ಜಹಾಂಗೀರ್ಪುರಿ ಹಿಂಸಾಚಾರದ ಕುರಿತು ದೆಹಲಿ ಪೊಲೀಸರು ಗುರುವಾರ ದೆಹಲಿ ನ್ಯಾಯಾಲಯದಲ್ಲಿ ಚಾರ್ಜ್ ಶೀಟ್ ಸಲ್ಲಿಸಿದ್ದಾರೆ. ಕ್ರಿಮಿನಲ್ ಪಿತೂರಿ ಮತ್ತು ಶಸ್ತ್ರಾಸ್ತ್ರ ಕಾಯ್ದೆಯಂತಹ ವಿವಿಧ ಆರೋಪಗಳ ಅಡಿಯಲ್ಲಿ 45 ಜನರ ಮೇಲೆ ಆರೋಪ ಹೊರಿಸಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ.
37 ಆರೋಪಿಗಳ ಪೈಕಿ 20 ವ್ಯಕ್ತಿಗಳನ್ನು ಸಿಸಿಟಿವಿ ಅಥವಾ ವೈರಲ್ ದೃಶ್ಯಗಳಲ್ಲಿ ನೋಡಿ ಬಂಧಿಸಲಾಗಿದೆ ಎಂದು ಪ್ರಾಸಿಕ್ಯೂಷನ್ ಹೇಳಿಕೊಂಡಿದೆ. ಆರೋಪಿಗಳನ್ನು ಗುರುತಿಸಲು ತಂತ್ರಜ್ಞಾನವನ್ನು ಬಳಸಲಾಗಿದೆ ಎಂದು ಅದು ಹೇಳಿದೆ.
ನಾನುಗೌರಿ.ಕಾಂಗೆ ದೇಣಿಗೆ ನೀಡಿ ಬೆಂಬಲಿಸಿ
₹100 ₹200 ₹500 ₹1000 Others
“ಇದುವರೆಗೆ ನಡೆಸಲಾದ ತನಿಖೆಯಿಂದ ಮತ್ತು ದಾಖಲೆಯಲ್ಲಿರುವ ವಸ್ತುಗಳಿಂದ, ಪ್ರಸ್ತುತ ಘಟನೆಯು 2019 ಮತ್ತು 2020 ರ ಸಿಎಎ ಮತ್ತು ಎನ್‌ಆರ್‌ಸಿ ವಿರುದ್ಧ ಶಾಹೀನ್ ಬಾಗ್‌ನಲ್ಲಿ ನಡೆದ ಪ್ರತಿಭಟನೆ ಮತ್ತು ಫೆಬ್ರವರಿ 2020 ರ ಈಶಾನ್ಯ ದೆಹಲಿ ಗಲಭೆಗಳ ಮುಂದುವರಿಕೆಯಾಗಿದೆ ಎಂದು ದೃಢಪಡಿಸಲಾಗಿದೆ. ಇದು ಏಪ್ರಿಲ್ 10, 2022 ರಂದು ದೇಶದ ವಿವಿಧ ಭಾಗಗಳಲ್ಲಿ ರಾಮ ನವಮಿ ಘಟನೆಗಳ ನಂತರ ಉಲ್ಬಣಗೊಂಡಿದೆ” ಎಂದು ತನಿಖಾ ಸಂಸ್ಥೆ ಹೇಳಿಕೊಂಡಿದೆ.
ವಿದ್ಯುನ್ಮಾನ ಮಾಧ್ಯಮದಿಂದ 34 ವೈರಲ್ ವೀಡಿಯೊಗಳು ಮತ್ತು 56 ವೀಡಿಯೊಗಳನ್ನು ಸಂಗ್ರಹಿಸಿ ಪರಿಶೀಲಿಸಲಾಗಿದೆ ಎಂದು ಅದು ಹೇಳಿದೆ. ಇದರಲ್ಲಿ ಕುಸಲ್ ಸಿನಿಮಾ ರಸ್ತೆಯ ಸುತ್ತ ಅಳವಡಿಸಲಾಗಿರುವ 28 ಪಿಡಬ್ಲ್ಯುಡಿ ಕ್ಯಾಮೆರಾಗಳು ಮತ್ತು ಜಹಾಂಗೀರ್‌ಪುರಿಯ ಸಿ-ಬ್ಲಾಕ್ ಸುತ್ತಲೂ ಅಳವಡಿಸಲಾಗಿರುವ 30 ಪಿಡಬ್ಲ್ಯುಡಿ ಕ್ಯಾಮೆರಾಗಳ ಸಿಸಿಟಿವಿ ದೃಶ್ಯಾವಳಿಗಳು ಸೇರಿವೆ ಎಂದು ತನಿಖಾ ಸಂಸ್ಥೆ ತಿಳಿಸಿದೆ.
