ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಪ್ರಕ್ರಿಯೆಯ ಭಾಗವಾಗಿ ಪ್ರಕಟಗೊಂಡ ಕರಡು ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರು ಇಲ್ಲದ ಕಾರಣ ಆತಂಕಗೊಂಡ ಜಾರ್ಖಂಡ್ನ ರಾಂಚಿ ನಗರದ ಜನರು ಭಾನುವಾರ (ಆ.9) ಮತಗಟ್ಟೆಗಳಿಗೆ ಧಾವಿಸಿದರು. ಇದರಿಂದ ಗೊಂದಲದ ವಾತಾವರಣ ಸೃಷ್ಟಿಯಾಯಿತು ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
ಹೆಸರು ಡಿಲೀಟ್, ತಿದ್ದುಪಡಿ ಮಾಡಲು ಅಥವಾ ಹೊಸದಾಗಿ ಸೇರಿಸಲು ಜನ ಮುಗಿಬಿದ್ದಿದ್ದರಿಂದ ಗೊಂದಲ ಉಂಟಾಯಿತು. ಮತದಾರರ ಪಟ್ಟಿಯಿಂದ ಹೆಸರು ತೆಗೆದುಹಾಕುವುದು, ಹೊಸ ಹೆಸರು ಸೇರಿಸುವುದು ಮತ್ತು ಬೇರೆ ಬೇರೆ ಕಡೆ ಇದ್ದ ಒಂದೇ ಕುಟುಂಬದ ಸದಸ್ಯರ ಹೆಸರುಗಳನ್ನು ಒಂದೇ ಮತಗಟ್ಟೆಗೆ ತರುವಲ್ಲಿಯೇ ಹೆಚ್ಚು ಸಮಸ್ಯೆಗಳಾಯಿತು ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಆದರೆ, ನಗರದ ಲಾಲ್ಪುರದ ಮತಗಟ್ಟೆಯೊಂದರಲ್ಲಿ, ವಿಜಯ್ ಕುಮಾರ್ ಎಂಬುವವರು ಕರಡು ಪಟ್ಟಿಯಲ್ಲಿ ತಮ್ಮ ಮತ್ತು ಮಗಳ ಹೆಸರು ನಾಪತ್ತೆಯಾಗಿ, ಮಗನ ಹೆಸರು ಮಾತ್ರ ಇರುವುದನ್ನು ಕಂಡು ಆತಂಕದಿಂದ ಮಗಳೊಂದಿಗೆ ಬಂದಿದ್ದರು ಎಂದು ವರದಿ ಹೇಳಿದೆ.
“ನಾವೆಲ್ಲರೂ ಎನ್ಯುಮರೇಷನ್ ಫಾರಂಗಳನ್ನು ಸರಿಯಾಗಿಯೇ ತುಂಬಿದ್ದೇವೆ. ನನ್ನ ಮಗ ಮತ್ತು ಮಗಳ ಹೆಸರುಗಳನ್ನು ನನ್ನ ಹೆಸರಿನೊಂದಿಗೆ ಮ್ಯಾಪ್ ಮಾಡಲಾಗಿತ್ತು. ಆದರೆ, ಈಗ ನನ್ನ ಮತ್ತು ಮಗಳ ಹೆಸರನ್ನು ಡಿಲೀಟ್ ಮಾಡಲಾಗಿದೆ” ಎಂದು ವಿಜಯ್ ಕುಮಾರ್ ಬೇಸರ ವ್ಯಕ್ತಪಡಿಸಿದ್ದಾರೆ. ತಂದೆ-ಮಗಳು ಇಬ್ಬರೂ ಅಗತ್ಯ ಫಾರಂ ಅನ್ನು ಮತ್ತೊಮ್ಮೆ ಸಲ್ಲಿಸಲು ಅಲ್ಲಿಗೆ ಬಂದಿದ್ದರು ಎಂದು ವರದಿ ಉಲ್ಲೇಖಿಸಿದೆ.
