಂಗ್ರೆಸ್ ಈ ದೇಶಕ್ಕೆ ಪರಿಹಾರ ಅಥವಾ ಪರ್ಯಾಯ ಎಂಬ ಭ್ರಮೆಯಲ್ಲಿ ಎದ್ದೇಳು ಕರ್ನಾಟಕದ ಯಾರೊಬ್ಬರೂ ಇಲ್ಲ.
ಎರಡನೆಯದಾಗಿ: ಎದ್ದೇಳು ಕರ್ನಾಟಕದ ಎಕ್ಸಿಕ್ಯೂಟಿವ್ ಕೌನ್ಸಿಲ್ಲಿನ ಅವಲೋಕನ ಸಭೆ ಇನ್ನು ನಡೆದಿಲ್ಲ. ಹಾಗಾಗಿ ನನ್ನ ಈ ಬರಹ ನನ್ನ ವೈಯಕ್ತಿಕ ಮಧ್ಯಾಂತರಿ ಅಭಿಪ್ರಾಯ.
ಮೂರನೆಯದಾಗಿ: ಈ ಬರಹದ ಉದ್ದೇಶ ಎದ್ದೇಳು ಕರ್ನಾಟಕ ಮಾಡಿದ ಕೆಲಸವನ್ನು ಕೊಂಡಾಡುವುದು ಅಲ್ಲ. ಬದಲಿಗೆ ಈ ಒಂದು ವಿಶಿಷ್ಟ ಅನುಭವ ನೀಡಿರುವ ಕಲಿಕೆಗಳ ಅನುಭವದ ಬುತ್ತಿಯಲ್ಲಿ ಹಂಚಿಕೊಳ್ಳಲಿಕ್ಕಾಗಿ. ಈ ಅಂಧಕಾರದ ದಿನಗಳಲ್ಲಿ, ಹಣ, ಜಾತಿ, ಕೋಮು ರಾಜಕರಣದಲ್ಲಿ ಮುಳುಗಿಗೇಳುತ್ತಿರುವ ಚುನಾವಣೆಗಳಲ್ಲಿ, ಸಾಮಾಜಿಕ ಸಂಘಟನೆಗಳಿಗೆ ಅರ್ಥವತ್ತಾದದ್ದನ್ನು ಮಾಡಲೇನಾದರೂ ಉಂಟೆ? ಎಂಬ ಪ್ರಶ್ನೆಗೆ ನಿಚ್ಚಳ ಉತ್ತರ ಅಲ್ಲವಾದರೂ ದಿಕ್ಸೂಚಿ ಉತ್ತರವನ್ನಂತೂ ಎದ್ದೇಳು ಕರ್ನಾಟಕದ ಅನುಭವ ತೋರಿಸಿಕೊಟ್ಟಿದೆ. ಹಾಗಾಗಿ ದೇಶ ಉಳಿಸಲು ಕೈಕೆಸರು ಮಾಡಿಕೊಳ್ಳಲು ಸಿದ್ಧವಿರುವ ಸಾಮಾಜಿಕ ಕಾರ್ಯಕರ್ತರು ಇದನ್ನು ಗಮನಿಸುವ ಮತ್ತು ಅವಲೋಕಿಸುವ ಅಗತ್ಯವಂತೂ ಇದೆ. ಅದಕ್ಕೆ ಸಹಾಯವಾಗಲಿ ಎಂಬ ಉದ್ದೇಶದಿಂದ ಬರಹ ರೂಪದಲ್ಲಿ ಅನುಭವವನ್ನು ಹಂಚಿಕೊಳ್ಳುತ್ತಿದ್ದೇನೆ.
