“ಸೆಪ್ಟೆಂಬರ್ 11, 2001 ರ ದಾಳಿಯನ್ನು ಯುನೈಟೆಡ್ ಸ್ಟೇಟ್ಸ್ ಎಂದಿಗೂ ಮರೆಯುವುದಿಲ್ಲ. 25 ವರ್ಷಗಳ ನಂತರವೂ ಇರಾನ್ ಮೇಲೆ ದಾಳಿ ಮಾಡುವ ಮೂಲಕ ದೇಶವು ಭಯೋತ್ಪಾದನೆ ವಿರುದ್ಧದ ಯುದ್ಧವನ್ನು ಮುಂದುವರೆಸಿದೆ” ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ಯುದ್ಧದ ನಡೆಯನ್ನು ಸಮರ್ಥಿಸಿಕೊಂಡಿದ್ದಾರೆ.
ನ್ಯೂಯಾರ್ಕ್‌ನಲ್ಲಿ ನಡೆದ 9/11 ಸ್ಮರಣೋತ್ಸವದಲ್ಲಿ ಭಾಗವವಹಿಸುವುದನ್ನು ತಪ್ಪಿಸಿದ ನಂತರ ಶುಕ್ರವಾರ ಪೆಂಟಗನ್‌ನಲ್ಲಿ ಮಾತನಾಡಿದ ಟ್ರಂಪ್, ಡೆಮೋಕ್ರಾಟ್‌ಗಳನ್ನು ಪರೋಕ್ಷವಾಗಿ ಗುರಿಯಾಗಿಸಿ ವಾಗ್ದಾಳಿ ನಡೆಸಿದರು.
“ಇಂದು ನಾವು ಕಾಲು ಶತಕದ ಹಿಂದೆ ಹುತಾತ್ಮರಾದವರ ಹೆಸರಿನಲ್ಲಿ ಮಾಡಿದ ಪವಿತ್ರ ಪ್ರತಿಜ್ಞೆಯನ್ನು ನವೀಕರಿಸುತ್ತಿದ್ದೇವೆ. ನಾವು ಎಂದೆಂದಿಗೂ ಮರೆಯುವುದಿಲ್ಲ. ಅದಕ್ಕಾಗಿಯೇ ನಾವು ಇಂದು ಹೋರಾಡುತ್ತಿದ್ದೇವೆ” ಎಂದು ಟ್ರಂಪ್ ಹೇಳಿದರು.
“ನಮಗೆ ಬೇರೆ ಆಯ್ಕೆಯಿಲ್ಲ. ಗೆಲುವು ಮಾತ್ರ ನಮ್ಮ ಗುರಿಯಾಗಿರಬೇಕು. ನಾವು ಕಠಿಣವಾಗಿ ಹೋರಾಡುತ್ತೇವೆ. ಗೆಲ್ಲಲೆಂದೇ ಹೋರಾಡುತ್ತೇವೆ” ಎಂದು ಅಧ್ಯಕ್ಷರು ಹೇಳಿದರು.
9/11 ರಂದು ಅಪಹರಿಸಲ್ಪಟ್ಟ ವಿಮಾನಗಳಲ್ಲಿ ಒಂದಾದ ಜೆಟ್ ವಾಷಿಂಗ್ಟನ್‌ನ ಪೆಂಟಗನ್ ಮೇಲೆ ಅಪ್ಪಳಿಸಿತ್ತು, ಅದರಲ್ಲಿ ಸಾವನ್ನಪ್ಪಿದ 184 ಜನರನ್ನು ಅವರ ಹೆಸರುಗಳನ್ನು ಓದುವಾಗ ಬಾರಿಸಿದ ಒಂದೇ ಒಂದು ಗಂಟೆಯ ನಿನಾದದೊಂದಿಗೆ ಸ್ಮರಿಸಲಾಯಿತು.
ಹಿಂದಿನ ಅಮೆರಿಕ ಅಧ್ಯಕ್ಷರು, ವಿಶ್ವ ವ್ಯಾಪಾರ ಕೇಂದ್ರದ ಮೇಲಿನ ದಾಳಿಯಲ್ಲಿ ಬಹುಪಾಲು 2,977 ಬಲಿಪಷುಗಳು ಸಾವನ್ನಪ್ಪಿದ ನ್ಯೂಯಾರ್ಕ್ ಸೇರಿದಂತೆ ಹಲವಾರು ಸ್ಥಳಗಳಿಗೆ ಭೇಟಿ ನೀಡುವ ಮೂಲಕ ಪ್ರಮುಖ ಸಂತಾಪ ಸ್ಮರಣೆ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದರು.