ಸರ್ಕಾರಿ ನೌಕರರು, ಕಾರ್ಮಿಕರು ಮತ್ತು ಇತರ ವೃತ್ತಿಯ ಜನರೂ ಇದೇ ರೀತಿಯ ಸಮಸ್ಯೆಗಳನ್ನು ಎದುರಿಸಿದ್ದಾರೆ. 2003ರಿಂದಲೂ ಮತದಾರರಾಗಿದ್ದು, ಎನ್ಯುಮರೇಷನ್ ಫಾರಂ ಅನ್ನು ಸರಿಯಾಗಿ ತುಂಬಿದ್ದ 44 ವರ್ಷದ ರಾಜ್ಯ ಸರ್ಕಾರಿ ನೌಕರರೊಬ್ಬರ ಹೆಸರು, ಕೇವಲ ಕಾಗುಣಿತದ (ಸ್ಪೆಲ್ಲಿಂಗ್) ತಪ್ಪು ತಿಳುವಳಿಕೆಯಿಂದಾಗಿ ಮತದಾರರ ಪಟ್ಟಿಯಿಂದ ನಾಪತ್ತೆಯಾಗಿದೆ ಎಂದು ವರದಿ ಹೇಳಿದೆ.
“ನನ್ನ ಹೆಸರು ‘ರಶ್ಮಿ’ (Rashmi).ಆದರೆ ಹಳೆಯ ಪಟ್ಟಿ ಮತ್ತು ಎಸ್ಐಆರ್ ಪ್ರಕ್ರಿಯೆ ಆರಂಭವಾಗುವ ಮೊದಲು ಇದ್ದ 2026ರ ಪಟ್ಟಿಯಲ್ಲಿ ‘ರಶಿಮ್’ (Rashim) ಎಂದು ತೋರಿಸುತ್ತಿತ್ತು. ಇದರಿಂದಾಗಿ ಕರಡು ಪಟ್ಟಿಯಲ್ಲಿ ನನ್ನ ಹೆಸರನ್ನು ಡಿಲೀಟ್ ಮಾಡಲಾಗಿದೆ. ಇದು ಯಾವಾಗಲೂ ಅವರದ್ದೇ (ಚುನಾವಣಾ ಆಯೋಗದ) ತಪ್ಪು” ಎಂದು ಮತ್ತೊಬ್ಬರು ಹೇಳಿದ್ದಾರೆ. ಅವರು ಈಗ ಫಾರಂ 6 ಅನ್ನು ಸಲ್ಲಿಸಲು ಸಿದ್ಧತೆ ನಡೆಸುತ್ತಿದ್ದಾರೆ.
ನಗರದ ಥರ್ಪಖ್ನಾದ ಕಾಳಿ ಚರಣ್ ಲೇನ್ ನಿವಾಸಿಯಾದ 45 ವರ್ಷದ ಅನಿಲ್ ಕುಮಾರ್ ವರ್ಮಾ ಅವರು ತಮ್ಮ ಕುಟುಂಬ ಅಲ್ಲಿ ‘ಕನಿಷ್ಠ 110 ವರ್ಷಗಳಿಂದ’ ವಾಸಿಸುತ್ತಿದೆ ಮತ್ತು 2003ರ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರಿತ್ತು ಎಂದು ಹೇಳಿದ್ದಾರೆ. “ನನ್ನ ಸಹೋದರ, ತಾಯಿ, ಅತ್ತಿಗೆ ಸೇರಿದಂತೆ ಕುಟುಂಬದ ಎಲ್ಲರ ಹೆಸರುಗಳೂ ಪಟ್ಟಿಯಲ್ಲಿವೆ, ಆದರೆ ನನ್ನ ಹೆಸರನ್ನು ಮಾತ್ರ ಡಿಲೀಟ್ ಮಾಡಲಾಗಿದೆ. ನಾನು ಬಹಳ ದಿನಗಳಿಂದ ವೋಟ್ ಮಾಡುತ್ತಿದ್ದೇನೆ” ಎಂದು ಅವರು ತಿಳಿಸಿದ್ದಾರೆ. ಅಲ್ಲದೆ, ಸಮೀಕ್ಷೆಯ ಅವಧಿಯಲ್ಲಿ ತಮಗೆ ಎನ್ಯುಮರೇಷನ್ ಫಾರಂ ಸಿಕ್ಕಿರಲಿಲ್ಲ ಎಂದು ಹೇಳಿದ ಅವರು, ಈಗ ಫಾರಂ 6 ಅನ್ನು ತುಂಬುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.
