ವೆಂಗೈವಾಯಲ್‌ನ ದಲಿತ ನಿವಾಸಿಗಳ ಪ್ರತಿಭಟನೆ ಮುಂದುವರೆದಿದೆ; ಡಿಸೆಂಬರ್ 2022 ರ ಘಟನೆಯ ಬಗ್ಗೆ ಸರ್ಕಾರ ಸಿಬಿಐ ತನಿಖೆಗೆ ಆದೇಶಿಸುವವರೆಗೆ ಪ್ರತಿಭಟನೆ ಮುಂದುವರಿಯಲಿದೆ ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.
ಗ್ರಾಮದ ದಲಿತರಿಗೆ ಪೂರೈಸಲಾದ ಓವರ್‌ಹೆಡ್ ನೀರಿನ ಟ್ಯಾಂಕ್‌ನಲ್ಲಿ ಮಲ ಮಿಶ್ರಣವಾಗಿದೆ ಎಂದು ಆರೋಪಿಸಿ ದಲಿತ ಸಮುದಾಯದ ಮೂವರು ‘ವಿಸಿಲ್ ಬ್ಲೋವರ್‌’ಗಳ ಮೇಲೆ ಸಿಬಿ-ಸಿಐಡಿ ವರದಿ ಹೊರಿಸಿದ ನಂತರ ದಲಿತರ ಧರಣಿ ಆರಂಭವಾಯಿತು.
ವೈಯಕ್ತಿಕ ಉದ್ದೇಶದಿಂದ ಮೂವರು ವ್ಯಕ್ತಿಗಳು ಅಪರಾಧ ಮಾಡಿದ್ದಾರೆ ಎಂದು ಮದ್ರಾಸ್ ಹೈಕೋರ್ಟ್‌ಗೆ ಸಿಬಿ-ಸಿಐಡಿ ಸಲ್ಲಿಸಿದ ವರದಿಯು ದಲಿತ ನಿವಾಸಿಗಳನ್ನು ಅಸಮಾಧಾನಕ್ಕೆ ಕಾರಣವಾಗಿದೆ. ಕೂಡಲೇ ಅವರು ಪ್ರತಿಭಟನೆಗೆ ಮುಂದಾದರು.
ಸಿಬಿ-ಸಿಐಡಿ ಪೊಲೀಸರು ಕಳೆದ ಸೋಮವಾರ ನ್ಯಾಯಾಲಯದಲ್ಲಿ ಅಂತಿಮ ತನಿಖಾ ವರದಿಯನ್ನು ಸಲ್ಲಿಸಿದರು. ಅದೇ ಗ್ರಾಮದ ಮೂವರು ಯುವಕರ ಮೇಲೆ ಆರೋಪ ಹೊರಿಸಿದರು.
ಗ್ರಾಮದ ನಿವಾಸಿ ಕೆ. ಕಣ್ಣದಾಸನ್ ಮಾತನಾಡಿ, “ನಾವು ಮಾಡದ ಕೃತ್ಯಕ್ಕೆ ನಮ್ಮನ್ನು ದೂಷಿಸುವ ಮೂಲಕ ಸಿಬಿ-ಸಿಐಡಿ ವರದಿಯು ನಮ್ಮ ಖ್ಯಾತಿಗೆ ಕಳಂಕ ತಂದಿದೆ. ಪ್ರಕರಣವನ್ನು ತ್ವರಿತವಾಗಿ ಮುಗಿಸಲು ನಮ್ಮ ಮೇಲೆ ಸಂಪೂರ್ಣ ಹೊಣೆಯನ್ನು ಹೊರಿಸುವುದು ಅನ್ಯಾಯ ಎಂದು ನಾವು ಭಾವಿಸುತ್ತೇವೆ” ಎಂದರು.