ಸಂಕ್ಷಿಪ್ತ ಹಿನ್ನೆಲೆ: ಕರ್ನಾಟಕದಲ್ಲಿ ಕೋಮುವಾದ ತಲೆಎತ್ತಿ ಬೆಳೆಯತೊಡಗಿದಾಗನಿಂದ ಅದನ್ನು ಪ್ರತಿರೋಧಿಸುವ ಪರಂಪರೆ ಕರ್ನಾಟಕದಲ್ಲಿ ಬಹಳ ಪ್ರಖರ ರೀತಿಯಲ್ಲೇ ಅಭಿವ್ಯಕ್ತಗೊಂಡಿದೆ. ಕರ್ನಾಟಕ ಕೋಮು ಸೌಹಾರ್ದ ವೇದಿಕೆ ಅದರ ಅತಿ ಹೆಚ್ಚು ಸಂಘಟಿತ ಹಾಗೂ ಅತಿ ಹೆಚ್ಚು ಕಾಲದ ಪ್ರಯತ್ನವಾಗಿತ್ತು. ಇದಲ್ಲದೆ ಸಮಾನ ಮನಸ್ಕರ ವೇದಿಕೆ, ಸಂವಿಧಾನ ಉಳಿವಿಗಾಗಿ ಕರ್ನಾಟಕ, ದೇಶಕ್ಕಾಗಿ ನಾವು, ಸಹಮತ, ಮಾನವ ಬಂಧುತ್ವ ವೇದಿಕೆ, ಬಹುತ್ವ, ಜನಪರ ಸಂಘಟನೆಗಳ ಒಕ್ಕೂಟ, ಸಹಬಾಳ್ವೆ ಮುಂತಾದ ಹತ್ತು ಹಲವು ಪ್ರಯತ್ನಗಳು ಇದರ ಜೊತೆಜೊತೆಗೂ ನಡೆದಿವೆ. ಇದಲ್ಲದೆ ಅನೇಕ ಎಡ, ಪ್ರಜಾತಾಂತ್ರಿಕ, ದಲಿತ, ಅಲ್ಪಸಂಖ್ಯಾತ ಸಂಘಟನೆಗಳು ಫ್ಯಾಸಿಸ್ಟ್ ಶಕ್ತಿಯನ್ನು ತಮ್ಮ ತಮ್ಮದೇ ರೀತಿಯಲ್ಲಿ ಪ್ರತಿರೋಧಿಸುತ್ತಾ ಬಂದಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ರೈತ ಸಂಘಟನೆಗಳು, ಮಹಿಳಾ ಸಂಘಟನೆಗಳು, ಕಾರ್ಮಿಕ ಸಂಘಟನೆಗಳು ಮುಂತಾದ ಬಹುತೇಕ ಸಾಮಾಜಿಕ ಸಂಘಟನೆಗಳು ಈ ಶಕ್ತಿಗಳನ್ನು ವಿರೋಧಿಸುವ ಖಚಿತ ನಿಲುವುಗಳಿಗೆ ತಲುಪಿದ್ದಾರೆ. ಹಾಗಾಗಿ ಬಿಜೆಪಿ ಮತ್ತು ಸಂಘಪರಿವಾರವನ್ನು ಕರ್ನಾಟಕದ ಎಲ್ಲಾ ಸಾಮಾಜಿಕ ಸಂಘಟನೆಗಳೂ ತಮ್ಮ ತಮ್ಮದೇ ರೀತಿಯಲ್ಲಿ ಪ್ರತಿರೋಧಿಸುತ್ತಿವೆ.
ಪ್ರತಿ ಚುನಾವಣೆ ಸಂದರ್ಭದಲ್ಲೂ ಸಾಮಾಜಿಕ ಸಂಘಟನೆಗಳು ಸಕ್ರಿಯವಾಗಿ ಮಧ್ಯಪ್ರವೇಶ ಮಾಡುವ ಪ್ರಯತ್ನ ಮಾಡಿವೆ ಮತ್ತು ಇದರ ಪ್ರಮಾಣ ಮತ್ತು ವೇಗ ಬಿರುಸುಪಡೆಯುತ್ತಾ ಬಂದಿದೆ. ಈ ಬಾರಿ ಇದರಲ್ಲೊಂದು ನೆಗೆತ ಸಾಧ್ಯವಾಗಿದೆ. ಇತ್ತೀಚಿನ ದಿನಗಳಲ್ಲಿ ಈ ಶಕ್ತಿಗಳನ್ನು ಎದುರಿಸುವ ನಿಟ್ಟಿನಲ್ಲಿ ನಡೆದ ಸಂಯುಕ್ತ ಪ್ರಯತ್ನಗಳ ಪೈಕಿ ನಾಲ್ಕು ಬಹಳ ಮುಖ್ಯವಾದವು.
1. 2022 ಮೇ ತಿಂಗಳಿನಲ್ಲಿ ನಡೆದ ಉಡುಪಿ ಸಹಬಾಳ್ವೆ ಸಮಾವೇಶದಲ್ಲಿ ಸಮಾಗಮಗೊಂಡ ಜೀವಪರ ಶಕ್ತಿಗಳು “ದ್ವೇಷ ರಾಜಕಾರಣದಿಂದ ಕರ್ನಾಟಕವನ್ನು ಮುಕ್ತಗೊಳಿಸಲು ನಾವು ನಿರಂತರ ಕೆಲಸ ಮಾಡಬೇಕು” ಎಂಬ ತೀರ್ಮಾನಕ್ಕೆ ಬಂದದ್ದು.
