ಅಮೆರಿಕದ ಸುಮಾರು 90 ಜನಪ್ರತಿನಿಧಿಗಳು ಮತ್ತು ರಾಜಕೀಯ ಅಭ್ಯರ್ಥಿಗಳು ರಾಷ್ಟ್ರೀಯ ಸ್ವಯಂಸೇವಕ ಸಂಘಕ್ಕೆ (RSS) ಬೆಂಬಲಿತ ಗುಂಪುಗಳಿಂದ ರಾಜಕೀಯ ದೇಣಿಗೆಗಳನ್ನು ಸ್ವೀಕರಿಸುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದಾರೆ. ಹಿಂದುತ್ವ ಸಂಘಟನೆಯ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ನ್ಯೂಯಾರ್ಕ್‌ನ ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್‌ನಲ್ಲಿ ನಡೆದ ಸಮಾವೇಶವೊಂದರಲ್ಲಿ ಭಾಷಣ ಮಾಡಿದ ಕೆಲವೇ ದಿನಗಳ ನಂತರ ಈ ಪ್ರತಿಜ್ಞೆ ಸುದ್ದಿಯಾಗಿದೆ.
ಮೋಹನ್ ಭಾಗವತ್ ಅವರು ಶನಿವಾರ ಅದೇ ಸ್ಥಳದಲ್ಲಿ “ಜಾಗತಿಕ ಸೌಹಾರ್ದತೆ” ವಿಷಯದ ಕುರಿತು ಭಾಷಣ ಮಾಡಿದ್ದರು. ಅದೇ ಸಮಯದಲ್ಲಿ, ಅಮೆರಿಕದ ರಾಜಕಾರಣಿಗಳ ಒಕ್ಕೂಟವೊಂದು ಆರ್‌ಎಸ್‌ಎಸ್‌ನೊಂದಿಗೆ ಸಂಪರ್ಕ ಹೊಂದಿರುವ ಸಂಸ್ಥೆಗಳು ಮತ್ತು ವ್ಯಕ್ತಿಗಳಿಂದ ಬರುವ ಯಾವುದೇ ಆರ್ಥಿಕ ನೆರವನ್ನು ತಿರಸ್ಕರಿಸುವುದಾಗಿ ಘೋಷಿಸಿದ್ದಾರೆ.
ಡೆಮಾಕ್ರಟಿಕ್ ಮತ್ತು ರಿಪಬ್ಲಿಕನ್ ರಾಜಕೀಯ ವಲಯಗಳ ಕಾಂಗ್ರೆಸ್ ಸದಸ್ಯರು, ರಾಜ್ಯ ಶಾಸಕರು, ಮೇಯರ್‌ಗಳು, ಸ್ಥಳೀಯ ಜನಪ್ರತಿನಿಧಿಗಳು ಮತ್ತು ಅಭ್ಯರ್ಥಿಗಳು ಈ ಆರು ಪುಟಗಳ ಪ್ರತಿಜ್ಞಾಪತ್ರಕ್ಕೆ ಸಹಿ ಹಾಕಿದ್ದಾರೆ. ಜೊತೆಗೆ ಆರ್ಎಸ್ಎಸ್ ಬೆಂಬಲಿತ ಸಂಸ್ಥೆಗಳಿಂದ ಪಡೆದ ದೇಣಿಗೆಗಳನ್ನು ವಾಪಸ್ ನೀಡಲು ಅಥವಾ ಪ್ರಜಾಪ್ರಭುತ್ವದ ಮೌಲ್ಯಗಳನ್ನು ಬೆಂಬಲಿಸುವ ಸಂಸ್ಥೆಗಳಿಗೆ ಅವುಗಳನ್ನು ವರ್ಗಾಯಿಸುವಂತೆ ಗುಂಪು ಸೂಚಿಸುತ್ತದೆ.