ಅಂಜಲಿ ಡೇ ಎಂಬವರು ತಮ್ಮ ಅತ್ತೆಯ ಹೆಸರು ಮತದಾರರ ಪಟ್ಟಿಯಲ್ಲಿ ಸೇರಿದೆಯೇ ಎಂದು ಪರಿಶೀಲಿಸಲು ಮತಗಟ್ಟೆಗೆ ಭೇಟಿ ನೀಡಿದ್ದರು, ಏಕೆಂದರೆ ಅವರಿಗೆ ಸ್ವತಃ ಆ ಹೆಸರನ್ನು ಹುಡುಕಲು ಸಾಧ್ಯವಾಗಿಲ್ಲ.
ನಗರದ ಆನಂದ್ಪುರದ ಮತದಾರರಾದ ದುಲೂರ್ ಎಕ್ಕಾ ಅವರು ಕೋಕರ್ನ ಶಾಲೆಯೊಂದಕ್ಕೆ ಭೇಟಿ ನೀಡಿ, ತಮ್ಮ ಕುಟುಂಬದ ಮೂವರು ಸದಸ್ಯರ ಹೆಸರುಗಳು ಬೇರೆ ಬೇರೆ ಮತಗಟ್ಟೆಗಳಲ್ಲಿ ಪಟ್ಟಿಯಾಗಿವೆ ಎಂದು ಹೇಳಿದ್ದಾರೆ. “ನಮ್ಮಲ್ಲಿ ಮೂವರ ಹೆಸರುಗಳು ವಿಭಿನ್ನ ಮತಗಟ್ಟೆಗಳಲ್ಲಿವೆ. ಈಗ ನಾವು ಅದನ್ನು ಸರಿಪಡಿಸಿಕೊಳ್ಳಬೇಕಾಗಿದೆ” ಎಂದು ಅವರು ತಿಳಿಸಿದ್ದಾರೆ.
ಮುಖ್ಯ ಚುನಾವಣಾ ಅಧಿಕಾರಿ (ಸಿಇಒ) ಕೆ. ರವಿ ಕುಮಾರ್ ಅವರು, ಒಂದು ಮತದಾನದ ಪ್ರದೇಶವು ಒಬ್ಬ ಬಿಎಲ್ಒ (ಬಿಎಲ್ಒ) ಅಡಿಯಲ್ಲಿ ಬರುವ ನಿರ್ದಿಷ್ಟ ಭೌಗೋಳಿಕ ಪ್ರದೇಶವಾಗಿದ್ದು, ಅಲ್ಲಿನ ಮತದಾರರನ್ನು ನೋಂದಾಯಿಸಲು ಅವರೇ ಜವಾಬ್ದಾರರಾಗಿರುತ್ತಾರೆ ಎಂದು ತಿಳಿಸಿದ್ದಾರೆ. ಕರಡು ಪಟ್ಟಿಯಲ್ಲಿ ಹೆಸರು ಬಿಟ್ಟುಹೋಗಿರುವ ಮತದಾರರು ಫಾರಂ 6 ಅನ್ನು ಸಲ್ಲಿಸಬೇಕು, ಮತ್ತು ಬೇರೆ ಮತಗಟ್ಟೆಯಲ್ಲಿ ಹೆಸರಿರುವವರು ಅಥವಾ ಕುಟುಂಬದ ಹೆಸರುಗಳನ್ನು ಒಂದೇ ಕಡೆಗೆ ತರಲು ಬಯಸುವವರು ಈಗ ನಡೆಯುತ್ತಿರುವ ಎಸ್ಐಆರ್ ಹಕ್ಕುಗಳು ಮತ್ತು ಆಕ್ಷೇಪಣೆಗಳ ಹಂತದಲ್ಲಿ ಫಾರಂ 8 ಅನ್ನು ಸಲ್ಲಿಸಬೇಕು ಎಂದು ಹೇಳಿದ್ದಾರೆ.
