ಗುಜರಾತ್‌ನ ರಾಜ್‌ಕೋಟ್‌ನ ನಾನಾ ಮಾವಾ ಪ್ರದೇಶದಲ್ಲಿರುವ ಜಗನ್ನಾಥ ದೇವಸ್ಥಾನದಿಂದ ಮಂಗಳವಾರ ಬುಲ್ಡೋಜರ್ ನೇತೃತ್ವದಲ್ಲಿ ರಥಯಾತ್ರೆ ನಡೆಸಲಾಯಿತು. ಬುಲ್ಡೋಜರ್‌ನ ಮುಂಬಾಗಕ್ಕೆ ‘ಸನಾತನಿ ಬುಲ್ಡೋಜರ್’ ಎಂಬ ಬ್ಯಾನರ್ ಹಾಕಲಾಗಿದೆ.
ಈ ಬಗ್ಗೆ ರಾಜ್‌ಕೋಟ್‌ನ ಜಗನ್ನಾಥ ದೇವಸ್ಥಾನದ ಪ್ರಧಾನ ಅರ್ಚಕ ಮನಮೋಹನದಾಸ್ ಅವರು ಮಾತನಾಡಿದ್ದು, ”ಈ ವಿಶೇಷ ರಥಯಾತ್ರೆಯಲ್ಲಿ ಸನಾತನಿ ಬುಲ್ಡೋಜರ್ ಇದೆ. ಸನಾತನ ಧರ್ಮವನ್ನು ರಕ್ಷಿಸುವುದು ಮತ್ತು ಪ್ರಚಾರ ಮಾಡುವುದು ಬುಲ್ಡೋಜರ್‌ನ ಉದ್ದೇಶವಾಗಿದೆ” ಎಂದು ಹೇಳಿರುವುದಾಗಿ ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಮಾಡಿದೆ.
ಮಾಜಿ ಮುಖ್ಯಮಂತ್ರಿ ವಿಜಯ್ ರೂಪಾನಿ ಅವರು ಬೆಳಗ್ಗೆ 9.30ರ ಸುಮಾರಿಗೆ ದೇವಸ್ಥಾನದಲ್ಲಿ ದೇವರ ಪೂಜೆ ನೆರವೇರಿಸಿದ ಬಳಿಕ ಯಾತ್ರೆಗೆ ಚಾಲನೆ ನೀಡಲಾಯಿತು. ಧಾರ್ಮಿಕ ಮೆರವಣಿಗೆಯಲ್ಲಿ, ಭಗವಾನ್ ಜಗನ್ನಾಥ ಅಥವಾ ಭಗವಾನ್ ಕೃಷ್ಣ, ಅವನ ಸಹೋದರ ಬಲರಾಮ ಮತ್ತು ಸಹೋದರಿ ಸುಭದ್ರೆಯ ವಿಗ್ರಹಗಳನ್ನು ರಥಗಳಲ್ಲಿ ಇರಿಸಲಾಗುತ್ತದೆ ಮತ್ತು ನಗರದ ತುಂಬಾ ಮೆರವಣಿಗೆ ಮಾಡಲಾಯಿತು.
ರಾಜ್‌ಕೋಟ್‌ನ ಪ್ರಮುಖ ರಸ್ತೆಗಳ ಮೂಲಕ ಈ ಯಾತ್ರೆಯು ಹಾದು ಹೋಗುತ್ತದೆ. ಒಟ್ಟು 26 ಕಿಮೀ ಸಾಗುವ ಯಾತ್ರೆಯು ಸಂಜೆಯ ನಂತರ ಜಗನ್ನಾಥ ದೇವಸ್ಥಾನದಲ್ಲಿ ಮುಕ್ತಾಯಗೊಳ್ಳಲಿದೆ.
ಜಗನ್ನಾಥ ದೇವಾಲಯದ ಈ ಬುಲ್ಡೋಜರ್ ರಥಯಾತ್ರೆಯನ್ನು ಆಯೋಜಿಸುವ ಪ್ರಮುಖರಲ್ಲಿ ಸ್ಥಳೀಯ ಬಿಜೆಪಿ ಕಾರ್ಯಕರ್ತ ರಾಜು ಜುಂಜಾ ಮಾತನಾಡಿ, ”ಏಕತೆಯ ಸಂದೇಶವನ್ನು ಕಳುಹಿಸಲು ಬುಲ್ಡೋಜರ್ ಅನ್ನು ಅಶ್ವದಳದಲ್ಲಿ ಸೇರಿಸಲಾಗಿದೆ” ಎಂದು ಹೇಳಿದ್ದಾರೆ.
ಹಬ್ಬಗಳನ್ನು ಸಂಭ್ರಮದಿಂದ ಆಚರಿಸಲು ರಾಜ್‌ಕೋಟ್‌ ನಗರವು ಹೆಸರುವಾಸಿಯಾಗಿದ್ದು, ಮುಂಬರುವ ಕೃಷ್ಣ ಜನ್ಮಾಷ್ಟಮಿಯಂದು ಮೆರವಣಿಗೆಗಳು ನಡೆಯಲಿವೆ ಎಂದು ಮಾಜಿ ಸಿಎಂ ವಿಜಯ್ ರೂಪಾನಿ ಹೇಳಿದರು.