2. ಡಿಸೆಂಬರ್ 6 ರಂದು ದಲಿತ ಸಂಘರ್ಷ ಸಮಿತಿಯ ವಿವಿಧ ಬಣಗಳು ಕೂಡಿ ಬೃಹತ್ ಪ್ರತಿರೋಧ ಸಮಾವೇಶ ನಡೆಸಿ “ಫ್ಯಾಸಿಸ್ಟ್ ಶಕ್ತಿಗಳನ್ನು ಸೋಲಿಸುವುದುದೇ ನಮ್ಮ ಪ್ರಧಾನ ಗುರಿ” ಎಂದು ಘೋಷಿಸಿದ್ದು.
3. ಫೆಬ್ರವರಿ 16ರಂದು ಬೆಂಗಳೂರಿನಲ್ಲಿ ಸಂಯುಕ್ತ ಹೋರಾಟದ ನೇತೃತ್ವದಲ್ಲಿ ರೈತ, ಕೃಷಿಕೂಲಿ, ದಲಿತ, ಕಾರ್ಮಿಕ ಸಂಘಟನೆಗಳು ಸೇರಿ ಜನಾಗ್ರಹ ಸಮಾವೇಶ ನಡೆಸಿ “ಜನ ವಿರೋಧಿ ಬಿಜೆಪಿಗೆ ಚುನಾವಣೆಯಲ್ಲಿ ತಕ್ಕ ಪಾಠ ಕಲಿಸೋಣ” ಎಂಬ ನಿರ್ಣಯ ತೆಗೆದುಕೊಂಡದ್ದು.
4. ಮಾರ್ಚ್ 5 ರಂದು ಬೆಂಗಳೂರಿನ ಜೈ ಭೀಮ್ ಭವನದಲ್ಲಿ ನಡೆದ ಕೇಂದ್ರೀಯ ಕಾರ್ಯಾಗಾರದಲ್ಲಿ ಪಾಲ್ಗೊಂಡ 20 ಜಿಲ್ಲೆಗಳ, ಹಲವು ಗಟ್ಟಿ ಸಂಘಟನೆಗಳ 150 ಗಟ್ಟಿ ಸಂಘಟಕರುಗಳು ಕೂಡಿ “ಎದ್ದೇಳು ಕರ್ನಾಟಕ”ದ ಹೆಸರಿನಲ್ಲಿ “ಕ್ರಿಟಿಕಲ್ ಕ್ಷೇತ್ರಗಳನ್ನು ಗುರುತಿಸಿ, ಅಲ್ಲಿ ತಳಮಟ್ಟಕ್ಕೆ ಇಳಿದು ಕೆಲಸ ಮಾಡೋಣ” ಎಂಬ ತೀರ್ಮಾನಕ್ಕೆ ಬಂದಿದ್ದು ಮತ್ತು ಅದಕ್ಕಾಗಿ ಸ್ಥೂಲ ಯೋಜನೆಯೊಂದನ್ನು ಸಿದ್ಧಗೊಳಿಸಿದ್ದು.
‘ಎದ್ದೇಳು’ ಯೋಜನೆ: ಮೇಲ್ಕಂಡ ಕಾರ್ಯಗಾರದಲ್ಲಿ ತಲುಪಿದ ತೀರ್ಮಾನವೆಂದರೆ “ಕೋಮುವಾದಿ ಶಕ್ತಿಗಳನ್ನು ಸೋಲಿಸಿ” ಎಂಬ ಜನರಲ್ ಪ್ರಚಾರದಿಂದ ಹೆಚ್ಚೇನೂ ಉಪಯೋಗವಿಲ್ಲ. ಬದಲಾಗಿ ಮತದಾನದ ಮೇಲೆ ನೇರ ಪರಿಣಾಮ ಬೀರುವಂತಹ ಕೆಲಸಕ್ಕೆ ಇಳಿಯಲೇಬೇಕು. ಅದಕ್ಕಾಗಿ…
ನಮ್ಮ ಶಕ್ತಿ ಸಾಮರ್ಥ್ಯವನ್ನು ಬಿಜೆಪಿಯ ಜೊತೆ ತೀವ್ರ ಸ್ಪರ್ಧೆ ಇರುವ ವಿಧಾನಸಭಾ ಕ್ಷೇತ್ರಗಳ ಮೇಲೆ ವಿನಿಯೋಗಿಸಬೇಕು. ಬಿಜೆಪಿಗೂ ಇತರೆ ಪಕ್ಷಗಳಿಗೂ ತೀವ್ರ ಹಣಾಹಣಿ ಇರುವ, ಗೆಲುವಿನ ಅಂತರ ಕಡಿಮೆ ಇರುವ, 5-10 ಸಾವಿರ ಓಟುಗಳ ಬದಲಾವಣೆಯಾದರೆ ಫಲಿತಾಂಶದಲ್ಲೇ ಬದಲಾವಣೆ ಬರುವ ಕ್ಷೇತ್ರಗಳನ್ನು ಆಯ್ದುಕೊಂಡು ಕೆಲಸ ಮಾಡಬೇಕು. ನಮ್ಮೆಲ್ಲಾ ಸಮಾಜಿಕ ಸಂಪರ್ಕ ಮತ್ತು ಸಾಮರ್ಥ್ಯ ಬಳಸಿ 5-10 ಸಾವಿರ ಮತಗಳನ್ನು ಪ್ರಭಾವಿಸುವ ಮೂಲಕ ಫಲಿತಾಂಶದ ಮೇಲೆ ಪರಿಣಾಮ ಬೀರಬೇಕು. ಇದಕ್ಕಾಗಿ ಈ ಕ್ಷೇತ್ರಗಳಲ್ಲಿ ವಾಲಂಟೀರ್ಸ್ ತಂಡಗಳನ್ನು ಕಟ್ಟಿ ಯೋಜಿತ ಕೆಲಸ ಮಾಡಬೇಕು.
