ಕೇಂದ್ರ ಚುನಾವಣಾ ಆಯೋಗವು ಎಸಗಿರುವ ಅಕ್ರಮಗಳ ಪಾಪದ ಕೊಡ ತುಂಬಿದ್ದು, ಆಯೋಗದ ಆಂತರಿಕ ಭಿನ್ನಾಭಿಪ್ರಾಯಗಳು ಜಗಜ್ಜಾಹೀರಾಗಿವೆ ಎಂದು ‘SIR ವಿರೋಧಿ ಜನಪರ ಸಂಘಟನೆಗಳ ಹಾಗೂ ಜಾತ್ಯತೀತ ಪಕ್ಷಗಳ ಒಕ್ಕೂಟ’ ಆಕ್ರೋಶ ವ್ಯಕ್ತಪಡಿಸಿದೆ. ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಜ್ಞಾನೇಶ್ ಕುಮಾರ್ ಅವರನ್ನು ತಕ್ಷಣವೇ ಹುದ್ದೆಯಿಂದ ವಜಾಗೊಳಿಸಬೇಕು ಮತ್ತು ಅಕ್ರಮವಾಗಿ ಜಾರಿಗೆ ತರಲಾಗಿರುವ ‘ಎಸ್ಐಆರ್’ (ವಿಶೇಷ ತೀವ್ರ ಪರಿಷ್ಕರಣೆ) ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ರದ್ದುಗೊಳಿಸಬೇಕು ಎಂದು ಒಕ್ಕೂಟವು ಆಗ್ರಹಿಸಿದೆ.
ಈ ಕುರಿತು ಮಾಧ್ಯಮ ಹೇಳಿಕೆ ಬಿಡುಗಡೆ ಮಾಡಿರುವ ಒಕ್ಕೂಟವು, ಚುನಾವಣಾ ಆಯೋಗವು ಅಕ್ರಮವಾಗಿ ಕಾರ್ಯನಿರ್ವಹಿಸುತ್ತಿರುವ ಸತ್ಯಾಂಶವನ್ನು ಜಗತ್ತಿನ ಮುಂದೆ ನಿರ್ಭೀತಿಯಿಂದ ತಂದ ತನಿಖಾ ಪತ್ರಕರ್ತೆ ಋತಿಕಾ ಚೋಪ್ರಾ (Ritika Chopra) ಹಾಗೂ ‘ದಿ ಇಂಡಿಯನ್ ಎಕ್ಸ್ಪ್ರೆಸ್’ ಪತ್ರಿಕೆಗೆ ತನ್ನ ಧನ್ಯವಾದ ಮತ್ತು ಅಭಿನಂದನೆಗಳನ್ನು ಸಲ್ಲಿಸಿದೆ.
ಏಕವ್ಯಕ್ತಿ ತೀರ್ಮಾನ ಮತ್ತು ಸಾಂವಿಧಾನಿಕ ಅಕ್ರಮ:
ಚುನಾವಣಾ ಆಯೋಗವು ಪ್ರಜಾಪ್ರಭುತ್ವದ ಅತ್ಯಂತ ಮಹತ್ವದ ಸಂಸ್ಥೆಯಾಗಿದ್ದು, ಅದರ ಘನತೆಯನ್ನು ಜ್ಞಾನೇಶ್ ಕುಮಾರ್ ಸಂಪೂರ್ಣವಾಗಿ ಧ್ವಂಸಗೊಳಿಸಿದ್ದಾರೆ ಎಂದು ಒಕ್ಕೂಟ ಆರೋಪಿಸಿದೆ. “ದೇಶದ ಎಲ್ಲಾ ವಿರೋಧ ಪಕ್ಷಗಳು ಮತ್ತು ನಾಗರಿಕ ಸಂಘಟನೆಗಳು ತೀವ್ರ ವಿರೋಧ ವ್ಯಕ್ತಪಡಿಸುತ್ತಿದ್ದರೂ, ಯಾರ ಮಾತಿಗೂ ಬೆಲೆ ನೀಡದೆ ಸರ್ವಾಧಿಕಾರಿ ರೀತಿಯಲ್ಲಿ ‘ಎಸ್ಐಆರ್’ ಎಂಬ ಮತ ಪರಿಷ್ಕರಣಾ ಪ್ರಕ್ರಿಯೆಯನ್ನು ದೇಶದ ಮೇಲೆ ಹೇರಲಾಗಿದೆ. ಇದರಿಂದಾಗಿ ಕೋಟ್ಯಾಂತರ ಅರ್ಹ ಮತದಾರರು, ವಿಶೇಷವಾಗಿ ಶೋಷಿತ ಸಮುದಾಯದ ಜನರು ಮತದಾರರ ಪಟ್ಟಿಯಿಂದ ಹೊರದಬ್ಬಲ್ಪಡುತ್ತಿದ್ದಾರೆ” ಎಂದು ಒಕ್ಕೂಟ ಕಳವಳ ವ್ಯಕ್ತಪಡಿಸಿದೆ.
