ಉತ್ತರ ಪ್ರದೇಶದ ಬುಲಂದ್ಶಹರ್ ಜಿಲ್ಲೆಯಲ್ಲಿ ಹಿಂದೂ ರಕ್ಷಾ ದಳದ ನಾಯಕನೊಬ್ಬ ಮುಸ್ಲಿಂ ಗ್ಯಾಸ್ ಏಜೆನ್ಸಿ ಮಾಲೀಕರನ್ನು “ಬಾಂಗ್ಲಾದೇಶಿ” ಎಂದು ಕರೆದು ಬೆದರಿಕೆ ಹಾಕುತ್ತಿರುವ ವೀಡಿಯೊ ಕಾಣಿಸಿಕೊಂಡ ನಂತರ ಆತನನ್ನು ಬಂಧಿಸಲಾಗಿದೆ.
ಜಿಲ್ಲೆಯ ಖುರ್ಜಾ ನಗರದಲ್ಲಿ ಈ ಘಟನೆ ನಡೆದಿದ್ದು, ನೀತು ಯಾದವ್ ಎಂದು ಗುರುತಿಸಲಾದ ಆರೋಪಿಯು ಎಲ್ಪಿಜಿ ಗ್ಯಾಸ್ ಏಜೆನ್ಸಿ ನಡೆಸುತ್ತಿರುವ ಖಾಲಿದ್ ಮಿಯಾನ್ ಎಂಬುವವರ ಮೇಲೆ ಗುಂಪಿನೊಂದಿಗೆ ದಾಳಿ ಮಾಡಿ ಬೆದರಿಕೆ ಹಾಕಿದ್ದಾನೆ.
ಈ ಸಂಬಂಧ ಸಾಮಾಜಿಕ ಮಾಧ್ಯಮಗಳಲ್ಲಿ ವಿಡಿಯೋಗಳು ವೈರಲ್ ಆಗಿದ್ದು, ವೈರಲ್ ಆಗಿರುವ ವಿಡಿಯೋದಲ್ಲಿ, ಖಾಲಿದ್ ಕೈಕಟ್ಟಿ ನಿಂತಿರುವುದನ್ನು ಕಾಣಬಹುದು, ಆದರೆ ಯಾದವ್ ಅವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿ ಬೆದರಿಕೆ ಹಾಕುತ್ತಿದ್ದಾನೆ.
ಖಾಲಿದ್ ಪ್ರಕಾರ, ಯಾದವ್ ತನ್ನ ಸಹಚರರಲ್ಲಿ ಒಬ್ಬರಿಗೆ ಸರದಿಯಲ್ಲಿ ನಿಲ್ಲದೆ ಗ್ಯಾಸ್ ಸಿಲಿಂಡರ್ ನೀಡಬೇಕೆಂದು ಒತ್ತಾಯಿಸಿದ ನಂತರ ವಾಗ್ವಾದ ಪ್ರಾರಂಭವಾಗಿದೆ.
“ಮೊದಲಿಗೆ ಬುಕಿಂಗ್ ಹೊಂದಿರುವವರಿಗೆ ಮಾತ್ರ ಗ್ಯಾಸ್ ಒದಗಿಸಬೇಕು ಎಂಬ ಸರ್ಕಾರಿ ನಿಯಮಗಳಿವೆ. ನಾನು ನಿಯಮಗಳನ್ನು ಉಲ್ಲೇಖಿಸಿದಾಗ, ಅವನು ನನ್ನನ್ನು ಬಾಂಗ್ಲಾದೇಶಿ ಎಂದು ಕರೆದನು ಮತ್ತು ನಂತರ ಏಜೆನ್ಸಿಗೆ ಬಂದು ನನ್ನನ್ನು ಅವಮಾನಿಸಿದನು” ಎಂದು ಖಾಲಿದ್ ಹೇಳಿದ್ದಾರೆ.
ಈ ವೀಡಿಯೊದಲ್ಲಿ ಯಾದವ್ ಅವರು ಬೆದರಿಕೆ ಹಾಕುತ್ತಿರುವುದನ್ನು ಮತ್ತು ಸಂತ್ರಸ್ತನ ಧಾರ್ಮಿಕ ಗುರುತನ್ನು ಗುರಿಯಾಗಿಸಿಕೊಂಡು ಅವಹೇಳನಕಾರಿ ಭಾಷೆಯನ್ನು ಬಳಸುತ್ತಿರುವುದನ್ನು ಸೆರೆಹಿಡಿಯಲಾಗಿದೆ ಎಂದು ಹೇಳಲಾಗಿದೆ.
ಖಾಲಿದ್ ಭಯದಿಂದಾಗಿ ಔಪಚಾರಿಕ ದೂರು ದಾಖಲಿಸಲು ಸಾಧ್ಯವಾಗದ ಕಾರಣ, ಪೊಲೀಸರು ಆರೋಪಿಗಳ ವಿರುದ್ಧ ಸ್ವಯಂಪ್ರೇರಿತವಾಗಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ ಎಂದು ವರದಿಯಾಗಿದೆ.
ಆರಂಭದಲ್ಲಿ ಸಣ್ಣಪುಟ್ಟ ಸೆಕ್ಷನ್ಗಳನ್ನು ಅನ್ವಯಿಸಲಾಗಿದ್ದರೂ, ನಂತರ ಯಾದವ್ ಅವರನ್ನು ಬಂಧಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಕರಣದ ಕುರಿತು ಹೆಚ್ಚಿನ ತನಿಖೆ ಮುಂದುವರೆದಿದೆ.
