ಕರ್ನಾಟಕದಲ್ಲಿ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಪ್ರಕ್ರಿಯೆ ಬಹಳ ಯಶಸ್ವಿಯಾಗಿ ನಡೆಯುತ್ತಿದೆ, ಮತದಾರರಿಗೆ ಎಲ್ಲಾ ರೀತಿಯ ಸಹಾಯಗಳನ್ನು ಒದಗಿಸಲಾಗುತ್ತಿದೆ ಎಂದು ರಾಜ್ಯ ಮುಖ್ಯ ಚುನಾವಣಾ ಆಯುಕ್ತ ಅನ್ಬುಕುಮಾರ್ ಅವರು ಪದೇ ಪದೇ ಹೇಳಿಕೊಳ್ಳುತ್ತಿದ್ದಾರೆ.
ಆದರೆ, ತಳಮಟ್ಟದಲ್ಲಿ ವಾಸ್ತವ ಸ್ಥಿತಿ ಬೇರೆಯೇ ಇದೆ. ಮುಖ್ಯವಾಗಿ ಆದಿವಾಸಿಗಳು, ದಲಿತರು, ಅಲ್ಪಸಂಖ್ಯಾತರು ಸೇರಿದಂತೆ ತಳ ಸಮುದಾಯಗಳ ಪರಿಸ್ಥಿತಿ ಶೋಚನೀಯವಾಗಿದೆ. ವ್ಯವಸ್ಥೆಯ ಲೋಪದಿಂದ ಈ ಸಮುದಾಯಗಳ ಸಾವಿರಾರು ಜನರು ತಮ್ಮ ಅಮೂಲ್ಯವಾದ ಮತದಾನದ ಹಕ್ಕನ್ನು ಕಳೆದುಕೊಳ್ಳುವುದು ಖಚಿತವಾಗಿದೆ.
ಆಗಸ್ಟ್ 8ರಂದು ಎಸ್ಐಆರ್ ಪ್ರಕ್ರಿಯೆಯ ಮನೆ ಮನೆ ಗಣತಿ ಅಥವಾ ಫಾರಂ ವಿತರಣೆ ಮತ್ತು ವಾಪಸ್ ಪಡೆಯುವ ಅವಧಿ ಕೊನೆಗೊಳ್ಳಲಿದೆ. ಆದರೆ, ಕೊಡಗು ಜಿಲ್ಲೆಯ ಆದಿವಾಸಿ ಹಾಡಿಗಳಿಗೆ ಇನ್ನೂ ಫಾರಂ ತಲುಪಿಯೇ ಇಲ್ಲ ಎಂಬ ಮಾಹಿತಿ ಲಭ್ಯವಾಗಿದೆ.
2026 ಜುಲೈ 29ರಂದು ಆಂದೋಲನ ಪತ್ರಿಕೆ ಪ್ರಕಟಿಸಿದ ವರದಿ ಪ್ರಕಾರ, ಕೊಡಗು ಜಿಲ್ಲೆಯಲ್ಲಿ ಎಸ್ಐಆರ್ ಫಾರಂ ವಿತರಣೆ ಕಾರ್ಯ ಪೂರ್ಣಗೊಂಡಿದೆ ಎಂದು ಜಿಲ್ಲಾಧಿಕಾರಿ ಎಸ್. ಜೆ ಸೋಮಶೇಖರ್ ಹೇಳಿದ್ದಾರೆ. ಆದರೆ, ವಿರಾಜಪೇಟೆ ತಾಲೂಕಿನ ಬಾಳುಗೋಡು ಮತ್ತು ಬಿ.ಶೆಟ್ಟಿಗಿರಿ ಹಾಡಿಗಳಲ್ಲಿ (ಹಳ್ಳಿಗಳಲ್ಲಿ) ಸುಮಾರು 26 ಜನರಿಗೆ ಇನ್ನೂ ಫಾರಂ ತಲುಪಿಲ್ಲ ಎಂದು ನಾಗರಿಕ ಮತ ಕಾವಲು ಸಮಿತಿಯ ಹೇಮಂತ್ ಹೇಳುತ್ತಾರೆ.