“ಮಾಧ್ಯಮಗಳಲ್ಲಿ ಪ್ರಸಾರವಾಗುವ ಕೆಲವು ಆಡಿಯೊ ತುಣುಕುಗಳನ್ನು ನಾವು ಮಾಡದ ಅಪರಾಧವನ್ನು ಒಪ್ಪಿಕೊಳ್ಳುತ್ತಿದ್ದೇವೆ ಎಂದು ತೋರುವಂತೆ ಮಾಡಲು, ನಮ್ಮನ್ನು ಅಪರಾಧಿಗಳಾಗಿ ಚಿತ್ರಿಸಲು ತಿರುಚಲಾಗಿದೆ. ಇದು ನಾವು ಈಗಾಗಲೇ ಹೊರುವ ಹೊರೆಯನ್ನು ಹೆಚ್ಚಿಸಿದೆ. ತನಿಖೆಯ ಸಮಯದಲ್ಲಿ, ಪೊಲೀಸರು ತಪ್ಪೊಪ್ಪಿಕೊಳ್ಳಲು ಒತ್ತಡ ಹೇರಿದರೂ ಸಹ, ಅವರು ಮಾಡದ ಅಪರಾಧವನ್ನು ಒಪ್ಪಿಕೊಳ್ಳದಂತೆ ನಾವು ಯುವಕರಿಗೆ ನಿರಂತರವಾಗಿ ಸಲಹೆ ನೀಡಿದ್ದೇವೆ. ಈಗಲೂ ಸಹ, ಈ ಅಪರಾಧವನ್ನು ಒಪ್ಪಿಕೊಳ್ಳಲು ಪೊಲೀಸ್ ಬಲವಂತದ ಬಗ್ಗೆ ನಮ್ಮ ಹೇಳಿಕೆಗಳು ಸಾರ್ವಜನಿಕ ವಲಯದಲ್ಲಿ ಲಭ್ಯವಿದೆ” ಎಂದರು.
ಗಣರಾಜ್ಯೋತ್ಸವದ ದಿನವಾದ ಭಾನುವಾರ, ಪ್ರತಿಭಟನಾಕಾರರು ತಮ್ಮ ಪ್ರತಿರೋಧವನ್ನು ಗುರುತಿಸಲು ಕಪ್ಪು ಧ್ವಜಗಳನ್ನು ಪ್ರದರ್ಶಿಸುವ ಮೂಲಕ ತಮ್ಮ ಪ್ರತಿಭಟನೆಯನ್ನು ತೀವ್ರಗೊಳಿಸಿದರು.
ಬೆಳಿಗ್ಗೆ 9 ಗಂಟೆಗೆ ಪ್ರಾರಂಭವಾದ ದಿನದ ಪ್ರತಿಭಟನೆ ಸಂಜೆ ಮುಕ್ತಾಯವಾಯಿತು. ಈ ಮಧ್ಯೆ, ಹೊರಗಿನವರ ಆಗಮನವನ್ನು ತಡೆಗಟ್ಟಲು ವೆಂಗೈವಾಯಲ್‌ಗೆ ಹೋಗುವ ಏಳು ಪ್ರವೇಶ ದ್ವಾರಗಳಲ್ಲಿ ಪೊಲೀಸರು ಭದ್ರತೆಯನ್ನು ಹೆಚ್ಚಿಸಿದ್ದಾರೆ.
ಸಿಬಿ-ಸಿಐಡಿಯ ವರದಿ ಟೀಕಿಸಿದ ಡಿಎಂಕೆ ಮಿತ್ರಪಕ್ಷಗಳು
ಡಿಎಂಕೆಯ ಎರಡು ಪ್ರಮುಖ ಮಿತ್ರಪಕ್ಷಗಳಾದ ಸಿಪಿಎಂ ಮತ್ತು ವಿಸಿಕೆ ಶುಕ್ರವಾರ ವರದಿಯನ್ನು ಟೀಕಿಸಿವೆ. ಪ್ರಕರಣದ ಸಿಬಿಐ ತನಿಖೆಗೆ ಒತ್ತಾಯಿಸುತ್ತಿರುವ ವಿರೋಧ ಪಕ್ಷಗಳೊಂದಿಗೆ ಸೇರಿಕೊಂಡಿವೆ.