ಸಹಿ ಹಾಕಿದ ಪ್ರಮುಖರಲ್ಲಿ ವಾಷಿಂಗ್ಟನ್‌ನ ಯುಎಸ್ ಪ್ರತಿನಿಧಿ ಪ್ರಮಿಳಾ ಜಯಪಾಲ್, ಕ್ಯಾಲಿಫೋರ್ನಿಯಾದ ರೋ ಖನ್ನಾ ಮತ್ತು ಇಲಿನಾಯ್ಸ್‌ನ ರಾಬಿನ್ ಕೆಲ್ಲಿ ಸೇರಿದ್ದಾರೆ. ಮಿಚಿಗನ್‌ನ ಡೆಮಾಕ್ರಟಿಕ್ ಸೆನೆಟ್ ಅಭ್ಯರ್ಥಿ ಅಬ್ದುಲ್ಲಾ ಹಮ್ಮೂದ್ ಮತ್ತು ನ್ಯೂಯಾರ್ಕ್ ರಾಜಕಾರಣಿ ಬ್ರ್ಯಾಡ್ ಲ್ಯಾಂಡರ್ ಕೂಡ ಸಹಿ ಮಾಡಿದ್ದು, ಇವರು ಭಾಗವತ್ ಅವರ ಭೇಟಿಯ ವಿರುದ್ಧ ನಡೆದ ಪ್ರತಿಭಟನೆಗಳಲ್ಲೂ ಭಾಗವಹಿಸಿದ್ದರು.
ಆರ್ಎಸ್ಎಸ್ ಪ್ರಜಾಪ್ರಭುತ್ವದ ಮೇಲೆ ಮಾಡುತ್ತಿರುವ ದಾಳಿಗಳನ್ನು ವಿರೋಧಿಸುವ ತಮ್ಮ ಬದ್ಧತೆಯನ್ನು ಪುನರುಚ್ಚರಿಸುವ ಜೊತೆಗೆ ಈ ಪ್ರತಿಜ್ಞೆಯನ್ನು ಬೆಂಬಲಿಸಲು ಹೆಮ್ಮೆಯಾಗುತ್ತಿದೆ ಎಂದು ರೋ ಖನ್ನಾ ಹೇಳಿದ್ದಾರೆ.
“ಈ ಪ್ರತಿಜ್ಞೆಯ ನೇತೃತ್ವ ವಹಿಸಲು ಮತ್ತು ಆರ್ಎಸ್ಎಸ್ ಹಾಗೂ ಜಾಗತಿಕ ಪ್ರಜಾಪ್ರಭುತ್ವದ ಮೇಲಿನ ಅದರ ದಾಳಿಗಳ ವಿರುದ್ಧ ನಿಲ್ಲುವ ನನ್ನ ಬದ್ಧತೆಯನ್ನು ಪುನರುಚ್ಚರಿಸಲು ನಾನು ಹೆಮ್ಮೆಪಡುತ್ತೇನೆ” ಎಂದು ಖನ್ನಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಆರ್ಎಸ್ಎಸ್ ಬೆಂಬಲಿಗರೊಂದಿಗೆ ಸಂಪರ್ಕ ಹೊಂದಿದ್ದ 6,600 ಡಾಲರ್‌ಗಳ ಇತ್ತೀಚಿನ ದೇಣಿಗೆಯನ್ನು ವಾಪಸ್ ನೀಡಿರುವುದಾಗಿ ಖನ್ನಾ ಘೋಷಿಸಿದರು. ಆರ್ಎಸ್ಎಸ್ ಸಂಯೋಜಿತ ಗುಂಪುಗಳು ಪೊಲಿಟಿಕಲ್ ಆಕ್ಷನ್ ಕಮಿಟಿಗಳನ್ನು (ಪಿಎಸಿ) ರಚಿಸಲು ಅಥವಾ ಅಮೆರಿಕದ ಚುನಾವಣೆಗಳ ಮೇಲೆ ಪ್ರಭಾವ ಬೀರಲು ಮಾಡುವ ಯಾವುದೇ ಪ್ರಯತ್ನವನ್ನು ವಿರೋಧಿಸುವುದಾಗಿ ಅವರು ಹೇಳಿದರು.