ಆ ಆಯ್ದ ಕ್ಷೇತ್ರಗಳಲ್ಲಿ ತಳಸಮುದಾಯಗಳಲ್ಲಿ ಜಾಗೃತಿ ಮೂಡಿಸುವ ಮೂಲಕ ಮತದಾನದ ಪ್ರಮಾಣವನ್ನು ಹೆಚ್ಚಿಸುವ, ಮತ ವಿಭಜನೆಯನ್ನು ತಗ್ಗಿಸುವ, ಬಿಜೆಪಿಯನ್ನು ಏಕೆ ಸೋಲಿಸಲೇಬೇಕು ಎಂಬುದನ್ನು ವಿವಿಧ ಜನವರ್ಗಗಳಿಗೆ ಮನವರಿಕೆ ಮಾಡಿಸುವ ಕೆಲಸ ಮಾಡಬೇಕು.
ವೈಜ್ಞಾನಿಕ ರೀತಿಯಲ್ಲಿ ಸರ್ವೆ ನಡೆಸಿ ಜನರ ನಾಡಿಮಿಡಿತ ಅರಿಯಬೇಕು, ಜನರು ಗಾಢವಾಗಿ ಫೀಲ್ ಮಾಡುತ್ತಿರುವ ಸಮಸ್ಯೆಗಳನ್ನೇ ಫೋಕಸ್ ಮಾಡುತ್ತಾ ನೆರೇಟಿವ್ ರೂಪಿಸಬೇಕು. ಇದಕ್ಕಾಗಿ ಸೋಷಿಯಲ್ ಮೀಡಿಯಾದಲ್ಲಿ ವ್ಯಾಪಕ ಕೆಲಸ ಮಾಡಬೇಕು ಮತ್ತು ವೈವಿಧ್ಯಮಯ ಸಾಹಿತ್ಯ ಪ್ರಕಟಿಸಬೇಕು.
ಕೊನೆಯದಾಗಿ ಮತ್ತು ಬಹುಮುಖ್ಯವಾಗಿ ಈ ಎಲ್ಲಾ ಕೆಲಸವನ್ನೂ ಯಾವುದೇ ರಾಜಕೀಯ ಪಕ್ಷ ಅಥವಾ ಅಭ್ಯರ್ಥಿಯಿಂದ ಬಿಡಿಗಾಸು ಹಣವನ್ನೂ ಪಡೆಯದೆ ಮಾಡಬೇಕು. ಇದೊಂದು ಸ್ವತಂತ್ರ ಮತ್ತು ನೀತಿಬದ್ಧ ನಾಗರಿಕ ಅಭಿಯಾನವಾಗಿದ್ದಾಗ ಮಾತ್ರವೇ ಎಲ್ಲರನ್ನೂ ವಿಮರ್ಷಿಸುವ ಮತ್ತು ಜನರ ಬಳಿ ನಿಸ್ವಾರ್ಥ ದನಿಯಲ್ಲಿ ಮಾತನಾಡುವ ನೈತಿಕ ಶಕ್ತಿ ನಮಗಿರುತ್ತದೆ.
(ಮುಂದುವರಿಯುತ್ತದೆ: ಭಾಗ -2 ‘ಎದ್ದೇಳು ಕರ್ನಾಟಕ’ ಮಾಡಿದ ಕೆಲಸ)