ಬಾಲಿಕಾ ಶಿಕ್ಷಣ ಭವನದ ಬಿಎಲ್ಒ ಸುಭಾಸ್ ಚಂದ್ರ ಗೋರಾಯ್ ಅವರು, ವರ್ಗಾವಣೆಗಳನ್ನು ಫಾರಂ 8 ರ ಮೂಲಕ ಮತ್ತು ಹೊಸ ಮತದಾರರನ್ನು ಫಾರಂ 6 ರ ಮೂಲಕ ನಿರ್ವಹಿಸುತ್ತಿರುವುದರಿಂದ ಪ್ರಕ್ರಿಯೆಯು ಸುಗಮವಾಗಿ ಸಾಗುತ್ತಿದೆ ಎಂದು ತಿಳಿಸಿದ್ದಾರೆ. ಭಾನುವಾರ ವಿಶ್ವ ಬುಡಕಟ್ಟು ದಿನವಾಗಿದ್ದರೂ ಹೆಚ್ಚಿನ ಸಂಖ್ಯೆಯಲ್ಲಿದ್ದ ಮಹಿಳಾ ಬಿಎಲ್ಒಗಳು ಸಾಂಪ್ರದಾಯಿಕ ಸೀರೆಗಳನ್ನು ಉಟ್ಟು ಕರ್ತವ್ಯದಲ್ಲಿ ತೊಡಗಿದ್ದರು ಮತ್ತು ನಂತರ ಹಬ್ಬದ ಸಂಭ್ರಮಾಚರಣೆಯಲ್ಲಿ ಭಾಗಿಯಾದರು ಎಂದು ವರದಿ ಉಲ್ಲೇಖಿಸಿದೆ.
ಮತದಾರರು ತಮ್ಮ ಮತ ಚಲಾಯಿಸಲು 2 ಕಿಲೋಮೀಟರ್ಗಿಂತ ಹೆಚ್ಚು ದೂರ ಪ್ರಯಾಣಿಸುವುದನ್ನು ತಪ್ಪಿಸಲು, ಒಂದು ಮತದಾನದ ಪ್ರದೇಶವು 1,200 ಕ್ಕಿಂತ ಹೆಚ್ಚು ಮತದಾರರನ್ನು ಹೊಂದಿರಬಾರದು ಮತ್ತು ಮತಗಟ್ಟೆಗಳು ಆಯಾ ಮತದಾನದ ಪ್ರದೇಶದ 2 ಕಿಲೋಮೀಟರ್ ವ್ಯಾಪ್ತಿಯಲ್ಲಿಯೇ ಇರಬೇಕು ಎಂದು ಸಿಇಒ ರವಿ ಕುಮಾರ್ ಅವರು ತಿಳಿಸಿದ್ದಾರೆ.
ಕರ್ನಾಟಕದ ಬಗ್ಗೆ ಆತಂಕ
ಟೈಮ್ಸ್ ಆಫ್ ಇಂಡಿಯಾದಲ್ಲಿ ಪ್ರಕಟಗೊಂಡ ಮೇಲಿನ ವರದಿ ಕರ್ನಾಟಕದ ಎಸ್ಐಆರ್ ಕುರಿತು ಜನರಲ್ಲಿ ಆತಂಕ ಸೃಷ್ಟಿಸುವಂತಿದೆ.