ಅಮೆರಿಕದಲ್ಲಿ, ‘ಪಿಎಸಿ’ಗಳ ಸದಸ್ಯರು, ದಾನಿಗಳು ಅಥವಾ ಉದ್ಯೋಗಿಗಳಿಂದ ಹಣವನ್ನು ಸಂಗ್ರಹಿಸಿ ರಾಜಕೀಯ ಪ್ರಚಾರಗಳಿಗೆ ವಿತರಿಸುವ ಖಾಸಗಿ ಸಂಘಟನೆಗಳಾಗಿವೆ.ಅಮೆರಿಕದಲ್ಲಿ ಆರ್ಎಸ್ಎಸ್ ಗುಂಪಿನ ರಾಜಕೀಯ ಪ್ರಭಾವದ ಕುರಿತು ಮರು ತನಿಖೆ ಮತ್ತು ಪರಿಶೀಲನೆ ಆರಂಭವಾದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ. ವರದಿಗಳ ಪ್ರಕಾರ, ‘ದಿ ನೇಷನ್’ 2023 ರಲ್ಲಿ ವರದಿ ಮಾಡಿದ್ದು, ಖನ್ನಾ ಅವರು 12 ವರ್ಷಗಳಲ್ಲಿ ಹಿಂದುತ್ವದ ಬೆಂಬಲಿಗರು ಎಂದು ಬಣ್ಣಿಸಲಾದ ವ್ಯಕ್ತಿಗಳಿಂದ 110,000 ಡಾಲರ್‌ಗಿಂತ ಹೆಚ್ಚಿನ ಹಣವನ್ನು ಪಡೆದಿದ್ದರು. ಆ ಸಮಯದಲ್ಲಿ ಇದಕ್ಕೆ ಪ್ರತಿಕ್ರಿಯಿಸಿದ್ದ ಖನ್ನಾ, ತಮಗೆ ಸಾವಿರಾರು ದಕ್ಷಿಣ ಏಷ್ಯಾದ ದಾನಿಗಳಿದ್ದಾರೆ. ಪ್ರತಿಯೊಬ್ಬ ದಾನಿಯ ಭಾರತೀಯ ರಾಜಕೀಯದ ವಿಚಾರಗಳ ಬಗ್ಗೆ ಪ್ರಶ್ನಿಸುವುದಿಲ್ಲ ಎಂದು ಹೇಳಿದ್ದರು.
ಭಾಗವತ್ ಅವರ ಭೇಟಿಗೆ ಸ್ವಲ್ಪ ಮೊದಲು, ‘ಅಂತರರಾಷ್ಟ್ರೀಯ ಧಾರ್ಮಿಕ ಸ್ವಾತಂತ್ರ್ಯದ ಮೇಲಿನ ಯುಎಸ್ ಕಮಿಷನ್’, ಆರ್ಎಸ್ಎಸ್ ಸದಸ್ಯರ ವಿರುದ್ಧ ನಿರ್ಬಂಧಗಳನ್ನು ಪರಿಗಣಿಸಲು ಮತ್ತು ಹಿರಿಯ ಆರ್ಎಸ್ಎಸ್ ನಾಯಕರು ಅಮೆರಿಕಕ್ಕೆ ಪ್ರವೇಶಿಸುವುದನ್ನು ತಡೆಯಲು ಟ್ರಂಪ್ ಆಡಳಿತವನ್ನು ಆಗ್ರಹಿಸಿತ್ತು. ಈ ಶಿಫಾರಸು ಸಲಹಾತ್ಮಕವಾಗಿದ್ದು, ಯಾವುದೇ ಕಾನೂನು ಬದ್ಧತೆಯನ್ನು ಹೊಂದಿರಲಿಲ್ಲ.
ಈ ಪ್ರತಿಜ್ಞೆಯ ಅಭಿಯಾನವನ್ನು ‘ಸೇಕ್ರೆಡ್ ಆಕ್ಷನ್ಸ್’ ಎಂಬ ಗುಂಪು ಆಯೋಜಿಸಿತ್ತು. ಇದು ಅಮೆರಿಕದಲ್ಲಿರುವ ದಕ್ಷಿಣ ಏಷ್ಯಾದ ಉಗ್ರಗಾಮಿ ಸಂಘಟನೆಗಳನ್ನು ಬಯಲಿಗೆಳೆಯುವ ಕೆಲಸ ಮಾಡುತ್ತದೆ ಎಂದು ಹೇಳಿಕೊಂಡಿದೆ. ಈ ಅಭಿಯಾನವನ್ನು 2023 ರಲ್ಲಿ ಇಲಿನಾಯ್ಸ್‌ನಲ್ಲಿ ‘ಇಂಡಿಯನ್ ಅಮೆರಿಕನ್ ಮುಸ್ಲಿಂ ಕೌನ್ಸಿಲ್’, ‘ಏಷ್ಯನ್ ಅಮೆರಿಕನ್ ಮಿಡ್‌ವೆಸ್ಟ್ ಪ್ರೋಗ್ರೆಸಿವ್ಸ್’, ‘ಇಂಡಿಯಾ ಸಿವಿಲ್ ವಾಚ್ ಇಂಟರ್ನ್ಯಾಷನಲ್’ ಮತ್ತು ‘ಹಿಂದೂಸ್ ಫಾರ್ ಹ್ಯೂಮನ್ ರೈಟ್ಸ್’ ಬೆಂಬಲದೊಂದಿಗೆ ಪ್ರಾರಂಭಿಸಲಾಯಿತು.