ಸಿಪಿಎಂ ರಾಜ್ಯ ಕಾರ್ಯದರ್ಶಿ ಪಿ. ಷಣ್ಮುಗಮ್ ಮಾತನಾಡಿ, “ಚಾರ್ಜ್‌ಶೀಟ್‌ನಲ್ಲಿ ಸಿಬಿ-ಸಿಐಡಿಯ ವಾದವನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ” ಎಂದು ಹೇಳಿದರು. “ಪ್ರಕರಣವನ್ನು ಮುಚ್ಚುವ ಒತ್ತಡದಿಂದ ಪೊಲೀಸರು, ಸಂತ್ರಸ್ತ ಜನರು ಸ್ವತಃ ನೀರಿನಲ್ಲಿ ಮಲ ಬೆರೆಸಿದ್ದಾರೆ ಎಂದು ಹೇಳಿದ್ದಾರೆ. ಇದನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ನಿಜವಾದ ಅಪರಾಧಿಗಳನ್ನು ಕಂಡುಹಿಡಿಯಲು ತಮಿಳುನಾಡು ಸರ್ಕಾರ ಪ್ರಕರಣವನ್ನು ಸಿಬಿಐಗೆ ಹಸ್ತಾಂತರಿಸಬೇಕು” ಎಂದು ಷಣ್ಮುಗಮ್ ಹೇಳಿದರು.
ವಿಸಿಕೆ ಅಧ್ಯಕ್ಷ ತೋಲ್ ತಿರುಮಾವಲವನ್ ಅವರು ಚಾರ್ಜ್‌ಶೀಟ್‌ಗೆ ಆಘಾತ ವ್ಯಕ್ತಪಡಿಸಿದರು. ಇದನ್ನು ಒಪ್ಪಿಕೊಳ್ಳಬಾರದು ಎಂದು ಹೈಕೋರ್ಟ್ ಅನ್ನು ಒತ್ತಾಯಿಸಿದರು. ನ್ಯಾಯಾಲಯವು ಸಿಬಿಐ ತನಿಖೆಗೆ ಆದೇಶಿಸಬೇಕು ಎಂದು ಹೇಳಿದರು.
ಮದ್ರಾಸ್ ಹೈಕೋರ್ಟ್ ತನಿಖೆಯ ವಿಳಂಬದ ಬಗ್ಗೆ ಪೊಲೀಸರಿಗೆ ಛೀಮಾರಿ ಹಾಕಿದ ನಂತರವೂ ಸಿಬಿ-ಸಿಐಡಿ ಅಪರಾಧಿಗಳನ್ನು ಗುರುತಿಸುವಲ್ಲಿ ಆಲಸ್ಯ ಹೊಂದಿದೆ ಎಂದು ತಿರುಮಾವಲವನ್ ಹೇಳಿದರು. ಈಗ, ಹೈಕೋರ್ಟ್ ಪ್ರಕರಣವನ್ನು ಸಿಬಿಐಗೆ ವಹಿಸದಂತೆ ತಡೆಯಲು, ಆರೋಪಪಟ್ಟಿ ಸಲ್ಲಿಸಲಾಗಿದೆ ಎಂದು ಹೇಳಿದ್ದು, ಪುದುಕ್ಕೊಟ್ಟೈ ಕಲೆಕ್ಟರೇಟ್ ಮುಂದೆ ವಿಸಿಕೆ ಪ್ರತಿಭಟನೆ ನಡೆಸುವ ನಿರೀಕ್ಷೆಯಿದೆ.
ಇದನ್ನೂ ಓದಿ; ತಮಿಳುನಾಡು ನೀರಿನ ಟ್ಯಾಂಕ್ ಮಲೀನ ಪ್ರಕರಣ: ಆರೋಪ ಪಟ್ಟಿಯಲ್ಲಿ ಮೂವರು ದಲಿತರ ಹೆಸರು