ಸಂಸ್ಥೆಯು 85 ಪೊಲೀಸರು ಮತ್ತು 47 ಸಾರ್ವಜನಿಕ ವ್ಯಕ್ತಿಗಳು/ವೈದ್ಯರು ಮತ್ತು ಇತರರು ಸೇರಿದಂತೆ 132 ಸಾಕ್ಷಿಗಳನ್ನು ವಿಚಾರಣೆ ನಡೆಸಿತು. ಇಬ್ಬರು ಬಾಲಾಪರಾಧಿಗಳ ವಿರುದ್ಧ ಈಗಾಗಲೇ ಪ್ರಿನ್ಸಿಪಾಲ್ ಜುವೆನೈಲ್ ಜಸ್ಟಿಸ್ ಬೋರ್ಡ್ ಮುಂದೆ ಎಫ್ಐಆರ್ ದಾಖಲಿಸಲಾಗಿದೆ.
2063 ಪುಟದ ಚಾರ್ಜ್ಶೀಟ್ ಬಂಧಿತ 37 ಮತ್ತು ತಲೆಮರೆಸಿಕೊಂಡಿರುವ ಎಂಟು ಮಂದಿ ಆರೋಪಿಗಳನ್ನು ಹೆಸರಿಸಿದೆ. ಅವರ ವಿರುದ್ಧ ಕ್ರಿಮಿನಲ್ ಪಿತೂರಿ, 147 (ಗಲಭೆ), ಸಾರ್ವಜನಿಕ ನೌಕರನನ್ನು ಕೊಲೆ ಮಾಡುವ ಪ್ರಯತ್ನ ಮತ್ತು ಹಲ್ಲೆ ಮಾಡುವುದು ಮತ್ತು ಅವರ ಸಾರ್ವಜನಿಕ ಕಾರ್ಯಗಳನ್ನು ನಿರ್ವಹಿಸುವಲ್ಲಿ ತಡೆಯುವುದು ಮತ್ತು ಶಸ್ತ್ರಾಸ್ತ್ರ ಕಾಯಿದೆ ಅಡಿಯಲ್ಲಿ ಆರೋಪಗಳನ್ನು ಮಾಡಲಾಗಿದೆ.
ಇದನ್ನೂ ಓದಿ: ದೆಹಲಿ ಗಲಭೆ: ಅನುಮತಿಯಿಲ್ಲದ ಮೆರವಣಿಗೆ ತಡೆಯದೆ ಇದ್ದಿದ್ದು ‘ಸಂಪೂರ್ಣ ವಿಫಲತೆ’; ದೆಹಲಿ ಪೊಲೀಸರಿಗೆ ಕೋರ್ಟ್ ಛೀಮಾರಿ
ಒಟ್ಟು ಒಂಬತ್ತು ಬಂದೂಕುಗಳು, ಐದು ಜೀವಂತ ಕಾಟ್ರಿಡ್ಜ್‌ಗಳು, ಎರಡು ಖಾಲಿ ಕಾಟ್ರಿಡ್ಜ್‌ಗಳು, ಒಂಬತ್ತು ಕತ್ತಿಗಳು ಮತ್ತು ಘಟನೆಯ ಸಮಯದಲ್ಲಿ ಧರಿಸಿದ್ದ 11 ಆರೋಪಿಗಳ ಬಟ್ಟೆಗಳು ಮತ್ತು ವೀಡಿಯೊಗಳಲ್ಲಿ ಕಂಡುಬರುವ ಬಟ್ಟೆಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಚಾರ್ಜ್ಶೀಟ್ ಹೇಳಿದೆ. ಆರೋಪಿಗಳಿಂದ 21 ಮೊಬೈಲ್ ಫೋನ್ ಗಳನ್ನು ತನಿಖಾ ಸಂಸ್ಥೆ ವಶಪಡಿಸಿಕೊಂಡಿದೆ.