“ಕಾನೂನಿನ ಪ್ರಕಾರ ಚುನಾವಣಾ ಆಯೋಗದಲ್ಲಿ ಮೂವರೂ ಆಯುಕ್ತರು ಸಮಾನರು ಮತ್ತು ತೀರ್ಮಾನಗಳು ಸರ್ವಸಮ್ಮತಿಯಿಂದ ಆಗಬೇಕು. ಆದರೆ ಆಯೋಗದ ಒಳಗಡೆ ಇಬ್ಬರು ಆಯುಕ್ತರ ಬಹುಸಂಖ್ಯಾತ ಅಭಿಪ್ರಾಯವನ್ನೂ ತಳ್ಳಿಹಾಕಿ, ಏಕವ್ಯಕ್ತಿಯಾಗಿ ಜ್ಞಾನೇಶ್ ಕುಮಾರ್ ಎಲ್ಲಾ ನಿರ್ಧಾರಗಳನ್ನು ತೆಗೆದುಕೊಂಡಿದ್ದಾರೆ. ತಮ್ಮ ಆಯ್ಕೆಯ ಹಿಂದೆ ಮೋದಿ-ಅಮಿತ್ ಶಾ ಇದ್ದಾರೆ ಎಂಬ ಧೈರ್ಯವೇ ಅವರಿಂದ ಈ ದುಸ್ಸಾಹಸವನ್ನು ಮಾಡಿಸಿದೆ. ಇದು ದೇಶದ್ರೋಹದ ಕೆಲಸವಾಗಿದ್ದು, ವಾಸ್ತವದಲ್ಲಿ ಮೋದಿ, ಅಮಿತ್ ಶಾ ಮತ್ತು ಜ್ಞಾನೇಶ್ ಕುಮಾರ್ ಅವರೇ ಆಯೋಗದಂತೆ ಕೆಲಸ ಮಾಡುತ್ತಿದ್ದಾರೆ,” ಎಂದು ಆಡಳಿತ ವ್ಯವಸ್ಥೆಯ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದೆ.
ರಾಜಕೀಯ ಪಕ್ಷಗಳಿಗೆ ಗಟ್ಟಿ ನಿರ್ಧಾರದ ಕರೆ & ಸೆಪ್ಟೆಂಬರ್ 26ಕ್ಕೆ ಪ್ರತಿಭಟನೆ:
ರಾಜಕೀಯ ಪಕ್ಷಗಳು ಕೇವಲ ತೋರಿಕೆಯ ಪ್ರತಿಭಟನೆಗೆ ಸೀಮಿತವಾಗದೆ, “ಮತದಾರರ ಪಟ್ಟಿ ಸಂಪೂರ್ಣವಾಗಿ ಸರಿಯಾಗುವ ತನಕ ಯಾವುದೇ ಚುನಾವಣೆಗಳಲ್ಲಿ ಸ್ಪರ್ಧಿಸುವುದಿಲ್ಲ” ಎಂಬ ಗಟ್ಟಿ ನಿರ್ಧಾರವನ್ನು ತೆಗೆದುಕೊಳ್ಳಬೇಕು ಮತ್ತು ಬೀದಿ ಹೋರಾಟಕ್ಕೆ ಇಳಿಯಬೇಕು ಎಂದು ಒಕ್ಕೂಟವು ಕರೆ ನೀಡಿದೆ.
