ರೈತರ ಭೂ ದಾಖಲೆಗಳ ಪರಿಶೀಲನೆಗೆ ಮುಂದಾದ ಒಕ್ಕೂಟ ಸರ್ಕಾರ

ರೈತರ ಭೂ ದಾಖಲೆಗಳ ಪರಿಶೀಲನೆಗೆ ಒಕ್ಕೂಟ ಸರ್ಕಾರ ಮುಂದಾಗಿದ್ದು, ಅಕ್ಟೋಬರ್‌ನಿಂದ ಪರಿಶೀಲನೆಗೆ ಚಾಲನೆ ನೀಡಲಾಗುತ್ತಿದೆ.

ಸುದ್ದಿಗಾರರೊಂದಿಗೆ ಮಾತನಾಡಿರುವ ಕೇಂದ್ರ ಆಹಾರ ಮತ್ತು ಸರಬರಾಜು ಕಾರ್ಯದರ್ಶಿ ಸುಧಾಂಶು ಪಾಂಡೆ, “ಕನಿಷ್ಠ ಬೆಂಬಲ ಬೆಲೆಯ ಲಾಭ ರೈತರಿಗೆ ತಲುಪುತ್ತಿದೆಯೋ, ವ್ಯಾಪಾರಿಗಳಿಗೆ ತಲುಪುತ್ತಿದೆಯೋ ಎಂದು ತಿಳಿದು ರೈತರಿಗೆ ಅನುಕೂಲ ಮಾಡಿಕೊಡುವ ನಿಟ್ಟಿನಲ್ಲಿ, ಮುಂದಿನ ತಿಂಗಳು ಭತ್ತ ಖರೀದಿಸುವ ಮೊದಲು ಭೂ ದಾಖಲೆಗಳನ್ನು ಹೋಲಿಸಿ ನೋಡಲು ಸರ್ಕಾರ ಮುಂದಾಗಿದೆ” ಎಂದು  ತಿಳಿಸಿದ್ದಾರೆ.

“ಅಸ್ಸಾಂ ಮತ್ತು ಉತ್ತರಖಾಂಡ್ ರಾಜ್ಯಗಳನ್ನು ಹೊರತುಪಡಿಸಿ ಬಹುತೇಕ ಉಳಿದೆಲ್ಲ ರಾಜ್ಯಗಳಲ್ಲೂ ಪರಿಶೀಲನೆ ನಡೆಯಲಿದೆ. ಭತ್ತ ಖರೀದಿ ರಾಜ್ಯಗಳು, ಒಕ್ಕೂಟ ಸರ್ಕಾರದ ನೋಡಲ್ ಖರೀದಿ ಸಂಸ್ಥೆ ಭಾರತ ಆಹಾರ ನಿಗಮದೊಂದಿಗೆ ಸಮಗ್ರ ಭೂದಾಖಲೆಗಳನ್ನು ಸಂಯೋಜಿಸಲು ಸಿದ್ಧವಾಗಿವೆ. ರೈತರು ಗೇಣಿ ಭೂಮಿಯಲ್ಲಾಗಲಿ, ಸ್ವತಃ ಭೂಮಿಯಲ್ಲಾಗಲಿ ಬೆಳೆದ ಬೆಳೆಯನ್ನು ಸರ್ಕಾರ ಖರೀದಿಸಲಿದೆ” ಎಂದು ಹೇಳಿರುವ ಅವರು, “ಬೆಳೆದ ಬೆಳೆಗೆ ಅನುಗುಣವಾಗಿ ಬೆಲೆ ನೀಡಿ ರೈತರಿಂದಲೇ ಉತ್ಪನ್ನ ಖರೀದಿಸುವುದು ಈ ಪರಿಶೀಲನೆಯ ಉದ್ದೇಶವಾಗಿದೆ” ಎಂದು ಸ್ಪಷ್ಟಪಡಿಸಿದ್ದಾರೆ.