‘ಸೇಕ್ರೆಡ್ ಆಕ್ಷನ್ಸ್’ನ ಕಾರ್ಯನಿರ್ವಾಹಕ ನಿರ್ದೇಶಕ ಪುಷ್ಕರ್ ಶರ್ಮಾ, ಕಳೆದ ದಶಕದಲ್ಲಿ ಇಲಿನಾಯ್ಸ್‌ನಲ್ಲಿ ಡೆಮಾಕ್ರಟಿಕ್ ಮತ್ತು ರಿಪಬ್ಲಿಕನ್ ರಾಜಕೀಯ ಪ್ರಚಾರಗಳಿಗಾಗಿ ಆರ್‌ಎಸ್‌ಎಸ್‌ನೊಂದಿಗೆ ಸಂಪರ್ಕ ಹೊಂದಿದ ವ್ಯಕ್ತಿಗಳು ಕನಿಷ್ಠ 2.5 ಮಿಲಿಯನ್ ಡಾಲರ್‌ಗಳನ್ನು ಖರ್ಚು ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ.
ಹೆಚ್ಚಿನ ದಕ್ಷಿಣ ಏಷ್ಯಾದ ಅಮೆರಿಕನ್ನರ ಅಭಿಪ್ರಾಯಗಳನ್ನು ಪ್ರತಿನಿಧಿಸದ “ಪ್ರಜಾಪ್ರಭುತ್ವ ವಿರೋಧಿ ಮತ್ತು ಉಗ್ರಗಾಮಿ ಕಾರ್ಯಸೂಚಿಯನ್ನು” ಮುನ್ನಡೆಸಲು ಈ ವೆಚ್ಚ ಮಾಡಲಾಗಿದೆ ಎಂದು ಅವರು ಪ್ರತಿಪಾದಿಸಿದರು.
ಅಮೆರಿಕದಲ್ಲಿ ರಾಜಕೀಯ ದೇಣಿಗೆಗಳನ್ನು ಹೆಚ್ಚಾಗಿ ವೈಯಕ್ತಿಕ ದಾನಿಗಳು, ಪೊಲಿಟಿಕಲ್ ಆಕ್ಷನ್ ಕಮಿಟಿಗಳು ಮತ್ತು ಸಂಯೋಜಿತ ಸಂಸ್ಥೆಗಳ ಮೂಲಕ ನೀಡಲಾಗುತ್ತದೆ. ಹೀಗಾಗಿ ಕೇವಲ ಪ್ರಚಾರ ನಿಧಿ ದಾಖಲೆಗಳ ಮೂಲಕ ಆರ್ಎಸ್ಎಸ್ ಗುಂಪಿನ ದೇಣಿಗೆಗಳೆಂದು ಗುರುತಿಸುವುದು ಕಷ್ಟಕರವಾಗಿದೆ ಎಂದು ವರದಿ ಹೇಳುತ್ತದೆ.
‘ಹಿಂದೂಸ್ ಫಾರ್ ಹ್ಯೂಮನ್ ರೈಟ್ಸ್ ಆಕ್ಷನ್’ನ ಕಾರ್ಯನಿರ್ವಾಹಕ ನಿರ್ದೇಶಕಿ ರಿಯಾ ಚಕ್ರವರ್ತಿ ಮಾತನಾಡಿ, ಆರ್ಎಸ್ಎಸ್ ಸಂಯೋಜಿತ ಗುಂಪುಗಳು ಯುಎಸ್ ರಾಜಕೀಯದಲ್ಲಿ ಹಿಂದೂ ಅಮೆರಿಕನ್ನರ ಏಕೈಕ ಪ್ರತಿನಿಧಿಗಳು ಎಂದು ದೀರ್ಘಕಾಲದಿಂದ ತಮ್ಮನ್ನು ತಾವು ಬಿಂಬಿಸಿಕೊಳ್ಳುತ್ತಿವೆ ಎಂದರು.