ರಿಪಬ್ಲಿಕನ್ ಮುನ್ಸೂಚಕರಾದ ಜಾರ್ಜ್ ಡಬ್ಲ್ಯು ಬುಷ್ ಅವರು ಆರಂಭಿಸಿದ್ದ ಭಯೋತ್ಪಾದನೆ ವಿರುದ್ಧದ ಯುದ್ಧವನ್ನು, ಈಗ ತನ್ನ ಏಳನೇ ತಿಂಗಳನ್ನು ತಲುಪಿರುವ ಯುಎಸ್-ಇಸ್ರೇಲ್‌ನ ಇರಾನ್ ಮೇಲಿನ ಯುದ್ಧಕ್ಕೆ ಟ್ರಂಪ್ ಜೋಡಿಸಿದರು.
“ಇಂದು ನಾವು ‘ಭಯೋತ್ಪಾದನೆ ವಿರುದ್ಧದ ಯುದ್ಧ’ದಲ್ಲಿ ಸೇವೆ ಸಲ್ಲಿಸಿದ ಯುನೈಟೆಡ್ ಸ್ಟೇಟ್ಸ್ ಮಿಲಿಟರಿಯ ಪ್ರತಿಯೊಬ್ಬ ಸದಸ್ಯರಿಗೂ ಗೌರವ ಸಲ್ಲಿಸುತ್ತೇವೆ. ಇದು ಅನಾರೋಗ್ಯಕರ, ಭಯಾನಕ ಭಯೋತ್ಪಾದನೆಯ ವಿರುದ್ಧದ ಯುದ್ಧವಾಗಿದೆ” ಎಂದು ಟ್ರಂಪ್ ಹೇಳಿದರು.
“ವಿಶ್ವದ ನಂಬರ್ ಒನ್ ಭಯೋತ್ಪಾದನೆ ಪ್ರಾಯೋಜಕರಾದ ಇರಾನ್ ಎಂದಿಗೂ ಪರಮಾಣು ಶಸ್ತ್ರಾಸ್ತ್ರವನ್ನು ಹೊಂದದಂತೆ ನೋಡಿಕೊಳ್ಳಲು ಪ್ರಸ್ತುತ ಶ್ರಮಿಸುತ್ತಿರುವ ಸೇನಾ ಸಿಬ್ಬಂದಿಗೆ ನಾವು ವಂದಿಸುತ್ತೇವೆ” ಎಂದರು.
ಪೆಂಟಗನ್ ಸಮಾರಂಭದಲ್ಲಿ ಮಾತನಾಡಿದ ಯುಎಸ್ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಕೂಡ ಇರಾನ್ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು.
“ಕಳೆದ ಆರು ತಿಂಗಳುಗಳಲ್ಲಿ, ನಾವು ವಿಶ್ವದ ಅತ್ಯಂತ ಪ್ರಮುಖ ಭಯೋತ್ಪಾದನಾ ಪ್ರಾಯೋಜಕ ರಾಷ್ಟ್ರವನ್ನು ನಾಶಪಡಿಸಿದ್ದೇವೆ. ನಮ್ಮ ಯೋಧರು ಸುಮಾರು ಅರ್ಧ ಶತಕದಿಂದ ನಮಗೆ ಸಾವನ್ನು ಬಯಸುತ್ತಿರುವ ಇಸ್ಲಾಮಿಕ್ ದೇವಪ್ರಭುತ್ವದ ವಿರುದ್ಧ ಹೋರಾಡಿದ್ದಾರೆ” ಎಂದು ಹೆಗ್ಸೆತ್ ಹೇಳಿದರು.
ಅಮೆರಿಕ ಮತ್ತು ಇರಾನ್ ನಡುವೆ ಗುಂಡಿನ ದಾಳಿಗಳು ನಡೆಯುತ್ತಿದ್ದರೂ, ಇರಾನ್ ಹಾರ್ಮುಜ್ ಜಲಸಂಧಿಯ ಮೇಲಿನ ತನ್ನ ಹಿಡಿತವನ್ನು ದೊಡ್ಡ ಮಟ್ಟದಲ್ಲಿ ಕಾಯ್ದುಕೊಂಡಿರುವುದರಿಂದ ಯುದ್ಧವು ಒಂದು ರೀತಿಯ ಜಡತ್ವಕ್ಕೆ ಜಾರಿದೆ.