ಫಾರಂ ತಲುಪದವರ ಕಥೆ ಒಂದೆಡೆಯಾದರೆ, ಇನ್ನು ಫಾರಂ ತಲುಪಿದವರ ಕಥೆ ಬೇರೆಯದ್ದೇ ಆಗಿದೆ. ಎರಡೂ ಹಳ್ಳಿಗಳ ಮತದಾರರು ಆದಿವಾಸಿಗಳು, ದಲಿತರು ಆಗಿರುವುದರಿಂದ ಅವರಿಗೆ ಫಾರಂ ತುಂಬುವುದು ಗೊತ್ತಿಲ್ಲ. ಇನ್ನೂ ಸ್ಪಷ್ಟವಾಗಿ ಹೇಳುವುದಾದರೆ ಈ ಫಾರಂ ಏಕೆ ಕೊಟ್ಟಿದ್ದಾರೆ ಎಂದೇ ಮಾಹಿತಿಯಿಲ್ಲ. ಕೆಲವೆಡೆ ಫಾರಂ ತುಂಬಲು ಬಿಎಲ್ಒಗಳು ಸಹಾಯ ಮಾಡಿದ್ದು, ಆದರೆ, ತಪ್ಪು ತಪ್ಪಾಗಿ ತುಂಬಿದ್ದಾರೆ ಎಂದು ಹೇಮಂತ್ ವಿವರಿಸಿದ್ದಾರೆ.
ಬಾಳುಗೋಡು ಹಾಡಿಯಲ್ಲಿ 80 ಮಂದಿ ಆದಿವಾಸಿ ಎರವ ಸಮುದಾಯದ ಮತದಾರರಿದ್ದಾರೆ. ಈ ಪೈಕಿ 40 ಮತದಾರರ ಫಾರಂಗಳನ್ನು ನಾವು ಪರಿಶೀಲನೆ ಮಾಡಿದ್ದೇವೆ. ಒಬ್ಬರು ಮಾತ್ರ ಸರಿಯಾಗಿ ಫಾರಂ ತುಂಬಿರುವುದು ಕಂಡು ಬಂದಿದೆ. ಬಿ.ಶೆಟ್ಟಿಗೆರಿಯಲ್ಲಿ 500ಕ್ಕೂ ಹೆಚ್ಚು ಎರವ, ಜೇನು ಕುರುಬ ಮತ್ತು ದಲಿತ ಸಮುದಾಯಗಳ ಮತದಾರರಿದ್ದಾರೆ. ಈ ಪೈಕಿ 100ಕ್ಕೂ ಹೆಚ್ಚು ಮಂದಿಯ ಫಾರಂಗಳನ್ನು ನಾವು ಪರಿಶೀಲಿಸಿದ್ದೇವೆ. ಕೇವಲ 26ರ ಜನರು ಮಾತ್ರ ಸರಿಯಾಗಿ ಫಾರಂ ತುಂಬಿದ್ದಾರೆ ಎಂದು ಹೇಮಂತ್ ತಿಳಿಸಿದ್ದಾರೆ.
ವಿವಿಧ ಇಲಾಖೆಯ ಸಿಬ್ಬಂದಿಯನ್ನು ಬಿಎಲ್ಒಗಳಾಗಿ ನೇಮಿಸಲಾಗಿದೆ. ಅವರಿಗೆ ಸಹಾಯ ಮಾಡಲು ಕೆಲವರನ್ನು ನಿಯೋಜಿಸಲಾಗಿದೆ. ಈ ಪೈಕಿ ಬಹುತೇಕರಿಗೆ ಸರಿಯಾದ ತರಬೇತಿ ನೀಡಿಲ್ಲ. 2002ರ ಮತದಾರರ ಪಟ್ಟಿಯಲ್ಲಿ ಹೆಸರು ಇರುವವರ ವಿವರಗಳನ್ನು 2025ರ ಮಾಹಿತಿ ತುಂಬಬೇಕಾದಲ್ಲಿ ತುಂಬಿದ್ದಾರೆ. ಇನ್ನೂ 2002ರ ಪಟ್ಟಿಯಲ್ಲಿ ಹೆಸರು ಇಲ್ಲದವರ ಫಾರಂನಲ್ಲಿ ಸಂಬಂಧಿಕರ ಬದಲು ಅದೇ ಮತದಾರರ ಮಾಹಿತಿಯನ್ನೇ ತುಂಬಿದ್ದಾರೆ. ಈ ರೀತಿ ಹಲವು ಲೋಪಗಳು ಆಗಿವೆ ಎಂದು ವಿವರಿಸಿದ್ದಾರೆ.