ರಾಜ್ಯದ ಮುಖ್ಯ ಚುನಾವಣಾ ಆಯುಕ್ತ ಅನ್ಬುಕುಮಾರ್ ಅವರು ಎಲ್ಲವೂ ಸುಗಮವಾಗಿ ನಡೆಯುತ್ತಿದೆ ಎಂದು ಪದೇ ಪದೇ ಹೇಳುತ್ತಿದ್ದಾರೆ. ಆದರೆ, ಗ್ರೌಂಡ್ ರಿಯಾಲಿಟಿ ಬೇರೆಯೇ ಇದೆ. ಹಲವು ಜನಪರ ಮಾಧ್ಯಮಗಳ ವರದಿಗಳು ಮತ್ತು ಜನ ಸಂಘಟನೆಗಳು ಈ ಬಗ್ಗೆ ದಾಖಲೆಗಳನ್ನು ಮುಂದಿಟ್ಟು ಮಾಹಿತಿಗಳನ್ನು ಹಂಚಿಕೊಂಡಿವೆ.
ಕರ್ನಾಟಕದ ಅಂಕಿ ಅಂಶಗಳು ಇಡೀ ದೇಶದಲ್ಲೇ ಅತೀ ಹೆಚ್ಚು ಜನರು ತಮ್ಮ ಮತದಾನದ ಹಕ್ಕು ಕಳೆದುಕೊಳ್ಳುವ ಸೂಚನೆಗಳನ್ನು ನೀಡುತ್ತಿವೆ. ಜನಪರ ಸಂಘಟನೆಗಳು ಈ ಬಗ್ಗೆ ಈಗಾಗಲೇ ಕಳವಳ ವ್ಯಕ್ತಪಡಿಸಿದ್ದು, ಹೋರಾಟದ ಎಚ್ಚರಿಕೆಯನ್ನು ನೀಡಿವೆ.
ರಾಜ್ಯದಲ್ಲಿ ಮೃತಪಟ್ಟವರು, ಶಾಶ್ವತವಾಗಿ ಸ್ಥಳಾಂತರಗೊಂಡವರು, ಡಬಲ್ ಎಂಟ್ರಿ ಮತ್ತು ಇತರೆ ಕಾರಣಗಳಿಗೆ (ASDDO)ಕಾರಣಗಳಿಗೆ ಈಗಾಗಲೇ ಒಂದು ಕೋಟಿಗೂ ಅಧಿಕ ಜನರನ್ನು ಮತಪಟ್ಟಿಯಿಂದ ಹೊರಗಿಡಲಾಗಿದೆ. ಲಾಜಿಕಲ್ ಡಿಸ್ಕ್ರಿಪೆನ್ಸಿಯ (ತಾರ್ಕಿಕ ವೈರುದ್ಯ) ಕಾರಣಕ್ಕೆ ಇನ್ನೆಷ್ಟು ಜನರು ಮತ ಹಕ್ಕು ಕಳೆದುಕೊಳ್ಳಲಿದ್ದಾರೆ ಎಂಬ ಬಗ್ಗೆ ಸ್ಪಷ್ಟತೆ ಸಿಕ್ಕಿಲ್ಲ. ಕರಡು ಪಟ್ಟಿ ಪ್ರಕಟಗೊಂಡ ಮೇಲೆ ಗೊತ್ತಾಗಬೇಕಿದೆ.
ರಾಂಚಿ ನಗರದ ಮೇಲಿನ ವರದಿಯೂ ASDDO ಮತ್ತು ಲಾಜಿಕಲ್ ಡಿಸ್ಕ್ರಿಪೆನ್ಸಿ ಈ ಎರಡೂ ಕಾರಣಗಳಲ್ಲದೆ, ಎಸ್ಐಆರ್ ಪ್ರಕ್ರಿಯೆ ಇತರೆ ಅವ್ಯವಸ್ಥೆಯ ಕಾರಣಕ್ಕೆ ಜನರ ಮತಪಟ್ಟಿಯಿಂದ ಹೊರಬಿದ್ದಿರುವುದನ್ನು ಸೂಚಿಸುತ್ತದೆ. ಇದು ಕರ್ನಾಟಕದ ಮಟ್ಟಿಗೆ ದೊಡ್ಡ ಆತಂಕದ ವಿಷಯವಾಗಿದೆ.