ತಮ್ಮ ಪ್ರಮುಖ ಆಗ್ರಹಗಳನ್ನು ಮುನ್ನೆಲೆಗೆ ತರಲು ಸೆಪ್ಟೆಂಬರ್ 26 (ಶನಿವಾರ) ಸಂಜೆ 4 ಗಂಟೆಗೆ ಬೆಂಗಳೂರಿನ ಫ್ರೀಡಂ ಪಾರ್ಕ್ನಲ್ಲಿ ಎಡ, ಪ್ರಜಾತಾಂತ್ರಿಕ ಪಕ್ಷಗಳು ಹಾಗೂ ಜನಪರ ಸಂಘಟನೆಗಳ ಜಂಟಿ ಪ್ರತಿಭಟನೆಯನ್ನು ಹಮ್ಮಿಕೊಳ್ಳಲಾಗಿದೆ. ಈ ಕರೆಯನ್ನು ಬೆಂಬಲಿಸಿ ಎಲ್ಲಾ ದೇಶಪ್ರೇಮಿ ನಾಗರಿಕರು ಪ್ರತಿಭಟನೆಯಲ್ಲಿ ಭಾಗವಹಿಸಬೇಕೆಂದು ಕೋರಲಾಗಿದೆ.
ಅಕ್ಟೋಬರ್ 1 ರಿಂದ ರಾಷ್ಟ್ರವ್ಯಾಪಿ ಆಂದೋಲನದ ಎಚ್ಚರಿಕೆ:
ನಡೆದಿರುವ ಆಡಳಿತಾತ್ಮಕ ಲೋಪ ಮತ್ತು ಅಕ್ರಮ ಕೂಸಾದ ‘ಎಸ್ಐಆರ್’ ಯೋಜನೆಯನ್ನು ತಕ್ಷಣವೇ ರದ್ದುಗೊಳಿಸಿ, ಜ್ಞಾನೇಶ್ ಕುಮಾರ್ ಅವರನ್ನು ವಜಾಗೊಳಿಸಬೇಕು. ಒಂದು ವೇಳೆ ಸೆಪ್ಟೆಂಬರ್ 30 ರೊಳಗೆ ಜ್ಞಾನೇಶ್ ಕುಮಾರ್ ರಾಜೀನಾಮೆ ನೀಡದಿದ್ದರೆ ಮತ್ತು ಎಸ್ಐಆರ್ ಪ್ರಕ್ರಿಯೆಯನ್ನು ಸ್ಥಗಿತಗೊಳಿಸದಿದ್ದರೆ, ಅಕ್ಟೋಬರ್ 1 ರಿಂದ ಸಮಾನ ಮನಸ್ಕರ ಜೊತೆಗೂಡಿ ದೇಶಾದ್ಯಂತ ಬೃಹತ್ ಆಂದೋಲನವನ್ನು ರೂಪಿಸುವುದಾಗಿ ಒಕ್ಕೂಟವು ಗಡುವು ನೀಡಿದೆ.
ಈ ಜಂಟಿ ಮಾಧ್ಯಮ ಹೇಳಿಕೆಗೆ ಒಕ್ಕೂಟದ ಪ್ರಮುಖ ನಾಯಕರಾದ ಕೆ. ಮಹಂತೇಶ್, ಸೀತಾರಾಂ ಗುಂಡಪ್ಪ, ತಾಹೀರ್ ಹುಸೇನ್, ಕೆ.ವಿ. ಭಟ್, ಅಬ್ದುಲ್ ಮಜೀದ್, ಚಾಮರಸ ಮಾಲಿ ಪಾಟೀಲ್, ನೂರ್ ಶ್ರೀಧರ್, ಅರುಣ್ ಲೂಯಿಸ್, ಯೂಸೂಫ್ ಕನ್ನಿ, ಕೆ. ಎಸ್. ವಿಮಲ, ಹೆಣ್ಣೂರು ಶ್ರೀನಿವಾಸ್ ಹಾಗೂ ಅಂಬಣ್ಣ ಆರೋಲಿಕರ್ ಬೆಂಬಲ ಸೂಚಿಸಿದ್ದಾರೆ.