ಇನ್ನೂ ಕೆಲ ಮತದಾರರ ಫಾರಂಗಳಲ್ಲಿ ಮಾಹಿತಿ ಸಿಕ್ಕಿಲ್ಲ ಎಂದು ಬಿಎಲ್ಒಗಳೇ ಬರೆದಿದ್ದಾರೆ. ಈ ಎಲ್ಲಾ ಕಾರಣಗಳಿಗೆ ಈ ಜನರು ತಮ್ಮ ಮತದಾನದ ಹಕ್ಕನ್ನು ಕಳೆದುಕೊಳ್ಳುವುದು ಖಂಡಿತ ಎಂದು ಹೇಮಂತ್ ಕಳವಳ ವ್ಯಕ್ತಪಡಿಸಿದ್ದಾರೆ.
ಆದಿವಾಸಿ ಮತದಾರರ 2002ರ ಪಟ್ಟಿ ಹುಡುಕುವುದು ಸವಾಲಾಗಿದೆ. ಹಾಡಿ ಜನರ ಸಹಾಯಕ್ಕೆ ಯಾವುದೇ ಪಕ್ಷಗಳ ಬಿಎಲ್ಎಗಳು ಬರುತಿಲ್ಲ. ಬಿಎಲ್ಒಗಳಿಗೆ ಸರಿಯಾಗಿ ತರಬೇತಿ ಇಲ್ಲ ಎಂದು ಹೇಮಂತ್ ಸಮಸ್ಯೆ ವಿವರಿಸಿದ್ದಾರೆ.
ದಾಖಲೆಗಳು ಇಲ್ಲ, ಪಿಆರ್ಸಿ, ಜಾತಿ ಪ್ರಮಾಣ ಪತ್ರ ಸಿಗುವುದು ಅನುಮಾನ
ಇನ್ನೂ ಫಾರಂ ಸಿಗದ ಮತದಾರರು ತಮ್ಮ ಹಕ್ಕು ಕಳೆದುಕೊಳ್ಳುವ ಆತಂಕದಲ್ಲಿದ್ದಾರೆ. ಫಾರಂ ಸಿಕ್ಕವರ ಪೈಕಿ ಬಹುತೇಕರು ಸರಿಯಾಗಿ ತುಂಬದೆ, ವಿವರಗಳು ಮ್ಯಾಚ್ ಆಗದೆ ಕರಡು ಪಟ್ಟಿಯಿಂದ ಹೊರ ಬೀಳುವುದು ಖಚಿತವಾಗಿದೆ. ಇಆರ್ಒ ನೋಟಿಸ್ ಕೊಟ್ಟರೆ ಸಮರ್ಥಿಸಿಕೊಳ್ಳಲು ಈ ಜನಗಳ ಬಳಿ ಯಾವುದೇ ದಾಖಲೆಗಳಿಲ್ಲ. ಶಾಶ್ವತ ನಿವಾಸಿ ಪ್ರಮಾಣ ಪತ್ರ ಪಡೆಯೋಣ ಅಂದರೆ, ಇವರದ್ದು ಸರ್ಕಾರಿ ಜಾಗದಲ್ಲಿ ಹೋರಾಟ ನಿರತ ಹಳ್ಳಿಗಳಾಗಿವೆ. ಜಾತಿ ಪ್ರಮಾಣ ಪತ್ರ ಪಡೆಯಲು ಇವರ ಜಾತಿಗಳು ಸರಿಯಾಗಿ ವಿಂಗಡಣೆಯೇ ಆಗಿಲ್ಲ ಎಂದು ಹೇಮಂತ್ ಹೇಳಿದ್ದಾರೆ.
ನಾನುಗೌರಿ.ಕಾಂ ವಿರಾಜಪೇಟೆ ತಾಲೂಕು ಬಾಳುಗೋಡು ಗ್ರಾಮದ ಹಿರಿಯ ಮತದಾರರೊಬ್ಬರ ಗಣತಿ ನಮೂನೆಯನ್ನು ಪರಿಶೀಲನೆ ನಡೆಸಿದೆ. ಈ ವೇಳೆ ಅವರ ನಮೂನೆಯಲ್ಲಿ ಎರಡೂ ಬದಿಯ ಕಾಲಂಗಳನ್ನು ತುಂಬಿರುವುದು ಕಂಡು ಬಂದಿದೆ. ಈ ರೀತಿಯ ಉದಾಹರಣೆಗಳು ಹಲವಿದೆ ಎಂದು ಹೇಮಂತ್ ಹೇಳುತ್ತಾರೆ.
